សម្តេចនាយករដ្ឋមន្ត្រី បានថ្លែងអំពាវនាវក្នុងសារសម្លេងមួយនៅថ្ងៃទី១៩តុលាដាស់តឿនប្រជាពលរដ្ឋត្រូវរៀន រស់នៅក្នុងបរិបទនៃគន្លងថ្មីដែលមានជម្ងឺកូវីដ១៩ ដែលការដាស់តឿននេះ បានធ្វើឡើងទន្ទឹមនឹងយុទ្ធនាការ ការចាក់វ៉ាក់សាំងត្រៀមនឹងបិទបញ្ចប់នាពេលខាងមុខ និងក្នុងពេលដែលតួលេខឆ្លងនិងស្លាប់ដោយសារកូវីដ១៩ ក្នុងប្រទេសកម្ពុជា ត្រូវគេឃើញថាបានបន្តធ្លាក់ចុះជាលំដាប់។

តួលេខឆ្លងកូវីដ១៩ក្នុងរយៈពេល២៤ម៉ោងចុងក្រោយនេះ បានបន្តធ្លាក់ចុះថែមទៀតដែលជាតួលេខស្ថិត ក្រោមខ្ទង់២០០ករណីក្នុងរយៈពេល២ថ្ងៃជាប់គ្នាមកនេះ។ តួលេខឆ្លងថ្មីថ្ងៃនេះ មានចំនួន១៧៥ករណីដែលថយ ចុះ២០ករណីបើប្រៀបធៀបនឹងការឆ្លងម្សិលមិញ។

តម្លៃប្រេងឥន្ធនៈ នៅតែបន្ដកើនឡើងបន្ថែមទៀត សម្រាប់ការលក់រយៈពេល១៥ថ្ងៃខាងមុខនេះ។ យោងតាម ក្រសួងពាណិជ្ជកម្ម, តម្លៃប្រេងឥន្ធនៈ សម្រាប់ការលក់ចាប់ពី ថ្ងៃទី១៦ រហូតដល់ថ្ងៃទី៣១ ខែតុលា ឆ្នាំ២០២១នេះ គឺប្រេងសាំងធម្មតា មានតម្លៃ៤ពាន់៣០០រៀលក្នុង១លីត្រ ដែលតម្លៃនេះគឺកើនឡើងចំនួន២០០រៀល បើធៀប ទៅការ លក់រយៈពេល១៥ ថ្ងៃមុនដូចគ្នា…ចំណែកប្រេងម៉ាស៊ូតវិញ មានតម្លៃ៤ពាន់រៀល ក្នុង១លីត្រ ដែលតម្លៃ នេះ បានកើនឡើងចំនួន២០០រៀល បើធៀបទៅនឹងការលក់រយៈពេល១៥ ថ្ងៃមុន៕

សេចក្តីព្រាងច្បាប់ស្តីពីសញ្ជាតិខ្មែរតែមួយសម្រាប់ថ្នាក់ដឹកនាំកំពូល កំពុងស្ថិតក្នុងរង្វង់ការពិនិត្យពីក្រុមជំនាញ នីតិកម្មរដ្ឋសភា។ សេចក្តីព្រាងច្បាប់ស្តីពីសញ្ជាតិខ្មែរតែមួយសម្រាប់ថ្នាក់ដឹកនាំកំពូលនេះ នឹងរំពឹងរកការ ដេញដោលអនុម័តក្នុងកិច្ចប្រជុំពេញអង្គរដ្ឋសភា នាពេលអនាគតខាងមុខនេះ៕

គ្រឿងញៀនជិត២០គីឡូក្រាមនិងជនសង្ស័យ២នាក់ ដែលបង្ក្រាបបានក្នុងខេត្តស្វាយរៀង ត្រូវបានសមត្ថកិច្ច បញ្ជូនទៅតុលាការនៅថ្ងៃទី១៨តុលានេះ ។ សមត្ថកិច្ចបានថ្លែងថាគ្រឿងញៀនសរុបទម្ងន់ ១៩គីឡូ និង៤៨៨ ក្រាម ត្រូវសមត្ថកិច្ចបានស្ទាក់ចាប់កាលពីថ្ងៃទី១៣តុលា ក្នុងពេលដែលជនល្មើសបំរុងដឹកជញ្ជួនចេញ ទៅប្រ ទេសវៀតណាម។

ភ្លៀងធ្លាប់ជាប់ៗគ្នា ប៉ុន្មានថ្ងៃចុងក្រោយនេះ បាននាំឲ្យច្រាំងទន្លេក្នុងខេត្តក្រចេះ បានបាក់ស្រុត និងធ្វើឲ្យផ្ទះ ចំនួន ២ខ្នង បានរងការបាក់រលំចូលក្នុងទន្លេ និងខូចខូចខាត។ សេចក្តីរាយការណ៍ពីសមត្ថកិច្ចបានឲ្យដឹងថា ហេតុការណ៍បានកើតឡើង កាលពីព្រឹកថ្ងៃទី១៧ ខែតុលា នៅចំណុចភូមិធំឃុំសណ្តាន់ ស្រុកសំបូរ ។

កម្ពស់ទឹកទន្លេចំនួន៣ នៃខេត្តស្ទឹងត្រែង នៅតែបន្ដហក់ឡើងថែមទៀត នៅថ្ងៃនេះនៅពេលដែលភ្លៀងបន្តធ្លាក់។ យោងតាមមន្ទីរធនធាន ទឹកនិងឧតុនិយម ខេត្ដស្ទឹងត្រែង បានឱ្យដឹងនៅថ្ងៃទី១៨ ខែតុលានេះថា ទន្លេទាំង៣ ដែលមានកម្ពស់ទឹកហក់ឡើងនោះ រួមមានទន្លេមេគង្គ ដែលទឹកមានកម្ពស់៧ម៉ែត្រ៣២សង្ទីម៉ែត្រថ្ងៃទី១៨តុលា។ កម្ពស់ទឹកទន្លេមេគង្គដែលត្រូវប្រកាសអាសន្ន គឺ១០ម៉ែត្រ៧០សង្ទីម៉ែត្រ។ នៅជាមួយគ្នានេះផងដែរកម្ពស់ទឹក ទន្លេសេកុង មាន៩ម៉ែត្រនិង៧៨សង្ទីម៉ែត្រនៅថ្ងៃនេះ ។