ការដាច់ភ្លើងនៅចុងសប្តាហ៍ បានមកដល់ទៀតហើយ ដែលមានរយៈ ពេល៤ថ្ងៃ គឺមាននៅថ្ងៃព្រហស្បតិ៍ ថ្ងៃសុក្រ ថ្ងៃសៅរ៍ និងថ្ងៃអាទិត្យ។ ការដាច់ភ្លើងនេះ បានកើតឡើងនៅក្នុងរាជធានីភ្នំពេញ និងខេត្ដកណ្ដាល ដែលនឹងមានរយៈពេលពី៦ម៉ោង ទៅ៩ម៉ោង។ តើការដាច់ភ្លើងប្រចាំសប្តាហ៍នេះ មាននៅទីណាខ្លះ? សូមស្ដាប់សេចក្ដីរាយការណ៍

មានប្រទេសតែ៤ប៉ុណ្ណោះនៅអាស៊ាន ក្នុងរយៈពេល ២៤ម៉ោងចុងក្រោយនេះ ដែលមានករណីឆ្លងកូវីដ១៩ ប៉ុន្តែគ្មានអ្នកស្លាប់ឡើយ។ ប្រទេសកម្ពុជានៅថ្ងៃនេះ មិនមានរកឃើញករណីឆ្លងថ្មីឡើយ។ តួលេខឆ្លងថ្មីកូវីដ១៩ ក្នុងប្រទេសអាស៊ាន នៃរយៈពេល ២៤ម៉ោងចុងក្រោយនេះ មានចំនួន ១៧៨ករណី ដែលជាតួលេខឆ្លងបន្តថយចុះច្រើនដល់ចំនួន ៣០៨ករណី បើប្រៀបធៀបការឆ្លងកាលពីថ្ងៃម្សិលមិញ។ ការឆ្លងក្នុងរយៈពេល ២៤ម៉ោងកន្លងមកនេះ បានកើតលើប្រទេសចំនួន៤ រួមមានប្រទេសហ្វីលីពីន, វៀតណាម, មីយ៉ាន់ម៉ា និងប្រទេសឡាវ។ ប្រទេសហ្វីលីពីន គឺជាប្រទេសដែលមានតួលេខឆ្លងច្រើនជាងគេ ដែលមានការឆ្លងចំនួន ១៣៣ករណី។ តួលេខឆ្លងតិចជាងគេ គឺប្រទេសមីយ៉ាន់ម៉ា ដែលមានការឆ្លងចំនួន ៨ករណី។ គិតសរុបរួមនៃប្រទេសទាំង១០ អាស៊ាននាពេលនេះ ការឆ្លងសរុបមានចំនួន ៣៦លាន ៣០ម៉ឺន ៧ពាន់ ២៤៧ករណី, និងការស្លាប់សរុបមានចំនួន ៣៦ម៉ឺន ៨ពាន់ ៥៩៣នាក់ដដែល។ បើគិតសរុបនៅលើសាកលលោកនោះវិញ ការឆ្លងវីរុសកូវីដ១៩ សរុបមានចំនួនជាង ៦៩២លានករណី, និងការស្លាប់មានជាង ៦លាន ៩០ម៉ឺននាក់៕

ខេត្តព្រះវិហារបានរាយការណ៍ជុំវិញករណីក្មេងទំនើងដែលទើបមានជាលើកដំបូងក្នុងខេត្ត ភាគឥសានកម្ពុជានោះ។ អប្សរាណិតរាយការណ៍ជុំវិញក្មេងទំនើងនោះពីខេត្តព្រះវិហារ

ធនាគារអភិវឌ្ឍន៍អាស៊ី ADB បានអនុម័តកម្ចី៤០លានដុល្លារ សម្រាប់កំណែទម្រង់សំខាន់ៗ ក្នុងការផ្តល់សេវាសាធារណៈនៅកម្ពុជា។ យោងតាមសេចក្ដីប្រកាសព័ត៌មាន ដែលទទួលបាននៅថ្ងៃទី២៦ ខែកក្កដា «ធនាគារអភិវឌ្ឍន៍អាស៊ី បានអនុម័តប្រាក់កម្ចី ផ្អែកលើគោលនយោបាយចំនួន៤០លានដុល្លារ ដើម្បីគាំទ្រដល់កិច្ចខិតខំប្រឹងប្រែងរបស់រាជរដ្ឋាភិបាលកម្ពុជា ក្នុងការពង្រឹងបន្ថែមការផ្តល់សេវាសាធារណៈ ដោយរដ្ឋបាលមូលដ្ឋាន តាមរយៈកំណែទម្រង់ជា បន្តបន្ទាប់ក្នុងវិស័យហិរញ្ញវត្ថុសាធារណៈ និងវិមជ្ឈការ”។ នាយិកាធនាគារអភិវឌ្ឍន៍អាស៊ីប្រចាំប្រទេសកម្ពុជាលោកស្រី យ៉ូតសាណា វ៉ាម៉ា បានថ្លែងថា «កំណែទម្រង់ និងដំណោះស្រាយឌីជីថល ដែលត្រូវបានអនុវត្តក្នុងកម្មវិធីនេះ នឹងជួយតម្រង់ផែនការកម្រិតមូលដ្ឋានជាមួយនឹងថវិកាជាតិ និងខេត្តសម្រាប់ការផ្តល់សេវាសាធារណៈ នៅមូលដ្ឋានប្រកបដោយប្រសិទ្ធភាព និងសមធម៌ ដូចជាការទទួលបានទឹកស្អាត អនាម័យ និងការអប់រំជាដើម»។ ADB គឺជាដៃគូរបស់កម្ពុជាក្នុងការគាំទ្រកំណែទម្រង់លើការគ្រប់គ្រងហិរញ្ញវត្ថុសាធារណៈ និងវិមជ្ឈការចាប់តាំងពីឆ្នាំ២០០២នោះមក។ កម្ចីកម្មវិធីថ្មីនេះគឺស្របតាមយុទ្ធសាស្ត្រ ភាពជាដៃគូប្រចាំប្រទេសរបស់ ADB សម្រាប់កម្ពុជាឆ្នាំ ២០១៩-២០២៣។

បណ្តាឥស្សរជននយោបាយ, ថ្នាក់ដឹកក្រសួងមន្ទីរក្នុងប្រទេសកម្ពុជា, មន្ត្រីក្នុងជួរនគរបាល និងក្នុងកងយោធពលខេមរភូមិន្ទ, បណ្តាញសារព័ត៌មាន, អភិបាលខេត្ត, សមាគម និងក្រុមហ៊ុនធ្វើអាជីវកម្មឯកជន បានចេញសារលិខិតគាំទ្រសេចក្តីសម្រេចដ៏ខ្ពង់ខ្ពស់ របស់សម្តេចតេជោ ក្នុងការរៀបចំសមាសភាពរាជរដ្ឋាភិបាលថ្មី ក្រោមការដឹកនាំរបស់បណ្ឌិត ហ៊ុន ម៉ាណែត។ ខ្លឹមសារលិខិតបានបញ្ជាក់ការប្តេជ្ញាគាំទ្រចំពោះការសម្រេចចិត្តដ៏ត្រឹមត្រូវរបស់សម្តេចតេជោ ហ៊ុន សែន និងប្រកាសគាំទ្រចំពោបណ្ឌិត ហ៊ុន ម៉ាណែត សម្រាប់កាន់តួនាទីជានាយករដ្ឋមន្រ្តីថ្មីសម្រាប់អាណត្តិទី៧។ សារលិខិតគាំទ្រនៅបានបួងសួងដល់វត្ថុស័ក្តិសិទ្ធិក្នុងលោក ជួយថែរក្សាសម្តេចតេជោ និងក្រុមគ្រួសារ និងជូនពរដល់បណ្ឌិត ហ៊ុន ម៉ាណែត ក្នុងការដឹកនាំប្រទេស បន្តភាពសុខក្សេមក្សាន្ត និងការរីកចំរើនបន្តវេនពីសម្តេចតេជោ និងថ្នាក់ដឹកនាំជំនាន់ មុនសូមឱ្យកម្ពុជាបានជួបប្រទះនឹងវិបុលភាព និងសេចក្តីសុខជារៀងរហូត។

សម្តេចតេជោ ហ៊ុន សែន បានប្រកាសនៅថ្ងៃទី២៦កក្កដានេះ បញ្ជាក់ការមិនបន្តធ្វើជានាយករដ្ឋមន្ត្រីទៀតឡើយ។ ការដឹកនាំរាជរដ្ឋាភិបាលសម្រាប់អាណ្ណត្តិថ្មី នឹងត្រូវរៀបចំដោយបណ្ឌិត ហ៊ុន ម៉ាណែត។ សម្តេចបានថ្លែងសារមួយនៅថ្ងៃពុធនេះ គឺ៣ថ្ងៃក្រោយការបោះឆ្នោតសកល ដែលមានលទ្ធផលមិនផ្លូវការបញ្ជាក់ថាគណបក្សប្រជាជនកម្ពុជាឈ្នះភ្លូកទឹកភ្លូកដី។ ប្រសាសន៍បញ្ជាក់ច្បាស់ៗ នៃការមិនបន្តធ្វើជានាយករដ្ឋមន្ត្រីនេះ បានទន្ទឹមនឹងលទ្ធផលមិនទាន់ផ្លូវការបញ្ជាក់ថា ក្នុងចំណោមអាសនៈទាំង១២៥ក្នុងរដ្ឋសភា គឺគណបក្សប្រជាជនកម្ពុជា នឹងទទួលបាន១២០, ចំណែកគណបក្សហ៊្វុនស៊ីនប៉ិចទទួលបាន៥អាសនៈ។ ក្នុងអាណ្ណត្តិដឹកនាំរបស់សម្តេចតេជោកន្លងមកនេះ, ថ្នាក់ដឹកនាំកំពូលដែលសម្រេចជោគវាសនាប្រទេសជាតិ បានឈានចូលដល់វ័យកាន់តែចំណាស់ និងជាពេលវេលាដែលអ្នកបន្ត វេនរបស់គណបក្សប្រជាជនកម្ពុជាជំនាន់ក្រោយ ត្រូវបន្តការដឹកនាំនិងកសាងប្រទេស។ សម្តេចតេជោបានថ្លែងថា ឥស្សរជនកំពូលៗ ដែលធ្លាប់សម្រេចជោគវាសនាជាតិ និងក្លាយជាមន្ត្រីឧត្តមប្រឹក្សាផ្ទាល់របស់ព្រះមហាក្សត្រ ក្នុ្ងងនោះសម្តេចតេជោ គឺជាប្រធានឧត្តមក្រុមប្រឹក្សារបស់ព្រះមហាក្សត្រ។ បណ្ឌិត ហ៊ុន ម៉ាណែត អាយុ ៤៤ឆ្នាំ គឺជាជនជាតិកម្ពុជាដំបូងគេ ដែលបានប្រឡងជាប់ចូលសិក្សានៅសាលាបណ្ឌិតយោធា West Point នៅសហរដ្ឋអាមេរិក និងបញ្ចប់ថ្នាក់អនុបណ្ឌិតសេដ្ឋកិច្ចនៅសាកលវិទ្យាល័យ New York និងបញ្ចប់ថ្នាក់បណ្ឌិតសេដ្ឋកិច្ចនៅសកលវិទ្យាល័យ Bristol នៅចក្រភពអង់គ្លេស។ សម្តេចតេជោបានថ្លែងបន្តថាតាមរយៈការរៀបចំទុកជាមុននេះ, ប្រទេសកម្ពុជានឹងក្លាយជាប្រទេសដែលនឹងធានាសុខសាន្តនូវស្ថិរភាព, សន្តិភាព។

ប្រទេសមួយចំនួននៅអាស៊ាន ក្នុងរយៈពេល ២៤ម៉ោងចុងក្រោយនេះ នៅតែមាកករណីឆ្លង និងស្លាប់ដោយសារកូវីដ១៩ នៅឡើយ។ ដោយឡែកប្រទេសកម្ពុជានៅថ្ងៃនេះ មិនមានរកឃើញករណីឆ្លងថ្មីឡើយ ដែលនាំឲ្យការមិនមានអ្នកឆ្លងសោះមានរយៈពេល ១សប្តាហ៍មកហើយ។ តួលេខឆ្លងថ្មីកូវីដ១៩ ក្នុងប្រទេសអាស៊ាននៃរយៈពេល ២៤ម៉ោងចុងក្រោយនេះ មានចំនួន ២៨១ករណី ដែលជាតួលេខឆ្លងថយចុះមកវិញច្រើនដល់ចំនួន ២៦៦ករណី បើប្រៀបធៀបការឆ្លងកាលពីថ្ងៃម្សិលមិញ។ ការឆ្លងក្នុងរយៈពេល ២៤ម៉ោងកន្លងមកនេះ បានកើតលើប្រទេសចំនួន ៥នៅអាស៊ាន រួមមានប្រទេសឥណ្ឌូនេស៊ី, ម៉ាឡេស៊ី, វៀតណាម, មីយ៉ាន់ម៉ា និងប្រទេសឡាវ។ ប្រទេសម៉ាឡេស៊ី គឺជាប្រទេសដែលមានតួលេខឆ្លងច្រើនជាងគេ ដែលមានការឆ្លងចំនួន ១៥០ករណី។ តួលេខឆ្លងតិចជាងគេ គឺប្រទេសឡាវ ដែលមានការឆ្លងចំនួន ៥ករណី។ ប្រទេសហ្វីលីពីន, ថៃ, សឹង្ហបុរី, កម្ពុជា និងប្រទេសប្រុយណេ គឺជាប្រទេសដែលគ្មានសេចក្តីរាយការណ៍ជុំវិញតួលេខឆ្លង និងស្លាប់ឡើយក្នុងរយៈពេល ២៤ម៉ោងចុងក្រោយនេះ។ តួលេខស្លាប់ដោយសារកូវីដ១៩ ក្នុងប្រទេសអាស៊ានរយៈពេល ២៤ម៉ោងចុងក្រោយនេះមាន ចំនួន ២នាក់ ដែលជាពលរដ្ឋនៃប្រទេសម៉ាឡេស៊ី។ គិតសរុបរួមនៃប្រទេសទាំង១០អាស៊ាន នាពេលនេះ ការឆ្លងសរុបមានចំនួន ៣៦លាន ៣០ម៉ឺន ៦ពាន់…

បុណ្យទៀនព្រះវស្សាដែលមានការដុតទៀន ឬប្រទីបសម្រាប់ថ្ងៃចូលព្រះវស្សាកាន់តែរំកិលកៀកមកជាលំដាប់។ នៅវត្តព្រះពុទ្ធអណ្តែត ហៅវត្តក្តីល្វា នាថ្ងៃទី២៤ ខែកក្កដា ឆ្នាំ២០២៣ ទៀនព្រះវស្សាខ្នាតធំចំនួន៤ដើម រួមនឹងចង្ហាន់បិណ្ឌបាត្រ ទេយ្យវត្ថុជាគ្រឿងឧបភោគបរិភោគជាច្រើន ត្រូវបានយកទៅប្រគេនជូនព្រះសង្ឃគង់ក្នុងវត្តតាមរយៈឧត្តមបណ្ឌិត ស៊ាង ប៊ុនលាង និងលោកជំទាវ អគ្គមហាឧបាសិកាពុទ្ធសាសនូបត្ថម្ភក៍ ហ៊ុន ប៊ុនធឿន។ សូមទស្សនាសេចក្តីរាយការណ៍

ក្រសួងអប់រំ បានកំណត់យកកាលបរិច្ឆេទ នៃកាប្រឡងសញ្ញាបត្រមធ្យមសិក្សាទុតិយភូមិ នៅដើមខែវិច្ឆិកាខាងមុខនេះ។ យោងតាមសេចក្ដីជូនដំណឹងរបស់ក្រសួងអប់រំ យុវជន និងកីឡា ការប្រឡងបាក់ឌុបសម្រាប់ឆ្នាំសិក្សា២០២២-២០២៣នេះ ក្រសួងបានកំណត់សម័យប្រឡងនាថ្ងៃទី០៦ ខែវិច្ឆិកា ឆ្នាំ២០២៣។ សេចក្ដីជូនដំណឹងដដែលនៅបានបញ្ជាក់ជូនដល់មន្ទីរអប់រំ យុវជន និងកីឡា រាជធានី-ខេត្ត គណៈគ្រប់គ្រង, គ្រឹះស្ថានមធ្យមសិក្សា, បុគ្គលិកអប់រំ, មាតាបិតា, អ្នកអាណាព្យាបាលសិស្សានុសិស្សគ្រប់រូប ត្រូវត្រៀមលក្ខណៈ ដើម្បីអនុវត្តការរៀបចំប្រឡងឱ្យមានប្រសិទ្ធភាពខ្ពស់។