ភ្នំពេញ៖ អគ្គលេខាធិការគណៈវិស្វករកម្ពុជា បានលើកឡើងថា ក្នុងយុគសម័យបច្ចេកវិទ្យាទំនើប នេះ ការបណ្ដុះបណ្តាលបង្កើនសមត្ថភាពប្រតិបត្តិជំនាញ វិជ្ជាជីវៈ ដល់យុវវិស្វករ វិស្វករ ជាកត្តាសំខាន់បំផុតមិនអាចខ្វះបាន ដើម្បីដើរឱ្យទាន់បច្ចេកវិទ្យា ទំនើប និងចូលរួមបង្កើតគំនិតថ្មីៗ ទាញយកអត្ថប្រយោជន៍ជាអតិបរមា ពីបច្ចេកវិទ្យាទំនើបទាំងនោះ ក្នុងន័យរួមចំណែកដល់ការអភិវឌ្ឍសង្គមជាតិ ។ ឯកឧត្តម សុខុម រិទ្ធីវុធ អគ្គលេខាធិការគណៈវិស្វករកម្ពុជា បានថ្លែងដូច្នេះ ក្នុងឱកាសចូលរួមជាមួយឯកឧត្តម លោកជំទាវ លោក លោកស្រី ជាអគ្គលេខាធិការរង ទីប្រឹក្សា និងវាគ្មិនបរទេស ក្នុងពិធីបើកវគ្គបណ្តុះបណ្តាលស្តីពី «នវានុវត្តន៍ក្នុងវិស័យសំណង់» ដោយមានការចូលរួមពីសិក្ខាកាមជាវិស្វករចុះបញ្ជី និស្សិតវិទ្យាស្ថានបច្ចេកវិទ្យាកម្ពុជាជំនាញសំណង់ស៊ីវិល ស្ថាបត្យករ មេកានិច និងអគ្គិសនីចំនួន ៣៥០នាក់ នៅសាលប្រជុំអាគារ A នៃវិទ្យាស្ថានបច្ចេកវិទ្យាកម្ពុជា ហៅកាត់ថា តិចណូ នាថ្ងៃទី១៧តុលា ។ ឯកឧត្តម សុខុម រិទី្ធវុធ បានបន្តថា វិស្វករ ជាធនធានបញ្ញវ័ន្តវិស្វកម្ម និងជាកំលាំងចលករមិនអាចខ្វះបាន ក្នុងការរួមចំណែកអភិវឌ្ឍន៍ប្រទេសប្រកបដោយចិរភាព ដែលតម្រូវឱ្យមានការសិក្សាស្វែងយល់ និងតាមឱ្យទាន់នូវការវិវត្តន៍បច្ចេកវិទ្យានាពេលបច្ចុប្បន្ន និងអនាគត។…