រយៈពេល២សប្ដាហ៍ដើមខែឧសភា ឆ្នាំ២០២០នេះ ចលនាទេសចរក្នុងស្រុកបានបន្តកើនឡើងបណ្ដើរៗវិញហើយ ជាក់ស្ដែងភ្ញៀវទេសចរប្រមាណជាង ២៥ ម៉ឺននាក់បានចេញដើរទស្សនាកម្សាន្តនៅទូទាំងប្រទេស ដែលមានការកើនឡើងជិត ៤៧% បើធៀបនឹងពីរសប្តាហ៍ចុងខែមុន។ នេះបើតាមការលើកឡើងរបស់រដ្ឋមន្ត្រីក្រសួងទេសចរណ៍។ តាមរយៈទំព័រហ្វេសប៊ុកផ្លូវការរបស់ក្រសួងទេសចរណ៍នាថ្ងៃទី២២ ខែឧសភានេះ លោក ថោង ខុន រដ្ឋមន្ត្រីក្រសួងទេសចរណ៍ បានបន្តថា ចំណោមភ្ញៀវទេសចរសរុបជាង ២៥ម៉ឺននាក់នោះ មានភ្ញៀវជាតិមានប្រមាណ ២៥៣,២៥៦ នាក់កើនឡើង ៤៦.៦៤ ភាគរយ និងភ្ញៀវបរទេសមានប្រមាណ ៤,២៨៥ នាក់កើនឡើង ៧.៤៧ ភាគរយ។ បើតាមលោក ថោង ខុន បានបង្ហាញការកត់សម្គាល់ថា ប្រជាពលរដ្ឋ និងទេសចរបរទេសផ្ទៃក្នុង ភាគច្រើនបានធ្វើដំណើរទៅកាន់តំបន់អេកូទេសចរណ៍នាភូមិភាគឦសាន ភាគនិរតី និងតំបន់ឆ្នេរ ពិសេសខេត្តព្រះសីហនុ ខេត្តកំពត និងខេត្តកែប។ សូមជម្រាបជូនថា ចំពោះមុខនៃការកើនឡើងចលនាទេសចរផ្ទៃក្នុងនេះក្រសួងទេសចរណ៍បានសហការជាមួយវិស័យឯកជនរៀបចំនូវវិធានការ (ស្ដង់ដាពិសេស) សម្រាប់សុវត្ថិភាពទេសចរណ៍ ក្នុងនោះរួមមានក្រមប្រត្តិបត្តិ គោលការណ៍ណែនាំចាំបាច់មួយចំនួនបន្ថែមពីលើវិធានការសុវត្ថិភាព និងអនាម័យដែលបានដាក់ចេញដោយក្រសួងសុខាភិបាល៕

ក្រុមហ៊ុនបច្ចេកវិទ្យាអាមេរិក Apple គ្រោងសង់រោចក្ររបស់ខ្លួននៅប្រទេសវៀតណាម សម្រាប់ផលិតកាសលើត្រចៀកប្រភេទថ្មី។ គម្រោងបង្កើតរោងចក្រនៅក្នុងប្រទេសវៀតណាម ធ្វើឡើងខណៈដែលភាពតានតឹងរវាងសហរដ្ឋអាមេរិក និងចិន កំពុងតែបន្តកើនឡើងនៅក្នុងពេល ដែលពិភពលោកកំពុងតែជួបនឹងជំងឺរាតត្បាតកូវីដ១៩។ នេះបើតាមការចុះផ្សាយរបស់សារព័ត៌មានវៀតណាម កាលពីថ្ងៃទី២១ ខែឧសភា ម្សិលមិញ។ ក្រុមហ៊ុនរោងចក្ររបស់ចិនចំនួន២ គឺ Goertek និងLuxshare នឹងចាប់ផ្តើមដំណើរការនៅក្នុងប្រទេសចិន និងប្រទេសវៀណាម ដើម្បីផលិតផលិតផលថ្មីរបស់ក្រុមហ៊ុន Apple ។ កាសសម្រាប់ស្តាប់តន្ត្រីថ្មី ដែលបើតាមពាក្យចចាមអារ៉ាម ត្រូវបានគេឲ្យឈ្មោះថា AirPods Studio នឹងមានលក្ខណៈពិសេសខុសគ្នាពីផលិតផលរបស់កាស Beats ពោលគឺវាមានលក្ខណៈពិសេសច្រើន។ កាសប្រភេទថ្មីនេះ នឹងផ្តោតសំខាន់លើកបច្ចេកវិទ្យា សម្រាប់ចុចបញ្ជារ។ នេះបើតាមការចុះផ្សាយរបស់សារព័ត៌មាន Bloomberg។ កាសប្រភេទថ្មីនេះ ត្រូវបានប្រភពក្រៅផ្លូវការបញ្ជាក់ថា នឹងចេញលក់នៅក្នុងរដូវស្លឹកឈើជ្រុះខាងមុខ ក្នុងតម្លៃ៣៤៩ដុល្លារអាមេរិក។ សូមជម្រាបជូនថា កាលពីដើមខែឧសភាកន្លងទៅ សារព័ត៌មាន Nikkei Asian Review បានរាយការណ៍ថា ក្រុមហ៊ុន Apple នឹងផលិត ផលិតផល AirPods 2 របស់ខ្លួនចំនួន៣០ភាគរយ ឬប្រមាណ៤លានគ្រឿង នៅក្នុងរោងចក្រនាប្រទេសវៀតណាម៕

ក្រុមហ៊ុនផលិតរថយន្ត Ford កាលពីថ្ងៃពុធ ទី២០ ខែឧសភា បានបិទរោងចក្រដំឡើងរថយន្តរបស់ខ្លួនចំនួនពីរនៅសហរដ្ឋអាមេរិក​ បន្ទាប់ពីអ្នកធ្វើការនៅក្នុងរោងក្រដំឡើងរថយន្តដ៏ធំរបស់អាមេរិកមួយនេះ ត្រូវបានរកឃើញថាវិជ្ជមានជំងឺកូវីដ១៩។ នេះបើតាមអ្នកនាំពាក្យរបស់ក្រុមហ៊ុនផលិតរថយន្តអាមេរិក លោកស្រី Kelli Felker។ អ្នកនាំពាក្យរូបនេះបញ្ជាក់ ការបិទកន្លែងដំឡើងរថយន្តនៅក្នុងក្រុង Dearborn រដ្ឋMichigan គឺបន្ទាប់បុគ្គលិករបស់ទីតាំងដំឡើងរថយន្តខាងលើនេះ មានផ្ទុកជំងឺកូវីដ១៩។ ដោយឡែករោងចក្រដំឡើងរថយន្តនៅក្នុងរដ្ឋ Chicago ត្រូវបានបិទដោយសារតែមិនមានវត្ថុធាតុគ្រប់គ្រាន់ក្នុងប្រតិបត្តិការដំឡើងរថយន្ត ប៉ុន្តែក្រុមហ៊ុនមិនបានបញ្ជាក់ថាវត្ថុធាតុដើមក្នុងផ្នែកណាមួយ ដែលមានការផ្គត់ផ្គង់មិនគ្រប់គ្រាន់នោះទេ។ ក្រុមហ៊ុនផលិតរថយន្តរបស់អាមេរិក ដែលក្នុងនោះក៏មានក្រុមហ៊ុនរថយន្តFord ផង បានចាប់ផ្តើមបើកដំណើរការប្រតិបត្តិការដំឡើងរថយន្តរបស់ខ្លួនឡើងវិញកាលពីថ្ងៃចន្ទ បន្ទាប់ពីផ្អាកដំណើរការមួយរយៈដោយសារតែការផ្ទុះឡើងនៃជំងឺកូវីដ១៩ នៅក្នុងទឹកដីសហរដ្ឋអាមេរិក។ ដើម្បីបង្ការការឆ្លងរាលដាលនៃជំងឺកូវីដ១៩ ក្រុមហ៊ុន ផលិតរថយន្តរបស់សហរដ្ឋអាមេរិក បានដាក់ចេញនូវវិធានការមួយចំនួន ដូចជាការពិនិត្យកំដៅរបស់បុគ្គលិក តម្រូវឲ្យប្រើម៉ាស់ និងក្បាំងមុខ និងរក្សាគម្លាតសង្គមក្នុងពេលធ្វើការងារជាដើម៕ ប្រភព៖ Reuters

រដ្ឋមន្ត្រីក្រសួងសុខាភិបាល លោកមម៉ ប៊ុនហេង នៅថ្ងៃទី២០ ខែឧសភា នេះបានប្រាប់រដ្ឋមន្ត្រីក្រសួងវប្បធម៌ អនុញ្ញាតឲ្យបើដំណើរការនូវសារមន្ទីរនានាជូនភ្ញៀវជាតិ និងអន្តរជាតិបានចូលទស្សនាឡើងវិញចាប់ពីខែមិថុនា ឆ្នាំ២០២០ទៅ។ ការបើកសារមន្ទីរឡើងវិញ គឺបន្ទាប់ពីកម្ពុជាប្រកាសថាអ្នកជំងឺកូវីដ១៩ ទាំង១២២នាក់ បានជាសះស្បើយពីជំងឺនេះ។ លោក ម៉ម ប៊ុនហេង ក៏បានណែនាំដល់ក្រសួងវប្បធម៌ និងវិចិត្រសិល្បៈ ថាមុនពេលបើកដំណើរការ ត្រូវរៀបចំវិធានការការពារនានាឲ្យរូចជាមុន ដើម្បីចៀសវាងនូវហានិភ័យ​នៃការចម្លងជំងឺកូវី១៩ ដូចជាការស្កែនកំដៅភ្ញៀវមុនអនុញ្ញាតឲ្យចូលទស្សនា មានប្រើអាល់កុល ឬជែលលាងដៃ និងត្រូវរៀបចំឲ្យគម្លាតសុវត្ថិភាពបុគ្គល ព្រមទាំងត្រូវពាក់ម៉ាស់ ហើយត្រូវអនុវត្តឲ្យបានគ្រប់បុគ្គល ទាំងភ្ញៀវ អ្នកនាំភ្ញៀវ និងអ្នកបំរើនៅទីនោះ និងមិនត្រូវអនុញ្ញាតឲ្យភ្ញៀវ ឬបុគ្គលណាម្នាក់ដែមានបញ្ហាសុខាភាព ឬសង្ស័យចូលទស្សនាសារមន្ទីរឡើយ។​ បើតាមលោក ម៉ម ប៊ុនហេង ថ្វីត្បិតតែស្ថានភាពជំងឺកូវីដ១៩ នៅក្នុងប្រទេសកម្ពុជា បច្ចុប្បន្ននេះ មិនមានរកឃើញករណីឆ្លងថ្មីជាងមួយខែ​ អ្នកឈឺបានព្យាបាលជាសះស្បើយ ១០០% និងមិនមានករណីស្លាប់ក៏ពិតមែន ហើយភាគច្រើនលើសលុបសុទ្ធសឹងជាករណីនាំចូលមកពីក្រៅប្រទេស ក៏ប៉ុន្តែកម្ពុជាត្រូវតែប្រកាន់យកការប្រុងប្រយ័ត្នជាប់ជានិច្ច ចំពោះការប្រឈមទៅនឹងការកើតមានឡើងនូវរលកទី២នៃការចម្លងវិរុស​កូវីដ១៩ ជាពិសេសការចម្លងនៅក្នុងសហគមន៍ ដែលអាចនឹងធ្វើឲ្យប៉ះពាល់ដល់នយោបាយ សុខភាពសាធារណៈ សេដ្ឋកិច្ច សង្គម និងការរស់នៅប្រចាំថ្ងៃរបស់ប្រជាជនទូទៅ ដែលពិបាកធ្វើការប៉ាន់ស្មានបាន៕

វៀតណាមកំណត់គោលដៅពង្រីកកំណើន E-commerce (ពាណិជ្ជកម្មអេឡិចត្រូនិក) ឲ្យដល់២៥ភាគរយក្នុងមួយឆ្នាំ ដើម្បីឲ្យសម្រេចគោលដៅក្នុងទំហំទឹកប្រាក់​៣៥ពាន់លាន​ដុល្លារអាមេរិក។ ជាមួយនឹងគោលដៅនេះ ប្រជាជនវៀតណាមប្រមាណជាងពាក់កណ្តាលប្រទេសនឹងធ្វើប្រតិបត្តិការទិញទំនិញតាមអនឡាញនៅឆ្នាំ២០២៥។ នេះបើតាមការចុះផ្សាយរបស់សារព័ត៌មានវៀតណាម នៅថ្ងៃទី២០ ខែឧសភានេះ។ គម្រោងមួយនេះត្រូវបានប្រកាសឲ្យដឹងនៅក្នុងផែនការមេសម្រាប់គម្រោងអភិវឌ្ឍន៍ ការទិញទំនិញតាមប្រព័ន្ធអ៊ីនធឺណិត ឬ E-commerce នៅក្នុងឆ្នាំ២០២១ដល់ឆ្នាំ២០១៥ ដែលត្រូវបានរដ្ឋាភិបាលវៀតណាមអនុម័តយល់ព្រមកាលពីសប្តាហ៍មុន។ តាមរយៈគោលដៅពង្រីកទំហំទីផ្សារ E-commerce របស់ខ្លួន វៀតណាមក៏បន្ថែមនូវគោលនយោបាយពង្រីកទីផ្សារនាំចេញផលិតផលវៀតណាមតាមរយៈ E-commerce ផងដែរ ជាពិសេសគោលដៅពាណិជ្ជកម្មអេឡិចត្រូនិចតាមព្រំដែនជាមួយប្រទេសជិតខាង។ សារព័ត៌មានវៀតណាមដដែលឲ្យដឹងថា រដ្ឋាភិបាលវៀតណាមមានគម្រោងទាក់ទាញឲ្យប្រជាជនវៀតណាមជាង៥៥ភាគរយនៃប្រជាជនសរុបប្រើប្រាស់ប្រតិបត្តិការទិញទំនិញតាមប្រព័ន្ធអនឡាញ នៅក្នុងឆ្នាំ២០២៥ ដែលនៅក្នុងនោះផងដែរ រដ្ឋាភិបាលរំពឹងថាពលរដ្ឋវៀតណាមម្នាក់នឹងចំណាយប្រមាណ៦០០ដុល្លារអាមេរិក្នុងមួយឆ្នាំលើការទិញទំនិញតាមប្រព័ន្ធអ៊ីនធឺណិត។ យោងតាមសៀវភៅ ស ស្តីពីពាណិជ្ជកម្មតាមប្រព័ន្ធអនឡាញឆ្នាំ២០១៩ បង្ហាញថា ទំហំទឹកប្រាក់នៃការធ្វើពាណិជ្ជកម្មតាមប្រព័ន្ធអនឡាញនៅក្នុងប្រទេសមានការកើនឡើងប្រមាណ៣០ភាគរយ ពោលគឺពី៦.២ពាន់លានដុល្លារ នៅក្នុងឆ្នាំ២០១៧ ដល់៨.០៨ពាន់លានដុល្លារនៅក្នុងឆ្នាំ២០១៨៕ ប្រភព៖ VNS

ដោយ៖ វង្ស​ រតនា ពលរដ្ឋខ្មែរ​ដែលចង់ទៅលេងនៅប្រទេសថៃ ទៅពិនិត្យសុខភាព ឬទៅទិញទំនិញ អាចផ្តើមកក់សំបុត្រជាមួយក្រុមហ៊ុននៅក្នុងស្រុក ឬអាចកក់សំបុត្រអនឡាញដើម្បីអាចធ្វើដំណើរបាននៅថ្ងៃទី០១​ខែកក្កដាខាងមុខនេះ។ នេះគឺជាការជូនដំណឹងពីអាកាសចរណ៍ស៊ីវិលថៃទៅដល់គ្រប់ក្រុមហ៊ុនទាំងអស់ដែលចង់ដឹកជញ្ជូនដំណើរមកកាន់ថៃព្រោះចាប់ពីថ្ងៃទី១​ ខែកក្កដាខាងមុខ​ថៃនឹងបើកឱ្យមានការហោះហើរអន្តរជាតិបន្ទាប់ពីបានបិទអស់រយៈពេលជាច្រើនខែ។ អាជ្ញាធរថៃ បន្តថា ការសម្រេចចិត្តបើកជើងមេឃអន្តរជាតិនៅខែកក្កដានោះ​ គឺដើម្បីជួយជំរុញការដោះដូរពាណិជ្ជកម្ម និងវិនិយោគ ទេសចរណ៍  ពាណិជ្ជកម្មនៅក្នុងតំបន់ក៏ដូចជាប្រទេសថៃខ្លួនឯង​ក្នុងខណៈដែលសេដ្ឋកិច្ចកំពុងជាប់គាំង។ យ៉ាងណាក៏ដោយ ថៃជឿជាក់ថា​ បើស្ថានការណ៍កូវីដនៅក្នុងប្រទេសខ្លួន និងតំបន់វិវត្តន៍ជាវិជ្ជមានយ៉ាងផែនការបើកជើងមេឃអន្តរជាតិឡើងវិញនេះពិតជាគ្មានបញ្ហានោះឡើយ៕​

ឯកអគ្គរដ្ឋទូតវៀតណាមប្រចាំកម្ពុជា លោក វ៉ូ ក្វាង មិញ បាននៅថ្ងៃទី១៩ ខែឧសភានេះ បាន​បញ្ជាក់ថា​ភាគី​វៀតណាមមិន​បាន​បញ្ជាក់ថា​អ្នក​ជំងឺ​ផ្ទុក​កូវីដ១៩​លេខ៣១៥​មាន​ការឆ្លងជំងឹ​នេះ​ពី​កម្ពុជា​នោះទេ។ នេះបើតាមទំព័រហ្វេសប៊ុករបស់ស្ថានទូតវៀតណាមប្រចាំកម្ពុជា។ អគ្គរដ្ឋទូត​វៀតណាម ថាតាមគោលការណ៍បង្ការនិងប្រឆាំងជំងឺឆ្លង វៀតណាម​ត្រូវ​អនុវត្ត​ការដាក់​អោយ​នៅ​ដាច់​ដោយ​ឡែក​គ្រប់ករណី​ដែល​មាន​ការសង្ស័យ​និង​ត្រូវប្រកាស​ជា​សាធារណៈ​នូវព័ត៌មាន​មួយ​ចំនួន​ទាក់ទង​នឹង​អ្នកជំងឺ​ដូចជា​ការធ្វើដំណើរ​របស់​អ្នកជំងឺនេះ​ដើម្បីអ្នក​ដែល​ធ្លាប់​មាន​ការប៉ះពាល់​អោយ​មាន​ការប្រុងប្រយ័ត្ននិងរាយការណ៍ដល់ស្ថាប័នជំនាញរបស់វៀតណាម។ ការបញ្ជាក់របស់ភាគីវៀតណាម គឺ​បន្ទាប់​ពី​ការជូនដំណឹង​របស់​ក្រសួង​សុខាភិបាល​កម្ពុជា​នា​ពេលយប់​ថ្ងៃទី១៨ ខែឧសភា ឆ្នាំ២០២០ ស្តីពីករណី​អ្នកជំងឺ​លេខ៣១៥​នៅ​វៀតណាម​មាន​លទ្ធផល​តេស្តវិជ្ជមាននឹង SARS-CoV-2 ដែលបង្កឡើងជំងឺរលាកផ្លូវដង្ហើមកូវីដ១៩ ក្រោយ​ពីវិលត្រឡប់ពីកម្ពុជា។ សេចក្តីប្រកាសព័ត៌មាន​របស់​ក្រសួង​សុខាភិបាល​កម្ពុជា​បាន​បដិសេធ​ព័ត៌មាន ដែលចុះផ្សាយដោយសារព័ត៌មានវៀតណាម កាលពីថ្ងៃទី១៦ ខែឧសភា។ ក្នុងការឆ្លើយបទសម្ភាសរបស់ទីភ្នាក់ងារសារព័ត៌មានវៀតណាមប្រចាំនៅកម្ពុជា ឯកអគ្គរដ្ឋទូត វ៉ូ ក្វាង មិញ បានបញ្ជាក់ច្បាស់ថា ដោយមូលហេតុ​ដូចបានពោលខាង​លើភាគីវៀតណាម​មិនទាន់​អះអាងថាអ្នកផ្ទុកជំងឺលេខ៣១៥មានការឆ្លងជំងឺកូវីដ១៩ក្នុងពេលនៅប្រទេសកម្ពុជានោះទេ ហើយ​រាល់​វិធានការ​ដែលបាន​ដាក់​ចេញ​គ្រាន់​តែជា​ការស្វែងរក​ដើម្បី​ចត្តាឡីស័ក១៧នាក់​ដែល​មាន​ការប៉ះពាល់ក្នុងរយះពេលដែលអ្នកជំងឺលេខ៣១៥ស្នាក់នៅប្រទេសវៀតណាមតែប៉ុណ្ណោះ។ នៅថ្ងៃទី១៦ ខែឧសភា កាសែត Vietnam News របស់​ទីភ្នាក់ងារសារព័ត៌មាន​វៀតណាម​បាន​ផ្សាយព័ត៌មាន​​ដែលបានដកស្រង់ពីគណៈកម្មការជាតិ​ដឹកនាំ​ការងារ​បង្ការ​និង​ប្រឆាំងជំងឺកូវីដ១៩​វៀតណាមថាមានអ្នកជំងឺជាបុរសអាយុ៣៩ឆ្នាំដែលវិលត្រឡប់មកពីខេត្តសៀមរាប(ប្រទេសកម្ពុជា)មកវៀតណាមដោយគ្មានលិខិតស្របច្បាប់នៅថ្ងៃទី០២ ខែឧសភា ឆ្នាំ២០២០​តាមផ្លូវខេត្តតៃនិញ​មាន​លទ្ធផលធ្វើតេស្ត SARS-CoV-2 អវិជ្ជមានលើកទី១នៅថ្ងៃទី៥ខែឧសភា តែ​ក្នុង​ការធ្វើ​តេស្ត​លើកទី២​នៅថ្ងៃទី១៥ ខែឧសភាបែរជាមានលទ្ធផលវិជ្ជមានវិញ។ បើតាមស្ថានទូតវៀតណាម ក្រសួងសុខាភិបាលវៀតណាមបាន និង​កំពុង​សហការ​ដ៏ស្អិត​រមួត​និង​តែងតែមានការផ្លាស់ប្តូរព័ត៌មានជាមួយក្រសួងសុខាភិបាលកម្ពុជានិងបណ្តាប្រទេសដទៃក្នុង​គោល​បំណងរួមគឺខិតខំបង្ការនិងប្រឆាំងនឹងជំងឺឆ្លងនេះ៕

ដោយ៖ វង្ស​ រតនា គម្រោងសាងសង់ផ្លូវល្បឿនលឿន(Expressway ) ភ្នំពេញ-ព្រះសីហនុ មានប្រវែងប្រមាណជាង ១៩០ គីឡូម៉ែត្រ សម្រេចបានបាន ២០,៦៥% និងដោះស្រាយផលប៉ះពាល់បាន ៨៨,៨៤% គិតត្រឹមខែមេសា ឆ្នាំ ២០២០ ។ នេះបើតាមក្រសួងសាធារណការ និងដឹកជញ្ជូន នៅថ្ងៃទី១៩ ខែឧសភានេះ។ សូមបញ្ជាក់ដែរថា គម្រោងសាងសង់ផ្លូវល្បឿនលឿននេះ ត្រូវបានបើកការដ្ឋានសាងសង់ នាថ្ងៃទី ២២ ខែ មីនា ឆ្នាំ ២០២០ ដោយរយៈពេលសាងសង់ចំនួន ៤៨ខែ ហើយគ្រោងនឹងបញ្ចប់ការសាងសង់មុនពេលកំណត់ នាចុងឆ្នាំ២០២២ នេះ ដោយគ្រោងប្រើប្រាស់ថវិកាវិនិយោគ ប្រមាណ ២.០០០លានដុល្លារអាមេរិក។ លោកនាយករដ្ឋមន្ត្រី ហ៊ុន សែន កាលពីថ្ងៃទី១២ ខែធ្នូ ឆ្នាំ២០១៩នេះ បានអះអាងថា ការសាងសង់ផ្លូវល្បឿនលឿននៅកម្ពុជា (Expressway) គឺស្របទៅនឹងសមាហរណកម្ម ក្នុងតំបន់អាស៊ាន និងមហាអនុតំបន់ទន្លេមេគង្គ និងពិភពលោកទាំងមូល ដែលនឹងជួយតភា្ជប់បណ្តាញដឹកជញ្ជូន ក្នុងតំបន់ពីប្រទេសមួយទៅប្រទេសមួយទៀត៕​

ក្រោយការបង្រួមបង្រួមកម្ពុជាបានទាំងស្រុងនៅឆ្នាំ​១៩៩៨ នៅពេលដែលកម្លាំងចុងក្រោយរបស់ខ្មែរក្រហមចុះចូលជាមួយរដ្ឋាភិបាល ហើយកម្ពុជាក្លាយទៅជាប្រទេសដែលមានរដ្ឋធម្មនុញ្ញតែមួយ​រាជរដ្ឋាភិបាលតែមួយ រាជបល្ល័ង្កតែមួយ កម្ពុជាបានសម្រេចដាក់ចេញគោលដៅទៅជាប្រទេសដែលមានចំណូលមធ្យមកម្រិតខ្ពស់នៅឆ្នាំ​២០៣០​និងចំណូលខ្ពស់តែម្តងនៅឆ្នាំ​២០៥០។ តើកម្ពុជាមានសក្តានុពលគ្រឹះសំខាន់ៗអ្វីខ្លះដើម្បីក្លាយជាប្រទេសអ្នកមាននៅក្នុងរយៈពេល៣០ឆ្នាំខាងមុខ? តើកម្ពុជានៅត្រូវការអ្វីខ្លះ ខ្វះខាតអ្វីខ្លះដើម្បីសម្រេចតាមគោលដៅរបស់ខ្លួន?