ការចោទប្រកាន់របស់ឧត្តមស្នងការសិទ្ធិមនុស្សអង្គការសហប្រជាជាតិ ក្នុងក្រុងហ្សឺណែវ ដែលនិយាយថា ការកាត់ទោសដាក់គុកសកម្មជនបរិស្ថាន ដោយសារតែការអនុវត្តសិទ្ធិសេរីភាពរបស់ខ្លួននោះ ត្រូវបានស្ថានបេសកកម្មអចិន្ត្រៃយ៍របស់កម្ពុជា បដិសេធថា វាមិនមែនជាការពិតឡើយ។ សេចក្ដីថ្លែងការណ៍ចុះទី១០ កក្កដា ឆ្នាំ២០២៤ របស់ស្ថានបេសកកម្មកម្ពុជា ក្នុងក្រុងហ្សឺណែវ ប្រទេសស្វីស បានថ្លែងថា ការផ្តន្ទាទោសមនុស្សទាំង១០នាក់នោះ «ពុំមែនដោយសារតែការអនុវត្តសិទ្ធិសេរីភាពរបស់ពួកគេនោះទេ ប៉ុន្តែដោយសារការរៀបចំសកម្មភាពប្រឆាំងរដ្ឋាភិបាល និងប្រមាថព្រះមហាក្សត្រ ដែលជាបទល្មើសប្រព្រឹត្តនៅក្នុងប្រទេសកម្ពុជា ចាប់ពីឆ្នាំ២០១២ ដល់ឆ្នាំ២០២១ និងត្រូវផ្តន្ទាទោសទៅតាមមាត្រា ៤៣៧ (ស្ទួន) និងមាត្រា ៤៥៣ នៃក្រមព្រហ្មទណ្ឌ»។ សកម្មជនចលនាមាតាធម្មជាតិចំនួន ៥នាក់ ក្នុងចំណោម ១០នាក់ ត្រូវបានតុលាការកាត់ទោសដាក់គុកពី៦ទៅ៨ឆ្នាំ ពីបទល្មើសរួមគំនិតក្បត់ និងប្រមាថអង្គព្រះមហាក្សត្រ កាលពីថ្ងៃទី២កក្កដា។ សេចក្ដីថ្លែងការណ៍ដដែលរបស់កម្ពុជាបានបញ្ជាក់ថា «នៅកម្ពុជាក៏ដូចប្រទេសប្រជាធិបតេយ្យដទៃទៀតដែរ គ្មានបុគ្គលណាម្នាក់ ត្រូវបានចោទប្រកាន់ ដោយសារតែពួកគេជានរណានោះទេ ប៉ុន្តែផ្អែកលើបទល្មើសដែលច្បាប់បានកំណត់»។ សេចក្ដីថ្លែងការណ៍បញ្ជាក់បន្ថែមថា ការសម្រេចរបស់តុលាការ គឺផ្អែកលើភស្តុតាងជាក់ស្តែង និងប្រកាន់ខ្ជាប់យ៉ាងតឹងរ៉ឹង ទៅលើដំណើរការតាមនីតិវិធីត្រឹមត្រូវ និងគោលការណ៍ច្បាប់។

សម្តេចធិបតី ហ៊ុន ម៉ាណែត បានទទួលជួបប្រធានអង្គការដោះមីន JMAS របស់ជប៉ុន ដែលបានវាយតម្លៃខ្ពស់ចំពោះកងកម្លាំង CMAC របស់កម្ពុជា «ក្នុងវិស័យបោសសម្អាតមីន ប្រកបដោយជំនាញវិជ្ជាជីវៈ និងវិន័យខ្ពស់»។ ជំនួបរវាងសម្តេចធិបតី និងប្រធានអង្គការដោះមីនជប៉ុន គឺនៅប៉ុន្មានថ្ងៃក្រោយដំណើរទស្សនកិច្ចរបស់រដ្ឋមន្ត្រីការបរទេសជប៉ុន លោកស្រី Yoko Kamikawa ដែលបញ្ជាក់ថា ជប៉ុននឹងធ្វើកិច្ចការជាមួយកម្ពុជា ដើម្បីការដោះគ្រាប់មីន ពីប្រទេសអ៊ុយក្រែន និងតាមប្រទេសដទៃ ដែលរងខ្ទេចខ្ទាំដោយសារសង្គ្រាម។ អប្សរាណិតរាយការណ៍

កម្ពុជាបាននាំចេញផ្លែមៀនស្រស់ទៅកាន់ទីផ្សារអន្តរជាតិ ១ម៉ឺន ៤ពាន់ ៨១៧តោន នៅក្នុងឆមាសទី១ ឆ្នាំ២០២៤ ដែលចំនួននេះមានការកើនឡើងជាង ១២០ភាគរយ បើធៀបនឹងរយៈពេលដូចគ្នាឆ្នាំ២០២៣។ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ កញ្ញា អ៊ឹម រចនា បានឱ្យដឹងថា ទីផ្សារដែលកម្ពុជានាំចេញផ្លែមៀនស្រស់ច្រើនជាងគេ គឺទីផ្សារប្រទេសចិន បន្ទាប់ពីអាជ្ញាធរក្រុងប៉េកាំង បានអនុញ្ញាតឱ្យកម្ពុជា នាំចេញមៀនស្រស់ទៅដោយផ្ទាល់ កាលពីឆ្នាំ២០២២។ មន្ត្រីក្រសួងកសិកម្មបានថ្លែងទៀតថា បន្ទាប់ពីក្រសួងពាណិជ្ជកម្ម បានចុះអនុស្សារណៈ ជាមួយក្រុមហ៊ុនអាលីបាបា ដើម្បីដាក់លក់ផ្លែមៀនស្រស់លើទីផ្សារអនឡាញនោះមក, ក្រុមហ៊ុនអាលីបាបា បានធ្វើឱ្យទីផ្សារមៀនស្រស់របស់កម្ពុជា កាន់តែរីកធំថែមទៀត ដោយមិនត្រឹមទៅដល់អ្នកដែលបញ្ជាទិញផ្ទាល់នៅប្រទេសចិនប៉ុណ្ណោះទេ ប៉ុន្តែក៏ទៅដល់អតិថិជន ដែលបញ្ជាទិញតាមទូរសព្ទដៃ យកទៅបរិភោគនៅតាមផ្ទះ ដោយគ្រាន់តែចុចបញ្ជានៅលើទូរសព្ទដៃប៉ុណ្ណោះ។ កម្ពុជាបានចាប់ផ្តើមនាំចេញផ្លែមៀនប៉ៃលិនស្រស់ ទៅទីផ្សារប្រទេសចិនជាលើកដំបូង កាលពីខែតុលា ឆ្នាំ២០២២ បន្ទាប់ពីការចរចាលក្ខខណ្ឌតម្រូវភូតគាមអនាម័យ និងបានដាក់លក់ជាផ្លូវការនៅលើទីផ្សារអនឡាញរបស់ Alibaba Group កាលពីថ្ងៃពី១២ ខែធ្នូ ឆ្នាំ២០២២។ តាមរយៈនោះ អតិថិជនកាន់តែច្រើនស្គាល់ពីផលិតផលកសិកម្មកម្ពុជា ព្រោះចិនជាទីផ្សារធំ ដែលមានប្រជាជនជាង ១ពាន់ ៤០០លាននាក់៕

ទំហំពាណិជ្ជកម្មរវាងកម្ពុជា និងទីផ្សារអន្តរជាតិ សម្រេចបានទឹកប្រាក់ជាង ២ម៉ឺន ៦ពាន់លានដុល្លារ ក្នុងរយៈពេល៦ខែឆ្នាំ២០២៤នេះ។ យោងតាមរបាយការណ៍របស់អគ្គនាយកដ្ឋានគយ និងរដ្ឋាករកម្ពុជា, ទំហំទឹកប្រាក់ ២៦ពាន់លានដុល្លារ គឺជាការធ្វើពាណិជ្ជកម្មជាមួយប្រទេស នៃដៃគូសំខាន់ៗ ចំនួន ២០ប្រទេស និងជាមួយបណ្តាប្រទេសផ្សេងទៀត ក្នុងនោះកម្ពុជាបាននាំចេញទំនិញ មានទឹកប្រាក់ជាង ១២ពាន់លានដុល្លារ ដែលកើនឡើងប្រមាណជាង ១២ភាគរយ បើធៀបរយៈពេលដូចគ្នាឆ្នំា២០២៣ ខណៈការនាំចូលពីបរទេសមានចំនួនជាង ១៣ពាន់លានដុល្លារកើនឡើងជាង ១២ភាគរយដូចគ្នា។ ទីផ្សារសំខាន់ៗ ដែលកម្ពុជាបាននាំចេញទំនិញរួមមាន ប្រទេសចិនជាង ៨០០លានដុល្លារ, សហរដ្ឋអាមេរិកជាង ៤ពាន់ ៤០០លានដុល្លារ, វៀតណាម ជាង ២ពាន់លានដុល្លារ, ថៃ ៤៣៩លានដុល្លារ, ជប៉ុនជាង ៦២៨លានដុល្លារ, អាល្លឺម៉ង់ ជាង ៤២៤លានដុល្លារ, អេស្ប៉ាញ ៤៥១លានដុល្លារ, កាណាដា ៤៩៤លានដុល្លារ, អង់គ្លេស ៤២៧លានដុល្លារ, ហូឡង់ ៣៤៥លានដុល្លារ, កូរ៉េខាងត្បូង ១៥៥លានដុល្លារ និងការនាំចេញទៅកាន់ប្រទេសផ្សេងៗមួយចំនួនទៀត។ ចំណែកការនាំចូលវិញ កម្ពុជាបាននាំចូលទំនិញពីប្រទេសចិន មានទឹកប្រាក់ជិត…

ការដាច់ភ្លើងនៅចុងសប្តាហ៍ បានមកដល់ទៀតហើយ ដែលមានរយៈពេល៤ថ្ងៃ គឺមាននៅថ្ងៃព្រហស្បតិ៍ ថ្ងៃសុក្រ ថ្ងៃសៅរ៍ និងថ្ងៃអាទិត្យ។ តើការដាច់ភ្លើងប្រចាំសប្តាហ៍នេះ មាននៅកន្លែងណាខ្លះ? សូមស្ដាប់សេចក្ដីរាយការណ៍

ក្មេងទំនើងចំនួនជាង ១ពាន់នាក់ ត្រូវឃាត់ខ្លួននឹងបញ្ជូនទៅតុលាការ ក្នុងរយៈពេល៤៧ថ្ងៃ មកនេះ។ អ្នកនាំពាក្យក្រសួងយុត្តិធម៌ លោក ជិន ម៉ាលីន បានថ្លែងថា គិតត្រឹមរយៈពេល ៤៧ថ្ងៃ រវាងពីថ្ងៃទី២៣ ខែឧសភា ដល់ថ្ងៃទី៩ ខែកក្កដា ឆ្នាំ២០២៤ សាលាដំបូង និងអយ្យការអមសាលាដំបូងរាជធានី-ខេត្ត បានទទួលចាត់ការលើសំណុំរឿងពាក់ព័ន្ធនឹងករណីក្មេងទំនើងចំនួន ២៩៧ករណី ដែលមានជនសង្ស័យចំនួន ១ពាន់ ៦១៦នាក់ ក្នុងនោះ តុលាការបានធ្វើការឃាត់ខ្លួនជនសង្ស័យចំនួន ១ពាន់ ១៧៧នាក់ផងដែរ។ ក្រុមក្មេងទំនើង គឺជាក្រុមដែលភាគច្រើនមានប្រភពពីក្មេងមិនស្តាប់បង្គាប់ឱពុកម្តាយ និងគ្រូបង្រៀន ដែលក្រុមក្មេងទាំងនេះ តែងប្រើប្រាស់ដាវសាមូរ៉ៃ និងឧបករណ៍ផ្សេងៗ ធ្វើសកម្មភាពវាយប្រហារគ្នា ក្នុងសហគមន៍ បង្កការភ័យខ្លាចដល់ពលរដ្ឋក្នុងមូលដ្ឋាន។ សម្តេចធិបតី ហ៊ុន ម៉ាណែត បានដាក់បទបញ្ជាយ៉ាងម៉ឺងម៉ាត់ ក្នុងការរៀបចំវិន័យដ៏តឹងតែងមួយ ដើម្បីអប់រំក្មេងទំនើង ឱ្យពួកគេក្លាយជាក្មេងល្អ និងមានប្រយោជន៍សម្រាប់សង្គម និងប្រទេសជាតិ។ សម្តេចធិបតីបានដាក់បទបញ្ជាការលុបបំបាត់ករណីក្មេងទំនើងចេញពីមូលដ្ឋាន និងពីសហគមន៍ ដើម្បីការកសាង និងពង្រឹងភូមិឃុំមានសុវត្ថិភាព។

កម្លាំងនគរបាល និងកម្លាំងប្រជាការពារជាច្រើនសិបនាក់ នៅក្នុងខេត្តបាត់ដំបង ត្រូវបានដាក់ពង្រាយក្នុងរយៈពេល ៤ថ្ងៃមកនេះ ដើម្បីតាមចាប់ជនសង្ស័យឃាតករម្នាក់ ដែលបានសម្លាប់ស្ត្រីចំណាស់អាយុ ៧៧ឆ្នាំ ដែលបានដើរតាមថ្នល់។ ជនសង្ស័យជាឃាតករនោះ ត្រូវកាមេរ៉ាសុវត្ថិភាពបង្ហាញភិនភាគ ជាបុរសស្លៀកខោខ្មៅ ពាក់អាវក្រហម ដែលគេនិយាយថា ជាមនុស្សបែកថ្នាំញៀន។ អប្សរាណិតរាយការណ៍

កងទ័ពជើងគោកនៃប្រទេសកម្ពុជា និងកងស្វ័យការពារជប៉ុន បានប្តេជ្ញាការពង្រឹង និងពង្រីកកិច្ចសហប្រតិបត្តិការយោធា ដើម្បីសន្តិភាព ស្ថិរភាព និងការអភិវឌ្ឍក្នុងតំបន់។ ការប្តេជ្ញាចិត្តរបស់មេបញ្ជាការកងទ័ព នៃប្រទេសទាំង២នេះ បានលើកឡើងក្នុងកិច្ចប្រជុំទ្វេភាគីមួយ រវាងមេបញ្ជាការកងទ័ពជើងគោកកម្ពុជា នាយឧត្តមសេនីយ៍ ម៉ៅ សុផាន់ និងមេបញ្ជាការកងស្វ័យការពារជើងគោកជប៉ុន នាយឧត្តមសេនីយ៍ យ៉ាស៊ូណូរិ ម៉ូរីស៊ីតា នៅទីក្រុងតូក្យូ ប្រទេសជប៉ុន នាថ្ងៃទី៩ កក្កដា ឆ្នាំ២០២៤។ អប្សរាណិតរាយការណ៍

សម្តេចរដ្ឋសភាធិបតី ឃួន សុដារី គ្រោងនឹងបំពេញទស្សនកិច្ចរយៈពេល២ថ្ងៃ ក្នុងប្រទេសថៃ ចាប់ផ្តើមពីថ្ងៃនេះ តបតាមការអញ្ជើញរបស់សមភាគីថៃ លោក វ៉ាន់មូហាម៉ាត់ ណ័រមៈថា។ អប្សរាណិតធ្វើសេចក្តីរាយការណ៍

ចរន្តផ្តាច់ខ្លួនរបស់សកម្មជនក្នុងគណបក្សប្រឆាំង បានលេចឡើងច្រើនកន្លែង បន្ទាប់ពីពួកគេបានមើលឃើញទណ្ឌិត សម រង្ស៊ី ធ្វើនយោបាយប្រឆាំងនឹងផលប្រយោជន៍ជាតិរបស់ខ្លួន។ សកម្មជនរបស់គណបក្សភ្លើងទៀនជាច្រើន បានប្រកាសផ្តាច់ខ្លួន ក្រោយទណ្ឌិត សម រង្ស៊ី ប្រឆាំងនឹងគំរោងព្រែកជីកហ៊្វូណនតេជោ។ អប្សរាណិតរាយការណ៍