ហាណូយ៖ ក្នុងគោលបំណងចាត់វិធានការការពារសុខភាពសាធារណៈ និងលើកកម្ពស់ការអនុវត្តសីលធម៌បន្ថែមទៀត អាជ្ញាធរក្រុងហាណូយបានចេញសេចក្តីណែនាំមួយ ដើម្បីឈានទៅរកការលុបបំបាត់ការជួញដូរសាច់ឆ្កែ និងឆ្មាទូទាំងទីក្រុងរបស់ប្រទេសវៀតណាមមួយនេះ។ សេចក្តីណែនាំរបស់អនុនាយកដ្ឋានបសុព្យាបាល ជលផល និងបសុព្យាបាល នៃទីក្រុងហាណូយ បានគូសបញ្ជាក់ពីយុទ្ធសាស្ត្រពហុភាគី ដែលពាក់ព័ន្ធនឹងការអនុវត្ត និងកិច្ចសហប្រតិបត្តិការយ៉ាងតឹងរឹងនៅទូទាំងភ្នាក់ងាររដ្ឋាភិបាលជាច្រើន និងក្រុមអធិការកិច្ចចល័ត ដើម្បីហាមឃាត់ការជួញដូរសាច់ឆ្កែ និងឆ្មា។ ដោយលើកឡើងពីហានិភ័យធ្ងន់ធ្ងរ ដែលបង្កឡើងដោយសារការផ្ទុះជំងឺឆ្កែឆ្កួតនាពេលថ្មីៗនេះនៅទូទាំងប្រទេសវៀតណាម សេចក្តីណែនាំនេះសង្កត់ធ្ងន់លើតម្រូវការបន្ទាន់ ក្នុងការទប់ស្កាត់វិបត្តិសុខភាពសាធារណៈនៅទីក្រុងហាណូយ។ គិតមកទល់ពេលនេះ មានករណីផ្ទុះជំងឺឆ្កែឆ្កួតរហូតដល់ ១០២ករណីនៅក្នុងខេត្ត-ក្រុងចំនួន២៩។ ការផ្តោតសំខាន់នៃសារាចរណែនាំនេះដែរ គឺដើម្បីបង្កើនអត្រានៃការចាក់ថ្នាំបង្ការជំងឺឆ្កែឆ្កួតដល់ជាង ៩០ភាគរយ ក្នុងចំណោមសត្វឆ្កែចិញ្ចឹម និងសត្វឆ្មា តាមរយៈការជំរុញរួមគ្នាដោយអាជ្ញាធរបសុពេទ្យ។ សេចក្តីណែនាំនេះទៀតសោត ក៏អំពាវនាវឱ្យមានយុទ្ធនាការផ្សព្វផ្សាយការយល់ដឹងជាសាធារណៈយ៉ាងទូលំទូលាយ តាមរយៈប្រព័ន្ធផ្សព្វផ្សាយមហាជន ដើម្បីអប់រំប្រជាពលរដ្ឋ អំពីគ្រោះថ្នាក់នៃជំងឺឆ្កែឆ្កួត, តម្រូវការគ្រប់គ្រងសត្វចិញ្ចឹមប្រកបដោយការទទួលខុសត្រូវ និងដើម្បីលុបបំបាត់ការកើនឡើងការបរិភោគសាច់ឆ្កែ និងឆ្មា៕ ប្រភព៖ Vietnam News ប្រែសម្រួលដោយ៖ ឈឹម ទីណា

បាងកក៖ នៅក្នុងការបង្រ្កាបដ៏ធំមួយពាក់ព័ន្ធនឹងបោកបញ្ឆោតតាមប្រព័ន្ធអ៊ីនធឺណិតក្នុងរយៈពេល៧ខែមកនេះ ប៉ូលីសថៃបានចាប់ខ្លួនជនសង្ស័យជាង ១៤,០០០នាក់ ដែលពាក់ព័ន្ធនឹងករណីឆបោកតាមរយៈទូរស័ព្ទ, ផែនការវិនិយោគក្លែងក្លាយ និងគេហទំព័រល្បែងអនឡាញជាដើម។ ប្រតិបត្តិការដ៏ក្តៅគគុកនេះ ក៏បាននាំទៅដល់ការបង្កកទ្រព្យសម្បត្តិរហូតដល់ជាង ១២៣លានដុល្លារ ហើយការពិភាក្សាកំពុងដំណើរការជាមួយការិយាល័យប្រឆាំងនឹងការលាងលុយកខ្វក់ (Amlo) អំពីរបៀបដែលលុយទាំងនេះ អាចត្រូវបានបែងចែកក្នុងចំណោមជនរងគ្រោះ។ អ្នកនាំពាក្យរងប៉ូលិសថៃ លោក Siriwat Depor បាននិយាយថ្មីៗនេះថា បន្ទាប់ពីមានការណែនាំពីនាយករដ្ឋមន្ត្រីថៃ លោក Srettha Thavisin និងអគ្គស្នងការនគរបាលជាតិស្តីទី លោក Kittirat Panpet អាជ្ញាធរថៃកំពុងស៊ើបអង្កេតយ៉ាងយកចិត្តទុកដាក់ ក៏ដូចជាប្រយុទ្ធប្រឆាំងនឹងឧក្រិដ្ឋកម្មបច្ចេកវិទ្យា។ កិច្ចខិតខំប្រឹងប្រែងរបស់ពួកគេ បានផ្តល់លទ្ធផលយ៉ាងច្រើននៅក្នុងវិស័យសំខាន់ៗចំនួនបី ក្នុងនោះរួមមានការបង្ក្រាបឧក្រិដ្ឋជន, ការរំខានដល់ហេដ្ឋារចនាសម្ព័ន្ធ និងការរុះរើបណ្តាញហិរញ្ញវត្ថុរបស់ក្រុមឧក្រិដ្ឋជន។ អាជ្ញាធរថៃបានចាប់ខ្លួនជនសង្ស័យប្រមាណ ១៤,៨២៦នាក់ ដែលជាប់ពាក់ព័ន្ធនឹងប្រតិបត្តិការខុសច្បាប់ គិតចាប់ពីថ្ងៃទី០១ ខែតុលា ឆ្នាំ២០២៣ ដល់ថ្ងៃទី៣០ ខែមេសា ឆ្នាំ២០២៤។ ហើយនៅចន្លោះថ្ងៃទី០១ ខែវិច្ឆិកា ឆ្នាំ២០២៣ ដល់ថ្ងៃទី៣០ ខែមេសា ឆ្នាំ២០២៤ អាជ្ញាធរថៃបានបង្កកដោយជោគជ័យនូវទឹកប្រាក់ជាង ១២៣លានដុល្លារ៕ ប្រភព៖ The Nation ប្រែសម្រួលដោយ៖…

គូឡាឡាំពួរ៖ វិស័យទេសចរណ៍ម៉ាឡេស៊ីកំពុងខិតខំប្រឹងប្រែងលើកកម្ពស់ការធ្វើដំណើរក្នុងស្រុក ដើម្បីសម្រេចឱ្យបាន២៥ភាគរយ នៃគោលដៅភ្ញៀវទេសចរប្រមាណ ២២០លាននាក់នៅក្នុងត្រីមាសទីមួយ ឆ្នាំ២០២៤ នេះបើតាមការបញ្ជាក់របស់អគ្គនាយកនៃក្រសួងទេសចរណ៍ម៉ាឡេស៊ី លោក Manoharan Periasamy។ លោក Periasamy បានគូសបញ្ជាក់ថា សម្រាប់ឆ្នាំ២០២៤នេះ ក្រសួងទេសចរណ៍ សិល្បៈ និងវប្បធម៌ម៉ាឡេស៊ី បានកំណត់គោលដៅទាក់ទាញភ្ញៀវទេសចរក្នុងស្រុកប្រមាណ ២២០លាននាក់ ដោយចំណាយថវិកាសរុបប្រហែល ១ពាន់លានដុល្លារ។ លោកបន្តថា ដើម្បីធានាថា យើងអាចសម្រេចបាននូវគោលដៅនេះ យើងនឹងពង្រឹងសកម្មភាពផ្សព្វផ្សាយ ក្នុងគោលបំណងឈានទៅដល់គ្រប់ផ្នែកនៃសង្គម។ លោកបន្ថែមថា ក្រសួងទេសចរណ៍ម៉ាឡេស៊ីកំពុងចាត់វិធានការស្របតាមទិសដៅយុទ្ធសាស្ត្រ នៃវិស័យទេសចរណ៍ក្នុងស្រុក ដើម្បីបង្កើនការមកដល់នៃភ្ញៀវទេសចរក្នុងស្រុក, ជំរុញការធ្វើដំណើរអន្តររដ្ឋ និងលើកទឹកចិត្តសម្រាប់ផែនការធ្វើដំណើរកំសាន្តក្នុងឱកាសវិស្សមកាល។ ហើយនៅក្នុងត្រីមាសទីមួយឆ្នាំនេះ យើងរំពឹងថា នឹងឈានដល់ជិត២៥ភាគរយ នៃគោលដៅរបស់យើង ហើយយើងក៏កំពុងមើលឃើញនិន្នាការរបស់ប្រជាពលរដ្ឋក្នុងស្រុកទៅទស្សនាតំបន់ទេសចរណ៍នៅទូទាំងប្រទេសម៉ាឡេស៊ីផងដែរ។ ទន្ទឹមគ្នា យើងក៏សង្ឃឹមផងដែរថា នឹងអាចសម្រេចបាននូវគោលដៅស្រូបទាញភ្ញៀវទេសចរក្នុងស្រុកចំនួន ២២០លាននាក់៕ ប្រភព៖ The Star ប្រែសម្រួលដោយ៖ ឈឹម ទីណា

វែលីងតោន៖ រដ្ឋាភិបាលនូវែលសេឡង់បានប្រកាសកាលពីថ្ងៃអាទិត្យថា ខ្លួនគ្រោងនឹងលុបចោលការហាមឃាត់រយៈពេល ៥ឆ្នាំ ទៅលើការរុករកប្រេង និងឧស្ម័នថ្មី ខណៈការប្រកាសនេះ បានដុតបញ្ឆេះប្រតិកម្មពីសំណាក់អ្នក នយោបាយ និងក្រុមបរិស្ថាន។ ច្បាប់ដែលនឹងត្រូវដាក់ឱ្យប្រើប្រាស់នៅឆ្នាំ២០២៤នេះ នឹងបិទបញ្ចប់ការហាមប្រាមកន្លងមកនេះ ដែលនឹងអនុញ្ញាតឱ្យមានការរុករកប្រេង និងឧស្ម័នថ្មីនៅលើដីគោកមួយចំនួននៅលើកោះភាគខាងជើងរបស់ប្រទេសនូវែលសេឡង់។ រដ្ឋមន្ត្រីក្រសួងធនធានធម្មជាតិនូវែលសេឡង់ លោក Shane Jones បានគូសបញ្ជាក់ថា ការហាមប្រាមលើការរុករកប្រេង និងឧស្ម័នថ្មីកន្លងមកនេះ បានរារាំងដល់ការវិនិយោគអន្តរជាតិ និងធ្វើឱ្យសន្តិសុខថាមពលរបស់ប្រទេសជួបការលំបាក។ លោក Jones បាននិយាយនៅក្នុងសេចក្តីថ្លែងការណ៍មួយថា ឧស្ម័នធម្មជាតិមានសារៈសំខាន់ណាស់ ដើម្បីរក្សាការបំភ្លឺភ្លើងរបស់យើង និងដំណើរការសេដ្ឋកិច្ចរបស់យើង ជាពិសេសក្នុងអំឡុងពេលតម្រូវការអគ្គិសនីហក់ឡើងខ្ពស់បំផុត។ បើតាមលោក Jones វិស័យប្រេង និងរ៉ែបានរួមចំណែកថវិកា ១.២ពាន់លានដុល្លារ ដល់ផលិតផលក្នុងស្រុកសរុប (GDP) របស់ប្រទេសនូវែលសេឡង់ក្នុងឆ្នាំ ២០២០-២០២១។ ទោះបីជាយ៉ាងណា មេដឹកនាំក្រុមបរិស្ថានបាននិយាយថា រដ្ឋាភិបាលកំពុងផ្តល់ប្រេង និងឧស្ម័ន ចាក់ទៅលើភ្លើងវិបត្តិអាកាសធាតុ។ យើងអាចបង្កើតសេដ្ឋកិច្ចប្រកបដោយនិរន្តរភាព និងប្រសិទ្ធភាពជាងមុន ដោយផ្តល់អាទិភាពដល់ថាមពលស្អាត ដែលធ្វើការជាមួយបរិស្ថាន មិនមែនប្រឆាំងនឹងវាទេ៕ ប្រភព៖ AFP ប្រែសម្រួលដោយ៖ ឈឹម ទីណា

ប៊ែរឡាំង៖ មេដឹកនាំអាល្លឺម៉ង់បាននិយាយកាលពីថ្ងៃពុធថា រដ្ឋាភិបាលអាល្លឺម៉ង់នឹងបញ្ជាទិញយន្តហោះចម្បាំង Eurofighter ចំនួន ២០គ្រឿងបន្ថែមទៀត ដែលនេះជាវិធានការមួយ មានគោលបំណងពង្រឹងជំហរការពារជាតិរបស់ប្រទេស និងលើកកម្ពស់ឧស្សាហកម្មអវកាស។ អធិការបតីអាល្លឺម៉ង់ លោក អូឡាហ្វ សូលស៍ បានប្រកាសកាលពីថ្ងៃពុធ នៅឯពិធីបើកការតាំងពិព័រណ៍អាកាស (ILA) នៅខាងក្រៅទីក្រុងប៊ែរឡាំងថា រូបលោកមានការប្តេជ្ញាចិត្តខ្ពស់ ក្នុងការរក្សា និងពង្រីកសមត្ថភាពផលិតសព្វាវុធរបស់ប្រទេសអាល្លឺម៉ង់។ តួយ៉ាង អាល្លឺម៉ង់នឹងបញ្ជាទិញយន្តហោះ Eurofighter ចំនួន ២០គ្រឿងបន្ថែមពីលើយន្តហោះ ៣៨គ្រឿងដែលបានបញ្ជាទិញរួចហើយ។ លោក សូលស៍ បន្ថែមថា ការបញ្ជាទិញនេះ នឹងផ្តល់ភាពរីកចម្រើន និងផលចំណេញដល់ក្រុមហ៊ុន Airbus និងអ្នកផ្គត់ផ្គង់របស់ខ្លួន។ ការបញ្ជាទិញយន្តហោះចម្បាំង Eurofighter បន្ថែមនេះដែរ កើតឡើងស្របពេលដែលកងទ័ពអាកាសអាល្លឺម៉ង់ចង់យកពួកវាមកជំនួសយន្តហោះចម្បាំង Tornado ដែលមានវ័យចាស់ទៅហើយ។ គិតមកទល់ពេលនេះ ប្រទេសអាល្លឺម៉ង់មានយន្តហោះចម្បាំង Eurofighter ចំនួន ១៣៨គ្រឿងដែលកំពុងបម្រើការក្នុងជួរកងទ័ព៕ ប្រភព៖ defensenews ប្រែសម្រួលដោយ៖ ឈឹម ទីណា