បរទេស៖ វិស័យអាកាសចរណ៍ត្រូវបានចាត់ទុកថា ជាវិស័យដែលមានសុវត្ថិភាពជាងគេបំផុតនៅលើពិភពលោក ដោយមានចំនួនគ្រោះថ្នាក់តិចបំផុតក្នុងចំណោមមធ្យោបាយធ្វើដំណើរផ្សេងៗ ប៉ុន្តែនៅពេលដែលមានគ្រោះថ្នាក់ ចំនួនអ្នកនៅរស់មានតិចជាងគ្រោះថ្នាក់ផ្សេងៗ ។ យោងតាមរបាយការណ៍ប្រចាំឆ្នាំ២០១៨ បានបង្ហាញឲ្យឃើញថា ចំនួនអ្នកស្លាប់ ដោយអាកាសចរណ៍ស៊ីវិលដឹកអ្នកដំណើរកើនឡើង៣ភាគរយ ចំណែកកាលពីឆ្នាំ២០១៧ គឺជាឆ្នាំដែលមានសុវត្ថិភាពបំផុតសម្រាប់ក្រុមហ៊ុនអាកាសចរណ៍ ។ ករណីយន្តហោះរបស់ក្រុមហ៊ុនអាកាសចរណ៍ Lion Air ដឹកអ្នកដំណើរ១៨៩នាក់ បានធ្លាក់ចូលក្នុងសមុទ្រ Java កន្លងមក បានក្លាយជាគ្រោះថ្នាក់ទ្រង់ទ្រាយធំបំផុតនៅក្នុងឆ្នាំ២០១៨នេះ ក្នុងវិស័យអាកាសចរណ៍ ។ ករណីគ្រោះថ្នាក់ទ្រង់ទ្រាយធំលើកទី២ កើតឡើងកាលពីខែឧសភា ពេលយន្តហោះដឹកអ្នកដំណើរ១១២នាក់របស់ក្រុមហ៊ុនអាកាសចរណ៍គុយបា ជួបគ្រោះថ្នាក់សម្លាប់អ្នកដំណើរទាំងអស់ ។ប្រសិនបើបូកបញ្ចូនអ្នកដំណើរ១៨៩នាក់ នៅលើយន្តហោះរបស់ក្រុមហ៊ុនអាកាសចរណ៍ Lion Air ជួបគ្រោះថ្នាក់ស្លាប់នោះ សរុបមានមនុស្សស្លាប់ដល់ទៅ៥៥១នាក់ក្នុងគ្រោះថ្នាក់យន្តហោះ១៤លើក ជុំវិញពិភពលោកនាឆ្នាំ២០១៨ ៕

រុស្ស៊ី៖ នៅក្នុងរបាយការណ៍ប្រចំាំឆ្នំាំរបស់ខ្លួន វិទ្យាស្ថានស្រាវជា្រវសន្តិភាពអន្តរជាតិ ស្តុកហូម មានមូលដ្ឋានក្នុងទីក្រុង ស្តុកហូម ប្រទេសស៊ុយអែត បានឱ្យដឹងនៅថ្ងៃច័ន្ទនេះថា រុស្ស៊ីបានក្លាយជាប្រទេសផលិតអាវុធធំជាងគេលំដាប់ទី២ នៅលើពិភពលោក បន្ទាប់ពីសហរដ្ឋអាមេរិក និងឡើងជំនួសតំណែងអង់គ្លេស ដែលបានកាន់តំណែងជាប្រទេសផលិតអាវុធជាប់លេខ២ ចាប់តាំងពីឆ្នាំ២០០២ ។ ការលក់អាវុធរបស់រុស្ស៊ីនៅលើពិភពលោកទាំងមូលមានកំណើន៩.៥ភាគរយ ឬស្មើនឹង៣៩៨.ពាន់លានដុល្លារ ដែលនេះបានធ្វើឱ្យរុស្ស៊ីឡើងមកឈរលេខរៀងទី ២ ជាប្រទេសផលិតអាវុធធំជាងគេលើលោកជំនួសអង់គ្លេស និងបន្ទាប់ពីសហរដ្ឋអាមេរិកដែលឈរលេខ ១ ជាមួយការលក់អាវុធដល់ទៅ៥៧ភាគរយ នៃការលក់អាវុធសរុបនៅទូទាំងពិភពលោក ។ បច្ចុប្បន្នអាវុធរបស់រុស្ស៊ីដែលកំពុងទទួលការបញ្ជាទិញច្រើននៅលើទីផ្សាររួមមាន យន្ដហោះចម្បាំង និងប្រព័ន្ធមីស៊ីលការពារដែនអាកាស S-400 ជាដើម ប៉ុន្តែទន្ទឹមគ្នានោះដែរ ទីក្រុងវ៉ាស៊ីនតោនក៏បានបង្កើតច្បាប់ថ្មីមួយផងដែរ ដោយមានគោលដៅដាក់ទណ្ឌកម្មប្រឆាំងនឹងបណ្ដាប្រទេសទាំងឡាយណា ដែលហ៊ានទិញអាវុធពីរុស្ស៊ី ៕

ប៊ែលហ្ស៊ិក៖ ក្រុមបាតុករប្រមាណជាង៤០០នាក់ត្រូវបានអាជ្ញាធរប៊ែលហ្សិកចាប់ ខ្លួន ក្រោយពួកគេបានយកគំរូតាមក្រុមកុប្បករនៅប្រទេសបារាំង ដោយពាក់អាវកាក់ពណ៌លឿង ហើយដើរដង្ហែក្បួន គប់ដុំថ្ម និងបាញ់កាំជ្រួច ព្រមទាំងបំផ្លាញហាងទំនិញ ក៏ដូចជារថយន្ដជាច្រើនគ្រឿង ដើម្បីព្យាយាមចូលក្នុងអគាររដ្ឋាភិបាល ក្នុងទីក្រុងព្រុចសែល ។ ក្រុមបាតុករអាវកាក់ពណ៌លឿងនៅក្នុងប្រទេសប៊ែលហ្សិក បានយកគំរូតាមក្រុមកុប្បករនៅក្នុងប្រទេសបារាំង ក្នុងការសម្ដែងការជំទាស់របស់ពួកគេ ប្រឆាំងនឹងការឡើងថ្លៃទំនិញ ហើយក្រៅពីប៊ែលហ្សិកនោះ ប្រទេសម៉ុងតេណេក្រូក៏ហាក់កំពុងត្រៀមខ្លួនប្រឈមមុខនឹងវិបត្តិដូចគ្នានេះដែរ ។ សូមបញ្ជាក់ថា បាតុកម្មតវ៉ារបស់ក្រុមអាវកាក់ពណ៌លឿង នៅក្នុងទីក្រុងព្រុចសែល ប្រទេសប៊ែលហ្សិកនេះ បានផ្ទុះឡើងអស់រយៈពេលជាង០៨ថ្ងៃមកហើយ ចំណែកឯបាតុកម្មតវ៉ាកាលពីថ្ងៃសៅរ៍កន្លងទៅ បានផ្ទុះឡើងបែបហិង្សាខ្លាំងក្លា រហូតឈានដល់ការចាប់ខ្លួនបាតុកររាប់រយនាក់ បន្ទាប់ពីមានការប៉ះទង្គិចគ្នារវាងក្រុមបាតុករ និងប៉ូលិសជាង១.០០០នាក់ដែលត្រូវបានដាក់ពង្រាយ ដើម្បីការពារសន្តិសុខសណ្ដាប់ធ្នាប់ ៕

បារំាង៖ ប្រធានាធិបតីបារាំង លោក អែមម៉ានុយអែល ម៉ាក្រុង ត្រូវបានរំពឹងថា នឹងប្រកាសពីវិធានការទប់ទល់នឹងបាតុកម្មដ៏ហិង្សា របស់ក្រុមបាតុករអាវកាក់ពណ៌លឿង នៅថ្ងៃច័ន្ទនេះ ស្របពេលមានការសន្និដ្ឋានជាច្រើនថា លោកទំនងជាប្រកាសដាក់ប្រទេសក្នុងភាពអាសន្ន ។ លោក អែមម៉ានុយអែល ម៉ាក្រុង នឹងថ្លែងសារទៅកាន់សាធារណៈជនបារាំងនៅម៉ោង ២០៖០០នាទីថ្ងៃច័ន្ទនេះ (ម៉ោងក្នុងតំបន់) ហើយនាឱកាសនោះលោកក៏ត្រូវបានរំពឹងដែរថា នឹងប្រកាសពីវិធានការទប់ទល់នឹងបាតុកម្មដ៏ហិង្សារបស់ ក្រុមអាវកាក់ពណ៌លឿង ក្នុងនោះរួមមានទំាងការប្រកាសដាក់រដ្ឋក្នុងភាពអាសន្នក៏ថាបាន នៅក្នុងបរិបទដែលមនុស្ស៤នាក់ហើយបានបាត់បង់ជីវិត និងរាប់ពាន់នាក់ត្រូវចាប់ខ្លួន រីឯបាតុកម្មកាន់តែមានសភាពធ្ងន់ធ្ងរ ។ គួរបញ្ជាក់ថា ប្រទេសបារាំងបានប្រឈមមុខនឹងបាតុកម្ម៤សប្ដាហ៍ជាប់ៗគ្នាមកហើយ បើទោះជារដ្ឋាភិបាលលោក ម៉ាក្រុង បានសម្រេចចិត្តលុបចោលគម្រោងដំឡើងពន្ធលើឥន្ធនៈចេញពីកញ្ចប់ថវិកាជាតិឆ្នាំ២០១៩ក៏ដោយ ។ ក្រៅតែពីការតវ៉ាប្រឆាំងនឹងសាំងឡើង ក្រុមបាតុករអាវកាក់ពណ៌លឿងបានបន្ថែមទាមទារកាន់តែឡើងក្នុងនោះរួមមានទាំងដំឡើង ប្រាក់ខែ កាត់បន្ថយការបង់ពន្ធ រួមទាំងការស្នើឱ្យលោក ម៉ាក្រុង ចុះចេញពីតំណែងផងដែរ ។ ប៉ុន្តែអ្វីដែលកត់សម្គាល់នោះគឺ គិតចាប់តាំងពីបាតុកម្មតវ៉ាផ្ទុះឡើងកាលពីថ្ងៃទី១៧ ខែវិច្ឆិកា ឆ្នាំ២០១៨មក បានធ្វើឱ្យសេដ្ឋកិច្ចបារាំងខាតបង់ជាង១លានអឺរ៉ូ ឬស្មើនឹងជាង១.១លានដុល្លារ ៕ …