ជប៉ុន៖ យោងតាមប្រភពរបស់អាជ្ញាធរជប៉ុនបានបញ្ជាក់ថា តួលេខជនរងគ្រោះបាត់បង់ជីវិត ដោយសារតែគ្រោះទឹកជំនន់ និងការរអិលបាក់ដ៏ធ្ងន់នៅភាគខាងលិចប្រទេស ចាប់តំាងពីសប្តាហ៍មុននោះ បានបន្តកើនឡើងដល់២០០នាក់ហើយ ខណៈ មនុស្ស៣៧នាក់ផ្សេងទៀតកំពុងបាត់ខ្លួននៅឡើយ ។

អេហ្ស៊ីប៖ ប្រព័ន្ធផ្សព្វផ្សាយអេហ្ស៊ីបបានរាយការណ៍ជំហានដំបូងថា យ៉ាងហោចណាស់មានមនុស្ស៥៥នាក់បានទទួលរងរបួសធ្ងន់ និងស្រាល ក្រោយរថភ្លើងមួយខ្សែបានរត់ធ្លាក់ផ្លូវនៅក្នុងថ្ងៃសុក្រ ម្សិលមិញនេះ (ម៉ោងក្នុងតំបន់) ស្ថិតនៅក្បែរ ទីក្រុង Giza ។សូមរំលឹកថា កាលពីថ្ងៃទី២៨ ខែកុម្ភៈកន្លងទៅនេះ ក៏មានហេតុការណ៍រថភ្លើងរត់ធ្លាក់ផ្លូវដ៏អាក្រក់មួយផងដែរ នៅក្នុងខេត្ត Beheira ភាគខាងជើងរដ្ឋធានី Cairo បណ្តាលឲ្យមនុស្ស១២នាក់បាត់បង់ជីវិត។ ដោយឡែកកាលពី ខែសីហា ឆ្នំា២០១៧វិញ ក៏មានករណីរថភ្លើងពីរគ្រឿងបានរត់បុកគ្នាដែរ បានបណ្តាលឲ្យមនុស្ស៤៩នាក់ បានបាត់បង់ជីវិត និងច្រើនជាង១០០នាក់ផ្សេងទៀតរងរបួស ៕

ប៉ាគីស្ថាន៖ ប្រព័ន្ធផ្សព្វផ្សាយប៉ាគីស្ថានបានរាយការណ៍ថា ករណីបំផ្ទុះគ្រាប់បែកអត្តឃាតដ៏អាក្រក់បំផុតប្រចាំឆ្នំានេះ ដែលកើតឡើងនៅក្នុងទីក្រុង ម៉ាស់ស្ទង់ ខេត្ត បាឡូឈីស្តង់ ភាគនិរតីប្រទេសនោះ គិតត្រឹមរសៀលថ្ងៃសៅរ៍ ចុងសប្តាហ៍នេះ បានបន្តកើនឡើងដល់១២៨នាក់ហើយ ខណៈមនុស្សច្រើនជាង១៥០នាក់ផ្សេងទៀតទទួលរងរបួសធ្ងន់ និងស្រាល។

កូរ៉េខាងត្បូង៖ ប្រធានាធិបតីកូរ៉េខាងត្បូងលោក មូន ចែអ៊ីន នៅក្នុងថ្ងៃសុក្រ នេះ បានជំរុញគ្រប់ភាគីពាក់ព័ន្ធទាំងអស់ ចូលរួមជំរុញដល់ដំណើរការរំសាយអាវុធនុយក្លេអ៊ែររបស់កូរ៉េខាងជើងទៅមុខ ហើយលោក មូន ថែមទាំងទទូចទៀតថា មេដឹកនាំកំពូលកូរ៉េខាងជើង លោក គីម ជុងអ៊ុន បាននិយាយហើយថា នឹងបង្វែរប្រទេសរបស់លោកទៅជា “រដ្ឋធម្មតាមួយ” វិញ។

សហរដ្ឋអាម៉េរិក៖ រដ្ឋាភិបាលក្រុងវ៉ាស៊ីនតោន និងព្យុងយ៉ាង បានសម្រេចផ្អាកកិច្ចពិភាក្សាកម្រិតការងាររួមគ្នាមួយរហូតដល់ថ្ងៃអាទិត្យ សប្តាហ៍នេះ ពាក់ព័ន្ធនឹងការធ្វើមាតុភូមិនិវត្តន៍នៃអដិ្ឋធាតុទាហានអាម៉េរិក ដែលបានបាត់បង់ជីវិតនៅសម័យសង្គ្រាមកូរ៉េ កាលពីឆ្នាំ១៩៥០ ដល់ឆ្នាំ១៩៥៣។

សហរដ្ឋអាម៉េរិក៖ រដ្ឋមន្រ្តីការបរទេសអាម៉េរិកលោក ម៉ៃ ប៉ុមប៉េអូ អមដំណើរដោយមន្រ្តីកំពូលៗជាច្រើនរូបទៀត គ្រោងនឹងធ្វើដំណើរទស្សនកិច្ចទៅកាន់ប្រទេសម៉ិកស៊ិក នៅក្នុងថ្ងៃសុក្រ សប្តាហ៍នេះ (ម៉ោងក្នុងតំបន់) ស្ថិតក្នុងគោលបំណងពិភាក្សាស្តីពីបញ្ហាទាក់ទងនឹងទំនាក់ទំនងទ្វេភាគី។ នេះបើតាមការប្រកាសរបស់ក្រសួងការបរទេសអាម៉េរិកកាលពីថ្ងៃព្រហស្បត្តិ៍ សប្តាហ៍នេះ។

អង្គការសហប្រជាជាតិ៖ អគ្គលេខាធិការអង្គការសហប្រជាជាតិលោក អាន់តូនីញ៉ូ ហ្គូដទ័ររ៉េស បានធ្វើការអំពាវនាវយ៉ាងទទួចមួយកាលពីថ្ងៃព្រហស្បត្តិ៍ ម្សិលមិញនេះ ឲ្យបង្កើតគោលនយោបាយថ្មីមួយ ដើម្បីឈានឆ្ពោះទៅលុបបំបាត់ភ្លើងសង្គ្រាមដ៏រុំារ៉ៃនៅក្នុងប្រទេសស៊ីរី ហើយរូបលោកថែមទំាងអះអាងទៀតថា ការប្រើប្រាស់កម្លំាងយោធា មិនមែនជាមធ្យោបាយដ៏ប្រសើរនោះឡើយ។

សហរដ្ឋអាម៉េរិក៖ លិខិតមួយច្បាប់ដែលមេដឹកនំាកំពូលកូរ៉េខាងជើងលោក គីម ជុង អ៊ុន ទើបផ្ញើមកជូនលោក ដូណាល់ ត្រាំ នោះ ត្រូវបានប្រធានាធិបតីអាម៉េរិករូបនេះ បានចេញផ្សាយជាសាធារណៈ ដែលក្នុងលិខិតនេះ បានភ្ជាប់នឹងការសរសើរមិនដាច់ពីមាត់ អំពីភាពរីកចម្រើនដ៏អស្ចារ្យនៅក្នុងកិច្ចសន្ទនាជាមួយទីក្រុងព្យុងយ៉ាង ។  តាមរយៈ បណ្តាញសង្គម ធ្វីតធើ ប្រធានាធិបតីអាម៉េរិកលោក ដូណាល់ ត្រាំ បានបង្ហោះសារមួយ ដោយបញ្ជាក់ថា វាគឺជាលិខិតមួយច្បាប់ដ៏មានន័យពីលោកប្រធាន គីម នៃប្រទេសកូរ៉េខាងជើង ហើយថា ការរីកចម្រើនដ៏អស្ចារ្យកំពុងដំណើរការទៅមុខ។

អារ៉ាប់រួមអេមីរ៉ាត៖ រដ្ឋមន្ត្រីការបរទេសអាម៉េរិកលោក ម៉ៃ ប៉ុមប៉េអូ បានចោទប្រកាន់អ៊ីរ៉ង់ថា បានប្រើប្រាស់ស្ថានទូតរបស់ខ្លួន ដើម្បីរៀបចំផែនការវាយប្រហារភេរវកម្មនៅអឺរ៉ុប ហើយថែមទំាងបានព្រមានអ៊ីរ៉ង់ទៀតថា សកម្មភាពរបស់ខ្លួនជាការបង្កការខាតបង់ និងការខូចខាត បន្ទាប់ពីអ៊ីរ៉ង់គំរាមទប់ស្កាត់ការផ្គត់ផ្គង់ប្រេងមជ្ឈិមបូព៌ា។