គីនហ្សាសា ៖ មន្រ្តីកុងហ្គោបានប្រាប់កាសែត AFP បន្ទាប់ពីហេតុការណ៍ឆេះ និងក្រឡាប់លិចទូកមួយគ្រឿងថា ចំនួនអ្នកស្លាប់ពិតប្រាកដក្នុងសោកនាដកម្មនេះ មានត្រឹមតែ ៣៣ នាក់ប៉ុណ្ណោះ មិនដូចសេចក្តីរាយការណ៍ពីមុន ដែលថា មានរាប់រយនាក់ទេ។ អភិបាលក្រុង អឹបានដាកា លោក វីយ៉េស បាឡូ និយាយថា ក្នុងចំណោមអ្នកស្លាប់ទាំង ៣៣ នាក់ ក្នុងនោះសាកសពមនុស្ស ២៩ នាក់បានបញ្ចុះរួចរាល់ហើយ និង ៤ នាក់ទៀតកំពុងតម្កល់នៅទីបញ្ចុះសពនៅឡើយ។ លោកអភិបាលក្រុងបន្ថែមថា ចំណែកមនុស្សចំនួន ១៩៥ នាក់បានរួចផុតជីវិតពីសេចក្តីស្លាប់ រួមជាមួយជនរងគ្រោះរលាកភ្លើងចំនួន ២២ នាក់ ដែលត្រូវបានបញ្ជូនទៅព្យាបាលនៅមន្ទីរពេទ្យ វ៉ាន់ហ្គាតា។ ហេតុការណ៍នេះបានកើតឡើងកាលពីយប់ថ្ងៃអង្គារសប្តាហ៍មុន នៅលើដងទន្លេកុងហ្គោ។ ទូកឈើផ្ទុកអ្នកដំណើរប្រហែល ៤០០ នាក់នោះ ត្រូវភ្លើងឆេះនៅជិតទីក្រុង អឹមបានដាកា ក្រោយចាកចេញពីកំពង់ផែ ម៉ាតាន់គូម៊ូ ទៅកាន់តំបន់ បូឡូមបា ក្នុងខេត្ត អ៊ីក្វាធ័រ។ ប្រភពបានឱ្យដឹងថា ឧប្បត្តិហេតុនេះបង្កឡើងពីអ្នកចម្អិនអាហារនៅលើទូក ហើយអ្នកដំណើរជាច្រើននាក់ រួមទាំងស្ត្រី និងកុមារបានស្លាប់បន្ទាប់ពីលោតចូលទឹក៕…

បរទេស ៖ យោធាអ៊ីស្រាអែលបានសារភាពថា ខ្លួនបានវាយប្រហារច្រលំមនុស្ស បណ្តាលឲ្យស្លាប់មន្ត្រីពេទ្យ នៅតំបន់ហ្គាហ្សា ចំនួន១៥នាក់។ របាយការណ៍បញ្ជាក់ថា កំហុសឆ្គងនេះបានកើតឡើង កាលពីថ្ងៃអាទិត្យ ហើយមេបញ្ជាការ ដែលបញ្ជាការវាយប្រហារ នឹងត្រូវបណ្តេញចេញ។ សេចក្តីសង្ខេបនៃការស៊ើបអង្កេតបាននិយាយថា «ការពិនិត្យបានរកឃើញ ការបរាជ័យផ្នែកវិជ្ជាជីវៈមួយចំនួន បំពានលើការបញ្ជា និងការខកខាន ក្នុងការរាយការណ៍ពេញលេញ អំពីឧប្បត្តិហេតុនេះ»។ ឧត្តមសេនីយទោ Yoav Har-Even ដែលដឹកនាំការស៊ើបអង្កេត បានទទួលស្គាល់ថា ទាហានបានប្រព្រឹត្តកំហុស ដោយអះអាងថា «យើងអាចនិយាយបានថា វាជាកំហុស។ យើងមិនគិតថាវាជាកំហុសប្រចាំថ្ងៃ នោះទេ»។ គួររម្លឹកថា ក្រុមគ្រូពេទ្យ និងបុគ្គលិកសង្គ្រោះផ្សេងទៀត ត្រូវបានសម្លាប់ នៅពេលឆ្លើយតបទៅនឹងការហៅទូរស័ព្ទ ដែលមានទុក្ខព្រួយ នៅជិតទីក្រុង Rafah ភាគខាងត្បូងនៃ តំបន់ Gaza កាលពីខែមីនា ដែលជាថ្ងៃ នៃការវាយលុកជាថ្មី របស់អ៊ីស្រាអែល នៅក្នុងទឹកដីដែលគ្រប់គ្រងដោយក្រុមហាម៉ាស៕ ប្រភពពី AFP ប្រែសម្រួល៖ សារ៉ាត