ភ្នំពេញ៖ ក្នុងជំនួបពិភាក្សាការងារជាមួយឯកឧត្តម ប៉ាន សូរស័ក្តិ រដ្ឋមន្ត្រីពាណិជ្ជកម្មកម្ពុជា តាមរយៈប្រព័ន្ធវីដេអូនៅថ្ងៃទី១៨ ខែកុម្ភៈ ឆ្នាំ២០២១ លោកស្រី ហេឌ័រ វាល័្លរ (Heather Wheeler) ប្រេសិតពាណិជ្ជកម្មរបស់នាយករដ្ឋមន្ត្រីចក្រភពអង់គ្លេសប្រចាំនៅកម្ពុជា ឡាវ និងវៀតណាម បានប្រកាសថា នឹងប្រឹងប្រែងបញ្ចុះបញ្ចូល ក៏ដូចជាជំរុញអ្នកវិនិយោគរបស់អង់គ្លេសមកសិក្សា និងស្វែងរកឱកាសវិនិយោគបន្ថែមទៀតនៅកម្ពុជា។ លោកស្រី បានទទួលស្គាល់ពីភាពរីកចម្រើនកំណើនសេដ្ឋកិច្ចប្រចាំឆ្នាំ និងសក្តានុពលនាំចេញរបស់កម្ពុជា។ លោកស្រី ក៏បានកោតសរសើរចំពោះកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការជួយសម្របសម្រួលប្រតិបត្តិការពាណិជ្ជកម្មរបស់ធុរជន និងវិនិយោគិនអង់គ្លេសនៅកម្ពុជានាពេលកន្លងមក។ដោយលោកស្រី អះអាងថា លោកស្រីនឹងប្រឹងប្រែងលើកទឹកចិត្ត និងបញ្ចុះបញ្ចូលអ្នកវិនិយោគអង់គ្លេស មកស្វែងយល់បន្ថែមពីសក្តានុពលវិនិយោគនៅកម្ពុជា។ លោកស្រី ក៏បានបង្ហាញពីការមើលឃើញនូវផលប៉ះពាល់លើវិស័យកាត់ដេរ និងវាយនភណ្ឌ ដែលជាសសរស្តម្ភមួយយ៉ាងសំខាន់សម្រាប់សេដ្ឋកិច្ចកម្ពុជា ដោយសារវិបត្តិជំងឺកូវីដ១៩។ ដើម្បីជួយស្រោចស្រង់ផលប៉ះពាល់នេះ លោកស្រី បានបង្ហាញអំពីគម្រោងគាំទ្រពន្លឿនផ្នែកសេដ្ឋកិច្ច (Accelerated COVID Economic Support-ACES) ដែលផ្តល់ដោយរាជរដ្ឋាភិបាលអង់គ្លេសសម្រាប់ប្រទេសនៅតំបន់អាស៊ាន ដែលរួមមានកម្ពុជាផងដែរនោះ។ តាមរយៈជំនួបពិភាក្សានេះឯកឧត្តមរដ្ឋមន្ត្រី ប៉ាន សូរស័ក្តិ បានបង្ហាញក្តីសង្ឃឹមខ្ពស់ថា លោកស្រីប្រេសិត នឹងអាចជួយជំរុញកិច្ចសន្ទនា កិច្ចសហប្រតិបត្តិការល្អ និងចំណងការទូតប្រកបដោយផ្លែផ្ការរវាងកម្ពុជា និងអង់គ្លេស។ ឯកឧត្តមរដ្ឋមន្រ្តី…