សម្ដេចតេជោ ហ៊ុន សែន អញ្ជើញដឹកនាំគណៈប្រតិភូដល់ទីក្រុងសេអ៊ូលដោយសុវត្ថិភាព ដើម្បីបំពេញទស្សនកិច្ចនៅកូរ៉េខាងត្បូង និងធ្វើជាសហប្រធានកិច្ចប្រជុំកំពូលសន្តិភាពពិភពលោកឆ្នាំ២០២២ ពីថ្ងៃទី១០-១៣ កុម្ភៈ ឆ្នាំ២០២២។ នៅក្នុងកិច្ចប្រជុំកំពូលសន្តិភាពពិភពលោក នឹងមានការចូលរួមពីបណ្តាវាគ្មិនសំខាន់ៗ និងអ្នកចូលរួមមកពី ១៥៧ប្រទេស ដើម្បីស្វែងរកក្តីសង្ឃឹមក្នុងការបង្រួបបង្រួមឧបទ្វីបកូរ៉េប្រកបដោយសន្តិវិធី។ សម្ដេចតេជោនឹងជួបជាមួយលោកប្រធានាធិបតីកូរ៉េ Moon Jae-in ដើម្បីពិភាក្សាអំពីទំនាក់ទំនង និងកិច្ចសហប្រតិបត្តិការទ្វេភាគី។ សម្ដេចតេជោក៏នឹងជួបជាមួយលោក Ban Ki-moon អតីតអគ្គលេខាធិការអង្គការសហប្រជាជាតិ និងឥស្សរជននយោបាយ និងធុរជនផ្សេងទៀត។

📷-អ្នកខេត្តសៀមរាប

សម្តេចតេជោ ហ៊ុន សែន ដឹកនាំគណៈប្រតិភូជាន់ខ្ពស់ទៅបំពេញទស្សនកិច្ចនៅប្រទេសកូរ៉េខាងត្បូង និងធ្វើជាសហប្រធានកិច្ចប្រជុំកំពូលសន្តិភាពពិភពលោកឆ្នាំ២០២២ ក្រោមមូលបទ “ឆ្ពោះទៅកាន់សន្តិភាពនៅឧបទ្វីបកូរ៉េ” ពីថ្ងៃទី១០-១៣ កុម្ភៈ ២០២២។

រដ្ឋមន្ត្រីថៃចំនួន ៧រូបដែលមកពីគណបក្សភូមិចៃថៃ ដែលធំជាងគេលំដាប់ទី២ នៅក្នុងសម្ព័ន្ធគណបក្សកាន់អំណាចចំនួន ១៨ របស់ថៃ បានធ្វើពហិការមិនចូលប្រជុំគណៈរដ្ឋមន្ត្រី ដែលដឹកនាំដោយលោកនាយករដ្ឋមន្ត្រី Prayut Chan-ocha កាលពីថ្ងៃទី៨ កុម្ភៈ កន្លងទៅ។ ការធ្វើពហិការនេះជាការជំទាស់នឹងផែនការរបស់រដ្ឋាភិបាលក្នុងការបន្តកុងត្រា ៣០ឆ្នាំទៀតឱ្យក្រុមហ៊ុនសេវារថភ្លើង BTS Group ក្នុងការប្រតិបត្តិការរថភ្លើងអាកាសក្នុងរាជធានីបាងកក ដោយសម្អាងថា ក្រុមហ៊ុន BTS នឹងដំឡើងតម្លៃសំបុត្រ។ ផ្ទុយទៅវិញ ការបន្តកុងត្រានេះទទួលបានការគាំទ្រពីសំណាក់គណបក្សប្រាឡាងប្រាឆារ៉ាត់ ដែលជាគណបក្សរបស់លោក Prayut។ បច្ចុប្បន្ន រដ្ឋាភិបាលថៃបានបញ្ជូនសំណើបន្តកុងត្រានេះទៅកាន់ក្រសួងមហាផ្ទៃវិញ និងបង្គាប់ឱ្យពិភាក្សាជាមួយអង្គភាពពាក់ព័ន្ធ ដែលជំទាស់លើបញ្ហានេះ។ ប្រភព៖ CNA

ដោយមានសមាជិកសភារាប់សិបនាក់មកពីគណបក្សរបស់លោកផ្ទាល់ធ្វើការទាមទារឱ្យលោកលាលែងពីតំណែង នាយករដ្ឋមន្ដ្រីអង់គ្លេសលោក Boris Johnson បានធ្វើការរុះរើគណៈរដ្ឋមន្ត្រី និងថ្នាក់ដឹកនាំគណបក្ស រួមទាំងតែងតាំងមន្ត្រីវិន័យគណបក្សថ្មី ដើម្បីទប់ទល់នឹងការបះបោរផ្ទៃក្នុង ជុំវិញរឿងអាស្រូវការធ្វើពិធីជប់លៀងក្នុងកំឡុងពេលបិទខ្ទប់ប្រទេស។ បើទោះបីជាលោក Johnson បានបង្ហាញការប្ដេជ្ញាចិត្តយ៉ាងម៉ឺងម៉ាត់បែបណាក៏ដោយ អ្នកវិភាគមួយចំនួនយល់ថា វិធានការរបស់លោកគឺយឺតពេលពេកហើយ ក្នុងការជួយសង្គ្រោះលោក ព្រោះប៉ូលិសអង់គ្លេសបានបើកការស៊ើបអង្កេតការចោទប្រកាន់ដែលថាលោកបានរំលោភច្បាប់បិទខ្ទប់ប្រទេសដែលខ្លួនលោកបានដាក់ចេញ។ លោក Johnson កំពុងប្រឈមមុខនឹងការធ្លាក់ការគាំទ្រក្នុងការស្ទង់មតិសាធារណ ខណៈបេក្ខជនមួយចំនួនដូចជាអធិការបតីក្រសួងរតនាគារអង់គ្លេសលោក Rishi Sunak កំពុងត្រៀមខ្លួនប្រជែងយកតំណែងប្រមុខរដ្ឋាភិបាល។ នៅពេលដែលនាយករដ្ឋមន្ដ្រីណាម្នាក់ប្រឈមមុខនឹងការទម្លាក់ពីតំណែង វិន័យក្នុងចំណោមសមាជិកសភាតែងតែមានការបែកបាក់ មន្ត្រីរាជការបាត់បង់ការគោរពចំពោះរដ្ឋាភិបាល ហើយបេក្ខជនឈានមុខគេធ្វើការបដិសេធមិនទទួលមុខងារក្នុងរដ្ឋាភិបាល។ បន្ថែមពីលើនេះ បណ្ដាញសារព័ត៌មានចាប់ផ្ដើមបង្ហាញអរិភាពចំពោះរដ្ឋាភិបាល ខណៈដែលការប្រកាសគោលនយោបាយថ្មីគឺត្រូវបានគ្របពីលើដោយការពិភាក្សាអំពីមេដឹកនាំថ្មីទៅវិញ។ ប្រភព៖ New York Times

ប្រភព៖ យុវជនប្រតិកម្មរហ័សរដ្ឋបាលក្រុងសៀមរាប

📷 Andrew Kobeszko