ប៉េកាំង ៖ ក្រុមហ៊ុនបច្ចេកវិទ្យាយក្ស Huawei បានបញ្ចេញរូបភាព និងវីដេអូបង្ហាញពីស្ថានីយសាកថ្មឡានអគ្គិសនីស្វ័យប្រវិត្តប្រើប្រាស់ដៃមនុស្សយន្ត មានឈ្មោះថា Huawei robotic EV Changer ដែលអាចសាកឡានអគ្គិសនីដោយមិនចាំបាច់អ្នកបើកបរចុះពីឡាន។ នៅក្នុងឃ្លីបវីដេអូនោះ ក្រុមហ៊ុនបច្ចេកវិទ្យាយក្សរបស់ប្រទេសចិនមួយនេះ ក៏បានបញ្ចេញឡានអគ្គិសនីដ៏ប្រណីតម៉ូដែល Maextro S800 ជាប្រភេទឡានបើកបរដោយខ្លួនឯងទៅកាន់ទីតាំងស្ថានីយសាកថ្ម។ នៅពេលដំណើរការមុខងារ Unmanned robotic arm fuction ដៃមនុស្សយន្តនឹងចាប់ផ្តើមសម្គាល់មុខងារ រួចដោតបញ្ចូលថ្ម និងដកចេញដោយស្វ័យប្រវត្តិនៅពេលសាកថ្មពេញ។ ស្ថានីយសាកថ្មស្វ័យប្រវត្តិ Huawei robotic EV Changer ដែលត្រូវបានបំពាក់នៅលើឆ្នាំងសាកដ៏ទំនើប មានកម្លាំង ៦០០គីឡូវ៉ាត់នេះ អាចផ្តល់ថាមពលបាន ១០០គីឡូវ៉ាត់ម៉ោងក្នុងរយៈពេល ១០នាទី ហើយ Huawei គ្រោងនឹងចាប់ផ្តើមដាក់ឲ្យប្រើប្រាស់ជាផ្លូវការនៅក្នុងត្រីមាសទី២ ឆ្នាំ ២០២៥។ ទោះបីជាក្រុមហ៊ុន Huawei មិនបានផ្តល់ព័ត៌មានលម្អិតផ្លូវការ ប៉ុន្តែផ្អែកតាមការចេញផ្សាយដោយសារព័ត៌មាន CarNewsChina ស្ថានីយសាកថ្មស្វ័យប្រវត្តិនេះ នឹងអាចប្រើប្រាស់បានជាមួយសមាជិក Huawei Superchargin Alliance ទាំងអស់ រួមទាំងឡានរបស់ក្រុមហ៊ុន BYD,…

ស្តុកខុល ៖ ប្រទេសស៊ុយអែតនាពេលថ្មីៗនេះ បានចាប់ផ្តើមសាងសង់រោងចក្រស្តុកទុកឥន្ធនៈនុយក្លេអ៊ែរចម្រាញ់រួចធំទីពីរនៅលើពិភពលោក ដោយកាកសំណល់វិទ្យុសកម្មនឹងត្រូវរក្សាទុកបានរហូតដល់ ១០០,០០០ឆ្នាំ។ ប្រទេសស៊ុយអែត ត្រូវបានរំពឹងថា នឹងចំណាយលុយជាង ១ពាន់លានដុល្លារ ដើម្បីសាងសង់រោងចក្រ Forsmark នេះ។ រោងចក្រ Forsmark មានទីតាំងស្ថិតចម្ងាយប្រហែល ១៥០គីឡូម៉ែត្រ ភាគខាងជើងរដ្ឋធានីស្តុកខុល របស់ប្រទេសស៊ុយអែត។ វានឹងក្លាយជាកន្លែងចុងក្រោយ សម្រាប់ផ្ទុកកាកសំណល់វិទ្យុសកម្មប្រមាណ ១២,០០០តោន។ ក្រុមហ៊ុនគ្រប់គ្រងឥន្ធនៈនុយក្លេអ៊ែរ និងកាកសំណល់ (SKB) របស់ស៊ុយអែត បានឱ្យដឹងថា រោងចក្រនេះ នឹងទទួលយកកាកសំណល់វិទ្យុសកម្មដំបូងនៅចុងទសវត្សរ៍ឆ្នាំ ២០៣០ ប៉ុន្តែវានៅពុំទាន់អាចដំណើរការបានពេញលេញទេ រហូតទល់តែឆ្នាំ ២០៨០ ជាពេលដែលត្រូវចាក់បំពេញផ្លូវរូងក្រោមដី។ ផ្អែកតាមការវយតម្លៃរបស់សមាគមនុយក្លេអែរពិភពលោក បានឱ្យដឹងថា មានឥន្ធនៈនុយក្លេអ៊ែរប្រមាណ ៣០០,០០០តោន ត្រូវបានប្រើប្រាស់ទូទាំងពិភពលោក និងត្រូវការបញ្ចេញចោល។ ភាគច្រើនវាត្រូវបានរក្សាទុកក្នុងស្រះទឹកត្រជាក់ក្បែរម៉ាស៊ីនរ៉េអាក់ទ័រដែលផលិតវា។ បន្ថែមលើឥន្ធនៈដែលចម្រាញ់រួច ប្រទេសមួយចំនួននៅអឺរ៉ុប និងជុំវិញពិភពលោក ក៏គ្រោងសាងសង់ម៉ាស៊ីនរ៉េអាក់ទ័រថ្មី ដើម្បីបង្វែរការផលិតថាមពលអគ្គិសនីចេញឆ្ងាយពីឥន្ធនៈហ្វូស៊ីលផងដែរ៕ ប្រភព ៖ Interesting Engineering ប្រែសម្រួល ៖ ឈឹម ទីណា

តូក្យូ ៖ យោងតាមការស្ទង់មតិរបស់ក្រុមហ៊ុន Tokyo Shoko Research បានឱ្យដឹងនាពេលថ្មីៗនេះថា ក្នុងឆ្នាំ ២០២៤ ចំនួនមុខជំនួញប្រកាសក្ស័យធននៅជប៉ុន បានកើនឡើងលើសពី ១០,០០០ទីតាំងជាលើកដំបូង ក្នុងរយៈពេល ១១ឆ្នាំ ដោយសារតែអាជីវកម្មទាំងនោះ ប្រឈមនឹងកង្វះកម្លាំងពលកម្ម និងតម្លៃទំនិញនាំចូលកើនឡើងព្រោះប្រាក់យ៉េនធ្លាក់ចុះខ្លាំង។ ក្រុមហ៊ុនស្រាវជ្រាវឥណទានមួយនេះ បានគូសបញ្ជាក់ថា មូលហេតុដែលមុខជំនួញទាំងនោះក្ស័យធន គឺដោយសារសហគ្រាសធុនតូច និងមធ្យម ភាគច្រើនបានរងផលប៉ះពាល់យ៉ាងធ្ងន់ធ្ងរ ព្រោះតែវិធានការពន្យារពន្ធពិសេសដែលត្រូវបានណែនាំក្នុងអំឡុងពេលផ្ទុះជំងឺរាតត្បាត COVID-19 ដែលបណ្តាលឱ្យពួកគេមានបន្ទុកហិរញ្ញវត្ថុខ្លាំង។ ចំនួនអាជីវកម្មក្ស័យធនក្នុងឆ្នាំ ២០២៤ ដែលមានរហូតដល់ ១០,០០៦ទីតាំងនេះ បង្ហាញពីតួលេខកើនឡើងប្រមាណ ១៥.១ភាគរយ បើធៀបនឹងឆ្នាំមុន ហើយចំនួននេះជាការកើនឡើងចំនួនបីឆ្នាំជាប់ៗគ្នា។ ក្នុងនោះ សហគ្រាសធុនតូច និងមធ្យមចំនួន ១០.០០៤សហគ្រាស។ បំណុលសរុបមានជាង ១៥ពាន់លានដុល្លារ ធ្លាក់ចុះ ២.៤ភាគរយ បើធៀបនឹងឆ្នាំ ២០២៣៕ ប្រភព ៖ Japan Today ប្រែសម្រួល ៖ ឈឹម ទីណា