ក្រុមសិល្បករ និងសិល្បការីនីរបស់កម្ពុជា បានប្តេជ្ញានឹងបង្ហាញឈុតឆាកសិល្បៈខ្មែរ ក្នុងព្រឹត្តិការណ៍ឈីងហ្គេ ក្នុងប្រទេសសឹង្ហបុរី ដើម្បីការបង្ហាញនូវអត្តសញ្ញាណរបស់ជាតិ និងមោទនភាពជាតិខ្មែរ។ ព្រឹត្តិការណ៍ឈឺងហ្គេ គឺជាក្បួនព្យុហយាត្រាសិល្បៈសម្តែងដ៏ធំមួយនៅអាស៊ី ដែលតែងរៀបចំឡើងជារៀងរាល់ឆ្នាំ ដោយសមាគមប្រជាជននៃសាធារណរដ្ឋសឹង្ហបុរី។ ក្រុមសិល្បករ និងសិល្បការីនីរបស់កម្ពុជា ក្នុងគណៈប្រតិភូដឹកនាំដោយសហភាពសហព័ន្ធយុវជនកម្ពុជា ដែលចាកចេញនៅថ្ងៃទី៣១មករានេះ បានថ្លែងប្តេជ្ញាលើការលើកស្ទួយកេរ្តិ៍ឈ្មោះ កម្ពុជា ឱ្យកាន់តែត្រដែតលើឆាកអន្តរជាតិ។ ព្រឹត្តិការណ៍ឈីងហ្គេរវាងពីថ្ងៃទី៣ដល់៤កុម្ភៈខាងមុខនេះ គឺជាគំនិតផ្តួចផ្តើមរបស់អតីត នាយករដ្ឋមន្ត្រីសឹង្ហបុរី លោក លី ក្វាន់យូ ក្នុងគោលបំណងបង្ហាញពីភាពអស្ចារ្យ ភាពស្រស់បំព្រង និងភាពសម្បូរបែបនៃវប្បធម៌ចម្រុះ។ កម្ពុជាកន្លងមកធ្លាប់បាននាំយករបាំអប្សរា… ក្បាច់គុនល្បុក្កតោរបស់ខ្មែរ…ល្ខោនស្រមោលស្បែកធំ, របាំម្ករ, ឈុតព្រះថោងនាងនាគ, ឈុតកូរសមុទ្រទឹកដោះ, របាំក្រមា និងក្បាច់ក្រមាជាដើម ចូលរួមសម្តែងក្នុងក្បួនព្យុះហយាត្រា នៃក្នុងព្រឹត្តិការណ៍ «ឈីងហ្គេ» នោះ។ កម្ពុជាធ្លាប់បានចូលរួមក្នុងព្រឹត្តិការណ៍ឈីងហ្គេនេះ ចំនួន២ដងរួចមកហើយ គឺនៅក្នុងឆ្នាំ២០១៧ ដឹកនាំប្រធាន ស.ស.យ.ក លោក ហ៊ុន ម៉ានី ក្រោមប្រធានបទ «សុខដុមក្នុងភាពចម្រុះ នៃវប្បធម៌, និងនៅក្នុងឆ្នាំ២០១៩ ក្រោមប្រធានបទ៖ «ភាពសុខដុម» ចំណែកឆ្នាំ២០២៣នេះ នឹងស្ថិតក្រោមប្រធានបទ «ក្តីសង្ឃឹមរបស់យើង»។

ទូកនេសាទ១គ្រឿងនៅក្បែរកោះរ៉ុងសន្លឹម បានលិចវេលាទាបភ្លឺថ្ងៃទី៣០ មករា ឆ្នាំ២០២៣ ក្បែរកោះរ៉ុងសន្លឹម នៃខេត្តព្រះសីហនុ បណ្តាលឱ្យមានមនុស្ស២នាក់បានបាត់ខ្លួន។ ក្រុមសង្គ្រោះដឹកនាំដោយឧកញ៉ា ទៀ វិចិត្រ បានប្រើប្រាស់អូប័រល្បឿនលឿនចំនួន៤គ្រឿង ដើម្បីស្វែងរកជនបាត់ខ្លួនទាំង២ ។ ក្រុមសង្គ្រោះបានថ្លែងថាអ្នកនេសាទដែលបានបាត់ខ្លួន គឺម្នាក់ជាអ្នក បើកបរទូក និងម្នាក់ទៀតជាកម្មករ។ ទូកនេះ បានលិចនៅចំណុចក្បែរកោះថាស។ សមត្ថកិច្ចបានថ្លែងថា ករណីលិចទូកនេះ គឺបណ្តាលមកពីខ្យល់កន្ត្រាក់ខ្លាំង បណ្តាលឱ្យមានទឹករលកធំៗ ធ្វើឱ្យលិចទូកនេសាទ។

តួលេខឆ្លងថ្មីកូវីដ១៩ ក្នុងប្រទេសអាស៊ាននៃរយៈពេល ៧២ម៉ោងចុងក្រោយនេះ បានថយចុះ ចំនួន ១ពាន់ ៥២ករណី បើប្រៀបធៀបនឹងតួលេខឆ្លងសរុបរយៈពេល៣ថ្ងៃដូចគ្នាកាលពីសប្តាហ៍មុន ។ តួលេខឆ្លងថ្មីកូវីដ១៩ នៅអាស៊ានរយៈពេលបីថ្ងៃមកនេះ មានចំនួន ៣ពាន់ ១០១ករណី ។ ការឆ្លងថ្ងៃនេះ បានកើតលើប្រទេសចំនួន៩ នៅអាស៊ាន រួមមានប្រទេសឥណ្ឌូនេស៊ី, ម៉ាឡេស៊ី, វៀតណាម, មីយ៉ាន់ម៉ា, សឹង្ហបុរី, ហ្វីលីពីន, កម្ពុជា, ថៃ និងប្រទេសឡាវ ។ ប្រទេសសឹង្ហបុរី គឺជាប្រទេសដែលមានតួលេខឆ្លងច្រើនជាងគេ ដែលមានចំនួន ១ពាន់ ៧៦ ករណី។ តួលេខឆ្លងតិចជាងគេ គឺប្រទេសមីយ៉ាន់ម៉ា ដែលមានចំនួនអ្នកឆ្លង ៤ករណី។ ប្រទេសប្រុយណេ គឺជាប្រទេសដែលគ្មានសេចក្តីរាយការណ៍ជុំវិញតួលេខឆ្លង និងស្លាប់ឡើយ ក្នុងរយៈពេល ២៤ ម៉ោងចុងក្រោយនេះ ។ តួលេខស្លាប់ដោយសារកូវីដ១៩ ក្នុងប្រទេសអាស៊ានរយៈពេល ៧២ម៉ោងចុងក្រោយនេះ មានចំនួន ៥៤នាក់ ក្នុងនោះប្រទេសហ្វីលីពីន មានមនុស្សស្លាប់ចំនួន ៣២នាក់ ដែលជាតួលេខស្លាប់ច្រើនជាងគេ ។…

កម្ពុជាក្នុងរយៈពេល ៧២ម៉ោងចុងក្រោយនេះ មានតួលេខឆ្លងកូវីដ១៩ ចំនួន ៨ករណី ដែលកើនឡើងចំនួន៤ករណី បើប្រៀបធៀបនឹងតួលេខឆ្លង ៧២ម៉ោងដូចគ្នាកាលពីសប្តាហ៍មុន ។ យោងតាមក្រសួងសុខាភិបាលតួលេខឆ្លងកាលពីថ្ងៃសៅរ៍ការឆ្លងមានចំនួន ២ករណី, ថ្ងៃអាទិត្យមាន ៤ករណី និងនៅថ្ងៃច័ន្ទនេះ មានការឆ្លងថ្មីចំនួន ២ករណី ។ តួលេខឆ្លងថ្មីទាំង ៨ករណីនាវេលា៧២ម៉ោងចុងក្រោយនេះ គឺកើតឡើងក្នុងរង្វង់សហគមន៍ទាំងអស់ ។ កម្ពុជាបានចាប់ផ្តើមចាក់ដូសជំរុញទី៦ ក្នុងខែមករានេះដើម្បីបង្កើនភាពស៊ាំ ក្នុងសហគមន៍ ខណៈដែលមានសេចក្តីរាយការណ៍របស់ពិភពលោកអំពីការឆ្លងនូវវីរុសបំប្លែង ថ្មីម្យ៉ាងឈ្មោះ XBB ។ ពលរដ្ឋដែលបានទៅចាក់ដូសជំរុញទី៦ បានចំនួន ១៣ម៉ឺន ២ពាន់ ៤២៨នាក់ ហើយ។ កម្ពុជាបច្ចុប្បន្នកំពុងរៀនរស់នៅជាមួយនឹងជម្ងឺកូវីដ១៩ ខណៈ ដែលការចាក់វ៉ាក់សាំងដូសមូលដ្ឋាន ទូទាំងប្រទេសមានប្រមាណជាង ៩៥ភាគរយ រួចមកនេះ។

សពកុមារាពីរនាក់ត្រូវបានរកឃើញក្នុងព្រែកកំចាយ នាវេលាថ្ងៃត្រង់ថ្ងៃទី៣០ ខែមករា ឆ្នាំ២០២៣ ក្រោយបាត់ពីផ្ទះអស់មួយយប់ចាប់តាំងពីម៉ោងប្រមាណ៥ល្ងាចថ្ងៃទី២៩ ខែមករា ឆ្នាំ២០២៣។ ហេតុការណ៍បានកើតឡើងនៅភូមិកំពង់គ្រែង ឃុំកំពង់គ្រែង ស្រុកទឹកឈូ ខេត្តកំពត។ សមត្ថកិច្ចបានថ្លែងថា កុមារារងគ្រោះទាំង២ ឈ្មោះ ឆក សម្បត្តិ អាយុ ៨ឆ្នាំ និងឈ្មោះ ថន សុខគា អាយុ ៧ឆ្នាំ ។ កុមារទាំងពីរនាក់ ត្រូវគេឃើញបាននាំគ្នាជិះកង់ដើរលេង ក្នុងភូមិបាត់មួយយប់ និងរហូតដល់ព្រឹកថ្ងៃទី៣០មករា គេបានប្រទះឃើញកង់កុមារទាំង ២ ដែលបានជិះផ្អែកនឹងដើមស្វាយមួយដើម និងស្បែកជើងចំនួនពីរគូរបស់ពួកគេ ស្ថិតនៅក្បែរព្រែកកំចាយ ក្នុងដីអ្នកភូមិ មួយកន្លែង។ ដោយការសង្ស័យ គេបានស្វែងរកមនុស្សចេះ មុជទឹករាវរកក្នុ្ងងព្រែកនោះ និងបានប្រទះឃើញសាកសពកុមារាទាំង២ នាវេលាថ្ងៃត្រង់។ ផ្អែកតាមលទ្ធផលនៃការធ្វើកោសលវិច័យបានបង្ហាញថា កុមារទាំងពីរនាក់ពិតជាបានស្លាប់ដោយសារលង់ទឹកប្រាកដមែន៕

បុរសម្នាក់នៅក្នុងក្រុងសៀមរាប បានចំណាយលុយជិត ២ម៉ឺនដុល្លារសាងសង់ផ្ទះ យន្តហោះ នៅក្រុងសៀមរាប ដែលសំណង់នោះ បានធ្វើឲ្យមហាជនចាប់អារម្មណ៍ខ្លាំង។ ដោយចង់សម្រេចបំណងដែលខ្លួនធ្លាប់បានប៉ងប្រាថ្នាតាំងពីតូច ដែលចង់ជិះយន្តហោះនោះ លោក ច្រាច់ ពៅ ដែលជាម្ចាស់ផ្ទះយន្តហោះនោះ បានថ្លែងថាការសាងសង់ផ្ទះនេះ គឺជាបំណងប្រាថ្នារបស់លោកតាំងពីនៅកុមារ ដែលចង់ជិះដេកនៅលើយន្តហោះ…និងលោកបានតាំងចិត្តថាប្រសិននៅពេលមានលុយ លោកនឹងធ្វើផ្ទះយន្តហោះនោះដោយខ្លួនឯង។ ផ្ទះនេះ ត្រូវបានសង់ដោយរូបលោកផ្ទះនៅដើមឆ្នាំ២០២២ នៅលើដីស្រែ ក្នុងភូមិព្នៅ សង្កាត់សំបួរ ក្រុងសៀមរាប ខេត្តសៀមរាប។ ផ្ទះយន្តហោះនេះ ទើបបានសាងសង់រួចរាល់នៅខែមករា ឆ្នាំ២០២៣នេះ។ ផ្ទះយន្តហោះរបស់លោក ច្រាច់ ពៅ មានទំហំទទឹងជិត ៤ម៉ែត្រ, បណ្ដោយ ជិត២០ម៉ែត្រ និងកម្ពស់ ៦ម៉ែត្រ។ ផ្ទះនេះដែរ មានបន្ទប់គេងចំនួនពីរ និងបន្ទប់ទឹកពីរ៕

បេក្ខជននៃអនាគតនាយករដ្ឋមន្ត្រីគណបក្សប្រជាជនកម្ពុជា បណ្ឌិត ហ៊ុន ម៉ាណែត បានប្រតិកម្មនឹងអ្នកវិភាគម្នាក់ដែលចោទថាបណ្ឌិត ហ៊ុន ម៉ាណែត ធ្វើអំពើខុសច្បាប់ពាក់ព័ន្ធនឹងបេក្ខភាព នៃអនាគតនាយករដ្ឋមន្ត្រី។ ការវិភាគចោទប្រកាន់ដាក់លើបណ្ឌិត ហ៊ុន ម៉ាណែត នេះ ត្រូវគេរាយការណ៍ថាធ្វើឡើងដោយបុគ្គលម្នាក់ដែលធ្វើនិរទេសខ្លួនឯងរត់ទៅក្រៅស្រុក ដែលតែងតែនិយាយរិះគន់ប្រឆាំងគណបក្សប្រជាជនកម្ពុជា។ ការវិភាគដែលមិនយល់អំពីច្បាប់គ្រប់ជ្រុងជ្រោយនេះ ត្រូវបានបណ្ឌិត ហ៊ុន ម៉ាណែត បានបកស្រាយតបមកវិញ តាមរយៈការថ្លែងមួយដែលគេបណ្តាញសារព័ត៌មាននានា បង្ហោះតាមបណ្តាញសង្គមនៅថ្ងៃទី៣០មករានេះ។

ឈុតតំណាងជាតិរបស់បវរកញ្ញាកម្ពុជា បានជាប់ជាឈុតតំណាងជាតិល្អជាងគេ ក្នុងកម្មវិធីប្រកួតសម្រស់បរវរកញ្ញាភពផែនដី Miss Planet International ២០២៣ ក្នុងចំណោមបវរកញ្ញា មកពី១៤ប្រទេសផ្សេងទៀតនៅលើពិភពលោក ។ កម្មវិធីប្រកួតសម្រស់ Miss Planet International 2022 បានប្រព្រឹត្តទៅនារាត្រីថ្ងៃទី២៩ ខែមករា ឆ្នាំ២០២៣ ម្សិលមិញ ដែលកម្ពុជាជាអ្នករៀបចំកម្មវិធី ។ ឈុត រាហូចាប់ចន្ទ ជាឈុតតំណាងជាតិ ដែលកម្ពុជាបានរៀបចំ សម្រាប់បវរកញ្ញាកម្ពុជាគឹកញ្ញា ពក ស្រីល័ក្ខ គ្រងក្នុងការបង្ហាញក្នុងកម្មវិធីនោះ ។ យោងតាមអ្នករៀបចំការរចនាឈុត «រាហូចាប់ចន្ទ» ឈុតដែលបេក្ខជនបវរកញ្ញាកម្ពុជាគ្រង ក្នុងកម្មវិធីនោះ គឺដើម្បីបង្ហាញពីវប្បធម៌ ជំនឿ សាសនាដ៏ផូរផង់នៃកម្ពុជា។ បវរកញ្ញាកម្ពុជា កញ្ញា ពក ស្រីល័ក្ខ បើទោះបីឈុតនោះ មានទំហំធំ និងជួបឧបសគ្គពេលបង្ហាញលើ ឆាកប្រកួតយ៉ាងណា ប៉ុន្តែបវរកញ្ញារូបនេះ បានគ្រប់គ្រងស្ថានការបានយ៉ាងល្អ ។ ការប្រកួតស្វែងរកម្ចាស់មកុដសម្រស់បរវរកញ្ញាភពផែនដី Miss Planet International ឆ្នាំ២០២៣ បវរកញ្ញាកម្ពុជាបានជាប់លំដាប់រងទី៧ និងឈ្នះក្នុងវគ្គប្រកួតឈុតតំណាងជាតិ…

គ្រាប់បេសែសិប មួយគ្រាប់បានផ្ទុះបណ្តាលអោយបុរសម្នាក់បានស្លាប់ មុនពេលបញ្ជូនទៅដល់មន្ទីរពេទ្យ។ ហេតុការណ៍បានកើតឡើងនៅក្នុង ភូមិគន្ទាក ឃុំសាគ្រាម ស្រុកប្រាសាទបល្ល័ង្គ ខេត្តកំពង់ធំ។ គ្រាប់បេសែសិបដែលបានផ្ទុះនោះ គឺជាគ្រាប់ដែលបុរសរងគ្រោះ ឈ្មោះ នឿន វិត អាយុ៤២ឆ្នាំ រើសបាននៅថ្ងៃទី២៨ មករា ឆ្នាំ២០២៣ ដែលគេជឿថា ជាគ្រាប់រាយប៉ាយសេសសល់ពីអតីតកាលសង្គ្រាមស៊ីវិលក្នុងប្រទេស។ ខេត្តកំពង់ធំគឺជាខេត្តមួយនៃអតីតសមរភូមិ ដែលមិនទាន់បានក្លាយជាខេត្តរំដោះគ្រាប់មីន និងគ្រាប់មិនទាន់ផ្ទុះ អស់នៅឡើយទេ។ បុរសឈ្មោះ នឿន វិត បានយកគ្រាប់បេមកវាយលេងបណ្តាលអោយផ្ទុះ និងរងរបួសធ្ងន់ ដាច់ខ្ទេចដៃទាំងសងខាង បាក់ស្មាឆ្វេង ត្រូវចំផ្ទៃមុខ និងរបួសពេញខ្លួនប្រាណ និងគាត់បានស្លាប់មុនពេលបញ្ជូនទៅដល់មន្ទីរពេទ្យខេត្ត ។ កម្ពុជាក្រោយការដោះអស់រយៈពេល៣០ ឆ្នាំមកនេះ នៅសេសល់ផ្ទៃដីមានគ្រាប់មីន និងគ្រាប់មិនទាន់ផ្ទុះប្រមាណ៦០០គីឡូម៉ែត្រក្រឡាថែមទៀត ក្នុងនោះរួមមានទាំងផ្នែកខ្លះ នៃខេត្តកំពង់ធំផងដែរ។ ទោះជាយ៉ាងណាក៏ដោយ កម្ពុជាបានប្តេជ្ញាបោសសំអាតគ្រាប់មីនឱ្យអស់ទាំងស្រុងនៅក្នុងឆ្នាំ២០២៥ខាងមុខនេះ។