១. អាជ្ញាធរ រកឃើញស្ថានីយប្រេងអន្ធនៈជិតពាក់កណ្តាលនៃស្ថានីយសរុបជាង ៨០០ បានប្រព្រឹត្តអំពើកេងចំណេញទាំងបរិមាណ និងគុណភាពពីអតិថិជន ខណៈអាជ្ញាធរព្រមានពីការព្យួរ ឬដកហូតអាជ្ញាបណ្ណ – RFI ២. ៣សប្ដាហ៍នៃខែតុលា CDC បានអនុម័តគម្រោងវិនិយោគថ្មីចំនួន ៥ នៅក្នុងវិស័យឧស្សាហកម្មនិងរោងចក្រ ដែលមានទុនសរុបជាង ១៩.១ លានដុល្លារ និងបង្កើតការងារជាង ៦ពាន់កន្លែង – AMS Economy ៣. មន្ទីរវប្បធម៌ខេត្តស្ទឹងត្រែង កំពុងសិក្សាពីលទ្ធភាពក្នុងការចងក្រងឯកសារផ្លូវការនៃនំអន្សមជ្រូក និងមុខម្ហូប ដូចជា ឡាប ភ្លា ដែលសុទ្ធសឹងតែជាមរតកប្រចាំខេត្តស្ទឹងត្រែង – ភ្នំពេញបុស្តិ៍ ៤. កូរ៉េខាងជើង បានចោទប្រកាន់អាមេរិកជាថ្មីម្តងទៀតបានថា ប្រើប្រាស់ស្តង់ដារទ្វេ និងមានប្រតិកម្មហួសហេតុទៅនឹងការបាញ់មីស៊ីលបាលីស្ទិកចេញពីនាវាមុជទឹករបស់ខ្លួននាពេលថ្មីៗនេះ – Yahoo ៥. អតីតប្រធានាធិបតីអាមេរិកលោក Donald Trump នឹងបើកដំណើរការកម្មវិធីបណ្តាញសង្គមផ្ទាល់ខ្លួនឈ្មោះថា TRUTH Social ដើម្បីតតាំង ជាមួយក្រុមហ៊ុនធំៗ ដូចជា Twitter និង Facebook ដែលរារាំងគាត់ពីវេទិការបស់ពួកគេ…

ប្រធានាធិបតីអាមេរិកលោក Joe Biden បានបង្កើនកិច្ចខិតខំប្រឹងប្រែងផ្សព្វផ្សាយសេចក្ដីព្រាងច្បាប់ចំណាយគាំពារសង្គមចំនួន ៣,៥ ទ្រីលានដុល្លារទៅកាន់អ្នកបោះឆ្នោត ខណៈពេលដែលមានការព្រួយបារម្ភថាសេតវិមានបានលាយឡំសាររបស់ខ្លួន ព្រមទាំងកំពុងមានការបែកបាក់ផ្ទៃក្នុងជុំវិញការអនុម័តច្បាប់នេះផងដែរ។ ក្នុងរយៈពេលប៉ុន្មានខែចុងក្រោយនេះ អត្រាគាំទ្ររបស់លោក Biden បានធ្លាក់ចុះយ៉ាងខ្លាំង បន្ទាប់ពីសមាជិកសភាមកពីគណបក្សរបស់លោកចាប់ផ្ដើមឈ្លោះប្រកែកគ្នាជុំវិញព័ត៌មានលម្អិតនៃសេចក្ដីព្រាងច្បាប់។ ជម្លោះជុំវិញសេចក្ដីព្រាងច្បាប់នេះក៏បានគំរាមកំហែងដល់សេចក្ដីព្រាងច្បាប់មួយផ្សេងទៀត ដែលគ្រោងចំណាយទឹកប្រាក់ចំនួន ១,២ទ្រីលានដុល្លារ ដើម្បីជួសជុលហេដ្ឋារចនាសម្ព័ន្ធកំពុងទ្រុឌទ្រោមរបស់អាមេរិក។ ជម្លោះបែបនេះអាចធ្វើឱ្យមានការបរាជ័យការអនុម័តសេចក្ដីព្រាងច្បាប់ទាំងពីរ ហើយបង្កឱ្យមានការព្រួយបារម្ភអំពីអនាគតរបស់គណបក្សប្រជាធិបតេយ្យក្នុងការបោះឆ្នោតសភាអាមេរិកនៅឆ្នាំក្រោយ។ ការស្ទង់មតិសាធារណជនបានបង្ហាញថាមានប្រជាពលរដ្ឋតិចណាស់ដែលយល់ដឹងអំពីគោលនយោបាយ និងកម្មវិធីសង្គមដែលច្បាប់នេះនឹងបង្កើត។ ក្រុមអ្នកវិភាគលើកឡើងថា ដើម្បីពង្រឹងការគាំទ្រសាធារណៈ គណបក្សប្រជាធិបតេយ្យត្រូវតែកាត់បន្ថយការឈ្លោះប្រកែកគ្នាជាសាធារណៈ ហើយបង្កើតសារទំនាក់ទំនងមួយដែលខ្លីៗ ងាយយល់ សម្រាប់អប់រំដល់ពលរដ្ឋរបស់ខ្លួន។ ប្រភព៖ Insider Voice

មនុស្សជាង ១៥០នាក់ក្នុងប្រទេសឥណ្ឌា និងនេប៉ាល់បានស្លាប់ដោយសារគ្រោះទឹកជំនន់ និងការរអិលបាក់ដីដែលបោកបក់ផ្ដាច់ផ្លូវ និងផ្ទះសម្បែងក្នុងរយៈពេលប៉ុន្មានថ្ងៃចុងក្រោយនេះ ខណៈមនុស្សរាប់សិបនាក់ទៀតកំពុងបាត់ខ្លួន។ ភ្លៀងធ្លាក់ខ្លាំងនៅរដ្ឋ Uttarakhand ភាគខាងជើងប្រទេស បានបង្កឱ្យមានការបាក់ដី និងបំផ្លាញសំណង់អគារជាច្រើនខ្នង។ មនុស្ស ៤៦នាក់ស្លាប់ និង ១១នាក់ផ្សេងទៀតកំពុងបាត់ខ្លួន ក្នុងរដ្ឋ Uttarakhand ខណៈចំនួនអ្នកស្លាប់កើនឡើងដល់ ៣៩នាក់នៅរដ្ឋ Kerala។ រីឯប្រទេសនេប៉ាល់វិញ ចំនួនអ្នកស្លាប់បានកើនឡើងដល់ ៧៧នាក់គិតត្រឹមថ្ងៃទី២០ តុលា បន្ទាប់ពីភ្លៀងធ្លាក់ខ្លាំងបីថ្ងៃជាប់គ្នានៅតំបន់ភាគខាងកើត និងខាងលិចក្បែរព្រំដែនឥណ្ឌា។ នាយកដ្ឋានឧតុនិយមឥណ្ឌាបានព្រមានអំពីការធ្លាក់ភ្លៀងខ្លាំងជោគជាំនៅតំបន់ភាគខាងជើង ហើយអាជ្ញាធរបានបិទសាលារៀន និងហាមឃាត់រាល់សកម្មភាពសាសនា និងទេសចរណ៍នៅក្នុងរដ្ឋ។ ការរអិលបាក់ដីតែងកើតមាននៅក្នុងតំបន់ហិមាល័យ និងកើតមានកាន់តែញឹកញាប់ ដោយសារភ្លៀងធ្លាក់ខ្លាំងខុសពីធម្មតា ការរលាយផ្ទាំងទឹកកក ការសាងសង់ទំនប់វារីអគ្គីសនី និងការកាប់បំផ្លាញព្រៃឈើផងដែរ។ ប្រភព៖ Aljazeera

ព័ត៌មាននៃការកែប្រែឈ្មោះនេះ បានលេចឡើងខណៈពេលដែលក្រុមហ៊ុននេះកំពុងប្រឈមមុខនឹងការត្រួតពិនិត្យពីសំណាក់រដ្ឋាភិបាលអាមេរិកកាន់តែច្រើនឡើងៗ អំពីការអនុវត្តអាជីវកម្មរបស់ខ្លួន។ អ្នកតាក់តែងច្បាប់មកពីគណបក្សទាំងពីរក្នុងសភាអាមេរិកតែងបង្ហាញពីការមិនពេញចិត្តចំពោះក្រុមហ៊ុនហ្វេសប៊ុក ដោយបន្តរិះគន់ក្រុមហ៊ុននេះរហូតមក។ ការផ្លាស់ប្តូរឈ្មោះថ្មីនេះ ក៏បានឆ្លុះបញ្ចាំងពីចំណាប់អារម្មណ៍របស់ហ្វេសប៊ុកលើការបង្កើត Metaverse ដែលជាពិភពអនឡាញមួយដែលអ្នកប្រើប្រាស់អាចប្រើឧបករណ៍ផ្សេងៗដើម្បីផ្លាស់ទី និងទំនាក់ទំនងគ្នាក្នុងមជ្ឈដ្ឋានបែបនិម្មិតបាន។ ប្រភព៖ Aljazeera

អង់គ្លេស និងអាឡឺម៉ង់ កំពុងរងគ្រោះដោយសារកង្វះសង្វាក់ផ្គត់ផ្គង់ផ្ទាល់ខ្លួន។ ក្រុមពាណិជ្ជកម្មក្រុងឡុងដ៍ បានព្រមានថាវិបត្តិសង្វាក់ផ្គត់ផ្គង់របស់ប្រទេសនឹងបន្តដល់ឆ្នាំ២០២៣ ឬយូរជាងនេះ។ កំឡុងវិបត្តិកូវីដ១៩ បានធ្វើឱ្យមានការកើនឡើងសម្រាប់ការដឹកទំនិញតាមផ្លូវអាកាស ហើយវាជាឱកាសដ៏ល្អសម្រាប់ឧស្សាហកម្មផ្នែកអាកាសចរណ៍។ ការដឹកជញ្ជូនតាមយន្តហោះ ជាវិធីសាស្ត្រមួយរហ័ស ប៉ុន្ដែវាត្រូវចំណាយច្រើនសម្រាប់វត្ថុធ្ងន់ៗ។ ទំនិញដឹកតាមអាកាសភាគច្រើនរក្សាទុកនៅក្នុងផ្នែកខាងក្រោមរបស់យន្ដហោះដឹកអ្នកដំណើរតែប៉ុណ្ណោះ។ ការកើនឡើងនេះឆ្លុះបញ្ចាំងមិនត្រឹមតែតម្រូវការខ្ពស់នោះទេតែវាក៏បញ្ជាក់ថាសេវាដឹកជញ្ជូនរបស់ក្រុមហ៊ុនអាកាសចរណ៍ក៏នៅខ្វះសមត្ថភាពដែរ។ តម្លៃដឹកជញ្ជូនគឺជាសមាសធាតុសំខាន់មួយនៃថ្លៃដើមពាណិជ្ជកម្ម ដូច្នេះការឡើងថ្មីនៃតម្លៃនេះបង្កជាបញ្ហាប្រឈមមួយបន្ថែមទៀតចំពោះសេដ្ឋកិច្ចពិភពលោក។ ដើម្បីកាត់បន្ថយស្ថានភាពនេះ UNCTAD បានគូសបញ្ជាក់ពីបញ្ហាចំនួនបីដែលត្រូវការ ការយកចិត្តទុកដាក់គឺ៖ ១. កែទម្រង់ការសម្របសម្រួលពាណិជ្ជកម្ម និងឱ្យប្រសើរឡើងនូវការតាមដាន ២. ការព្យាករណ៍ពាណិជ្ជកម្មតាមសមុទ្រ ៣. ពង្រឹងលទ្ធភាពប្រកួតប្រជែងថ្នាក់ជាតិ។ ប្រភព៖ UNCTAD

ចេញព្រះវស្សា គឺការផុតកំណត់ចាំព្រះវស្សាបីខែនៃការចូលវស្សាហើយដើម្បីចេញព្រះវស្សា នៅថ្ងៃ ១៥ កើត ពេញបូណ៌មី ខែ អស្សុជ ឆ្នាំនេះ ត្រូវនឹងថ្ងៃទី២១ តុលា ភិក្ខុសង្ឃ ត្រូវធ្វើកិច្ចចេញព្រះវស្សារបស់ខ្លួនវិញដែលហៅថា “បវរណាចេញវស្សា”។ ពិធីបវរណានេះ ភិក្ខុមួយអង្គៗត្រូវប្រកាសខ្លួនដាក់កាយឱ្យសង្ឃ ឬបុគ្គលគ្នាឯងរិះគន់ ក្រែងមានប្រព្រឹត្តខុសឆ្គង ឬលើសបញ្ញត្តិណាមួយ ក្នុងការចាំព្រះវស្សា ៣ខែកន្លងមកនោះ ទោះដោយការឃើញក្តី ការស្តាប់ឮក្តី និងការរង្កៀសក្តី ក៏សួមឱ្យលើកឡើង និងបង្ហាញនូវភ័ស្តុតាងច្បាស់លាស់ដើម្បីភិក្ខុប្រព្រឹត្តខុសនោះ បានកែប្រែឱ្យប្រសើរឡើងវិញ ហើយកិច្ចនេះហៅថា “សម្តែងអាបត្តិ”។ 📸 Mardy Suong

សម្ដេចតេជោ ហ៊ុន សែន បញ្ជាក់ថា មិនមានការអនុញ្ញាតឱ្យរៀបចំអាពាហ៍ពិពាហ៍ឡើងវិញនោះឡើយ ហើយសារសំឡេងរបស់សម្ដេច ដែលត្រូវបានចែកចាយតាមបណ្ដាញសង្គមនៅថ្ងៃនេះ គឺជាសារសំឡេងចាស់របស់សម្ដេចកាលពីខែវិច្ឆិកា ២០២០។ ប្រភព៖ FN

📷-ទៅលេងបន្ទាយស្រី