ហ្ស៊េរុយសាឡិម៖ អ៊ីស្រាអែលបានប្តេជ្ញាកាលពីពុធថា នឹងតាមកម្ចាត់លោក Yahya Sinwar បន្ទាប់ពីរូបលោកត្រូវបានតែងតាំងជាមេដឹកនាំថ្មីរបស់ក្រុមហាម៉ាស់ប៉ាឡេស្ទីន ក្រោយការធ្វើឃាតមេដឹកនាំមុន គឺលោក Ismail Haniyeh នៅប្រទេសអ៊ីរ៉ង់ ខណៈដែលសង្រ្គាមហ្គាហ្សាឈានចូលដល់ខែទី ១១។ ថ្លែងនៅឯមូលដ្ឋានយោធាមួយកន្លែង នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ បាននិយាយថា អ៊ីស្រាអែលបានប្តេជ្ញាចិត្តក្នុងការការពារខ្លួន ហើយបានប្រាប់ទៅកាន់មេដឹកនាំហាម៉ាស់ថ្មីថា អ៊ីស្រាអែលបានត្រៀមខ្លួនរួចហើយ ទាំងការការពារខ្លួន និងការវាយលុក។ ប្រមុខយោធាអ៊ីស្រាអែល លោក Herzi Halevi បាននិយាយថា យើងនឹងខិតខំប្រឹងប្រែងស្វែងរកលោក Yahya Sinwar រួចវាយប្រហារលើរូបលោក ហើយនឹងធ្វើឱ្យក្រុមហាម៉ាស ផ្លាស់ប្តូរមេដឹកនាំនយោបាយរបស់ពួកគេជាថ្មីម្តងទៀត។ កាលពីថ្ងៃអង្គារ រដ្ឋមន្រ្តីការបរទេសអ៊ីស្រាអែល លោក Israel Katz ក៏បានអំពាវនាវឱ្យកម្ចាត់លោក Sinwar ជាបន្ទាន់ផងដែរ។ អ៊ីស្រាអែលបានចោទប្រកាន់លោក Yahya Sinwar ថា ជាមេគំនិតនៅពីក្រោយការវាយប្រហារកាលពីថ្ងៃទី៧ ខែតុលា ឆ្នាំ២០២៣ ទៅលើភាគខាងត្បូងអ៊ីស្រាអែល ដែលនាំឱ្យផ្ទុះសង្រ្គាមនៅតំបន់ហ្គាហ្សាស្ទ្រីបអស់រយៈពេល ១១ខែមកនេះ៕ ប្រភព៖ AFP…

ហ្សឺណែវ៖ អង្គការសុខភាពពិភពលោក (WHO) បាននិយាយកាលពីថ្ងៃពុធថា ខ្លួននឹងបញ្ជូនវ៉ាក់សាំងជំងឺស្វិតដៃជើងជាងមួយលានទៅកាន់តំបន់ហ្គាហ្សា ជាទីដែលហែកហួរដោយសារសង្រ្គាមអ៊ីស្រាអែល និងក្រុមហាម៉ាស់ បន្ទាប់ពីមេរោគត្រូវបានរកឃើញនៅក្នុងទឹកសំណល់នៃទឹកដីប៉ាឡេស្ទីន។ ប្រធានអង្គការសុខភាពពិភព (WHO) លោក ថេដ្រូស អាដាណម ហ្គេប្រេយេសឹស បានប្រាប់សន្និសីទសារព័ត៌មានមួយថា អង្គការសុខភាពពិភពលោកកំពុងបញ្ជូនវ៉ាក់សាំងជំងឺស្វិតដៃជើងច្រើនជាងមួយលាន ទៅកាន់តំបន់ហ្គាហ្សានៅក្នុងសប្តាហ៍ខាងមុខនេះ។ ការរកឃើញជំងឺស្វិតដៃជើងនៅក្នុងទឹកសំណល់នៅតំបន់ហ្គាហ្សា គឺជាសញ្ញាបង្ហាញថា មេរោគកំពុងរាតត្បាតនៅក្នុងសហគមន៍ ធ្វើឱ្យកុមារមិនបានចាក់វ៉ាក់សាំងប្រឈមនឹងហានិភ័យ។ លោក ថេដ្រូស បានសង្កត់ធ្ងន់ថា បុគ្គលិកសុខាភិបាលត្រូវការការអនុញ្ញាតឱ្យចូលទៅកាន់តំបន់ហ្គាហ្សា ដើម្បីចែកចាយវ៉ាក់សាំងជំងឺស្វិតដៃជើង និងថា បទឈប់បាញ់ ឬយ៉ាងហោចណាស់រក្សាភាពស្ងប់ស្ងាត់ពីរបីថ្ងៃ គឺជារឿងចាំបាច់ ដើម្បីចាក់វ៉ាក់សាំងដល់កុមារងាយរងគ្រោះនៅហ្គាហ្សា។ ក្រសួងសុខាភិបាលបាននិយាយថា មេរោគត្រូវបានរកឃើញនៅក្នុងសំណាកទឹកសំណល់ ដែលបានយកចេញពីតំបន់ Khan Yunis និងនៅតំបន់ភាគកណ្តាលនៃតំបន់ហ្គាហ្សា។ មេរោគនេះភាគច្រើនឆ្លងតាមរយៈទឹកស្អុយ និងទឹកកខ្វក់ មានផ្ទុកវីរុសប៉ូលីយ៉ូ ដែលឆ្លងខ្លាំង។ មេរោគនេះអាចបណ្តាលឱ្យអ្នកជំងឺខូចទ្រង់ទ្រាយរាងកាយ និងខ្វិន ហើយក៏អាចឈានដល់ស្លាប់ផងដែរ។ ជាចម្បងវាប៉ះពាល់ដល់កុមារអាយុក្រោម ៥ឆ្នាំ៕ ប្រភព៖ AFP ប្រែសម្រួលដោយ៖ ឈឹមទីណា

បរទេស៖ ក្រុមហ៊ុនអាកាសចរណ៍តម្លៃធូរថ្លៃដ៏ធំរបស់ឥណ្ឌា គឺ IndiGo កំពុងសាកល្បងមុខងារកក់កៅអី ដែលនឹងអនុញ្ញាតឱ្យអ្នកដំណើរស្រីរើសកន្លែងអង្គុយដែលមិនក្បែរអ្នកដំណើរប្រុស។ នេះជាជម្រើសថ្មីដំបូងបង្អស់ មិនធ្លាប់មានក្នុងវិស័យអាកាសចរណ៍ក្នុងពិភពលោក។ ក្រុមហ៊ុននេះអះអាងថា ការផ្តល់នូវជម្រើសនេះ គឺដើម្បីសុវត្ថិភាព ខណៈដែលកន្លងមក មានការបំពាតបំពាន និងកាយវិការមិនសមរម្យរបស់បុរសទៅលើស្ត្រីនៅលើយន្តហោះ។ ក្រុមហ៊ុន IndiGo បានប្រាប់សារព័ត៌មាន CNBC Travel កាលពីសប្តាហ៍មុនថា កៅអីដែលអ្នកដំណើរស្រីជ្រើសរើសនឹងកំណត់ឲ្យមានពណ៌ផ្កាឈូក ដែលអនុញ្ញាតិឲ្យភ្ញៀវស្រីដូចគ្នារើសកន្លែងក្បែរស្រីៗដូចគ្នា។ មុខងាររើសកៅអីអង្គុយនេះត្រូវបានដាក់ដំណើរការសាកល្បងចាប់តាំងពីខែឧសភាមក។ អ្នកប្រើប្រាស់វេទិកាប្រព័ន្ធផ្សព្វផ្សាយសង្គមបានសរសើរគំនិតផ្តួចផ្តើមថ្មី របស់ IndiGo ដើម្បីបញ្ចៀសការបៀតបែន។ កាលពីខែកញ្ញា ឆ្នាំមុន នៅលើយន្តហោះរបស់ក្រុមហ៊ុន IndiGo ធ្លាប់មានករណីអ្នកដំណើរប្រុសម្នាក់ បានដាក់ដៃ លើអ្នកដំណើរស្រី មិនសមរម្យ ខណៈពេលដែលនាងកំពុងគេង។ នេះបើយោងតាមការចុះផ្សាយរបស់កាសែត The Economic Times ។ ជើងហោះហើរមួយទៀត របស់ក្រុមហ៊ុននេះ ដដែល ក្នុងឆ្នាំ២០១៩ បុរសជនជាតិឥណ្ឌា ដែលរស់នៅសិង្ហបុរី ត្រូវបានកាត់ទោសឱ្យជាប់ពន្ធនាគារ រយៈពេល ៤ ខែ ពីបទបៀតបៀន និងប៉ះអ្នកបម្រើ លើយន្តហោះអាយុ ២២ឆ្នាំ…