មូស្គូ៖ មេដឹកនាំរុស្ស៊ីនឹងធ្វើដំណើរទៅកាន់ប្រទេសចិននាសប្តាហ៍ក្រោយនេះ ដើម្បីជួបជាមួយ “មិត្តជាទីស្រឡាញ់” លោក ស៊ី ជីនពីង ដើម្បីពង្រឹងភាពជាដៃគូកាន់តែជិតស្និទ្ធ នៅក្នុងទំនាក់ទំនងជាយុទ្ធសាស្ត្រដ៏សំខាន់មួយ។ ប្រធានាធិបតីរុស្ស៊ី លោក វ្ល៉ាឌីមៀ ពូទីន ស្ទើរតែមិនហ៊ានចេញដំណើរហួសពីព្រំដែនប្រទេសរបស់លោក ចាប់តាំងពីជម្លោះផ្ទុះឡើងនៅអ៊ុយក្រែន ដោយការធ្វើដំណើរនៅសប្តាហ៍ក្រោយរបស់គាត់ គឺជាដំណើរឆ្ពោះទៅកាន់ប្រទេសមហាអំណាចពិភពលោកលើកដំបូង។ ទីក្រុងប៉េកាំងនឹងធ្វើជាម្ចាស់ផ្ទះស្វាគមន៍អ្នកតំណាងមកពីប្រទេសចំនួន ១៣០ នៅថ្ងៃទី ១៧ និង១៨ ខែតុលានេះ ដើម្បីប្រារព្ធខួបមួយទសវត្សរ៍នៃគំនិតផ្តួចផ្តើមខ្សែក្រវាត់ និងផ្លូវ ហៅកាត់ថា (BRI) ដែលជាគម្រោងភូមិសាស្ត្រនយោបាយដ៏សំខាន់របស់ប្រធានាធិបតីចិន លោក ស៊ី ជីនពីង ដើម្បីពង្រីកការឈានទៅដល់សកលលោករបស់ប្រទេសចិន។ ការពឹងផ្អែកជាយុទ្ធសាស្ត្ររបស់មេដឹកនាំរុស្សីលើប្រទេសចិន បានរីកចម្រើនយ៉ាងខ្លាំង ចាប់តាំងពីការលុកលុយលើប្រទេសជិតខាងរបស់ខ្លួន (អ៊ុយក្រែន) ដែលបានរុញច្រានប្រទេសរបស់គាត់ឱ្យស្ថិតក្នុងភាពឯកោអន្តរជាតិ។ តួយ៉ាងនៅឆ្នាំនេះ ពាណិជ្ជកម្មរវាងមហាអំណាចទាំងពីរបានកើនឡើងដល់កម្រិតដែលមិនធ្លាប់មាន ចាប់តាំងពីការចាប់ផ្តើមនៃសង្រ្គាមរបស់ទីក្រុងមូស្គូក្នុងប្រទេសអ៊ុយក្រែន ជាមួយនឹងការនាំចូលប្រេងរបស់ចិនពីរុស្ស៊ី ផ្តល់ឱ្យទីក្រុងមូស្គូនូវខ្សែជីវិតដ៏សំខាន់មួយ ក្រោយរងសម្ពាធទណ្ឌកម្មពីអន្តរជាតិ។ យោងតាមទិន្នន័យគយចិនបានបង្ហាញថា ពាណិជ្ជកម្មទ្វេភាគី (រុស្សី-ចិន) បានឈានដល់កម្រិតខ្ពស់បំផុត ក្នុងទំហំទឹកប្រាក់ ១៩០ពាន់លានដុល្លារកាលពីឆ្នាំមុន ហើយភាគីទាំងពីរបានសន្យាថា នឹងឈានដល់ ២០០ពាន់លានដុល្លារនៅឆ្នាំ២០២៣នេះ៕ ប្រភព៖ AFP ប្រែសម្រួលដោយ៖…

បេរូត៖ ក្រុមសកម្មប្រយុទ្ធ ហេសបូឡា ដែលគាំទ្រដោយអ៊ីរ៉ង់នៅក្នុងប្រទេសលីបង់ នៅថ្ងៃសុក្រទី១៣ ខែតុលានេះ បានប្រកាសថា ពួកគេបានត្រៀមខ្លួនពេញលេញហើយ ដើម្បីចូលរួមជាមួយសម្ព័ន្ធមិត្តប៉ាឡេស្ទីនម៉ាហាស់របស់ខ្លួន ក្នុងសង្រ្គាមប្រឆាំងនឹងអ៊ីស្រាអែល នៅពេលដែលពេលវេលាសក្តិសមមកដល់។ អនុប្រធានក្រុមហេសបូឡា លោក ណែម ហ្គាហ្ស៊ឹម បានប្រាប់ក្នុងពិធីជួបជុំអ្នកគាំទ្រប៉ាឡេស្ទីននៅជាយក្រុងបេរូត យ៉ាងដូច្នេះថា យើងបានត្រៀមខ្លួនយ៉ាងពេញលេញ ហើយនៅពេលដែលពេលវេលាសក្តិសមមកដល់ យើងនឹងធ្វើវា។ លោកបន្ថែមថា ការផ្សព្វផ្សាយដោយប្រទេសធំៗ, បណ្តាប្រទេសអារ៉ាប់ និងបេសកជនមកពីអង្គការសហប្រជាជាតិ ដោយផ្ទាល់ និងដោយប្រយោល ដោយសុំឱ្យយើងកុំជ្រៀតជ្រែកក្នុងសមរភូមិជម្លោះរវាងអ៊ីស្រាអែល និងក្រុមហាម៉ាស់ក៏ដោយ ក៏មិនអាចជះឥទ្ធិពលដល់ស្មារតីរបស់ពួកយើងឡើយ ពីព្រោះហេសបូឡាដឹងច្បាស់ពីកាតព្វរបស់ខ្លួន។ ការប្រកាសបែបនេះរបស់លោក ហ្គាហ្ស៊ឹម ខាងលើនេះ បានកើតមានឡើងចំពេលដែលក្រុមហាម៉ាស់ និងអ៊ីស្រាអែល បានបើកការវាយប្រហារគ្នាយ៉ាងធ្ងន់ធ្ងររយៈពេល ៧ថ្ងៃមកហើយ បន្ទាប់ពីខ្មាន់កាំភ្លើងក្រុមហាម៉ាស់រាប់រយនាក់បានសម្រុកឆ្លងកាត់ព្រំដែនពីហ្គាហ្សា ចូលទៅក្នុងទឹកដីប្រទេសអ៊ីស្រាអែលកាលពីថ្ងៃសៅរ៍សប្តាហ៍មុន និងបានសម្លាប់មនុស្សជាង ១,៣០០នាក់ ដែលភាគច្រើនជាជនស៊ីវិល។ ជាការឆ្លើយតប អ៊ីស្រាអែលបានសងសឹកវិញដោយការទម្លាក់គ្រាប់បែកលើគោលដៅរបស់ក្រុមហាម៉ាសនៅតំបន់ហ្គាហ្សាស្ទ្រីប ដោយបានសម្លាប់មនុស្សយ៉ាងហោចណាស់ ១,៩០០នាក់ ភាគច្រើនជាជនស៊ីវិល រួមទាំងកុមារជាង ៦០០នាក់ នេះបើយោងតាមប្រភពពីក្រសួងសុខាភិបាលប៉ាឡេស្ទីន៕ ប្រភព៖ AFP ប្រែសម្រួលដោយ៖ ឈឹម ទីណា

រ៉ាម៉ាឡាហ៍៖ មេដឹកនាំប៉ាឡេស្ទីនបានពណ៌នាការវាយប្រហាររបស់អ៊ីស្រាអែលប្រឆាំងនឹងក្រុមហាម៉ាស់លើតំបន់ហ្គាហ្សា ថា ជាឧក្រិដ្ឋកម្មសង្គ្រាម, អំពើប្រល័យពូជសាសន៍ និងជាការបំផ្លិចបំផ្លាញដែលមិនធ្លាប់មានពីមុនមក។ នាយករដ្ឋមន្រ្តីប៉ាឡេស្ទីនលោក ម៉ូហាំម៉េដ សាតាយយ៉េហ៍ បាននិយាយក្នុងសន្និសិទកាសែតមួយនៅក្នុងទីក្រុងរ៉ាម៉ាឡាហ៍ យ៉ាងដូច្នេះថា ប្រជាជនប៉ាឡេស្ទីនកំពុងមើលឃើញការសម្លាប់រង្គាលនៅតំបន់ហ្គាហ្សា និងការវាយប្រហារជារៀងរាល់ថ្ងៃដោយអ្នកតាំងលំនៅលើប្រជាជនរបស់យើងនៅតំបន់ West Bank។ អ្វីដែលបានប្រព្រឹត្តនៅហ្គាហ្សា គឺពិតប្រាកដណាស់ ជាការសម្លាប់រង្គាល។ លោកបន្តថា ការគាំទ្រអន្តរជាតិដល់អ៊ីស្រាអែល គឺមិនខុសអីពីការលើកទឹកចិត្តឱ្យអ៊ីស្រាអែល ប្រព្រឹត្តឧក្រិដ្ឋកម្មកាន់តែច្រើនឡើងលើប្រជាជនរបស់យើងនោះទេ។ ជុំវិញបញ្ហានេះដែរ ប្រធានាធិបតីប៉ាឡេស្ទីនបានជួបពិភាក្សាជាមួយមេដឹកនាំអន្តរជាតិ។ តួយ៉ាង គាត់បានជួបប្រជុំនៅព្រឹកនេះជាមួយរដ្ឋមន្រ្តីការបរទេសអាមេរិក លោក អាន់ថូនី ប្លីងគែន ហើយអ្វីដែលយើងអំពាវនាវ នោះគឺការបញ្ឈប់ជាបន្ទាន់នូវការវាយប្រហារមកលើប្រជាជនរបស់យើងនៅតំបន់ហ្គាហ្សា។ នាយករដ្ឋមន្រ្តីអ៊ីស្រាអែលរូបនេះបានបន្ថែមថា កុមារច្រើនជាង ៥៨៣នាក់ និងស្ត្រីច្រើនជាង ៣៥១នាក់ បានស្ថិតក្នុងចំណោមជនរងគ្រោះដែលត្រូវបានសម្លាប់ដោយកងទ័ពអ៊ីស្រាអែល។ នេះគឺជាឧក្រិដ្ឋកម្មសង្រ្គាម, អំពើប្រល័យពូជសាសន៍ និងការបំផ្លិចបំផ្លាញដែលមិនធ្លាប់មានពីមុនមក ទៅលើទ្រព្យសម្បត្តិឯកជន, ស្ថាប័ន, ទីតាំងសាធារណៈ និងហេដ្ឋារចនាសម្ព័ន្ធ៕ ប្រភព៖ AFP ប្រែសម្រួលដោយ៖ ឈឹម ទីណា

អ.ស.ប៖ ប្រមុខអង្គការសហប្រជាជាតិ នៅថ្ងៃសុក្រទី១៣ ខែតុលានេះ បានអំពាវនាវឱ្យការពារសិទ្ធិមនុស្សជាមូលដ្ឋាន ខណៈដែលជម្លោះរវាងអ៊ីស្រាអែល និងក្រុមហាម៉ាស់បានរីករាលដាល ដោយលោកបានសង្កត់ធ្ងន់ថា សូម្បីតែសង្រ្គាមក៏មានច្បាប់ដែរ ហើយព្រមានប្រឆាំងនឹងការប្រើចំណាប់ខ្មាំងជាខែលការពារខ្លួន។ អគ្គលេខាធិការអង្គការសហប្រជាជាតិ លោក អាន់ថូនីញ៉ូ ហ្គូទែរេស បានថ្លែងក្នុងសន្និសិទកាសែត នៅមុនកិច្ចប្រជុំក្រុមប្រឹក្សាសន្តិសុខថា ស្ថានការណ៍នៅតំបន់ហ្គាហ្សាបានឈានដល់កម្រិតទាបថ្មីមួយដ៏គ្រោះថ្នាក់។ លោក ហ្គូទែរេស បាននិយាយយ៉ាងដូច្នេះថា យើងចង់ឱ្យការផ្តល់ជំនួយមនុស្សធម៌ជាបន្ទាន់ចូលទៅដល់ទូទាំងតំបន់ហ្គាហ្សា ដូច្នេះយើងអាចចែកចាយប្រេងឥន្ធនៈ, ស្បៀងអាហារ និងទឹកបរិភោគដល់មនុស្សគ្រប់គ្នាដែលត្រូវការ ដោយសារតែប្រព័ន្ធសុខាភិបាលរបស់តំបន់នេះជិតដួលរលំហើយ។ ប្រមុខអង្គការសហប្រជាជាតិរូបនេះបានសង្កត់ធ្ងន់ថា សូម្បីតែសង្រ្គាមក៏មានច្បាប់ដែរ… នោះគឺច្បាប់មនុស្សធម៌អន្តរជាតិ និងច្បាប់សិទ្ធិមនុស្ស ដែលត្រូវតែគោរព និងតម្កល់ទុកជានិច្ច ដូច្នេះជនស៊ីវិលត្រូវតែទទួលបាននូវការការពារ ហើយក៏មិនត្រូវបានប្រើប្រាស់ជាខែលការពារខ្លួនដែរ។ ការអំពាវនាវរបស់លោក ហ្គូទែរេស ឱ្យការពារជនស៊ីវិលខាងលើនេះ បានកើតឡើង ខណៈដែលនាយករដ្ឋមន្ត្រីអ៊ីស្រាអែល លោក ប៊ិនចាមីន ណឺតាន់យ៉ាហ៊ូ បាននិយាយថា ការទម្លាក់គ្រាប់បែកដ៏ខ្លាំងក្លារបស់ប្រទេសលោកទៅលើតំបន់ហ្គាហ្សា គឺជា “គ្រាន់តែជាការចាប់ផ្តើម” នៃការឆ្លើយតបចំពោះការវាយប្រហាររបស់ពួកហាម៉ាស ដែលបានធ្វើឡើងកាលពីថ្ងៃសៅរ៍សប្តាហ៍កន្លងទៅ ដែលបានធ្វើឱ្យមនុស្ស ១,៣០០នាក់ ភាគច្រើនជាជនស៊ីវិលបានស្លាប់៕ ប្រភព៖ AFP ប្រែសម្រួលដោយ៖ ឈឹម ទីណា

វ៉ាស៊ីនតោន៖ ប្រធានាធិបតីអាមេរិក លោក ចូ បៃដិន នៅថ្ងៃសុក្រទី១៣ ខែតុលានេះ បានថ្លែងថា ការដោះស្រាយវិបត្តិមនុស្សធម៌នៅតំបន់ហ្គាហ្សា គឺជារឿងអាទិភាព។ នៅក្នុងសន្ទរកថានៅឯទីក្រុងហ្វីឡាដែលហ្វី ប្រធានាធិបតីអាមេរិក លោក ចូ បៃដិន បានបញ្ជាក់ជាថ្មីពីការគាំទ្រយ៉ាងម៉ឺងម៉ាត់ចំពោះអ៊ីស្រាអែល បន្ទាប់ពីការវាយប្រហារដ៏គួរឱ្យភ្ញាក់ផ្អើលកាលពីថ្ងៃសៅរ៍កន្លងទៅ ដោយក្រុមសកម្មប្រយុទ្ធហាម៉ាស់ ដែលលោកបានពណ៌នាថា ជាទង្វើពួកបិសាច។ លោក បៃដិន បានគូសបញ្ជាក់យ៉ាងដូច្នេះថា យើងកំពុងធ្វើឱ្យប្រាកដថា អ៊ីស្រាអែលមានអ្វីដែលខ្លួនត្រូវការដើម្បីការពារខ្លួន និងឆ្លើយតបទៅនឹងការវាយប្រហាររបស់ក្រុមហាម៉ាស់។ ប្រធានាធិបតីអាមេរិករូបនេះបានសង្កត់ធ្ងន់ថា រឿងមួយទៀតក៏ជាអាទិភាពមួយសម្រាប់លោកផងដែរ នោះគឺការដោះស្រាយជាបន្ទាន់នូវវិបត្តិមនុស្សធម៌នៅតំបន់ហ្គាហ្សា។ បើតាមលោក បៃដិន ក្រុមការងាររដ្ឋបាលរបស់លោកកំពុងធ្វើការនៅក្នុងតំបន់ រួមទាំងការទំនាក់ទំនងដោយផ្ទាល់ជាមួយរដ្ឋាភិបាលអ៊ីស្រាអែល, អេហ្ស៊ីប ហ្ស៊កដានី និងបណ្តាប្រទេសអារ៉ាប់ផ្សេងទៀត ក៏ដូចជាអង្គការសហប្រជាជាតិ ដើម្បីបង្កើនការគាំទ្រក្នុងការដោះស្រាយវិបត្តិមនុស្សធម៌នៅតំបន់ហ្គាហ្សា៕ ប្រភព៖ AFP ប្រែសម្រួលដោយ៖ ឈឹម ទីណា

ហ៊្សេរុយសាឡឹម៖ ពលរដ្ឋប៉ាឡេស្ទីនរាប់ពាន់នាក់ភៀសខ្លួនទៅកាន់តំបន់ហ្គាហ្សាភាគខាងត្បូង ដើម្បីស្វែងរកទីជម្រកមានសុវត្ថិភាព នៅថ្ងៃសៅរ៍ទី១៤ ខែតុលានេះ បន្ទាប់ពីអ៊ីស្រាអែលបានព្រមានពួកគេឱ្យជម្លៀសខ្លួន មុនពេលបើកការវាយលុកតាមជើងគោកប្រឆាំងនឹងក្រុមហាម៉ាស់។ នាយករដ្ឋមន្រ្តីអ៊ីស្រាអែល លោក ប៊ិនចាមីន ណឺតាន់យ៉ាហ៊ូ បានព្រមានថា ការទម្លាក់គ្រាប់បែកដ៏សាហាវជិតមួយសប្តាហ៍មកនេះ ទៅលើតំបន់ហ្គាហ្សា ដើម្បីប្រឆាំងនឹងក្រុមហាម៉ាស់ គឺគ្រាន់តែជាការចាប់ផ្តើមប៉ុណ្ណោះ។ ក្រសួងសុខាភិបាលបានឱ្យដឹងថា យ៉ាងហោចណាស់ប្រជាជនហ្គាហ្សា ១,៩០០នាក់ ដែលភាគច្រើនជាជនស៊ីវិល ហើយរួមទាំងកុមារជាង ៦០០នាក់ត្រូវបានសម្លាប់ នៅក្នុងរលកនៃការវាយប្រហារដោយមីស៊ីលរបស់អ៊ីស្រាអែលប្រឆាំងនឹងក្រុមសកម្មប្រយុទ្ធហាម៉ាស់។ ស្របពេលជាមួយគ្នានេះដែរ នាយករដ្ឋមន្រ្តីប៉ាឡេស្ទីនលោក ម៉ូហាំម៉េដ សាតាយយ៉េហ៍ បានចោទប្រកាន់អ៊ីស្រាអែលថា បានប្រព្រឹត្តអំពើប្រល័យពូជសាសន៍នៅតំបន់ហ្គាហ្សា។ ប៉ុន្តែអ្នកនាំពាក្យនាយករដ្ឋមន្រ្តីអ៊ីស្រាអែល លោក តាល់ ហែនរីគ បានប្រាប់សារព័ត៌មាន AFP ថា អ្វីៗដែលកើតឡើងនៅក្នុងតំបន់ហ្គាហ្សា គឺជាការទទួលខុសត្រូវរបស់ក្រុមហាម៉ាស់៕ ប្រភព៖ AFP ប្រែសម្រួលដោយ៖ ឈឹម ទីណា