បារាំង៖ ប្រធានាធិបតីបារាំងលោក អែមម៉ានុយអែល ម៉ាក្រុង បានសម្រេចបង្ខំចិត្តប្រកាសដាក់ប្រទេសក្នុងភាពអាសន្នហើយនៅថ្ងៃចន្ទនេះ ក្នុងគោលបំណងទប់ទល់នឹងបាតុកម្មដ៏ហិង្សារបស់ក្រុមបាតុករអាវកាក់ពណ៌លឿង ដែលកំពុងធ្វើឱ្យសេដ្ឋកិច្ចបារាំងរងគ្រោះយ៉ាងធ្ងន់អស់រយៈពេលជាង៤សប្ដាហ៍នេះ។ លោក អែមម៉ានុយអែល ម៉ាក្រុង បានថ្លែងនៅក្នុងសន្ទរកថាតាមកញ្ចក់ទូរទស្សន៍ថា ជាដំបូង ខ្ញុំសូមប្រកាសពីភាពអាសន្ន ផ្នែកសង្គម និងសេដ្ឋកិច្ចនៅក្នុងប្រទេស ហើយខ្ញុំសូមអំពាវនាវឱ្យមានការរក្សាភាពស្ងប់ស្ងាត់ និងសណ្ដាប់ធ្នាប់នៅក្នុងប្រទេស។ ប្រធានាធិបតីបារាំងរូបនេះ ក៏បានថ្កោលទោសយ៉ាងខ្លាំងផងដែរចំពោះអំពើហិង្សាប្រឆាំងនឹងអាជ្ញាធរ ដែលប្រព្រឹត្តឡើងដោយក្រុមបាតុករអាវកាក់ពណ៌លឿងមួយចំនួន។ សូមជម្រាបជូនផងដែរថា ទិន្នន័យចុងក្រោយរបស់ក្រសួងមហាផ្ទៃបារាំងបានឱ្យដឹងថា មនុស្សច្រើនជាង៤,៥០០នាក់ត្រូវបានចាប់ខ្លួន ហើយក្នុងនោះមាន៤,០៩៩នាក់កំពុងជាប់ឃុំនៅឡើយ ខណៈមនុស្ស០៤នាក់ហើយបានស្លាប់ គិតចាប់តាំងពីបាតុកម្មបានផ្ទុះឡើងកាលពីថ្ងៃទី១៧ ខែវិច្ឆិកាមក៕ម.ន

សហរដ្ឋអាម៉េរិក៖ ប្រធានាធិបតីអាម៉េរិក លោក ដូណាល់ ត្រាំ នឹងជួបជាមួយមេដឹកនាំខាងគណបក្សប្រជាធិបតេយ្យនៅថ្ងៃអង្គារ៍នេះ សម្រាប់កិច្ចខិតខំប្រឹងប្រែងមួយ ដើម្បីសង្គ្រោះដល់កញ្ចប់ថវិកាសម្រាប់សាងសង់ជញ្ជាំងនៅព្រំដែន។ ថវិកានេះ គឺជាផ្នែកមួយនៃកញ្ចប់ថវិការបស់រដ្ឋាភិបាល ដែលត្រូវតែអនុម័តត្រឹមថ្ងៃទី២១ ខែធ្នូ ខាងមុខ ហើយថវិកានេះដែរ គឺជាសកម្មភាពផ្លូវច្បាប់ចុងក្រោយបង្អស់របស់សភាដែលត្រួតត្រាដោយគណបក្សសាធារណរដ្ឋ និងជាច្បាប់ដែលត្រូវតែអនុម័តមួយ ក្នុងគោលបំណងចៀសវាងការបិទរដ្ឋាភិបាលមួយផ្នែក នៅមុនរដូវកាលឈប់សម្រាកមកដល់ក្នុងពេលឆាប់ៗនេះ។ លោក ត្រាំ នឹងជួបជាមួយមេដឹកនាំសំឡេងភាគតិចនៅក្នុងព្រឹទ្ធសភា លោក Chuck Schumer និងមេដឹកនាំសំឡេងភាគតិចនៅក្នុងរដ្ឋសភា លោកស្រី Nancy Pelosi ដើម្បីពិនិត្យមើលថាតើអាចថ្លឹងថ្លែងទៅលើសំណើរបស់លោក ដែលស្នើសុំប្រាក់រហូតដល់៥ពាន់លានដុល្លារសម្រាប់សាងសង់ជញ្ជាំងនៅព្រំប្រទល់នេះ ក្នុងឆ្នាំសារពើពន្ធ២០១៩ដែរឬយ៉ាងណា។ ជំនួបនេះទៀតសោត នឹងក្លាយជាការសាកល្បងដំបូងបង្អស់ទៅលើសមត្ថភាពរបស់លោក ត្រាំ ក្នុងការចរចាទៅលើកិច្ចព្រមព្រៀងលក្ខណៈទ្វេបក្ស ក្រោយពីគណបក្សប្រជាធិបតេយ្យទទួលបានជ័យជម្នះយ៉ាងខ្លាំង នៅក្នុងការបោះឆ្នោតពាក់កណ្តាលអាណត្តិកាលពីខែវិច្ឆិកា កន្លងទៅនេះ៕ម.ន

វេណេស៊ុយអេឡា៖ សារព័ត៌មាន Sputnik របស់រុស្ស៊ី បានចេញផ្សាយនៅថ្ងៃចន្ទនេះថា ប្រធានាធិបតីវេណេស៊ុយអេឡា លោក នីកូឡាស់ ម៉ាឌូរ៉ូ បានថ្លែងអះអាងថា មានភ័ស្ដុតាងបញ្ជាក់បានថា សហរដ្ឋអាម៉េរិកពិតជាកំពុងរៀបចំផែនការផ្ដួលរំលំរដ្ឋាភិបាលស្របច្បាប់របស់លោក។ សូមរំលឹកថា កាលពីខែសីហាកន្លងទៅ ប្រធានាធិបតីវេណេស៊ុយអេឡារូបនេះ ត្រូវបានគេប៉ុនប៉ងធ្វើឃាត នៅពេលចូលរួមក្នុងពិធីព្យុហយាត្រាយោធាមួយក្នុងទីក្រុងការ៉ាកាស់ ហើយលោកបានចោទប្រកាន់ថា សហរដ្ឋអាម៉េរិកជាអ្នកនៅពីក្រោយការវាយប្រហារដោយយន្ដហោះដ្រូនមកលើរូបលោក។ ប៉ុន្តែលោក ម៉ាឌូរ៉ូ មិនបានបង្ហាញភ័ស្ដុតាងជាក់លាក់ណាមួយឡើយ ខណៈក្រុមបក្សប្រឆាំងក្នុងប្រទេសចោទរូបលោកថា បានប្រើប្រាស់ការប៉ុនប៉ងធ្វើឃាតនេះ ជាលេសបង្ក្រាបអ្នកប្រឆាំង និងពង្រឹងអំណាចរបស់ខ្លួន។ ពាក់ព័ន្ធនឹងការអះអាងរបស់ខ្លួនខាងលើនេះ លោក ម៉ាឌួរ៉ួ បានថ្លែងប្រាប់ប្រព័ន្ធផ្សព្វផ្សាយនៅក្នុងស្រុកថា ការព្យាយាមបំផ្លាញប្រជាធិបតេយ្យ និងការដឹកនាំការធ្វើរដ្ឋប្រហារប្រឆាំងនឹងរដ្ឋធម្មនុញ្ញ របបប្រជាធិបតេយ្យនៅក្នុងប្រទេសរបស់យើង គឺត្រូវបានធ្វើក្រោមការសម្របសម្រួលពីសេតវិមាន។ លោកបន្ថែមទៀតថា នឹងធ្វើសន្និសីទសារព័ត៌មានមួយនៅប៉ុន្មានថ្ងៃខាងមុខនេះ ដើម្បីបង្ហាញពីភ័ស្ដុតាងនៃផែនការធ្វើរដ្ឋប្រហាររបស់ទីក្រុងវ៉ាស៊ីនតោននៅវេណេស៊ុយអេឡា៕ម.ន

រុស្ស៊ី៖ មន្ត្រីផ្នែកសារព័ត៌មានរបស់វិមានក្រឹមឡំាងបានថ្លែងប្រាប់អ្នកកាសែតថា ប្រធានាធិបតីរុស្ស៊ីលោក វ៉្លាឌីមៀ ពូទីន និងអធិការបតីអាល្លឺម៉ង់លោកស្រី អាន់ជែលឡា មឺហ្គែល បានធ្វើកិច្ចពិភាក្សាគ្នាតាមទូរសព្ទនៅថ្ងៃច័ន្ទនេះ ពាក់ព័ន្ធនឹងករណីប៉ះទង្គិចគ្នារវាងកងកម្លាំងអ៊ុយក្រែន និងរុស្ស៊ីនៅឯដែនសមុទ្រឃើច នាពេលថ្មីៗនេះ ព្រមទាំងស្ថានភាពជុំវិញសន្ធិសញ្ញាកងកម្លាំងនុយក្លេអ៊ែរកម្រិតមធ្យម INF ក៏ដូចជាការវិវឌ្ឍនៅប្រទេសស៊ីរី។ មេដឹកនាំប្រទេសទាំងពីរបានព្រមព្រៀងគ្នាបន្តធ្វើកិច្ចពិភាក្សាទៅលើស្ថានការណ៍ ដែលបានកើតឡើងរហូតក្លាយជាការប្រើអំពើហិង្សាពីសំណាក់កងកម្លាំងការពារព្រំដែនរុស្ស៊ី ទៅលើក្រុមនាវិកអ៊ុយក្រែន និងរឹបអូសយកនាវារបស់ពួកគេចំនួន៣គ្រឿងកាលពីថ្ងៃទី២៥ ខែវិច្ឆិកាកន្លងទៅនេះ។ បើតាមសេចក្តីថ្លែងការណ៍របស់មន្ត្រីរុស្ស៊ីខាងលើ លោក ពួទីន និងលោកស្រី មឺហ្គែល បានបង្ហាញចំណាប់អារម្មណ៍រួមគ្នាមួយ ក្នុងការទប់ស្កាត់ការកើនឡើងនៃភាពតានតឹងនៅក្នុងតំបន់ដែនសមុទ្រខ្មៅ-អាហ្ស៊ូវ និងក្នុងការដោះស្រាយបញ្ហាដែលបណ្តាលមកពីសកម្មភាពបង្កហេតុដោយអាជ្ញាធរអ៊ុយក្រែន៕ម.ន

អង់គ្លេស៖ ដំណើរចាកចេញពីសហភាពអឺរ៉ុបដ៏ចលាចលរបស់អង់គ្លេស កាន់តែជួបភាពចលាចលនៅថ្ងៃច័ន្ទនេះ ស្របពេលដែលនាយករដ្ឋមន្ត្រីអង់គ្លេសលោកស្រី ធើរ៉េសា ម៉េ សម្រេចចិត្តផ្អាកការបោះឆ្នោតនៅសភា ទៅលើកិច្ចព្រមព្រៀងចាកចេញពីសហភាពអឺរ៉ុបរបស់អង់គ្លេស ឬហៅថា Brexit។ កិច្ចព្រមព្រៀងនេះ ត្រូវបានចំណាយពេលរាប់ខែ ដើម្បីចរចាលើរឿងស្មុគស្មាញជាច្រើនជាមួយនឹងសហភាពអឺរ៉ុបដើម្បីចងក្រងឡើង។ ចំណែកព័ត៌មានពាក់ព័ន្ធនឹងការផ្អាកកិច្ចព្រមព្រៀងនេះវិញ រូបិយបណ្ណផោនរបស់អង់គ្លេសបានធ្លាក់ចុះដល់កម្រិតទាបបំផុត បើធៀបនឹងប្រាក់ដុល្លារអាមេរិកក្នុងរយៈពេល១៨ខែមកនេះ ហើយរូបិយប័ណ្ណនេះក៏ធ្លាក់ចុះដែរ បើធៀបនឹងប្រាក់អឺរ៉ូ។ ថ្លែងទៅកាន់សភា លោកស្រី ម៉េ បានបញ្ជាក់ថា ប្រសិនបើការបោះឆ្នោតនេះបន្តទៅមុខ នោះនឹងមានការគាំទ្រតិចតួចណាស់‍ ដូច្នេះការបោះឆ្នោតនេះ នឹងត្រូវពន្យារពេល‍។ លោកស្រីបានសង្កត់ធ្ងន់ថា កិច្ចព្រមព្រៀងដ៏ទូលំទូលាយនេះគឺល្អបំផុតសម្រាប់អង់គ្លេស ហើយថា លោកស្រីនឹងជួបជាមួយបណ្តាមេដឹកនាំសហភាពអឺរ៉ុប ក្នុងរយៈពេលប៉ុន្មានថ្ងៃខាងមុខនេះ‍។ គួរបញ្ជាក់ថា បន្ទាប់ពីពិភាក្សាដេញដោលនៅក្នុងសភាអស់រយៈពេលបួនថ្ងៃ និងកិច្ចខិតខំប្រឹងប្រែងរបស់លោកស្រី ដើម្បីឲ្យសាធារណជនអង់គ្លេសដែលកាន់តែមិនយល់ស្របលើកិច្ចព្រមព្រៀងនេះមានជំនឿលើនោះ សមាជិកសភានានាគ្រោងនឹងទាត់ចោលកិច្ចព្រមព្រៀងរបស់លោកស្រី ម៉េ នេះ ។ ប្រសិនបើមិនទទួលបានការគាំទ្រលើកិច្ចព្រមព្រៀងនេះទេនោះ លោកស្រី ម៉េ នឹងត្រូវលាលែងពីតំណែង ហើយអាចនឹងប៉ះពាល់ដល់រដ្ឋាភិបាលអភិរក្សនិយមទៀតផង៕ម.ន