សមាគមមិត្តភាពកម្ពុជា-ចិន បានចេញសេចក្ដីអំពាវនាវដល់ប្រជាពលរដ្ឋខ្មែរកាត់ចិន សូមទៅបោះឆ្នោតឲ្យបានគ្រប់ៗគ្នា ដើម្បីជ្រើសរើសអ្នកដឹកនាំប្រទេសជាតិដោយសេរីត្រឹមត្រូវនិងយុត្តិធម៌។ ការបោះឆ្នោតសកលឆ្នាំ២០២៣នេះ ត្រូវគេកត់សម្គាល់ថាមានលក្ខណៈខុសប្លែកពីធម្មតា ដោយសារតែមានអំពើញុះញង់ពីក្រៅប្រទេសចង់បំផ្លាញលទ្ធផល នៃការបោះឆ្នោត ខណៈដែលគណបក្សចូលរួមទាំង១៨ ក្នុងស្រុកបានរួមគ្នាប្រឆាំងនឹងអំពើញុះញង់ទាំងនោះ។ សេចក្តីអំពាវនាវរបស់សមាគមមិត្តភាពកម្ពុជា-ចិន ថ្ងៃទី២០ ខែកក្តដា ឆ្នាំ២០២៣នេះ បាន «អំពាវនាវចំពោះប្រជាពលរដ្ឋខ្មែរ-ចិន ទាំងអស់ដែលមានសិទ្ធ និងមានឈ្មោះក្នុងបញ្ជីបោះឆ្នោត សូមអញ្ជើញទៅបោះឆ្នោតឲ្យបានគ្រប់ៗរូប ជ្រើសរើសអ្នកដឹកនាំប្រទេសជាតិ ដើម្បីការពារសន្តិភាព ការអភិវឌ្ឍ និងការរីកចម្រើនរុងរឿងថ្កើងថ្កាន លើគ្រប់វិស័យនៃមាតុភូមិ»។ សមាគមមិត្តភាព កម្ពុជា-ចិន បានបញ្ជាក់ទៀតថាការបោះឆ្នោតដែលនឹងប្រព្រឹត្តទៅ នាពេលខាងមុខ គឺជាការបោះឆ្នោតជាទូទៅ, ជាសកលដោយសេរី ត្រឹមត្រូវ យុត្តិធម៌ ស្មើភាព និងដោយសម្ងាត់ ស្របតាមគោលការណ៍លទ្ធិប្រជាធិបតេយ្យ សេរី ពហុបក្ស។ ប្រជាពលរដ្ឋដែលមានសិទ្ធិបោះឆ្នោត ត្រូវគជបបញ្ជាក់ថាមានចំនួនជាង៩ លាន៧សែននាក់, ការិយាល័យ ដែលត្រូវបម្រើដល់ការបោះឆ្នោតនៅទូទាំងប្រទេសមានចំនួនសរុប ២ម៉ឺន៣ ពាន់៧៩៩ការិយាល័យ៕

កម្ពុជាគ្រោងនឹងធ្វើជាម្ចាស់ផ្ទះ នៃសន្និសីទស្វាយចន្ទីពិភពលោកនៅដើមឆ្នាំ២០២៤។ សន្និសីទស្វាយចន្ទីពិភពលោករយៈពេលបីថ្ងៃគ្រោងនឹងរៀបចំធ្វើនៅលើទឹកដីអង្គរខេត្តសៀមរាប នាដើមឆ្នាំ២០២៤ ដោយមានការចូលរួម៤០ប្រទេស ពីលើសកលលោក។ អប្សរាណិតរាយការណ៍

សកម្មជនអតីតគណបក្សប្រឆាំងជិត២៨០នាក់ បានស័្មគ្រចិត្តចូលរួមជីវភាពនយោបាយ ជាមួយគណបក្សប្រជាជនកម្ពុជារាជធានីភ្នំពេញ។ ពិធីប្រកាសបញ្ចូលជាសមាជិកថ្មីចំនួន២៧៩ រូបនេះ បានធ្វើឡើងនាព្រឹកថ្ងៃទី២០ ខែកក្កដា ឆ្នាំ២០២៣ ក្រោមវត្តមានប្រធានគណៈកម្មាធិការគណបក្សរាជធានីភ្នំពេញលោក ឃួង ស្រេង នៅមន្ទីរគណបក្សរាជធានីភ្នំពេញ។ តំណាងអ្នកចូលរួមបានលើកឡើងក្នុងឱកាសនោះបញ្ជាក់ថា ការស័្មគ្រចិត្តចូលរួមជីវភាពនយោបាយជាមួយគណបក្សប្រជាជនកម្ពុជានេះ គឺក្រោយពីបានមើលឃើញពីវីរភាព និងការលះបង់ដ៏ធំធេងរបស់សម្តេចតេជោ ហ៊ុន សែន ប្រធានគណបក្សប្រជាជនកម្ពុជា ក្នុងបុព្វហេតុស្វែងរកសន្តិភាព និងការអភិវឌ្ឍប្រទេសជាតិ ឲ្យរីកចម្រើនជឿនលឿន ហើយការស័្មគ្រចិត្តចូលរួមជីវភាពនយោបាយ ជាមួយគណបក្សប្រជាជនកម្ពុជានេះ គឺពួកគេមានគោលបំណង ដើម្បីរួមចំណែកកសាងជាតិ មាតុភូមិ។ លោក ឃួង ស្រេង បានអំពាវនាវការរួមគ្នាការពារសន្តិភាព និងការនាំគ្នាទៅបោះឆ្នោតថ្ងៃទី២៣ កក្កដា គាំទ្រគណបក្សប្រជាជនកម្ពុជា ដើម្បីកម្ពុជាមានឱកាសកសាងអភិវឌ្ឍន៍ប្រទេសឲ្យរីកចម្រើនរុងរឿងបន្ថែមទៀត ពិសេសគឺការប្រែក្លាយប្រទេសកម្ពុជា ទៅជាប្រទេសដែលមានចំណូលមធ្យមកម្រិតខ្ពស់ នៅឆ្នាំ២០៣០ និងក្លាយជាប្រទេសមានចំណូលខ្ពស់ នៅឆ្នាំ២០៥០៕

នាយករដ្ឋមន្ត្រីនៃប្រទេសហ្គីណេប៊ីសាវលោក នូណូ ហ្គូណេស ណាប៊ីអេម គ្រោងបំពេញទស្សនកិច្ចការងារនៅកម្ពុជារយៈពេល៣ថ្ងៃរវាងពីថ្ងៃទី២១ ដល់២៤កក្កដា ដែលដំណើរទស្សនកិច្ចនោះ គឺតបតាមការអញ្ជើញរបស់សម្តេចនាយករដ្ឋមន្ត្រី នៃប្រទេសកម្ពុជា។ យោងតាមសេចក្តីប្រកាសព័ត៌មានរបស់ក្រសួងការបរទេស, នាយករដ្ឋមន្ត្រី នៃប្រទេសហ្គីណេ ប៊ីសាវ នឹងជួបទ្វេភាគីជាមួយនឹងសម្តេចតេជោ ហ៊ុន សែន និងអញ្ជើញចូលរួមសង្កេតការណ៍ដោយផ្ទាល់ក្នុងការបោះឆ្នោតសកលនៅកម្ពុជាថែមទៀត។ លោក នូណូ ហ្គូណេស ណាប៊ីអេម នឹងចូលរួមកម្មវិធីអាហារពេលល្ងាច ដែលរៀបចំឡើងដោយសម្តេចតេជោ ហ៊ុន សែន, ជួបពិភាក្សាលើប្រធានបទទ្វេភាគីមួយចំនួន, រៀបចំផែនការសកម្មភាពនានា សម្រាប់ជម្រុញកិច្ចសហប្រតិបត្តិការ ដែលផ្តល់ផងប្រយោជន៍ទៅវិញទៅមក ព្រមទាំងផ្លាស់ប្តូរទស្សនៈលើបញ្ហាតំបន់ និងអន្តរជាតិដែលជាផលប្រយោជន៍និងក្តីបារម្ភរួម។ ក្រសួងការបរទេសកម្ពុជាបានថ្លែងថា «ដំណើរទស្សនកិច្ចការងារជាលើកដំបូងរបស់លោក នូណូ ហ្គូណេស ណាប៊ីអេម មកកាន់កម្ពុជាគឺជាព្រឹត្តិការណ៍ដ៏មានសារៈសំខាន់មួយ នៅក្នុងទំនាក់ទំនងជាមិត្តភាពរវាងប្រទេសទាំង២ព្រមទាំងរួមចំណែកដល់ការពង្រឹងចំណងមិត្តភាព និងកិច្ចសហប្រតិបត្តិការដ៏ល្អ ដើម្បីជាផលប្រយោជន៍របស់ប្រជាជន នៃប្រទេសទាំង២»។ ប្រទេសហ្គីណេ ប៊ីសាវ គឺជាប្រទេសត្រូពិចមួយនៅលើឆ្នេរសមុទ្រអាត្លង់ទិក នៃទ្វីបអាហ្រ្វិកខាងលិច ដែលត្រូវបានគេស្គាល់ថាជាឧទ្យានជាតិ និងសត្វព្រៃ។ ប្រទេសក្នុងទ្វីបអាហ្វ្រិកនេះ ជាប្រទេសមានទំហំប្រមាណ៣ម៉ឺន ៦ពាន់ ១៣០គីឡូម៉ែត្រក្រឡា ដែលតូចជាងកម្ពុជាជិត៦ដង និងមានប្រជាជនជាង២លាននាក់។

សម្ដេចក្រឡាហោម ស ខេង បានជួបក្រុមប្រឹក្សាកីឡាក្រសួងមហាផ្ទៃចំនួន៤៨នាក់ ដែលត្រៀមចេញទៅប្រកួតកីឡានគរបាល និងកងពន្លត់អគ្គិភ័យពិភពលោក នៅក្នុងប្រទេសកាណាដា។ ការប្រកួតកីឡានគរបាលក្នុងព្រឹត្តិការណ៍The 20th World Police and Fire Games 2023 នៅប្រទេសកាណាដា នឹងមានរយៈពេល៩ថ្ងៃចាប់ពីថ្ងៃទី២៨ ខែកក្កដា រហូតដល់ថ្ងៃទី៦ ខែសីហា។ ប្រទេសដែលនឹងចូលរួមមានសរុប៦០ប្រទេស ដែលនឹងប្រកួតកីឡានគរបាលនេះ ចំនួន ៦៣វិញ្ញាសារកីឡា។ យោងតាមរបាយការណ៍កម្ពុជានឹងបញ្ជូនក្រុមកីឡាករនគរបាលចំនួន៤៨នាក់ ដើម្បីចូលរួមក្នុងការប្រកួតនោះ។ យោងតាមអនុរដ្ឋលេខាធិការក្រសួងមហាផ្ទៃលោក សរ សិទ្ធិ ការរៀបចំកីឡានគរបាល និងកងពន្លត់អគ្គិភ័យពិភពលោក គឺដើម្បីបង្ហាញពីសមាគ្គីភាព, សមត្ថភាព និងទេព្យកោសល្យរបស់កងនគរបាល នៃប្រទេសនីមួយៗ។ លោកបានថ្លែងថាប្រទេសកម្ពុជាធ្លាប់បានបញ្ជូនប្រតិភូកីឡាចូលរួមចំនួន២លើក ក្នុងចំណោមការរៀបចំចំនួន២០លើករួចមកហើយនេះ។ កីឡាករនៃក្រុមនគរបាលកម្ពុជា នឹងចូលរួមប្រកួតលើ១៣ប្រភេទកីឡារួមមានកីឡាវាយសី, កីឡាលើកទំងន់, កីឡាយូដូ, កីឡាជីជិតស៊ូ, កីឡាការ៉ាតេ, កីឡាហែលទឹក, កីឡាវាយកូនឃ្លីលើតុ, កីឡាបាល់ទះក្នុងសាល, កីឡាបាល់ទះឆ្នេរខ្សាច់, កីឡាចំបាប់, កីឡាចំបាប់កាច់ដៃ, កីឡាវាយកូនគោល, កីឡាលើកទម្ងន់សាច់ដុំ Bench Press និងកីឡាទាញសាច់ដុំ Push…

មន្ត្រីគជបបានថ្លែងថាគេបានទទួលបណ្តឹងចំនួន៣២ករណី ក្នុងរយៈពេល២០ថ្ងៃ នៃយុទ្ធនាការឃោសនាបោះឆ្នោត។ យុទ្ធនាការឃោសនាបោះឆ្នោតជ្រើសតាំងតំណាងរាស្រ្តនីតិកាលទី៧ នឹងបញ្ចប់នៅថ្ងៃចុងក្រោយទី២១ ខែកក្កដា ឆ្នាំ២០២៣នេះហើយ។ អ្នកនាំពាក្យគជប លោក សោម សូរីដា បានបញ្ជាក់ថាក្នុងចំណោមបណ្ដឹងទាំង៣២នោះ មាន១១បណ្ដឹង ត្រូវបានដោះស្រាយចប់រួចរាល់…ចំណែក២១បណ្ដឹងទៀត ត្រូវបាននិងកំពុងដោះស្រាយ។ លោកបានបន្តថាក្នុងចំនោមបណ្តឹងទាំង៣២នោះ មានបណ្តឹងមួយករណីដែលពាក់ព័ន្ធទៅនឹងការបង្ហោះសារ ដែលមានការរើសអើងពូជសាសន៍ និងបណ្ដឹងមួយទៀតពាក់ព័ន្ធនឹងជនមិនស្គាល់អត្តសញ្ញាណ ដែលបានយកស្លាកគណបក្សយោបាយមួយទៅបិទនៅលើរូបថតថ្នាក់ដឹកនាំគណបក្សប្រជាជនកម្ពុជា។ ដោយឡែកចំនួន៣០បណ្តឹងផ្សេងទៀត គឺជាការប្តឹងពាក់ព័ន្ធ នឹងការណែនាំ ឬញុះញង់អ្នកបោះឆ្នោតឲ្យបំផ្លាញសន្លឹកឆ្នោតចោល។ យោងតាមច្បាប់ស្តីពីវិសោធនកម្មច្បាប់ស្តីពីការបោះឆ្នោតជ្រើសតាំងតំណាងរាស្ត្រ ក្នុងមាត្រា១៤២ បានការផាកពិន័យប្រាក់រវាងពី៥លានរៀល ទៅ២០លានរៀល ដោយពុំទាន់គិតពីបទព្រហ្មទណ្ឌផ្សេងទៀតឡើយ ពាក់ព័ន្ធនឹងជនណាដែលប្រើមធ្យោបាយទុច្ចរិតដូចជា «ណែនាំឬញុះញង់ឱ្យអ្នកបោះឆ្នោត, បំផ្លាញឬធ្វើឱ្យខូចសន្លឹកឆ្នោត, ធ្វើឱ្យបាត់ទំនុកចិត្តលើការសម្ងាត់ នៃការបោះឆ្នោត, និងធ្វើឱ្យមានការភាន់ច្រឡំនាំឱ្យបាត់ទំនុកចិត្តលើការបោះឆ្នោត»។

មនុស្សជាង១៤ម៉ឺននាក់ដែលជាប្រធាន, អនុប្រធាន និងសមាជិកគណៈកម្មការការិយាល័យបោះឆ្នោតនៅទូទាំងប្រទេស បានរៀបចំធ្វើពិធីស្បថសច្ចាប្រណិធានប្តេជ្ញាការរក្សា «ឯករាជ្យ, អព្យាក្រឹត, សច្ចៈ, យុត្តិធម៌ និងតម្លាភាព»។ នៅទូទាំងប្រទេសកម្ពុជាការិយាល័យបោះឆ្នោត មានសរុបចំនួន២ម៉ឺន ៣ពាន់ ៧៩៩នាក់ ដែលក្នុងការិយាល័យនីមួយៗមានប្រធាន, អនុប្រធាន និងសមាជិកចំនួន៦នាក់។ បើគិតសរុបនៃចំនួនមនុស្សទាំងអស់, ប្រធាន, អនុប្រធាន និងសមាជិកដែលបានដាក់ពង្រាយ ដើម្បីធ្វើការនៅថ្ងៃបោះឆ្នោតនោះ មានចំនួនសរុប១៤ ម៉ឺន២ពាន់៧៩៤នាក់។ អប្សរាណិតធ្វើសេចក្តីរាយការណ៍

សង្គ្រាមនៃពាក្យសម្តីចោទប្រកាន់ កាន់តែកើនឡើង ខណៈការបោះឆ្នោតសកលនឹងមកដល់នាចុងសប្តាហ៍នេះ។ ពីក្រៅប្រទេស, មេខ្លោងធ្វើនយោបាយ ដែលចង់នាំប្រទេសធ្លាក់ចូលក្នុងសង្គ្រាម បានប្រើពាក្យសម្តីវាយប្រហារ និងចោទប្រកាន់ជាច្រើនដាក់មកលើប្រមុខដឹកនាំរាជរដ្ឋាភិបាលកម្ពុជា។ ប៉ុន្តែការចោទប្រកាន់នូវពាក្យមិនពិតទាំងនោះ បានទទួលការការពារពីប្រជាពលរដ្ឋ និងព្រះសង្ឃផងដែរ។ បណ្ឌិត ហ៊ុន ម៉ាណែត បានថ្លែងក្នុងសប្តាហ៍នេះថា អ្វីដែលសម្តេចតេជោ ហ៊ុន សែន បានធ្វើ គឺដើម្បីតែផលប្រយោជន៍ជាតិ និងប្រជាជនរបស់ខ្លួន តែប៉ុណ្ណោះ។ អប្សរាណិតធ្វើសេចក្តីរាយការណ៍

ព្រះមហាក្សត្រខ្មែរសម្តេចព្រះបរមនាថ នរោត្តម សីហមុនី និងប្រធានាធិបតីចិន បានធ្វើសារលិខិតឆ្លើយឆ្លងគ្នាអបអរទិវាខួបលើកទី៦៥ឆ្នាំ នៃទំនាក់ទំនងការទូតរវាងប្រទេសទាំង២។ ព្រះមហាក្សត្រខ្មែរ និងលោកប្រធានាធិបតីចិន ស៊ី ជីនពីន ក្នុងសារលិខិតឆ្លើយឆ្លងគ្នា បានបញ្ជាក់ការប្តេជ្ញាបង្កើនកិច្ចសហប្រតិបត្តិការកាន់តែរឹងមាំ និងបានសម្តែងក្តីពេញចិត្តលើកិច្ចសហប្រតិបត្តិការត្បូងពេជ្រ រវាងប្រទេសចិន និងកម្ពុជា។ អប្សរាណិតធ្វើសេចក្តីរាយការណ៍