ព្រះករុណា ព្រះបាទ សម្តេច ព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា និងសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរនិង សុភមង្គល បាន ព្រះបរមរាជាអនុញ្ញាត ឲ្យលោកអនុប្រធានមន្ទីរពេទ្យគន្ធបុប្ផា ចូលក្រាបបង្គំគាល់ និងទទួលតង្វាយជាព្រះរាជទ្រព្យ សម្រាប់ជួយដល់មន្ទីរពេទ្យគន្ធបុប្ផា នៅថ្ងៃ១០កក្កដាម្សិលមិញ។ ក្នុងឱកាសនោះ ព្រះករុណាព្រះមហាក្សត្រ ទ្រង់សព្វព្រះរាជហឫទ័យប្រោសព្រះរាជទានព្រះរាជទ្រព្យចំនួន៥សែនដុល្លារ និងសម្តេចព្រះមហាក្សត្រី ព្រះវររាជមាតាជាតិខ្មែរ ចំនួន៥សែនដុល្លារ សរុប១លានដុល្លារ ជាព្រះរាជឧបត្ថម្ភជូនដល់មន្ទីរពេទ្យ គន្ធបុប្ផា ដើម្បីបន្តកិច្ចការមនុស្សធម៌ជួយព្យាបាលកុមារកម្ពុជា៕

ភ្នំពេញ៖ កម្ពុជា គឺជាប្រទេសដែលល្បីល្បាញ ផ្នែកសីលធម៌អរិយធម៌ និងវប្បធម៌ ដែលពិភពលោកទទួលស្គាល់ថា កម្ពុជា គឺជាប្រទេសមហានគរ និងមានក្បួនក្បាច់រចនានៅ លើប្រាង្គប្រាសាទរាប់ពាន់។ ជាមួយគ្នានេះដែរ ប្រវត្ដិសាស្រ្ត គឺជាឬសគល់នៃមនុស្សជាតិ ប្រៀបបានសំលៀកបំពាក់ខ្មែរ គឺជាដួងព្រលឹង នៃប្រពៃណីខ្មែរដ៏ផូរផង់។ សម្លៀកបំពាក់ខ្មែរ តាមសម័យកាលចាប់ពីសម័យមហានគរ រហូតមកដល់បច្ចុប្បន្ន នឹងផុសឡើងនៅចំកណ្តាល រាជធានីភ្នំពេញ តាមរយៈការដើរម៉ូតសម្លៀកបំពាក់ខ្មែរ នៅរាត្រីថ្ងៃទី១៥ ខែកក្កដា ឆ្នាំ២០១៨ ចាប់ពីម៉ោង ៤រសៀល ដល់ម៉ោង៧យប់ នៅផ្សារទំនើបសូរិយា សេនធ័រ ភ័នធ៌ ចាប់ពីជាន់ផ្ទាល់ដី រហូតដល់ជាន់ទី៤ នៃផ្សារទេសចរណ៍ដែលជាកន្លែងប្រមូលផ្តុំនូវសំណង ស្ថាបត្យកម្មល្បីៗ របស់ខ្មែរ ជាមួយនឹងគំនិតឆ្នៃប្រឌិត។ សូមអញ្ជើញភ្ញៀវជាតិ និងអន្តរជាតិ ចូលរួមទស្សនា និងស្វែងយល់អំពី អរិយធម៌ និង វប្បធម៌ខ្មែរដ៏ត្រចះត្រចង់ ថែមទាំងជាចំណែកគាំទ្រ និងលើកស្ទួយដួងព្រលឹងជាតិខ្មែរ នៅថ្ងៃទី១៥ ខែកក្កដា ឆ្នាំ២០១៨ ខាងមុខនេះ ទាំងអស់គ្នា។

ភ្នំពេញ ៖ លោកនុត ពុធដារ៉ា អភិបាលខណ្ឌដង្កោបញ្ជាក់ថា ក្នុងពេលឆាប់ៗខាងមុខផ្លូវដីក្នុងខណ្ឌដង្កោនឹងលែងមានទៀតហើយ ដោយប្រែក្លាយទៅជាផ្លូវបេតុងទាំងអស់ បច្ចុប្បន្នយើងឃើញថា នៅក្នុងមូលដ្ឋានខណ្ឌដង្កោទាំងមូល ភាគច្រើនគឺជាផ្លូវបេតុង ដែលអាជ្ញាធរខិតខំស្ថាបនា សម្រាប់បម្រើផលប្រយោជន៍ជូនប្រជាពលរដ្ឋទូទៅ។ ទន្ទឹមនឹងនេះ ពលរដ្ឋរស់នៅក្នុងខណ្ឌដង្កោ ក៏មានជីវភាពល្អប្រសើរផងដែរ ទាំងនេះក៏ដោយសារតែប្រទេសជាតិមានសុខសន្តិភាពពេញបរិបូរណ៍ ក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ។

នៅព្រឹកថ្ងៃទី១១ ខែកក្កដា ឆ្នាំ២០១៨នេះ នៅបញ្ជាការដ្ឋានកងទ័ពជើងគោក មានរៀបចំពិធីបិទវគ្គបំប៉នគ្រូបង្គោលការងារអប់រំចិត្តស្ថិតសាស្ត្រ ក្រោមអធិបតីភាពឯកឧត្តម ឧត្តមសេនីយ៍ឯក ចាប វ៉ាន្នី មេបញ្ជាការរងកងទ័ពជើងគោក ។

ឯកឧត្តមសេនីយ៍ទោ ម៉ៅ ផល្លា នាយរងសេនាធិការ នាយការិយាល័យទី៥ កងទ័ពជើងគោក ព្រឹកថ្ងៃទី១០ ខែកក្កដា ឆ្នាំ២០១៨ បានអញ្ជើញជាអធិបតីក្នុងពិធីប្រជុំបូកសរុបលទ្ធផលការងារយោធាសន្តិសុខប្រចាំឆមាសទី១ ទិសដៅឆមមាសទី២ ឆ្នាំ២០១៨ និងប្រកាសតែងតាំងមុខងារ នាយទាហាន នាយទាហានរង ចំណុះការិយាល័យទី៥កងទ័ពជើងគោក ស្ថិតនៅខណ្ឌ ទួលគោក រាជធានីភ្នំពេញ ។