គ្រាប់មីនតោនមួយគ្រាប់បានផ្ទុះឡើងបណ្តាលឱ្យបុរសអាយុ៤២ឆ្នាំម្នាក់ រងរបួសធ្ងន់ក្នុងហេតុការណ៍មួយ កើតឡើងក្នុងខេត្តព្រះវិហារ។ សមត្ថកិច្ចបានរាយការណ៍ថា ជនរងគ្រោះឈ្មោះ អុល ស៊ីម ខណៈកំពុងបើកត្រាក់ទ័រភ្ជួរដី នៅក្នុងភូមិត្រពាំងសង្កែខាងលិច ឃុំកន្ទួត ស្រុកជាំក្សាន្ត វេលាព្រឹកថ្ងៃទី២៥មិថុនានេះ ស្រាប់តែត្រាក់ទ័ររបស់គាត់ បានកិនលើគ្រាប់មីនតោន បណ្តាលឱ្យផ្ទុះឡើងក្នុងពេលនោះ។ អ្នកបើកត្រាក់ទ័របានរងរបួសបែកក្បាលជង្គង់ និងរបួសតាមដងខ្លួន និងកំពុងទទួលការជួយសង្គ្រោះជីវិតនៅមន្ទីរពេទ្យ។ ខេត្តព្រះវិហារ គឺជាខេត្តជាប់ព្រំដែនមួយ ដែលមានសេសសល់គ្រាប់មីន និងគ្រាប់មិនទាន់ផ្ទុះជាច្រើនកប់នៅក្នុងដី។ យោងតាមទិន្នន័យរបស់អាជ្ញាធរមីន ក្នុងរយៈពេល៣០ឆ្នាំកន្លងមកនេះ ប្រជាជនរងគ្រោះ ដោយសារគ្រាប់មីន មានសរុបចំនួន ៦ម៉ឺន ៥ពាន់ និង ៤នាក់ ក្នុងនោះចំនួនមនុស្សស្លាប់មាន ១ម៉ឺន ៩ពាន់ ៨១៨នាក់។ កម្ពុជា គ្រោងនឹងប្រកាសជាប្រទេសដែលអស់គ្រាប់មីនសេសសល់ក្នុងដីទាំងស្រុង ក្នុងឆ្នាំ២០២៥។ ខេត្តព្រះវិហារ និងខេត្ត៦ដទៃទៀត រួមមាន ខេត្ដកោះកុង ខេត្ដពោធិ៍សាត់ ខេត្ដបាត់ដំបង ខេត្ដប៉ៃលិន ខេត្ដបន្ទាយមានជ័យ ខេត្ដឧត្តរមានជ័យ គឺជាខេត្តចុងក្រោយ ដែលមិនទាន់បានប្រកាសជាខេត្តអស់មីននៅឡើយទេ។

រដ្ឋបាលខេត្តពោធិ៍សាត់ បានថ្លែងថា គេទុករយៈពេលចំនួន៣០ថ្ងៃ ដល់ប្រជាពលរដ្ឋចំនួន ៣១គ្រួសារ ដែលមិនទាន់យល់ព្រមចាកចេញពីតំបន់អន្ទង់អាំង។ តំបន់អន្ទង់អាំងនៃជើងភ្នំ១៥០០ ត្រូវបានរាជរដ្ឋាភិបាលរក្សាជាតំបន់អភិរក្សឧទ្យានជាតិ។ រាជរដ្ឋាភិបាលបានសម្រេចលុបចោលគោលការណ៍អនុញ្ញាតគម្រោងអភិវឌ្ឍន៍ នៅតំបន់អន្ទង់អាំង ក្នុងស្រុកវាលវែង ខេត្តពោធិ៍សាត់ ចំនួន ៤គំរោង ដើម្បីប្រែក្លាយតំបន់អន្ទង់អាំង ទៅជាតំបន់បៃតង។ ទោះជាយ៉ាងណាក៏ដោយ ក្នុងតំបន់ដែលកំពុងរៀបចំជាតំបន់បៃតងនេះ ពលរដ្ឋដែលរស់នៅ ៦៧គ្រួសារ ក្នុងចំណោម ៩៨គ្រួសារ បានចាកចេញជាមួយនឹងការយល់ព្រម តាមគោលការណ៍ដោះដូររៀបចំដី ប៉ុន្តែពលរដ្ឋ ៣១គ្រួសារ នៅមិនទាន់បានចាកចេញនៅឡើយទេ។ លិខិតរបស់រដ្ឋបាលខេត្តថ្ងៃទី២៥មិថុនាបានប្រាប់ពលរដ្ឋចំនួន ៣១គ្រួសារ «ត្រូវពិចារណាសម្រេចចិត្តក្នុងរយៈពេល៣០ថ្ងៃ ចាប់ពីថ្ងៃជូនដំណឹងនេះទៅ»។ ក្នុងការយល់ព្រមចាកចេញ ត្រូវដាក់ពាក្យស្នើសុំគោលនយោបាយដីធ្លី មករដ្ឋបាលខេត្តពោធិ៍សាត់…ប៉ុន្តែក្នុងករណីផុតកំណត់រយៈពេល៣០ថ្ងៃ នៅតែមិនព្រមសម្រេចចិត្ត រុះរើចាកចេញ ឬដាក់ពាក្យស្នើសុំគោល នយោបាយដីធ្លីទេ ការខាតបង់ផលប្រយោជន៍ផ្សេងៗ របស់ប្រជាពលរដ្ឋទាំងនោះ គឺជាការទទួលខុសត្រូវដោយខ្លួនឯង ព្រមទាំងត្រូវប្រឈមក្នុងការទទួលខុសត្រូវ ចំពោះមុខច្បាប់ផងដែរ។

សម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានអញ្ជើញជាអធិបតីក្នុងពិធីបំពាក់គ្រឿងឥស្សរិយយស ជូនមន្ត្រីបុគ្គលិកកាកបាទក្រហមកម្ពុជា។ ពិធីបំពាក់មេដាយដល់មន្ត្រី៧១នាក់ នៃទីស្នាក់ការកណ្តាល និងសាខារាជធានី-ខេត្ត បានប្រព្រឹត្តទៅនាទីស្នាក់ការកណ្ដាលកាកបាទក្រហមកម្ពុជា រាជធានីភ្នំពេញ។ អប្សរាណិតរាយការណ៍

ព្រះមហាក្សត្របានចេញព្រះរាជក្រឹត្យស្តីពីការផ្ទេរ និងតែងតាំងមុខតំណែងអភិបាលខេត្តថ្មី ៨រូប ខណៈអតីតអភិបាលខេត្ត៤រូប ត្រូវបានតែងតាំងជារដ្ឋលេខាធិការក្រសួងមហាផ្ទៃ។ ព្រះរាជក្រឹត្យថ្ងៃទី២៤ ខែមិថុនា ឆ្នាំ២០២៤ អភិបាលខេត្តថ្មីទាំង៨រូប ដែលត្រូវបានផ្ទេរ និងតែងតាំងមុខតំណែងតាមព្រះរាជក្រឹត្យថ្ងៃទី២៤ មិថុនា ឆ្នាំ២០២៤ រួមមាន លោក វ៉ី សំណាង ត្រូវបានផ្ទេរចេញពីតួនាទីជាអភិបាលខេត្តកំពង់ស្ពឺ និងត្រូវបានតែងតាំងជា «អភិបាលខេត្តតាកែវ»។ លោក ជាម ច័ន្ទសោភ័ណ្ឌ ត្រូវបានផ្ទេរពីចេញពីតួនាទីជាអភិបាលខេត្តត្បូងឃ្មុំ និងត្រូវបានតែងតាំងជា « អភិបាលខេត្តកំពង់ស្ពឺ»។ លោក គួច ចំរើន ត្រូវបានផ្ទេរពីចេញពីតួនាទីជាអភិបាលខេត្តព្រះសីហនុ និងត្រូវបានតែងតាំងជា «អភិបាលខេត្តកណ្តាល»។ យោងតាមព្រះរាជក្រឹត្យ, អភិបាលខេត្តព្រះសីហនុត្រូវបានត្រាស់បង្គាប់តែងតាំងដល់ លោក ម៉ាង ស៊ីណេត។ ចំណែកអភិបាលខេត្តស្ទឹងត្រែង ត្រូវបានព្រះមហាក្សត្រត្រាស់បង្គាប់តែង តាំង លោក សរ សុពុត្រា និង អភិបាលខេត្តឧត្តរមានជ័យ គឺត្រូវបានត្រាស់បង្គាប់តែងតាំង លោក មាន ចាន់យ៉ាដា។ ដោយឡែក អតីតអភិបាលខេត្តចំនួន៤រូបផ្សេងទៀត ដែលត្រូវចូលនិវត្តន៍ និងត្រូវបានតែងតាំងជារដ្ឋលេខាធិការក្រសួងមហាផ្ទៃ។ មន្ត្រីទាំងបួនដែលត្រូវបានតែងតាំងជារដ្ឋលេខាធិការ…

សម្តេចធិបតីនាយករដ្ឋមន្រ្តី បានប្រញាប់បញ្ជូនសារតាមបណ្តាញសង្គម ក្រោយរឿងឃាតកម្ម ក្នុងបរិវេណបុរីប៉េងហូតបឹងស្នោរ បានក្លាយជាវេទិកាបញ្ចេញមតិមួយដែលគ្មានព្រំដែន។ សម្តេចធិបតី ហ៊ុន ម៉ាណែត បានអំពាវនាវពលរដ្ឋត្រូវជឿ និងទុកចិត្តលើប្រព័ន្ធតុលាការ របស់ព្រះរាជាណាចក្រកម្ពុជា។ អប្សរាណិតរាយការណ៍

យុទ្ធនាការ «១ម៉ឺនរៀល ១ម៉ឺននាក់» មូលនិធិគន្ធបុប្ផាកម្ពុជា ទទួលបានថវិកាបរិច្ចាគបានជាង ២លាន ៨៥ម៉ឺនដុល្លារហើយ ខណៈការបិទបញ្ចប់យុទ្ធនាការនេះនៅសល់តែប្រមាណ ៥ថ្ងៃចុងក្រោយទៀតតែប៉ុណ្ណោះ។ យុទ្ធនាការ «១ម៉ឺនរៀល ១ម៉ឺននាក់» រយៈពេលមួយខែ ដើម្បីទ្រទ្រង់មូលនិធិគន្ធបុប្ឆា ក្រោមគំនិតផ្តួចផ្តើមរបស់លោកជំទាវបណ្ឌិត ពេជ ចន្ទមុន្នី បានចាប់ផ្តើមដំណើរការរបស់ខ្លួន កាលពីថ្ងៃទី១មិថុនា។ លោកជំទាវបណ្ឌិត ពេជ ចន្ទមុន្នី ប្រធានកិត្តិយសនៃមូលនិធិគន្ធបុប្ផាកម្ពុជា បានបញ្ជាក់នៅថ្ងៃទី២៥មិថុនានេះថា យុទ្ធនាការ «១ម៉ឺនរៀល ១ម៉ឺននាក់» ឆ្នាំ២០២៤ មូលនិធិគន្ធបុប្ផាកម្ពុជា គិតមកទល់នឹងពេលនេះ ទទួលបានការចូលរួមពីពលរដ្ឋចំនួន ១៩ម៉ឺន ៩ពាន់ ៨៨១នាក់ ដែលសរុបទឹកប្រាក់មានចំនួន ២លាន ៨៥ម៉ឺន ៩ពាន់ ៨០៨ដុល្លារអាមេរិក។ មូលនិធិគន្ធបុប្ឆា គឺជាមូលនិធិមួយដែលជួយទ្រទ្រង់លើដំណើរការមន្ទីរពេទ្យគន្ធបុប្ឆា ដែលត្រូវការប្រាក់ចំណាយច្រើនសិបលានដុល្លារ ក្នុងមួយឆ្នាំៗ ដើម្បីជួយព្យាបាលកុមារ ដោយឥតគិតថ្លៃ។ លោកជំទាវបណ្ឌិត ពេជ ចន្ទមុន្នី ជាមួយនឹងប្រសាសន៍ថ្លែងអំណរគុណ បានអំពាវនាវដល់ «បងប្អូនសប្បុរសជន ដែលមានបំណងចូលរួមបរិច្ចាគ ក្នុងយុទ្ធនាការ នៃការរក្សានិរន្តរភាព កិច្ចដំណើរការរបស់មន្ទីរពេទ្យគន្ធបុប្ផា…

កម្ពុជាបានបង្កើតបណ្តាញសាកលវិទ្យាល័យសាយប័រជាលើកដំបូង ដោយមានគ្រឹះស្ថានឧត្តមសិក្សាចំនួន ១២ បានចូលរួមក្នុងប្រព័ន្ធសិក្សា តាមលំនាំបច្ចេកវិទ្យាឌីជីថលនេះ។ សម្តេចធិបតី ហ៊ុន ម៉ាណែត បានអញ្ជើញចូលរួមក្នុងពិធីបើកសម្ពោធបណ្តាញសាកលវិទ្យាល័យសាយប័រ នៅក្នុងរាជធានីភ្នំពេញ នៅថ្ងៃទី២៥ មិថុនា ឆ្នាំ២០២៤។ អប្សរាណិតធ្វើសេចក្តីរាយការណ៍

មេបញ្ជាការរងកងរាជអាវុធហត្ថខេត្តប៉ៃលិនម្នាក់ ត្រូវបានផ្អាកមុខតំណែង ដើម្បីតាមដានក្នុងហេតុការណ៍ជម្លោះមួយ ជាប់សង្ស័យនឹងការបំពានអំណាច។ យោងតាមសេចក្តីប្រកាសព័ត៌មានរបស់កងរាជអាវុធហត្ថលើផ្ទៃប្រទេស វរសេនីយ៍ឯក ស ប៊ុនសឿង ត្រូវបានផ្អាកមុខតំណែងពីមេបញ្ជាការរងកងរាជអាវុធហត្ថខេត្តប៉ៃលិន ក្រោយការតាមដានមួយជំហាន ក្នុងដំណាក់កាលដំបូង លើជម្លោះមួយ ដែលនាំឱ្យមានការចាប់ខ្លួន អ្នករត់តាក់ស៊ីម្នាក់ឈ្មោះ ហូ ទ្រី។ យោងតាមវីដេអូដែលចែកចាយនៅតាមបណ្តាញសង្គមបានឱ្យដឹងថា ជម្លោះនេះបានកើតតាំងពីថ្ងៃទី១២ មិថុនា ដោយមេបញ្ជាការរងកងរាជអាវុធហត្ថខេត្តនោះ បានជួលឡាន អ្នករត់តាក់ស៊ីឈ្មោះ ហូ ទ្រី ដឹកកង់ហាត់ប្រាណរបស់លោក ក្នុងតម្លៃ ៨ម៉ឺនរៀល ប៉ុន្តែលោក ស ប៊ុនសឿង បានឱ្យអ្នករត់តាក់ស៊ីតែ ៦ម៉ឺនរៀលប៉ុណ្ណោះ។ សេចក្តីរាយការណ៍បន្តថាវរសេនីយ៍ឯក ស ប៊ុនសឿង មិនត្រឹមតែមិនឱ្យលុយគ្រប់ចំនួនទេ ប៉ុន្តែថែមទាំងនាំកូនចៅទៅចាប់អ្នករត់តាក់ស៊ីនោះថែម។ ព័ត៌មានផ្សព្វផ្សាយតាមបណ្តាញសង្គមអំពីរឿងចាប់អ្នករត់តាក់ស៊ីនោះ បាននាំឱ្យការរិះគន់ ជាសាធារណៈតាមបណ្តាញសង្គម។ សេចក្តីប្រកាសព័ត៌មានរបស់កងរាជអាវុធហត្ថដដែលនៅជាមួយនឹងការផ្អាកមុខតំណែង របស់មេបញ្ជាការរងកងរាជអាវុធហត្ថខេត្តប៉ៃលិននោះ បានបញ្ជាក់ថា គេបានធ្វើសំណើបង្កើតក្រុមវិន័យ «មុននឹងដាក់ទណ្ឌកម្មតាមលក្ខន្តិកៈទូទៅ» ដែល «ត្រូវសុំយោបល់ក្រុមប្រឹក្សាវិន័យជាមុនសិន»។

ខេត្តចំនួន១៥ របស់កម្ពុជា បាននិងកំពុងរងការបំផ្លិចបំផ្លាញដំណាំពីដង្កូវហ្វូង ខណៈដែលក្រុមជំនាញកំពុងរកមធ្យោបាយទប់ទល់។ ខេត្តដែលមានដង្កូវហ្វូង កំពុងបំផ្លាញកសិផលនេះ រួមមានខេត្តកំពង់ចាម, ខេត្តកំពង់ឆ្នាំង, ខេត្តកំពង់ធំ, ខេត្តក្រចេះ, ខេត្តព្រះវិហារ, ខេត្តសៀមរាប, ខេត្តស្ទឹងត្រែង, ខេត្តតាកែវ, ខេត្តប៉ៃលិន, ខេត្តត្បូងឃ្មុំ, ខេត្តបាត់ដំបង, ខេត្តបន្ទាយមានជ័យ, ខេត្តកោះកុង, ខេត្តពោធិ៍សាត់ និងខេត្តឧត្តរមានជ័យ។ អប្សរាណិតរាយការណ៍

រដ្ឋមន្ត្រីការបរទេសថៃ គ្រោងនឹងបំពេញទស្សនកិច្ចផ្លូវការរយៈពេលមួយថ្ងៃ នៅក្នុងប្រទេសកម្ពុជា ក្នុងសប្តាហ៍នេះ។ សេចក្តីប្រកាសព័ត៌មានរបស់ក្រសួងការបរទេសបានឱ្យដឹងថា ដំណើររបស់លោក ម៉ារីស សាងៀម ផុងសា គ្រោងនឹងធ្វើនៅថ្ងៃទី២៧ ខែមិថុនា ដោយលោកនឹងជួបពិភាក្សាទ្វេភាគី ជាមួយសមភាគីកម្ពុជាលោក សុខ ចិន្តាសោភា លើកិច្ចពង្រឹងទំនាក់ទំនងកិច្ចសហប្រតិបត្តិការទ្វេភាគី បន្ទាប់ពីប្រទេសទាំងពីរបានតម្លើងកម្រិតទំនាក់ទំនងទ្វេភាគី ទៅជាភាពជាដៃគូយុទ្ធសាស្ត្រ កាលពីខែកុម្ភៈ ឆ្នាំ២០២៤នោះមក។ ភាគីទាំងពីរ ក៏នឹងពិភាក្សាគ្នាលើបញ្ហាតំបន់ និងអន្តរជាតិមួយចំនួន ដែលជាប្រយោជន៍ និងក្តីកង្វល់រួមគ្នា។ ក្នុងដំណើរទស្សនកិច្ចនោះ, រដ្ឋមន្ត្រីការបរទេសថៃ នឹងអញ្ជើញជួបសម្តែងការគួរសម ចំពោះសម្តេចតេជោ ហ៊ុន សែន ប្រធានព្រឹទ្ធសភា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី។ រដ្ឋមន្ត្រីការបរទេសថៃរូបនោះ នឹងជួបតំណាងសហគមន៍ធុរកិច្ចថៃ ក្នុងប្រទេសកម្ពុជា និងតំណាងទីភ្នាក់ងារថៃផ្សេងៗទៀត ដែលកំពុងបំពេញកិច្ចការងាររបស់ពួកគេ នៅក្នុងប្រទេសកម្ពុជាផងដែរ។