ភ្នំពេញ៖ ឆន្ទៈ ស្មារតី និងការចូលរួមយ៉ាងមុះមុតជាមួយរាជរដ្ឋាភិបាលក្នុងយុទ្ធនាការប្រឆាំងកូវីដ១៩ សហភាពសហព័ន្ធយុវជនកម្ពុជា បាននាំយកថវិកាវិភាគទានរបស់សមាជិក សមាជិកា និងសប្បុរសជន ដែលបានចូលរួមបរិច្ចាគតាមរយៈ ស.ស.យ.ក. សរុបចំនួន១២៥,០០០ដុល្លារ ប្រគល់ជូនរាជរដ្ឋាភិបាល តាមរយៈលោក សេង ទៀង ។ ថវិកាវិភាគទាន ជាការគាំទ្រ និងចូលរួមចំណែកជាមួយរដ្ឋាភិបាល ដើម្បីប្រើប្រាស់សម្រាប់ការទិញវ៉ាក់សាំងជំងឺកូវីដ-១៩ ចាក់ជូនប្រជាពលរដ្ឋដោយឥតគិតថ្លៃ។ ទន្ទឹមនឹងការចូលរួមបរិច្ចាគជាថវិកា សហភាពសហព័ន្ធយុវជនកម្ពុជា បាននិងកំពុងចូលរួមចំណែកយ៉ាងសកម្មក្នុងយុទ្ធនាការ ប្រយុទ្ធប្រឆាំងនឹងជំងឺកូវីដ១៩ តាមរយៈការបន្តអនុវត្តយុទ្ធនាការបញ្ជ្រាបការយល់ដឹងពីគ្រោះថ្នាក់ នៃជំងឺកូវីដ១៩ ដល់ប្រជាពលរដ្ឋក្នុងមូលដ្ឋាន ដែលយុទ្ធនាការ ទទួលបានការចូលរួមយ៉ាងផុលផុសពីសមាជិក សមាជិកា និងយុវជនស្ម័គ្រចិត្ត ស.ស.យ.ក. រាជធានី-ខេត្ត ទាំង២៥។ តាមរយៈមូលនិធិ ស.ស.យ.ក ដូចជាតាមរយៈការចូលរួមឧបត្ថម្ភពីបណ្តាសប្បុរសជន និងដៃគូរសហការនានា គណៈកម្មាធិការកណ្តាល ស.ស.យ.ក. បានឧបត្ថម្ភសម្ភារចាំបាច់រួមមាន៖ ម៉ាស់ចំនួន៥០ម៉ឺនម៉ាស់ សាប៊ូលាងដៃ ១០៨០០ដុំ និងបដាអប់រំផ្សព្វផ្សាយចំនួន ៣០០០បដា ដើម្បីអោយសមាជិក សមាជិកាខ្លួន បន្តយុទ្ធនាការបញ្ជ្រាបការយល់ដឹងពីគ្រោះថ្នាក់នៃជំងឺកូវីដ១៩ ៕

ភ្នំពេញ៖ សហព័ន្ធសេវាអប់រំនៅកម្ពុជា (Federation of Education Services in Cambodia)ដែលមានសមាជិកប្រមាណ១០០សាលា-ក្រុមហ៊ុន បានប្រមូលថវិកាចូលគ្នាបាន ៥០០០ដុល្លារ ជូនសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ដើម្បីចូលរួមជាមួយរាជរដ្ឋាភិបាល ទិញវ៉ាក់សាំងប្រឆាំងជំងឺកូវីដ១៩ ។ បន្ទាប់ពីសម្តេចតេជោ ហ៊ុន សែន ប្រកាសពីការត្រៀមថវិកាទិញវ៉ាក់សាំងកូវីដ១៩ មកចាក់ជូនប្រជាពលរដ្ឋដោយឥតគិតថ្លៃ ស្របពេលដែលជំងឺកូវីដ១៩ បានឆ្លងចូលដល់សហគមន៍កម្ពុជា។ សម្តេចតេជោ ហ៊ុន សែន ថ្ងៃទី០៧ ខែធ្នូ ឆ្នាំ២០២០ បានប្រកាសពីការត្រៀមបម្រុងថវិកា សម្រាប់ទិញវ៉ាក់សាំងយកមកចាក់ ជូនប្រជាជនដោយឥតគិតថ្លៃ ជាជំហានដំបូងចំនួន ១លានដូស ដើម្បីចាក់ប្រជាពលរដ្ឋប្រមាណ ៥០ម៉ឺននាក់៕

ភ្នំពេញ៖ បំណែកព្រះបរមអដ្ឋិ ព្រះបរមរតនកោដ្ឋ សម្តេច នរោត្តម សីហនុ ត្រូវបានរាជានុញ្ញាតយាងចេញពីកុដិ សម្តេចព្រះធម្មលិខិត សៅរ៍ ចន្ទថុល្ល ព្រះចៅអធិការវត្តលង្កាព្រះកុមារាម ទៅគង់ប្រថាប់នៅព្រះវិហារវិញ ដើម្បីបើកជូនសាធារណជនចូលក្រាបថ្វាយបង្គំគោរពបូជា។ សម្តេចព្រះធម្មលិខិត សៅរ៍ ចន្ទថុល្ល ព្រះចៅអធិការវត្តលង្កាព្រះកុមារាម មានសង្ឃដីកានៅយប់ថ្ងៃទី១០ ខែធ្នូ ឆ្នាំ២០២០ ថា ព្រះអដ្ឋិ ព្រះបរមរតនកោដ្ឋ គ្រោងនឹងរៀបចំពិធីដង្ហែនៅចុងខែធ្នូ នេះ។ សម្តេចព្រះធម្មលិខិត សៅរ៍ ចន្ទថុល្ល បញ្ជាក់ថា ព្រះបរមអដ្ឋិ ព្រះបរមរតនកោដ្ឋ ដែលយាងចេញទៅគង់ប្រថាប់នៅលើព្រះវិហារនេះ គឺជាបំណែកព្រះបរមអដ្ឋិ ដែលព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរជាទីគោរពសក្ការា រាជានុញ្ញាតប្រគេនដល់ព្រះអង្គ ដើម្បីរៀបចំគង់ប្រថាប់ក្នុងព្រះកោដ្ឋថ្មកែវ ក្នុងកុដិ ដើម្បីបានគោរពបូជា និងសូត្រថ្វាយមហាព្រះរាជកុសលជាប្រចាំរៀងរាល់ថ្ងៃឧបោសថសីល​។ សម្តេចព្រះធម្មលិខិត សៅរ៍ ចន្ទថុល្ល មានសង្ឃដីកាបន្តថា ដោយសារព្រះអង្គ មានបំណងចង់ផ្សព្វផ្សាយ និងបើកទូលាយជូនមហាជនគ្រប់ស្រទាប់វណ្ណ មានឱកាសចូលក្រាបថ្វាយបង្គំ ព្រះបរមអដ្ឋិ ដែលកំពុងគង់ប្រថាប់នៅក្នុងវត្តលង្កា ទើបព្រះអង្គយាងចេញពីកុដិ ទៅតម្កល់នៅព្រះមហាបុស្បុកក្នុងព្រះវិហារវិញ។…