រដ្ឋបាលរាជធានីភ្នំពេញ បានចេញសេចក្តីដំណឹងស្តីពីការបញ្ចៀសចរាចរណ៍ ក្នុងអំឡុងពេលប្រារព្ធពិធីមីទ្ទិញ អបអរសាទរខួបលើកទី៤៤ នៃទិវាជ័យជម្នះ ៧មករា ។ សេចក្ដីជូនដំណឹងរបស់រដ្ឋបាលរាជធានីភ្នំពេញនៅថ្ងៃច័ន្ទនេះ បានសរសេរថានៅថ្ងៃទី០៧ ខែមករា ឆ្នាំ២០២៣ វេលាម៉ោងកន្លះព្រឹក គណបក្សប្រជាជនកម្ពុជា នឹងរៀបចំប្រារព្ធពិធី មីទ្ទិញអបអរសាទរខួបលើកទី៤៤ នៃទិវាជ័យជម្នះ ៧មករា នាមជ្ឈមណ្ឌលសន្និបាត និងពិព័រណ៍កោះពេជ្រ ដែលស្ថិតនៅក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ។ សេចក្តីជូនដំណឹងដដែលបានបញ្ជាក់ថា ដើម្បីឲ្យការប្រារព្ធពិធីប្រព្រឹត្តទៅដោយរលូន រក្សាបាននូវសន្តិសុខ សុវត្ថិភាព សណ្ដាប់ធ្នាប់ និងរបៀបរៀបរយសាធារណៈ ព្រមទាំងបញ្ចៀស បាននូវការកកស្ទះចរាចរណ៍, រដ្ឋបាលរាជធានីភ្នំពេញ នឹងបញ្ចៀសចរាចរណ៍ ចំពោះយានយន្តគ្រប់ប្រភេទ លើកំណាត់មហាវិថីសម្ដេចសុធារស ចាប់ពីស្តុបជលផលដល់ផ្លូវឧកញ៉ាឈុន, លើកំណាត់វិថីព្រះស៊ីសុវត្ថិ ចាប់ពីរង្វង់មូលសម្តេចសង្ឃ ជួន ណាត ដល់ផ្លូវឧកញ៉ាឈុន, លើកំណាត់មហាវិថីព្រះសុរាម្រឹត ចាប់ពីនាគបាញ់ទឹក ដល់វិមានឯករាជ្យ, លើកំណាត់មហាវិថី ព្រះសីហនុ ចាប់ពីវិមានឯករាជ្យ ដល់នាគបាញ់ទឹក និងលើផ្លូវនៅជុំវិញទីតាំងប្រារព្ធពិធី រហូតដល់ពិធីត្រូវបានបញ្ចប់។

មន្ត្រីជាន់ខ្ពស់ម្នាក់នៃគណបក្សភ្លើងទៀន បានបង្ហើបជុំវិញផែនការឃុបឃិតរវាងគណបក្សភ្លើងទៀន និងមេខ្លោងក្រុមឧទ្ទាម សម រង្ស៊ី ដើម្បីប៉ុនប៉ងបង្កចលាចលនៅមុនការបោះឆ្នោត សកលឆ្នាំ២០២៣។ មន្ត្រីគណបក្សភ្លើងទៀនជារៀងរាល់ដងតែបដិសេធថាគណបក្សរបស់ខ្លួនមិនដែលបានពាក់ព័ន្ធជាមួយនឹងក្រុមឧទ្ទាមក្រៅស្រុកដឹកនាំដោយ សម រង្ស៊ី នោះឡើយ ប៉ុន្តែសម្តីសារភាពរបស់ប្រធានចលនាខ្មែរឥស្លាមរបស់គណបក្សភ្លើងទៀន ឈ្មោះ ឯល រ៉ាហ្វើត បានបង្ហាញថាគណបក្សភ្លើងទៀន និងមេខ្លោងក្រុមឧទ្ទាមក្រៅស្រុកគឺជាបក្ខពួកតែមួយ។ សូមបញ្ជាក់ថាលោក ឯល រ៉ាហ្វើត បានភ្ញាក់រលឹកចាកចេញពីគណបក្សភ្លើងទៀន ដោយសារតែបណ្តាំម្តាយរបស់លោកមុនការចែកឋាន។ នេះជាការរៀបរាប់មួយរបស់ឈ្មោះ ឯល រ៉ាហ្វើត តាមបណ្តាញសង្គមជំរាបជួនសម្តេចតេជោ ហ៊ុន សែន ដែលបានផ្សព្វផ្សាយថ្ងៃនេះតាមប្រព័ន្ធ Fresh News។ ការបញ្ចេញសារលិខិតនេះតាមបណ្តាញសង្គម គឺនៅបន្ទាប់ពីលោក ឯល រ៉ាហ្វើត បានវិលត្រឡប់មកកម្ពុជាវិញដោយសុវត្ថិភាព និងលោកត្រៀមប្រកាសការផ្តាច់ខ្លួនរបស់លោកចេញពី គណបក្សភ្លើងទៀននាពេលខាងមុខបន្តិចទៀតនេះ។ គណបក្សភ្លើងទៀនតែងបដិសេធជាប់ជានិច្ចថាគណបក្សប្រឆាំងរបស់ខ្លួននេះ មិនជាប់ពាក់ព័ន្ធនឹងមេខ្លោងក្រុមឧទ្ទាមក្រៅច្បាប់ សម រង្ស៊ី នោះឡើយ។ គេនឹងរង់ចាំមើលថាតើគណបក្សភ្លើងទៀននឹងដោះសារយ៉ាងណាទៅវិញជាមួយនឹងភស្ថុតាងបង្ហាញការជាប់ពាក់ព័ន្ធរបស់ខ្លួនជាមួយក្រុមឧទ្ទាមខុសច្បាប់ សម រង្ស៊ី នេះ?

តម្លៃប្រេងសាំង បានកើនមកវិញសម្រាប់ក្នុងការលក់រយៈពេល១០ថ្ងៃខាងមុខនេះ ដែលការកើនឡើងនេះគឺដោយសារតែតម្លៃទីផ្សារជាអន្តរជាតិ។ យោងតាមក្រសួងពាណិជ្ជកម្ម តម្លៃប្រេងឥន្ធនៈ សម្រាប់ការលក់ រវាងពីថ្ងៃទី០១ ខែមករា រហូតដល់ថ្ងៃទី១០ ខែមករា ឆ្នាំ២០២៣ គឺប្រេងសាំងធម្មតា មានតម្លៃ៤ពាន់ ២០០រៀលក្នុង ១លីត្រ ដែលតម្លៃនេះ គឺកើនឡើងចំនួន១៥០ រៀល បើធៀបទៅការលក់រយៈពេល១០ថ្ងៃ មុន…ចំណែក ប្រេងម៉ាស៊ូតមានតម្លៃ ចំនួន៤ពាន់៥៥០រៀល ក្នុង១លីត្រ ដែលតម្លែនេះ បានកើនឡើងចំនួន៥០រៀល បើធៀបទៅនឹងការ លក់រយៈពេល១០ថ្ងៃមុន។ ដោយឡែកតម្លៃប្រេងស៊ុបពែ័រវិញ គឺមិនបានកំណត់ក្នុងតារាងក្រសួងពាណិជ្ជកម្មនោះទេ ប៉ុន្តែតម្លៃលក់តែង តែខ្ពស់ជាងតម្លៃប្រេងសាំងធម្មតា។ នៅថ្ងៃនេះប្រេងសាំងស៊ុបពែ័រ តាមស្ថានីយ៍ខ្លះគឺមានតម្លៃចំនួន៤ពាន់ ៨០០រៀល , កន្លែងខ្លះមានតម្លៃចំនួន៤ពាន់៨៥០រៀល និងកន្លែងខ្លះមានតម្លៃចំនួន៤ពាន់៩០០រៀល ក្នុងមួយលីត្រ ។ សូមជម្រាបថា រាជរដ្ឋាភិបាលតែងតែចំណាយប្រាក់ ជួយខាតយ៉ាងហោច ៦ចុច៥សេន ក្នុងមួយលីត្រ ដើម្បីជាការទប់ស្កាត់តម្លៃប្រេង ក្នុងការជួយសម្រាលបន្ទុកដល់ពលរដ្ឋ។

កម្ពុជាបានវិលត្រឡប់ជាប្រទេសអតិរេក នៃការទទួលបានថវិកាចរន្តខ្ពស់សាឡើងវិញហើយ បន្ទាប់ពីវិបត្តិញាំញីរយៈពេលជាង២ឆ្នាំដោយសារជម្ងឺកូវីដ១៩។ សម្តេចតេជោ ហ៊ុន សែន បានថ្លែងនៅថ្ងៃទី២ មករា ឆ្នាំ២០២៣នេះ បង្ហាញនូវជោគជ័យ នៃការប្រមូលចំណូលពន្ធដ៏ខ្ពស់របស់កម្ពុជា ក្នុងរយៈពេលពេញមួយឆ្នាំកន្លងមកនេះ។ ប្រទេសចិនបានប្រកាសបើកព្រំដែនរបស់ខ្លួនជាលើកដំបូងក្រោយការបិទជិតអស់រយៈពេល ប្រមាណ៣ឆ្នាំកន្លងមកនេះ ដោយសារតែវិបត្តិឆ្លងកូវីដ១៩។ ការបើកច្រកព្រំដែនចិនជាលើកដំបូងនេះ ត្រូវគេរំពឹងថាកម្ពុជា នឹងអាចទទួលបានភ្ញៀវទេសចរចិនសាឡើងវិញ ជាពិសេសចាប់ពីដើមឆ្នាំ២០២៣ ដែលមានការឈប់សម្រាកបុណ្យចូលឆ្នាំចិន។ សម្តេចតេជោ ហ៊ុន សែន រំពឹងថាសេដ្ឋកិច្ចជាតិនឹងដំណើរការល្អសាឡើងវិញ ចាប់ពីឆ្នាំ២០២៣ ដោយសារតែបច្ចុប្បន្នវិស័យនានាបានងើបស្ទុះសាឡើងវិញហើយ លើកលែងតែវិស័យទេសចរណ៍ ប៉ុន្តែសម្តេចរំពឹងថាវិស័យនេះនឹងងើបឡើងវិញ តាមរយៈដំណើរហូរចូលរបស់ទេសចរចិននាពេលខាងមុខនេះ។ ទំហំពាណិជ្ជកម្មរវាងកម្ពុជា និងចិនបានសម្រេចប្រមាណជាង ១១ពាន់លានដុល្លារ អាមេរិក នៅឆ្នាំ២០២១។ ប្រទេសទាំង២កម្ពុជានិងចិន បានកំណត់គោលដៅលើការសម្រេចធ្វើ ពាណិជ្ជកម្មជាមួយគ្នាឱ្យបាន១៥ពាន់លានដុល្លារនៅឆ្នាំ២០២៥។ គិតក្នុងឆ្នាំ២០២២កន្លងមក នេះ ទំហំពាណិជ្ជកម្មរវាងប្រទេសទាំង២ បានកើនដល់១៤ពាន់៥០០លានដុល្លារហើយ។

សម្តេចតេជោ ហ៊ុន សែន បានថ្លែងដាស់តឿនពលរដ្ឋត្រូវប្រុងប្រយ័ត្នរារាំងក្រុមឧទ្ទាម ដែលតែងចិញ្ចឹមគំនិតចង់ឆក់ប្លន់សន្តិភាពចេញពីកម្ពុជា។ ប្រសាសន៍ណែនាំដាស់តឿននេះ បាន ធ្វើឡើងខណៈដែលបុណ្យដំណាច់ឆ្នាំសកល២០២២ បានចូលរួមដោយមនុស្សជាង២លាន នាក់នៅទូទាំងប្រទេសដែលសម្តេចបានចាត់ទុកថាភាពរីករាយរបស់ពលរដ្ឋនោះ គឺអាស្រ័យ ដោយប្រទេសមានសន្តិភាព ដូច្នេះគេមិនត្រូវឱ្យសន្តិភាពបានរបូតចេញពីដៃដែលកម្ពុជាបាន ព្យាយាមរកដោយលំបាកនោះឡើយ។ គួរបញ្ជាក់ថាថ្ងៃទី៧មករាឆ្នាំ២០២៣ គឺជាថ្ងៃខួបលើកទី៤៤នៃទិវាជ័យជម្នះជាប្រវត្តិសាស្ត្រ ដែលជាទិវារំលឹកការផ្តួលរំលំរបបកម្ពុជាប្រជាធិបតេយ្យខ្មែរក្រហមដែលបានសម្លាប់មនុស្ស ច្រើនលាននាក់ក្នុងពេលកាន់កាប់ប្រទេសរយៈពេល៣ឆ្នាំ៨ខែ២០ថ្ងៃ រវាងពីថ្ងៃទី១៧មេសាឆ្នាំ ១៩៧៥ដល់ថ្ងៃទី៦មករាឆ្នាំ១៩៧៩។

ស្ពានឆ្លងកាត់ទន្លេមេគង្គក្នុងខេត្តក្រចេះប្រវែង១ពាន់៧៦១ម៉ែត្រ និងផ្លូវតភ្ជាប់ប្រវែងជាង៣១ គីឡូម៉ែត្រ ត្រូវបានបើកការដ្ឋានសាងសង់នៅថ្ងៃទី២ មករា ឆ្នាំ២០២៣ បន្ទាប់ពីដំណាច់ឆ្នាំសកលចាស់ទើបបានកន្លងផុត។ សម្តេចតេជោ ហ៊ុន សែន ដែលអញ្ជើញជាអធិបតីដ៏ខ្ពង់ខ្ពស់ ក្នុងឱកាសនោះ បានថ្លែងថាសំណង់ស្ពាននិងផ្លូវតភ្ជាប់នេះ គឺជាជំនួយក្រោមឥណទានហិរញ្ញទាន របស់រដ្ឋាភិបាលសាធារណរដ្ឋប្រជាមានិតចិន ដែលជាផ្នែកមួយនៃគោលនយោបាយផ្លូវ និងខ្សែក្រវាត់របស់រដ្ឋាភិបាលក្រុងប៉េកាំង។ ខេត្តក្រចេះក្នុងឆ្នាំ២០២៣នេះ ត្រូវគេរំពឹងថានឹងទទួលបាននូវការសាងសង់ជាច្រើន លើហេដ្ឋារចនាសម្ព័ន្ធដោយសារតែមានការជួយឧបត្ថម្ភពីឥណទានសម្បទានរបស់ធនាគារពិភពលោក។ កម្ពុជាក្នុងជំនាន់ដឹកនាំរបស់សម្តេចតេជោ ហ៊ុន សែន ប្រទេសកម្ពុជាដែលអតីតកាលធ្លាប់តែជួបប្រទះកលយុគ, ការបែកបាក់ និងសង្គ្រាមស៊ីវិល ត្រូវបានក្លាយជាកោះសន្តិភាពពិតប្រាកដ ក្រោមនយោបាយឈ្នះឈ្នះរបស់ប្រមុខដឹកនាំគណបក្សប្រជាជនកម្ពុជា។ បន្ទាប់ពីការអស់សង្គ្រាមស៊ីវិល កម្ពុជាបានរៀបចំស្តារប្រទេសសាឡើងវិញក្រោមនយោបាយ ការទូតដ៏ប៉ិនប្រសប់របស់ ប្រមុខដឹកនាំរាជរដ្ឋាភិបាលជាពិសេសគោលនយោបាយអព្យាក្រឹត្យ មិនចូលបក្ខសម្ព័ន្ធដែលនយោបាយមិនលំអៀងនេះ បានធ្វើឱ្យប្រទេសជាតិបានទទួលនូវស្ថិរ ភាពនយោបាយ, ការគាំទ្រពីសំណាក់សហគមន៍អន្តរជាតិ និងការគាំទ្រពីសំណាក់ដៃគូ នៃប្រទេសអភិវឌ្ឍន៍ជាច្រើន រួមមានប្រទេសចិន, ជប៉ុន, កូរ៉េខាងត្បូង, សហរដ្ឋអាមេរិក និងបណ្តាប្រទេសជាច្រើនទៀត ដែលគាំទ្រគោលនយោបាយ ដឹកនាំរបស់ប្រមុខរាជរដ្ឋាភិបាលកម្ពុជានាបច្ចុប្បន្ន។