ថវិកាចំនួន៥០លានយ៉េនដែលស្មើនឹងប្រមាណជាង៤៥ម៉ឹនដុល្លារពីក្រុមហ៊ុនអ៊ីអន ខេមបូឌា ខូអិលធីឌី ត្រូវ បានប្រគល់ជូនដល់ក្រសួងសុខាភិបាលកម្ពុជា ដើម្បីប្រយុទ្ធប្រឆាំងនឹងជំងឺកូវីដ១៩។ ពិធីប្រគល់និងទទួល នេះបានធ្វើឡើងនៅព្រឹកថ្ងៃទី៣០មិថុនានេះនៅទីស្តីការក្រសួងសុខាភិបាល ក្រោមវត្តមានរបស់រដ្ឋមន្រ្តីក្រសួង សុខាភិបាលលោកសាស្រ្តាចារ្យម៉ម ប៊ុនហេង និងតំណាងក្រុមហ៊ុនអ៊ីអន លោក Tsugutoshi Seko ។

ការឆ្លងរាលដាលជម្ងឺកូវីដ១៩នៅក្នុងខែមិថុនា ត្រូវគេរាយការណ៍កត់សម្គាល់ថាមានជាង២ម៉ឺនករណីដែលជា តួលេខឆ្លងខ្ពស់មិនធ្លាប់ជួបប្រទះក្នុងខែនានាកន្លងមក។ កំណើនឆ្លងខ្ពស់ក្នុងខែមិថុនានេះ ត្រូវគេកត់សម្គាល់រួម មានទាំងការផ្ទុះសាឡើងវិញក្នុងផ្សារ មួយនាកណ្តាលរាជធានីភ្នំពេញនោះថែមទៀត។ ការឆ្លងក្នុងទីផ្សារដែល ទើបបានស្ងប់ស្ងាត់ក្នុងរយៈពេលប្រមាណជាង១០ថ្ងៃមកនោះ ស្រាប់តែមានសេចក្តីរាយការណ៍ជុំវិញការផ្ទុះ ឆ្លងនៅក្នុងផ្សារបឹងកេងកង ដែលប្រញាប់ឲ្យអាជ្ញាធរត្រូវបិទផ្សារនោះសាឡើងវិញក្នុងរយៈពេល១៤ថ្ងៃ។

ការឆ្លងជំងឺកូវីដ១៩នៅក្នុងប្រទេសកម្ពុជា បានកើនឡើងលើស៥ម៉ឺននាក់ហើយ នៅទន្ទឹមនឹងការដាស់តឿន ព្រមានពីមន្ត្រីសុខាភិបាលជុំវិញការឆ្លងនេះបានហួសចូលក្នុងបន្ទាត់ក្រហមហើយ។ សេចក្តីរាយការណ៍ថ្ងៃនេះ បានបង្ហាញការឆ្លងខ្ពស់ចំនួន៤ខ្ទង់ជាលើកដំបូងក្នុងរយៈពេល២៤ម៉ោង ដែលកម្ពុជាមិនធ្លាប់បានជួបប្រទះ ឡើយ។

គ្រោះធម្មជាតិ បានធ្វើឲ្យមនុស្ស៤នាក់ស្លាប់និងរបួសនិងបានបំផ្លាញផ្ទះប្រជាពលរដ្ឋចំនួន១៩៨ខ្នង នៅក្នុង ខេត្តបាត់ដំបង។ ហេតុការណ៍នោះ បានកើតឡើងកាលពីថ្ងៃទី២៨ ខែមិថុនា ឆ្នាំ២០២១ ស្ថិតក្នុងស្រុក ចំនួន៤គឺ ស្រុកសង្កែ ,ស្រុករុក្ខគីរី, ស្រុកឯកភ្នំ និងស្រុកមោងឬស្សី។

កម្ពុជា ក្នុងសប្ដាហ៍ទៅមុខទៀតនេះ នឹងទទួលរងនូវឥទ្ធិពល២ដំណាក់កាលនៃខ្យល់មូសុងនិរតីខ្សោយផង, ឥទ្ធិពលខ្យល់មូសុងនិរតីមធ្យមនិងជ្រលងសម្ពាធទាបពីចិនផង។

គម្រោងសាងសង់ផ្លូវ៣៨ខ្សែនៅក្រុងសៀមរាបសម្រេចបានជិត៦៤%ហើយបើទោះបីខេត្តសៀមរាបរងការ គម្រាមនឹងជម្ងឺឆ្លងកូវីដ១៩។ ទេសរដ្ឋមន្ត្រីស៊ុនចាន់ថុលដែលជារដ្ឋមន្ត្រីក្រសួងសាធារណការនិងដឹកជញ្ជូន បានចុះពិនិត្យដំណើរការសាងសង់ផ្លូវក្នុងក្រុងសៀមរាបកាលពីថ្ងៃទី២៨មិថុនា និងបានបញ្ជាក់ជុំវិញវឌ្ឍនភាព នៃដំណើរការសាងសង់ដែលសម្រេចបានជិត៦៤ភាគរយហើយ។

ខេត្តក្រចេះ បានរកឃើញអ្នកឆ្លងកូវីដ១៩ថ្មីចំនួន១៤នាក់ថែមទៀត និងមានអ្នកស្លាប់ម្នាក់ ក្នុងរយៈពេល ២៤ម៉ោងចុងក្រោយនេះ ។ នេះជាតួលេខឆ្លងខ្ពស់ចំនួន ៥នាក់ បើធៀបនឹងម្សិលម៉ិញ ដែលបានរកឃើញអ្នក ឆ្លងចំនួន ៩នាក់ ។

ខេត្តស្ទឹងត្រែង បានរកឃើញអ្នកឆ្លងកូវីដ១៩ថ្មី ចំនួន ៣០នាក់ថែមទៀត ក្នុងរយៈពេល ២៤ម៉ោងចុងក្រោយនេះ ។ យោងតាមរដ្ឋបាលខេត្ត ការឆ្លងកូវីដ១៩ថ្មីទាំង៣០នាក់ថ្ងៃនេះ បានឆ្លងលើពលរដ្ឋនៅក្នុងក្រុងស្ទឹងត្រែង និង នៅស្រុកសេសាន ។

ខេត្តកំពង់ចាម បានរកឃើញអ្នកឆ្លងកូវីដ១៩ថ្មី ច្រើនរហូតដល់ ៨១នាក់ ក្នុងរយៈពេល ២៤ម៉ោង ចុងក្រោយនេះ ដែលជាតួលេខឆ្លងឡើងខ្ពស់ជាងម្សិលម៉ិញរហូតដល់៣១នាក់ ។

ខេត្តត្បូងឃ្មុំរកឃើញអ្នកវិជ្ជមានជំងឺកូវីដ-១៩ ថ្មី ៤៤នាក់ ឮក្នុងរយៈពេល២៤ម៉ោងចុងក្រោយនេះ។ យោងតាម រដ្ឋបាលខេត្ត អ្នកឆ្លងថ្មីទាំងនោះ គឺជាពលរដ្ឋនៅស្រុកពញាក្រែកចំនួន៣០នាក់, ក្នុងក្រុងសួង១១នាក់, ស្រុកត្បូង ឃ្មុំម្នាក់, ស្រុកមេមត់ម្នាក់ និងទៅពីខេត្តកំពង់ចាមម្នាក់។ ខេត្តបន្ទាយត្បូងឃ្មុំ នៅថ្ងៃនេះ បានព្យាបាលជាសះ ស្បើយ អ្នកឆ្លងជំងឺកូវីដ១៩ចំនួន៨នាក់ផងដែរ។