អង់គ្លេស៖ នាយករដ្ឋមន្ត្រីអង់គ្លេស លោកស្រី ធើរ៉េសា មេ បានសរសេរលិខិតមួយច្បាប់ទៅកាន់ពលរដ្ឋទាំងអស់ ដើម្បីបំផុសឱ្យពួកគេគាំទ្រដល់កិច្ចព្រមព្រៀងចាកចេញពីសហភាពអឺរ៉ុប ឬ Brexit របស់លោកស្រី ស្របពេលដែលបណ្ដាមេដឹកនាំអឺរ៉ុបកំពុងត្រៀមចុះហត្ថលេខាលើកិច្ចព្រមព្រៀងនេះ។ ការអំពាវនាវរបស់នាយករដ្ឋមន្ត្រីអង់គ្លេសរូបនេះ ធ្វើឡើងគ្រាដែលបណ្ដាមេដឹកនាំអឺរ៉ុបក៏កំពុងជួបប្រជុំគ្នាក្នុងទីក្រុងព្រុចសែលដែរ ដើម្បីសម្រេចចិត្តថាតើគួរតែចុះហត្ថលេខាលើកិច្ចព្រមព្រៀង Brexit របស់លោកស្រី មេ ឬក៏យ៉ាងណា ខណៈប្រធានក្រុមប្រឹក្សាអឺរ៉ុប លោក Donald Tusk ផ្ដល់អនុសាសន៍ឱ្យប្រទេសជាសមាជិកទាំងអស់អនុម័តលើកិច្ចព្រមព្រៀងនេះ ដែលនឹងបើកផ្លូវឱ្យអង់គ្លេសចាកចេញពីសហភាពអឺរ៉ុបនៅខែមីនា ឆ្នាំ២០១៩ខាងមុខ។ យ៉ាងណាមិញ កិច្ចព្រមព្រៀងនេះ នៅតែចាំបាច់ត្រូវមានការអនុម័តពីសភាអង់គ្លេសជាមុនសិន នៅក្នុងបរិបទដែលសមាជិកសភាមួយចំនួនអះអាងថា នឹងបោះឆ្នោតជំទាស់។ គួរបញ្ជាក់ថា នៅក្នុងលិខិតខាងលើនេះ លោកស្រី ធើរ៉េសា មេ ក៏បានសន្យាផងដែរថា កិច្ចព្រមព្រៀងចាកចេញពីសហភាពអឺរ៉ុប ឬ Brexit របស់លោកស្រី នឹងជួយឱ្យចក្រភពអង់គ្លេសមានអនាគតភ្លឺស្វាង ហើយថា ការចាកចេញពីសហភាពអឺរ៉ុបនៅឆ្នាំក្រោយនេះ នឹងក្លាយជាពេលវេលាមួយដ៏សំខាន់ ក្នុងការផ្សះផ្សាប្រជាជាតិអង់គ្លេសទាំងមូល៕ម.ន

អ៊ីរ៉ង់៖ សារព័ត៌មានអ៊ីរ៉ង់បានចេញផ្សាយថា គ្រោះរញ្ជួយដីក្នុងកម្រិត៦.៣រ៉ិចទ័របានធ្វើការវាយប្រហារភាគខាងលិចប្រទេសអ៊ីរ៉ង់ នៅក្នុងថ្ងៃអាទិត្យចុងសប្តាហ៍មុននេះ បណ្តាលឲ្យមនុស្សរាប់រយនាក់ទទួលរងរបួស។ ប្រភពបន្តថា គ្រោះធម្មជាតិនេះ បានវាយប្រហារក្នុងរយៈពេលខ្លីប៉ុណ្ណោះ នៅម៉ោងប្រមាណ៨យប់ថ្ងៃ អាទិត្យ ម្សិលមិញ (ម៉ោងក្នុងតំបន់) មានចម្ងាយប្រហែល២០គីឡូម៉ែត្រពីទីក្រុង Sarpol-e Zahab នៅក្នុងខេត្ត Kermanshah ស្ថិតនៅក្បែរព្រំដែនជាមួយប្រទេសអ៊ីរ៉ាក់ ហើយបើតាមការប៉ាន់ស្មាននោះ គ្រោះរញ្ជួយដីខាងលើ មានជម្រៅប្រមាណ១០គីឡូម៉ែត្រ។ សារព័ត៌មានអ៊ីរ៉ង់បានដកស្រង់សម្តីរបស់អភិបាលខេត្តមកបញ្ជាក់ថា គ្រោះមហន្តរាយនេះដែរ បានធ្វើឱ្យអាគារជាច្រើនរងការខូចខាត ហើយយ៉ាងហោចណាស់មានមនសុ្ស២៦០នាក់រងរបួស ដែលភាគច្រើននៃពួកគេទទួលរងរបួសស្រាលប៉ុណ្ណោះ ខណៈដែលរដ្ឋាភិបាលក្រុងតេហេរ៉ង់ភ្លាមៗនោះ បានធ្វើការបញ្ជូនក្រុមជួយសង្គ្រោះទៅកាន់ទីតាំងកើតហេតុ៕ម.ន

អ៊ុយហ្កាន់ដា៖ អ្នកនាំពាក្យរបស់មន្ត្រីប៉ូលិសអ៊ុយហ្កាន់ដា បានប្រាប់ឱ្យដឹងនៅក្នុងថ្ងៃអាទិត្យចុងសប្តាហ៍មុននេះថា តួលេខជនរងគ្រោះបាត់បង់ជីវិត ដោយសារហេតុការណ៍លិចទូកមួយគ្រឿងនៅក្នុងទឹកទន្លេ Lake Victoria កាលពីថ្ងៃសៅរ៍នោះ បានបន្តកើនឡើងដល់៣០នាក់ហើយ។ អ្នកនាំពាក្យប៉ូលិសអ៊ុយហ្កាន់ដា លោក Patrick Onyango បានគូសបញ្ជាក់ថា ក្រុមយោធាម៉ារីន និងមន្រ្តីប៉ូលិស រួមជាមួយនឹងក្រុមអ្នកមុជទឹកក្នុងតំបន់ផងនោះ បានជួយសង្គ្រោះទាន់ពេលវេលានូវជនរងគ្រោះចំនួន២៧នាក់ នៅក្នុងករណីលិចទូកដ៏អាក្រក់នេះ។ ប្រភពដដែលបន្តថា ទូកចំនួន២គ្រឿងបានលិចយ៉ាងជ្រៅទៅក្នុងទឹកទន្លេ Lake Victoria នៅសង្កាត់ Mukono ភាគកណ្តាលប្រទេសអ៊ុយហ្កាន់ដា។ លោក Patrick Onyango បានអះអាងថា សោកនាដកម្មនេះ បង្កឡើងដោយសារការផ្ទុកមនុស្សលើសចំណុះ និងអាកាសធាតុអាក្រក់៕ម.ន

តួកគី៖ រដ្ឋមន្រ្តីការបរទេសតួកគីលោក មេវលូត កាវូសូគ្លូ បាននិយាយថា សម្តីរបស់លោក ដូណាល់ ត្រាំ អំពីការស៊ើបអង្កេតលើករណីសម្លាប់អ្នកកាសែតលោក ចាម៉ាល់ ខាហ្សូកជី បង្ហាញថា ប្រធានាធិបតីអាម៉េរិករូបនេះ បានបិទភ្នែកធ្វើមិនដឹងព័ត៌មានលម្អិតអំពីហេតុការណ៍នោះ។ នៅដើមសប្តាហ៍នេះ លោក ដូណាល់ ត្រាំ បានប្តេជ្ញានៅតែធ្វើជាដៃគូរបស់អារ៉ាប៊ីសាអូឌីត ទោះជាមានការលើកឡើងថា ព្រះអង្គម្ចាស់រាជទាយាទ ម៉ូហាមេត ប៊ីន សាល់ម៉ាន់ អាចដឹងអំពីផែនការសម្លាប់លោក ខាហ្សូកជី កាលពីខែមុនក្តី។ ថ្លែងទៅកាន់អ្នកសារព័ត៌មាន លោក កាវូសូគ្លូ បានបញ្ជាក់ថា សហរដ្ឋអាម៉េរិកមិនបានជូនព័ត៌មានដល់តួកគី អំពីការថតសម្លេងពាក់ព័ន្ធនឹងការស្លាប់របស់លោក ខាហ្សូកជី នៅមួយថ្ងៃបន្ទាប់ពីប្រព័ន្ធផ្សព្វផ្សាយតួកគីមួយបានរាយការណ៍ថា ទីភ្នាក់ងារស៊ើបការណ៍កណ្តាល (សេអ៊ីអា) អាម៉េរិកមានសំឡេងថតបានមួយ ដែលបង្ហាញថា ព្រះអង្គម្ចាស់បានចេញបញ្ជាឲ្យបំបិទមាត់លោក ខាហ្សូកជី ៕ម.ន

ចិន៖ ការគំរាមកំហែងដោយទីប្រឹក្សាសំខាន់ម្នាក់របស់ប្រធានាធិបតីអាម៉េរិក លោក ដូណាល់ ត្រាំ ដើម្បីបណ្តេញចិនចេញពីអង្គការពាណិជ្ជកម្មពិភពលោក (WTO) ត្រូវបានក្រសួងការបរទេសចិនច្រានចោលថា ជាការនិយាយមិនសមហេតុផល កាលពីថ្ងៃព្រហស្បតិ៍តសប្តាហ៍នេះ។ អ្នកនាំពាក្យក្រសួងការបរទេសចិនលោក កេង សួង បាននិយាយនៅក្នុងសន្និ សីទសារព័ត៌មានមួយនៅទីក្រុងប៉េកាំងថា “អង្គការ WTO គឺជាអង្គការពហុភាគី និងមិនមែនជាកម្មសិទ្ធិរបស់សហរដ្ឋអាម៉េរិកនោះទេ” ។ លោកបានកត់សម្គាល់ថា ការអត្ថាធិប្បាយបែបនេះ “គឺបកអាក្រាតនូវចរិតគំរាមកំហែងរបស់រដ្ឋាភិបាលក្រុងវ៉ាស៊ីនតោន និងស្មារតីមោទនភាពលើខ្លួនឯងជ្រុលហួសហេតុ។ ការថ្លែងរបស់អ្នកនាំពាក្យក្រសួងការបរទេសចិនរូបនេះ ត្រូវបានធ្វើឡើង បន្ទាប់ពីលោក ខេវិន ហាសសេត ជាប្រធានក្រុមប្រឹក្សានៃទីប្រឹក្សាសេដ្ឋកិច្ចរបស់លោក ដូណាល់ ត្រាំ បាននិយាយនៅក្នុងបទសម្ភាសន៍មួយថា ចិនប្រព្រឹត្តមិនត្រឹមត្រូវក្នុងនាមជាសមាជិកអង្គការពាណិជ្ជកម្មពិភពលោក WTO ហើយថែមទំាងបានស្នើថា ករណីមួយអាចត្រូវបានធ្វើឡើងដើម្បីបណ្តេញចិនចេញពីអង្គការអន្តរជាតិនេះ៕ម.ន

សហរដ្ឋអាម៉េរិក៖ របាយការណ៍ថ្មីមួយរបស់សហព័ន្ធបានព្រមានថា គ្រោះមហន្តរាយធម្មជាតិនឹងកាន់តែអាក្រក់ទៅៗនៅសហរដ្ឋអាម៉េរិក ដោយសារតែការឡើងកម្តៅផែនដី ដោយរបាយការណ៍របស់សេតវិមានដែលចេញដោយស្ងៀមស្ងាត់នៅក្នងថ្ងៃសុក្រសប្តាហ៍នេះ ក៏ផ្សាយបញ្ច្រាស់គ្នាជាញឹកញាប់ពីការលើកឡើងរបស់ប្រធានាធិបតីអាម៉េរិកលោក ដូណាល់ ត្រាំ ផងដែរ។ របាយការណ៍វាយតម្លៃអាកាសធាតុជាតិ ត្រូវបានគេសរសេរជាយូរមកហើយ មុនពេលភ្លើងឆេះព្រៃលេបត្របាក់នៅរដ្ឋកាលីហ្វ័រញ៉ាក្នុងខែនេះ និងនៅមុនពេលព្យុះកំបុតត្បូងផ្លរិន និងព្យុះម៉ៃឃើល វាយលុកឆ្នេរសមុទ្រខាងកើត និងរដ្ឋផ្លរីដា។ របាយការណ៍នេះលើកឡើងថា ការឡើងកម្តៅខ្ពស់លើផែនដី បានកើតឡើងជាញឹកញាប់ ខ្លាំងក្លា រីករាលដាល ឬ អូសបន្លាយពេលយូរ ។ របាយការណ៍នេះបានកត់សម្គាល់ថា ប៉ុន្មានឆ្នាំចុងក្រោយនេះ បានបំបែកកំណត់ត្រារបស់សហរដ្ឋអាម៉េរិកសម្រាប់អាកាសធាតុដ៏បំផ្លិចបំផ្លាញ ដោយធ្វើឱ្យប្រទេសមហាអំណាចនេះ ខាតបង់ប្រាក់អស់៤០០ពាន់លានដុល្លារចាប់តាំងពីឆ្នាំ២០១៥ ។ របាយការណ៍នេះចេញផ្សាយជារៀងរាល់ពីរបីឆ្នាំម្តង ហើយផ្អែកទៅលើការសិក្សាស្រាវជ្រាវមុនៗជាង១,០០០ ខណៈវាបង្ហាញលម្អិតពីរបៀបដែលការឡើងកម្តៅផែនដីចេញពីការដុតធ្យូងថ្ម ប្រេង និងឧស្ម័នកំពុងធ្វើឱ្យខូចខាតដល់តំបន់នីមួយៗនៃសហរដ្ឋអាម៉េរិក និងថាតើវាប៉ះពាល់ដល់វិស័យផ្សេងៗទៀតនៃសេដ្ឋកិច្ចយ៉ាងដូចម្តេច ក្នុងនោះរួមមានទាំងវិស័យថាមពល និងកសិកម្ម៕ម.ន