គណបក្សប្រជាជនកម្ពុជាបានហៅសេចក្តីថ្លែងការណ៍របស់គណបក្សភ្លើងទៀនថា «បានធ្វើឲ្យប៉ះពាល់ធ្ងន់ធ្ងរបំផុតដល់ភាពត្រឹមត្រូវ និងសេចក្តីថ្លៃថ្នូររបស់គណបក្សប្រជាជនកម្ពុជា ដែលជាគណបក្សកំពុងកាន់អំណាចនៅកម្ពុជា»។ សេចក្តីថ្លែងការណ៍ថ្ងៃទី១៩មករារបស់គណបក្សប្រជាជនកម្ពុជា បានធ្វើឡើងក្រោយសេចក្តីថ្លែងការណ៍របស់គណបក្សភ្លើងទៀនថ្ងៃទី១៦ មករាដែលសរសេរថា «មានចលនានៃការបំភិតបំភ័យ និងការគំរាមកំហែងពីសំណាក់អ្នកមានអំណាច មកលើថ្នាក់ដឹកនាំ និងសកម្មជនគណបក្សភ្លើងទៀនជាបន្តបន្ទាប់»។ គណបក្សប្រជាជនកម្ពុជា ក្នុងសេចក្តីថ្លែងការណ៍ប្រតិកម្មនៅថ្ងៃនេះ បានសរសេរថា «គណបក្សប្រជាជនកម្ពុជា ពុំអាចទទួលយកបានជាដាច់ខាត នូវការប្រមាថកាតទាន និងការចោទប្រកាន់ទាំងបំពានរបស់គណបក្សភ្លើងទៀន»។ សេចក្តីថ្លែងការណ៍របស់គណបក្សកាន់អំណាចបានបន្តថា «គណបក្សប្រជាជនកម្ពុជានឹងធ្វើអ្វីៗទាំងអស់តាមច្បាប់ ដើម្បីការពារខ្លួនមិនឱ្យគេរំលោភបំពានបានឡើយ»។ សេចក្តីថ្លែងការណ៍ដដែលបានបញ្ជាក់ថាគណបក្សប្រជាជនកម្ពុជាគាំទ្រពេញទំហឹងរាល់ចំណាត់ការរបស់រាជរដ្ឋាភិបាល និងអាជ្ញាធរមានសមត្ថកិច្ចចំពោះគ្រប់បុគ្គលបានប្រព្រឹត្តល្មើសច្បាប់ ដែលត្រូវតែទទួលទោសទណ្ឌតាមការកំណត់ នៃច្បាប់ដែលគ្រប់ប្រទេស នៅក្នុងពិភពលោកក៏អនុវត្តដូចគ្នានេះដែរ។

សម្តេចតេជោ ហ៊ុន សែន បានព្រមានជុំវិញការចាត់វិធានការតាមផ្លូវច្បាប់ដល់គណបក្សនយោបាយនានាណាដែលបន្តចោទថាគណបក្សប្រជាជនកម្ពុជាលួចសន្លឹកឆ្នោត ឬប្រមាថកិត្តិយស ដល់ភាពស្អាតស្អំរបស់គណបក្សប្រជាជនកម្ពុជា។ ប្រសាសន៍ព្រមាននៅថ្ងៃទី១៩មករានេះ បានធ្វើឡើងទន្ទឹមនឹងមានការឃាត់ខ្លួននអនុប្រធានគណបក្សភ្លើងទៀនលោក ថាច់ សេដ្ឋា ដែលជាប់ទាក់ទងនឹងការចេញសែកអត់សាច់ប្រាក់ ប៉ុន្តែគណបក្សភ្លើងទៀន បែរជានិយាយថាវាជារឿងនយោបាយ។ សម្តេចតេជោ ហ៊ុន សែន បានថ្លែងថាក្នុងនាមសម្តេចជាប្រមុខដឹកនាំគណបក្សប្រជាជនកម្ពុជា សម្តេចមិនអាចឱ្យមានអំពើប្រមាថដាក់លើគណបក្សប្រជាជនកម្ពុជាបានឡើយចាប់ពីពេលនេះទៅ។

សម្តេចនាយករដ្ឋមន្ត្រី បានអញ្ជើញពិនិត្យវឌ្ឍនភាព នៃការសាងសង់អគារមន្ទីរពេទ្យ «តេជោសន្ដិភាព» ដែលនឹងក្លាយជាមន្ទីរពេទ្យដ៏ធំជាងគេបង្អស់ក្នុងប្រទេសកម្ពុជា បន្ទាប់ពីការសាងសង់រួចរាល់ជាស្ថាពរ។ សំណង់អគារមន្ទីរពេទ្យ «តេជោសន្ដិភាព» មានទីតាំងស្ថិតនៅសង្កាត់គោករកា, ខណ្ឌព្រែកព្នៅ ជាយរាជធានីភ្នំពេញ។ សម្តេចនាយករដ្ឋមន្ត្រីបានលើកឡើងជុំវិញ មូលហេតុអ្វីដែលកម្ពុជាត្រូវកសាងមន្ទីរពេទ្យដ៏ធំនេះ? សម្តេចតេជោ ហ៊ុន សែន បានថ្លែងថាគោលដៅចម្បង នៃការកសាងមន្ទីរពេទ្យនេះ គឺការគ្រប់គ្រងការផ្ទុះនៃជម្ងឺឆ្លងណាមួយដែលនឹងកើតឡើងសាជាថ្មី។ មន្ទីរពេទ្យដែលកំពុងសាងសង់នេះ នៅបានរៀបចំកន្លែងដាក់គ្រែប្រមាណ២ពាន់គ្រែសម្រាប់ការត្រៀមដល់ការផ្ទុះនៃជម្ងឺឆ្លងនានា។ មន្ទីរពេទ្យជាតិដ៏ធំមួយនេះ គ្រោងនឹងបញ្ចប់ការសាងសង់រួចជាស្ថាពរ និងដាក់ឲ្យដំណើរការជាផ្លូវការនៅខែមិថុនា ឆ្នាំ២០២៣។

តួលេខឆ្លងថ្មីកូវីដ១៩ ក្នុងប្រទេសអាស៊ាននៃរយៈពេល ២៤ម៉ោងចុងក្រោយនេះ បានកើនឡើងចំនួន ៤៧១ករណី បើប្រៀបធៀបនឹងតួលេខឆ្លងកាលពីម្សិលមិញ ។ តួលេខឆ្លងថ្មី កូវីដ១៩ នៅអាស៊ានរយៈពេល ២៤ម៉ោងចុងក្រោយនេះ មានចំនួន ១ពាន់ ៥០៥ករណី។ ការឆ្លងថ្ងៃនេះ បានកើតលើប្រទេសចំនួន៧ នៅអាស៊ាន រួមមានប្រទេសឥណ្ឌូនេស៊ី, ម៉ាឡេស៊ី, វៀតណាម, មីយ៉ាន់ម៉ា, សឹង្ហបុរី, ហ្វីលីពីន និងប្រទេសកម្ពុជា ។ ប្រទេសសឹង្ហបុរី គឺជា ប្រទេសដែលមានតួលេខឆ្លងច្រើនជាងគេ ដែលមានចំនួន ៥៥៣ករណី ។ តួលេខឆ្លងតិចជាងគេ គឺប្រទេសកម្ពុជា ដែលមានចំនួនឆ្លងតែ ៣ករណីប៉ុណ្ណោះ ។ ប្រទេសថៃ ឡាវ និងប្រទេសប្រុយណេ គឺជាប្រទេសដែលគ្មានសេចក្តីរាយការណ៍ជុំវិញតួលេខឆ្លង និងស្លាប់ ឡើយក្នុងរយៈពេល ២៤ម៉ោងចុងក្រោយនេះ ។ តួលេខស្លាប់ដោយសារកូវីដ១៩ ក្នុងប្រទេសអាស៊ានរយៈពេល ២៤ម៉ោងចុងក្រោយនេះ មានចំនួន ១៦នាក់ ក្នុងនោះប្រទេសឥណ្ឌូនេស៊ី មានមនុស្សស្លាប់ចំនួន ៧នាក់ ដែលជាតួលេខ ស្លាប់ច្រើនជាងគេ ។…

ការឆ្លងថ្មីកូវីដ១៩ ក្នុងរយៈពេល២៤ម៉ោងចុងក្រោយនេះ មានចំនួន ៣ករណី ដែលបានកើនឡើងចំនួន២ករណី បើប្រៀបធៀបនឹងការឆ្លងកាលពីម្សិលមិញ ។ យោងតាមក្រសួងសុខាភិបាល ការឆ្លងថ្មី៣ករណីថ្ងៃនេះ គឺបានកើតឡើងក្នុងរង្វង់សហគមន៍ទាំងអស់ ។ កម្ពុជាបានចាប់ផ្តើមចាក់ដូសជំរុញទី៦ កាលពីខែមករាកន្លងមក ដែលរហូតមកទល់ពេលនេះ មានពលរដ្ឋទៅចាក់ដូសជំរុញនោះ បានចំនួន ៣ម៉ឺន ៥ពាន់ ១៨៧នាក់ហើយ ខណៈពិភពលោកកំពុងប្រុងប្រយ័ត្ននូវវីរុសបំបែ្លងថ្មីម្យ៉ាងឈ្មោះ XBB ។ កម្ពុជាបច្ចុប្បន្នកំពុងរៀនរស់ នៅជាមួយនឹងជម្ងឺកូវីដ១៩ ខណៈដែលការចាក់វ៉ាក់សាំងដូសមូល ដ្ឋានទូទាំងប្រទេសមាន ប្រមាណជាង ៩៥ភាគរយ រួចមកនេះ។