មជ្ឈមណ្ឌលទិន្នន័យជាតិ (National Data Center) តម្លៃជិត៣០លានដុល្លារ ត្រូវបានកម្ពុជា បានសាងសង់ឡើងជាលើកដំបូងដើម្បីផ្ទុកទិន្នន័យជាតិ។ រដ្ឋមន្ដ្រីក្រសួងប្រៃសណីយ៍ និងទូរគមនាគមន៍ លោក ជា វ៉ាន់ដេត នៅថ្ងៃទី១៩ ខែកក្កដា ឆ្នាំ២០២៣ ក្នុងពិធីអញ្ជើញចូលរួមការបញ្ចុះបឋមសិលាបើកការដ្ឋានសាងសង់អគារមជ្ឈមណ្ឌលទិន្នន័យជាតិ បានបញ្ជាក់នូវមូលហេតុដែលកម្ពុជាត្រូវកសាងមជ្ឈមណ្ឌលទិន្នន័យជាតិនេះ។ មជ្ឈមណ្ឌលទិន្នន័យជាតិនេះ នឹងគ្រោងបញ្ចប់ការសាងសង់នៅក្នុងឆ្នាំ២០២៥។

ខេត្តព្រះវិហារបានបើកវគ្គហ្វឹកហ្វឺនពង្រឹងសមត្ថភាពប្រយុទ្ធយោធានៅទីបញ្ជាការដ្ឋានកងវរសេនាតូចលេខ១។ វគ្គហ្វឹកហ្វឺនបានធ្វើនៅថ្ងៃទី១៩កក្កដានេះ ជាមួយការប្តេជ្ញារបស់យោធិន ប្រឆាំងដាច់ខាតការប៉ុនប៉ងណាមួយដែលចង់ផ្តួលរំលំរាជរដ្ឋាភិបាលកម្ពុជា។ អប្សរាណិតធ្វើសេចក្តីរាយការណ៍

ក្រុមជនបរទេសដែលចូលរួមក្នុងការសង្កេតការណ៍បោះឆ្នោត បានធ្វើដំណើរមកដល់ប្រទេសកម្ពុជាជាបណ្តើរ និងក្រុមខ្លះទទួលបានការអនុញ្ញាតជួបសាកសួរជាមួយស្ថាប័នជាប់ទាក់ទងនានាជុំវិញ ការចង់ដឹងសភាពការណ៍ទាំងឡាយពាក់ព័ន្ធនឹងដំណើរការបោះឆ្នោតនៅកម្ពុជា។ សមាជិកគជបលោក ឌឹម សុវណ្ណារុំ ដែលជាប្រធានក្រុមប្រតិកម្មព័ត៌មានគជប បានប្រាប់អប្សរាណិតថាក្រុមសង្កេតការណ៍បរទេសបានចាប់ផ្តើមធ្វើដំណើរមកដល់កម្ពុជាតាំងពីថ្ងៃទី១៧ កក្កដា និងជាបន្តបន្ទាប់រហូតដល់ថ្ងៃទី២១កក្កដា។ លោកបានថ្លែងថារហូតដល់ថ្ងៃទី២១កក្កដា គឺនឹងមានការមកដល់នៃប្រធានគជបរបស់ប្រទេសថៃ, ប្រទេសមីយ៉ាន់ម៉ា និងអនុប្រធានគជប នៃប្រទេសឥណ្ឌា។ ដោយឡែកកាលពីថ្ងៃទី១៨ កក្កដា ឆ្នាំ២០២៣, ក្រុមសង្កេតការណ៍ នៃប្រទេសដែលនិយាយភាសាបារាំង នៃក្រុមបេសកកម្មសង្កេតការណ៍បោះឆ្នោត នៃប្រទេសហ្វ្រង់កូហ្វូនី ត្រូវបានអនុញ្ញាតជួបសម្តែងការគួរសមជាមួយ ប្រធានក្រុមប្រឹក្សាធម្មនុញ្ញ គឺកិត្តិនិតិកោសល្យបណ្ឌិត អ៊ឹម ឈុនលឹម។ ក្រុមប្រឹក្សាធម្មនុញ្ញគឺជាស្ថាប័នច្បាប់កំពូលបំផុតរបស់ព្រះរាជាណាចក្រកម្ពុជា។ មន្ត្រីនាំពាក្យក្រុមប្រឹក្សាធម្មនុញ្ញ បានថ្លែងថាក្នុងជំនួបសម្តែងការគួរសមនោះ, ប្រធានក្រុមប្រឹក្សាធម្មនុញ្ញ បានរៀបរាប់ជុំវិញសភាពពាក់ព័ន្ធនឹងការបោះឆ្នោត ទាក់ទងនឹងមូលហេតុដែលគណបក្សចំនួន២អវត្តមានមិនបានចូលរួមក្នុងការបោះឆ្នោត ដោយសារតែកំហុសរបស់គណបក្សនយោបាយ ដែលមិនមានឯកសារបញ្ជាក់ដូចតាមនីតិវិធីដែលជាបញ្ហាច្បាប់ដោយសុទ្ធសាធ។ ប្រធានក្រុមប្រឹក្សាធម្មនុញ្ញបានរៀបរាប់ជុំវិញស្ថានការណ៍បោះឆ្នោតសកលទាំង៦ដង កើតឡើងក្នុងប្រទេសកម្ពុជា និងការកែសម្រួលច្បាប់ឱ្យកាន់តែប្រសើរឡើង ពាក់ព័ន្ធនឹងការបោះឆ្នោត និងភាពរលូន នៃយុទ្ធនាការឃោសនាដែលបាននិងកំពុងប្រព្រឹត្ត ចាប់តាំងពីដើមខែកក្កដាមកនេះ។ មន្ត្រីនាំពាក្យក្រុមប្រឹក្សាធម្មនុញ្ញបានថ្លែងបន្តថាប្រធានក្រុមប្រឹក្សាធម្មនុញ្ញ នៃប្រទេសកម្ពុជា បានលើកទឹកចិត្តដល់ក្រុមអ្នកសង្កេតការណ៍ ហ្វ្រង់កូ ហ្វូនី សូមជួយបន្តការតាមដានដំណើរការបោះ ឆ្នោតបន្ថែមទៀតក្រោមក្រសែភ្នែករបស់អ្នក សង្កេតការណ៍អន្តរជាតិ។

ជម្ងឺគ្រុនឈាមក្នុងរដូវវស្សាធ្លាក់ភ្លៀង ត្រូវគេរកឃើញបានកើតនៅក្នុងខេត្តកំពង់ឆ្នាំង។ ក្នុងរយៈពេល៦ខែដើមឆ្នាំនេះ ការស្លាប់ដោយជម្ងឺគ្រុនឈាមមាន២ករណីជាមួយនឹងការកើតលើកុមារចំនួន១៤៣នាក់។ អប្សរាណិតរាយការណ៍

ថ្នាក់ដឹកនាំគណបក្សភ្លើងទៀន និងសកម្មជនជាង៥០នាក់នៅខណ្ឌមានជ័យ និងខណ្ឌដូនពេញ បានសុំចូលរួមជីវភាពនយោបាយជាមួយបក្សប្រជាជនកម្ពុជា។ ការស្ម័គ្រចិត្តចូលរួមរបស់សមាជិកគណបក្សភ្លើងទៀនទាំងនេះ បានធ្វើឡើងនាព្រឹកថ្ងៃទី១៩ កក្កដា ឆ្នាំ២០២៣ ដោយពួកគេបានដោះអាវនិងទម្លាក់ស្លាកគណបក្សភ្លើងទៀនចេញហើយ សុំចូលរួមជីវភាពនយោបាយជាមួយគណបក្សប្រជាជនកម្ពុជា។ ព្រឹត្តិការណ៍ទម្លាក់ស្លាកគណបក្សភ្លើងទៀនចេញនេះបាន ធ្វើឡើងនៅស្នាក់ការគណបក្សភ្លើងទៀន ស្ថិតក្នុងភូមទ្រាទី៤ សង្កាត់ស្ទឹងមានជ័យទី៣ ខណ្ឌមានជ័យ។ លោក ភួង សុវណ្ណ ដែលសមាជិកគណៈកម្មាធិការនាយក និងជាសមាជិកក្រុមការងារចុះជួយគណបក្សភ្លើងទៀនរាជធានីភ្នំពេញ បានអះអាងថា សមាជិករបស់លោកទាំងអស់ គឺគ្មានជំនឿទៅលើការដឹកនាំ របស់គណបក្សភ្លើងទៀនតទៅទៀតនោះទេ ព្រោះមេដឹកនាំគណបក្សនេះ តែងបោកប្រាស់សមាជិករបស់ខ្លួនរហូត ហើយពុំដែលធ្វើអ្វីដើម្បីប្រជាជន និងប្រទេសជាតិនោះទេ។ អតីតសកម្មជនម្នាក់ទៀត ឈ្មោះ ទឹង សុចិត្រា ដែលជាប្រធានគណកម្មាធិការប្រតិបត្តិគណបក្សភ្លើងទៀន ខណ្ឌមានជ័យ បានលើកឡើងថា មានតែគណបក្សប្រជាជនកម្ពុជា ដែលមានសម្តេចតេជោ ហ៊ុន សែន ជាប្រធាននោះទេ ដែលជាគណបក្សគិតគួរប្រទេសជាតិប្រជាជាតិជាធំ មិនដូចមេដឹកនាំគណបក្សភ្លើងទៀន ដែលគិតតែផលប្រយោជន៍ផ្ទាល់ខ្លួននោះឡើយ៕

រថយន្តក្រុង៣៥០គ្រឿង ដើម្បីសម្រួលក្នុងការដឹកជញ្ជូនកម្មករនិយោជិត និងប្រជាពលរដ្ឋ ទៅតាមបណ្តាខេត្ត ដើម្បីការចូលរួមបោះឆ្នោតសកលថ្ងៃទី២៣កក្កដា បានត្រៀមរួចរាល់ជាស្រេច។ កិច្ចប្រជុំមួយជាមួយស្ថាប័នដែលពាក់ព័ន្ធដឹកនាំដោយអភិបាលរាជធានីភ្នំពេញលោក ឃួង ស្រេង និងរដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ ពាក់ព័ន្ធនឹងការត្រៀមរៀបចំនេះ បានធ្វើឡើងនៅរសៀលថ្ងៃទី១៨ ខែកក្កដា ឆ្នាំ២០២៣ អនុវត្តតាមប្រសាសន៍ដឹកនាំដ៏ខ្ពង់ខ្ពស់របស់សម្តេចតេជោ ហ៊ុន សែន។ រថយន្តទាំង៣៥០គ្រឿងនេះ នឹងត្រូវបានដាក់ឱ្យប្រើប្រាស់រយៈពេល៣ថ្ងៃ ចាប់ពីថ្ងៃទី២២ ដល់ថ្ងៃទី២៤ ខែកក្កដា ឆ្នាំ២០២៣ ដោយមិនបង់ប្រាក់ និងបានបែងចែងជា១០ទីតាំងនៅក្នុងរាជធានីភ្នំពេញ។

ការបោះឆ្នោតសកលជ្រើសតាំងតំណាងរាស្ត្រនីតិកាលទី៧ នឹងមកដល់នាថ្ងៃអាទិត្យចុងសប្តាហ៍នេះហើយ។ សម្តេចតេជោ ហ៊ុន សែន បាន សរសេរក្នុងបណ្តាញសង្គមបញ្ជាក់ថា «ការបោះឆ្នោតសកលនៅឆ្នាំ២០២៣នេះ មិនមែនមានត្រឹមតែការប្រកួតប្រជែងដណ្តើមកៅអីសភារវាងគណបក្សទាំង១៨ ដែលចុះឈ្មោះប្រកួតប្រជែងនោះទេ ប៉ុន្តែថែមទាំងមានការប្រកួតប្រជែងរវាងគណបក្សទាំង១៨ ជាមួយពួកជ្រុលនិយម ដែលចង់បំផ្លាញចោលការបោះឆ្នោតថែមទៀត»។ សម្តេចតេជោបានថ្លែងក្នុងបណ្តាញសង្គមប្រាប់ពលរដ្ឋទូទាំងប្រទេសត្រូវបន្តរង់ចាំមើលថាតើទីចុងបំផុតកម្លាំងខាងណាមួយដែលនឹងមានប្រៀបជាង? អប្សរាណិតធ្វើសេចក្តីរាយការណ៍

សម្តេចព្រះមហាសង្ឃរាជ បួរ គ្រី នៃគណៈធម្មយុត្តិរបស់ព្រះរាជាណាចក្រកម្ពុជា បានមានព្រះរាជបន្ទូលផ្តល់យុត្តិធម៌ជូនដល់គណបក្សប្រជាជនកម្ពុជា ដែលជាគណបក្សបានជួយសង្គ្រោះប្រជាពលរដ្ឋពីរបបកាប់សម្លាប់ខ្មែរក្រហម, ជាគណបក្សធ្វើឱ្យប្រទេសជាតិកម្ពុជា ទទួលបានសុខសន្តិភាពពិតប្រាកដ និងធ្វើឱ្យប្រទេសមានការរីកចំរើនដូចបច្ចុប្បន្ន។ ព្រះរាជបន្ទូលផ្តល់យុត្តិធម៌នេះ បានធ្វើក្នុងសេចក្តីអំពាវនាវមួយដល់ពលរដ្ឋទាំងអស់នៅទូទាំងប្រទេសសូមអញ្ជើញនាំគ្នាចូលរួមបោះឆ្នោតសកលថ្ងៃទី២៣កក្កដាឆ្នាំ២០២៣។ ព្រះរាជបន្ទូលរបស់សម្តេចព្រះមហាសង្ឃរាជ បួរ គ្រី បានធ្វើឡើងក្នុងស្ថានការណ៍ ដែលមេខ្លោងក្រុមឧទ្ទាមដឹកនាំដោយ សម រង្ស៊ី កំពុងចលនាប្រជាជនប្រឆាំងសន្តិភាព ដែលរកបានដោយលំបាកតាមនយោបាយឈ្នះឈ្នះដាក់ចេញដោយសម្តេចតេជោ ហ៊ុន សែន ដែលធ្វើឱ្យប្រទេសអស់សង្គ្រាមស៊ីវិល និងបានទទួលសុខសន្តិភាពពិតប្រាកដ។ សម្តេចព្រះមហាសង្ឃរាជ បួរ គ្រី បានមានបន្ទូលបង្ហាញថាដំណើរទៅមុខរបស់ប្រទេសកម្ពុជា បច្ចុប្បន្នបានស្ថិតក្នុងគន្លងដ៏ត្រឹមត្រូវហើយកំពុងឆ្ពោះទៅរីកចំរើនដូចអរិយៈប្រទេសនានាលើសកលលោក។ សម្តេចព្រះមហាសង្ឃរាជ បួរ គ្រី ដែលមានព្រះជន្មាយុ៧៨ព្រះវស្សា គឺជាថ្នាក់ដឹកនាំសង្ឃដ៏កំពូលមួយរបស់ព្រះរាជាណាចក្រកម្ពុជា និងវត្តមានរបស់ព្រះអង្គក្នុងពិធីនានា នៃគ្រប់សាសនាលើពិភពលោក តែងទទួលបានការកោតគោរព និងការផ្តល់ឱវាទទូន្មានរបស់ព្រះអង្គ មិនថាតែពលរដ្ឋខ្មែរប៉ុណ្ណោះទេដែលត្រងត្រាប់ សូម្បីតែបរទេសក៏បានទទួលស្គាល់ថា ព្រះអង្គគឺជាថ្នាក់សង្ឃកំពូលមួយអង្គក្នុងរង្វង់ព្រះសង្ឃល្បីល្បាញនានាក្នុងសកលលោក ផងដែរ។