ខេត្តមណ្ឌលគិរី គឺជាខេត្តទី១៤ ដែលត្រូវបានប្រកាសជាខេត្តអស់មីននាពេលនេះ។ សាលាខេត្តមណ្ឌលគិរី បានរៀបចំធ្វើពិធីមួយនៅថ្ងៃទី១៤វិច្ឆិកានេះ អបអរសាទរខេត្តភាគឥសានកម្ពុជានេះ ដែលបានក្លាយជាខេត្តទី១៤ ដែលអស់គ្រាប់មីន។ រាជរដ្ឋាភិបាលកម្ពុជា បានដាក់ទិសដៅឆ្នាំ២០២៥ ជាប្រទេសដែលអស់គ្រាប់មីនទាំងស្រុង។ អនុប្រធានទី១ អាជ្ញាធរមីន លោក លី ធុជ បានថ្លែងក្នុងពិធីចាត់ទុកថា «នេះគឺជាស្នាដៃប្រវត្តិសាស្រ្តរបស់រាជរដ្ឋាភិបាលកម្ពុជា ក្រោមការដឹកនាំដ៏ខ្ពង់ខ្ពស់របស់សម្តេចធិបតី ហ៊ុន ម៉ាណែត សម្រាប់ប្រជាជនខេត្តមណ្ឌលគិរីទាំងមូល ឱ្យទទួលបាននូវសេរីភាព រួចចាកផុតពីការគំរាមដោយសារមីន ដែលជាមរតកពីសង្រ្គាម ក្រោមម្លប់សន្តិភាព កើតចេញពីនយោបាយឈ្នះឈ្នះ របស់សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្រ្តី ដែលបានខិតខំប្រឹងប្រែងពលិស្វែងរកមកយ៉ាងលំបាក»។ ខេត្តមណ្ឌលគិរី បានបោសសម្អាតចាប់តាំងពីឆ្នាំ២០០២ ដោយមានក្រុងប្រតិបត្តិករចំនួន៣ ចូលរួម ក្នុងនោះគឺរួមមាន មជ្ឈមណ្ឌលជាតិរក្សាសន្តិភាព, អង្គភាពស៊ីម៉ាក់ និងអង្គការមែក MAG ក្នុងទំហំផ្ទៃដីប្រមាណ ១៧លាន ៨៨ម៉ឺន ៦ពាន់ ៥៦៤ម៉ែត្រក្រឡា។

រាជធានីភ្នំពេញ បានដាក់វិធានការបង្កើនការបង្ក្រាបករណីក្មេងទំនើង និងការបង្ក្រាបត្រូវមានប្រសិទ្ធភាព ខណៈករណីក្មេងទំនើងនេះ ត្រូវគេសម្គាល់ថា កំពុងតែមានសកម្មភាពកំរើកសាឡើងវិញ។ អ្នកនាំពាក្យស្នងការដ្ឋាននគរបាលរាជធានីលោកវរសេនីយ៍ឯក សំ វិច្ឆិកា បានថ្លែងថាក្នុងរយៈពេល៣ខែកន្លងមកនេះ គេបានបង្ក្រាបករណីក្មេងទំនើងនេះ បានច្រើនដល់ជាង ២៤០ករណី នៅក្នុងរាជធានីភ្នំពេញនេះ។ អប្សរាណិតធ្វើសេចក្តីរាយការណ៍

ដំណើរទស្សនកិច្ចរបស់រដ្ឋមន្ត្រីក្រសួងការពារជាតិកម្ពុជា ក្នុងប្រទេសវៀតណាម រយៈពេលបីថ្ងៃ បានបញ្ចប់នៅថ្ងៃទី១៤វិច្ឆិកានេះហើយ។ លោកឧបនាយករដ្ឋមន្ត្រី ទៀ សីហា ដែលជារដ្ឋមន្ត្រីក្រសួងការពារជាតិ បានបំពេញទស្សនកិច្ចនៅសាធារណរដ្ឋសង្គមនិយមវៀតណាម រវាងពីថ្ងៃទី១២ ដល់១៤វិច្ឆិកា ដែលនៅទីនោះលោកបានជួបពិភាក្សាទ្វេភាគីជា មួយរដ្ឋមន្ត្រីក្រសួងការពារជាតិវៀតណាម និងជួបសម្តែងការគួរសមចំពោះប្រធានរដ្ឋ និងជួបនាយករដ្ឋមន្ត្រី នៃប្រទេសវៀតណាមថែមទៀត ។ អប្សរាណិតធ្វើសេចក្តីរាយការណ៍

ត្រីទឹកសាបរបស់កម្ពុជា បានបំបែកឯកទ្ទគ្គកម្មពិភពលោក និងបានទទួលវិញ្ញាបនបត្រថែមទៀត ពីក្រុមធ្វើកំណត់ត្រាពិភពលោក GUINNESS WORLD RECORDS នៅថ្ងៃទី១៤វិច្ឆិកា។ កម្ពុជាកាលពីខែកក្កដា ឆ្នាំ២០២៣ បានចាប់ត្រីបបែលយក្ខទឹកសាបមួយ ដែលមានទម្ងន់ ៣០០គីឡូក្រាម ក្នុងដែនទឹកទន្លេមេគង្គរបស់ខ្លួន ដែលជាប្រភេទត្រីទឹកសាបធំជាងគេបង្អស់ មិនធ្លាប់មានលើពិភពលោក។ អប្សរាណិតធ្វើសេចក្តីរាយការណ៍

តុលាការបានសម្រេចឃុំខ្លួនបណ្តោះអាសន្ន ចំពោះឧត្ដមសេនីយ៍ទោ នៃនគរបាលប្រឆាំងបទល្មើសគ្រឿងញៀន និងបក្ខពួក៤នាក់ទៀត ពាក់ព័ន្ធនឹងករណីគ្រឿងញៀន។ ឧត្តមសេនីយ៍ទោ វ៉ាន់ កុសល អនុប្រធានមន្ទីរប្រឆាំងគ្រឿងញៀន និងបក្ខពួក៤នាក់ទៀត ត្រូវសមត្ថកិច្ចឃាត់ខ្លួនកាលពីថ្ងៃទី១០ វិច្ឆិកា។ អ្នកនាំពាក្យអយ្យការអមសាលាដំបូងរាជធានីភ្នំពេញ លោក ប្លង់ សុផល បានបញ្ជាក់ថា ឈ្មោះ វ៉ាន់ កុសល និងបក្ខពួក៤នាក់ទៀត ពីជំរិតទារប្រាក់ជនជាតិចិន ដែលពាក់ព័ន្ធនឹងគ្រឿងញៀន ជាថ្នូរនឹងការដោះលែងឱ្យមានសេរីភាព។ បក្ខពួក៤នាក់ទៀតដែលបានសហការក្នុងអំពើខុសច្បាប់នេះរួមមានឈ្មោះ ជួន លឹមហេង, អុន សំអូន, នេត សុខុម និងឈ្មោះ ឈាវ ស៊ីដេត។

កម្មវិធីនៃចំណុចគោលនយោបាយអទិភាពចំនួន២ ក្នុងនោះរួមមាន កម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេស ដល់យុវជនមកពីគ្រួសារក្រីក្រ និងគ្រួសាររងហានិភ័យចំនួន ១លាន ៥សែននាក់ ត្រូវបានដាក់ឱ្យដំណើរការនៅថ្ងៃទី១៤វិច្ឆិកានេះហើយ។ «កម្មវិធីរបបសន្តិសុខសង្គមផ្នែកថែទាំសុខភាពតាមរបបភាគទានដោយស្ម័គ្រចិត្ត» និង «កម្មវិធីបណ្តុះបណ្ដាលជំនាញវិជ្ជាជីវៈ និងបច្ចេកទេសដល់យុវជន មកពីគ្រួសារក្រីក្រ និងគ្រួសារងាយរងហានិភ័យ» គឺជាចំណុចអទិភាព នៃគោលនយោបាយបញ្ចកោណ របស់រាជរដ្ឋាភិបាល ដែលបានដាក់ចេញនូវចក្ខុវិស័យឆ្នាំ២០៣០ និងឆ្នាំ២០៥០។ អប្សរាណិតរាយការណ៍

ព្រះមហាក្សត្រខ្មែរ បានធ្វើព្រះរាជសវនាការជាមួយនឹងប្រធានាធិបតីបារាំង ក្នុងឱកាសបំពេញព្រះរាជទស្សនកិច្ចរយៈពេល៦ថ្ងៃលើទឹកដី នៃប្រទេសបារាំង។ ព្រះរាជដំណើររបស់ព្រះមហាក្សត្រខ្មែរ ក្នុងប្រទេសបារាំង គឺតបតាមការអញ្ជើញរបស់ប្រធានាធិបតីបារាំង លោក អេម៉ានូអែល ម៉ាក្រុង និងជាការយាងចូលរួមសន្និសីទអន្តររដ្ឋាភិបាលលើកទី៤ សម្រាប់ការការពារ និងអភិវឌ្ឍន៍អង្គរ ដែលប្រព្រឹត្តទៅក្នុងទីស្នាក់ការកណ្តាលអង្គការយូណេស្កូ ក្នុងក្រុងប៉ារីស។ អប្សរាណិតធ្វើសេចក្តីរាយការណ៍

តួលេខឆ្លងជំងឺកូវីដ១៩ ក្នុងរយៈពេល ៧២ម៉ោងកន្លងមកនេះ មានចំនួន ៥១៥ករណី ដែលថយចុះមកវិញចំនួន ៣៧ករណី បើប្រៀបធៀបនឹងការឆ្លងរយៈពេល៣ថ្ងៃ នៃសប្តាហ៍មុន។ ការឆ្លងក្នុងរយៈពេល ៧២ម៉ោងកន្លងមកនេះ បានកើតលើប្រទេសចំនួន ៧នៅអាស៊ាន លើកលែងតែប្រទេសចំនួន៣ទៀត ដែលមិនមានការឆ្លង រួមមានប្រទេសម៉ាឡេស៊ី, វៀតណាម និងប្រទេសសឹង្ហបុរី។ ប្រទេសដែលមានអ្នកឆ្លងច្រើនជាងគេ ក្នុងចំណោមប្រទេសទាំង៧ គឺប្រទេសហ្វីលីពីនដែលមានចំនួន ១៩៦ករណី ខណៈប្រទេសកម្ពុជា មានអ្នកឆ្លង ១ករណីតិចជាងគេ។ អាស៊ាន នារយៈពេល ៧២ម៉ោងចុងក្រោយនេះ មានអ្នកស្លាប់ដោយសារជំងឺកូវីដ១៩ ម្នាក់ ដែលជាពលរដ្ឋនៃប្រទេសថៃ។

តម្លៃប្រេងសាំង បានថយចុះមកវិញ សម្រាប់ក្នុងការលក់រយៈពេល១០ ថ្ងៃខាងមុខនេះ ក្រោយការឡើងតិចតួចរយៈពេលកន្លងមកនេះ។ យោងតាមក្រសួងពាណិជ្ជកម្ម តម្លៃប្រេងឥន្ធនៈ សម្រាប់ការលក់រវាងពីថ្ងៃទី១១ រហូតដល់ថ្ងៃទី២១ ខែវិច្ឆិកា ឆ្នាំ២០២៣ គឺប្រេងសាំងធម្មតា មានតម្លៃចំនួន ៤ពាន់ ៣៥០រៀល ក្នុង ១លីត្រ ដែលតម្លៃនេះបានថយចុះមកវិញចំនួន៥០ រៀលក្នុង១លីត្រ បើប្រៀបធៀបទៅនឹងការលក់រយៈពេល១០ថ្ងៃមុន.. ចំណែក ប្រេងម៉ាស៊ូត មានតម្លៃចំនួន ៤ពាន់ ៣៥០រៀល ក្នុង១លីត្រ ដែលតម្លៃនេះ គឺមានការថយចុះចំនួន២០០ រៀល បើប្រៀបធៀបទៅនឹងការលក់រយៈពេល១០ថ្ងៃមុន។ ដោយឡែកតម្លៃប្រេងស៊ុបពែ័រវិញ គឺមិនបានកំណត់ក្នុងតារាងក្រសួងពាណិជ្ជកម្មនោះទេ ប៉ុន្តែតម្លៃលក់តែងតែខ្ពស់ជាងតម្លៃប្រេងសាំងធម្មតា។ នៅថ្ងៃនេះប្រេងសាំងស៊ុបពែ័រ តាមស្ថានីយ៍ខ្លះ គឺមានតម្លៃចំនួន ៥ពាន់រៀល និងកន្លែងខ្លះទៀត មានតម្លៃចំនួន ៥ពាន់ ៥០រៀល ក្នុងមួយលីត្រ។ សូមជម្រាបថា រាជរដ្ឋាភិបាលតែងតែចំណាយប្រាក់ ជួយខាតយ៉ាងហោច៦ចុច៥សេន ក្នុងមួយលីត្រ ដើម្បីជាការទប់ស្កាត់តម្លៃប្រេង ក្នុងការជួយសម្រាលបន្ទុកដល់ពលរដ្ឋ។

ទូកដែលត្រៀមចូលរួមប្រកួតក្នុងព្រះរាជពិធីបុណ្យអុំទូកនាចុងខែវិច្ឆិកាខាងមុខនេះ នឹងមានចំនួន៣៣៨ទូក។ ព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក គ្រោងនឹងប្រព្រឹត្តទៅរយៈពេល៣ថ្ងៃ គឺថ្ងៃទី ២៦-២៧-និង២៨ ខែវិច្ឆិកា។ ដោយឡែកប្រទីបនឹង ចូលរួមដង្ហែរនៅតាមដងទន្លេឆ្នាំនេះ មានចំនួន៣០ប្រទីប។ អនុប្រធានអចិន្ត្រៃយ៍ និងជាអគ្គលេខាធិការគណៈកម្មាធិការជាតិរៀបចំបុណ្យជាតិ-អន្តរជាតិលោក ឈិន កេតនា បានថ្លែងថា ក្នុងចំណោមទូកចូលរួមប្រកួតទាំង៣៣៨ រួមមានប្រភេទទូកអុំ ទូកចែវ ទូកខ្នាតអន្តរជាតិ និងមានកីឡាករចំណុះទូកបុរស នារី សរុបចំនួន ២ម៉ឺន ៤៤៤នាក់ មកពីរាជធានី ខេត្ត និងពីក្រសួងស្ថាប័ននានា។