តបតាមការអញ្ជើញរបស់កងទ័ពជើងគោក នៃកងយោធពលខេមរភូមិន្ទ ឯកឧត្តម នាយឧត្តមសេនីយ៍ ណារ៉ុងផាន់ ជិតកែវធែ (Narongpan Jittkaewtae) អគ្គមេបញ្ជាការកងទ័ពជើងគោកភូមិន្ទថៃ បានអញ្ជើញមកបំពេញទស្សនកិច្ចជាផ្លូវការរយៈពេល២ថ្ងៃ នៅព្រះរាជាណាចក្រកម្ពុជាជាលើកដំបូងបន្ទាប់ពីឯកឧត្តម នាយឧត្តមសេនីយ៍ បានចូលកាន់តំណែង។ នៅក្នុងអំឡុងពេលនៃដំណើរទស្សនកិច្ចនេះ នាព្រឹកថ្ងៃទី០៣ ខែកុម្ភៈ ឆ្នាំ២០២២ ឯកឧត្តមបានដឹកនាំគណៈប្រតិភូជាន់ខ្ពស់នៃកងទ័ពជើងគោកភូមិន្ទថៃ ចូលជួបពិភាក្សាការងារទ្វេភាគីជាមួយ ឯកឧត្តម ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងទ័ពជើងគោក នៅបញ្ជាការដ្ឋានកងទ័ពជើងគោក។

គណៈកម្មាធិការជាតិរៀបចំការបោះឆ្នោត (គ.ជ.ប) បានជូនដំណឹងដល់គណបក្សនយោបាយដែលបានចុះបញ្ជីត្រឹមត្រូវនៅក្រសួងមហាផ្ទៃ ហើយដែលមានបំណងសុំចុះបញ្ជីបេក្ខជន នៃគណបក្សនយោបាយសម្រាប់ឈរឈ្មោះបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២ ដែលនឹងប្រព្រឹត្តទៅនៅថ្ងៃទី៥ ខែមិថុនា ឆ្នាំ២០២២។

ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ស្តេចយាងទៅចូលរួមពិធីសម្ពោធព្រឹត្តិការណ៍កីឡាអូឡាំពិករដូវរងា នៅទីក្រុងប៉េកាំង នៃសាធារណរដ្ឋប្រជាមានិតចិន នាថ្ងៃទី០៣ ខែកុម្ភៈ ឆ្នាំ២០២២នេះ ហើយនៅថ្ងៃទី៥ ខែកុម្ភៈ ឆ្នាំ២០២២ ព្រះអង្គនឹងយាងមាតុភូមិនិវត្តន៍មកកម្ពុជាវិញ។ ចិនបានទទួលធ្វើជាម្ចាស់ផ្ទះក្នុងការរៀបចំកីឡាអូឡាំពិករដូវរងាឆ្នាំ២០២២ ចាប់ពីថ្ងៃទី០៤ ដល់ថ្ងៃទី២០ ខែកុម្ភៈ ឆ្នាំ២០២២។

អស់រយៈពេល១ឆ្នាំមកហើយ ប្រទេសជាសមាជិកអាស៊ាននៅតែមានក្តីព្រួយបារម្ភយ៉ាងខ្លាំងចំពោះការវិវត្តនានា នៅក្នុងប្រទេសមីយ៉ាន់ម៉ា រួមទាំងរបាយការណ៍នៃការបន្តកើតមាននូវអំពើហិង្សា និងការធ្លាក់ចុះនៃស្ថានភាពមនុស្សធម៌។ ដោយរំលឹកឡើងវិញពីកិច្ចខិតខំប្រឹងប្រែងដ៏ម៉ត់ចត់ដើម្បីជួយដោះស្រាយវិបត្តិ រួមទាំង ដំណើរទស្សនកិច្ចទៅកាន់ប្រទេសមីយ៉ាន់ម៉ានាពេលថ្មីៗនេះដោយសម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ប្រទេសជាសមាជិកអាស៊ានសូមជំរុញអាជ្ញាធរមីយ៉ាន់ម៉ា ឱ្យចាត់សកម្មភាពជាក់លាក់ដើម្បីអនុវត្តប្រកបដោយប្រសិទ្ធភាព និងពេញលេញនូវកិច្ចព្រមព្រៀងជាឯកច្ឆន្ទប្រាំចំណុច (5PC) ដែលបានសម្រេចនៅក្នុងកិច្ចប្រជុំរបស់ថ្នាក់ដឹកនាំអាស៊ាន កាលពីថ្ងៃទី២៤ ខែមេសា ឆ្នាំ២០២១។

ឯកឧត្តម សោម សូរីដា អ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) បានមានប្រសាសន៍ប្រាប់ AMS នៅល្ងាចថ្ងៃទី០២ ខែកុម្ភៈនេះថា ការចូលរួម ឬមិនចូលរួមក្នុងការបោះឆ្នោតជ្រើសរើសក្រុមប្រឹក្សាឃុំ សង្កាត់ ឆ្នាំ២០២២ របស់គណបក្សនយោបាយទាំង៦ គឺជាសិទ្ធិសម្រេចរបស់គណបក្សទាំងនោះ ដោយយោងតាមច្បាប់ស្តីពីការបោះឆ្នោតជ្រើសរើសក្រុមប្រឹក្សាឃុំ សង្កាត់។ ប៉ុន្តែពាក់ព័ន្ធទៅនឹងការទាមទារឱ្យរក្សាខ្លឹមសារដើមដដែល នៃទម្រង់បែបបទ ១១០២ គឺកំណត់ហេតុនៃការរាប់សន្លឹកឆ្នោត គឺគណៈកម្មាធិការជាតិរៀបចំការបោះឆ្នោត នឹងពិចារណាដាក់ទន្និន័យចំនួនសន្លឹកឆ្នោតទទួលបានសរុប សន្លឹកឆ្នោតដែលនៅសល់មិនបានប្រើ និងសន្លឹកឆ្នោតខូចទៅក្នុងទម្រង់នោះវិញ។

គណៈកម្មាធិការជាតិរៀបចំការបោះឆ្នោត (គ.ជ.ប) បានចេញសេចក្ដីសម្រេចស្ដីពីការដាក់ឱ្យប្រើប្រាស់ប្រព័ន្ធបច្ចេកវិទ្យា ក្នុងដំណើរការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២។ សេចក្តីសម្រេចនេះ បានចេញកាលពីថ្ងៃទី៣១ ខែមករា ឆ្នាំ២០២២ ដែលត្រូវបានផ្សព្វផ្សាយជាផ្លូវការនៅថ្ងៃទី០២ ខែកុម្ភៈ ឆ្នាំ២០២២។

ស្ថានបេសកកម្មអចិន្រ្តៃយ៍នៃព្រះរាជាណាចក្រកម្ពុជា នៅទីក្រុងហ្សឺណែវ បានបដិសេធយ៉ាងដាច់អហង្ការចំពោះសេចក្ដីថ្លែងការណ៍ដែលមើលឃើញតែមួយជ្រុង ធ្វើនយោបាយូបនីកម្ម បែបស្រមើស្រមៃ និងបង្កការភ័ន្តច្រឡំរបស់អ្នករាយការណ៍ពិសេសបីរូប ដែលពុំមែនជាបុគ្គលិកអង្គការសហប្រជាជាតិ ពាក់ព័ន្ធនឹង ”ច្រកទ្វារអ៊ីនធឺណិតជាតិ” នៅកម្ពុជា។ យោងតាមសេចក្តីថ្លែងការណ៍របស់ស្ថានបេសកកម្មអចិន្រ្តៃយ៍នៃព្រះរាជាណាចក្រកម្ពុជា នៅទីក្រុងហ្សឺណែវ កាលពីថ្ងៃទី១ ខែកុម្ភៈ បានឱ្យដឹងថា ការបង្កើត”ច្រកទ្វារអ៊ីនធឺណិតជាតិ” គឺជាការគោរពតាមគោលការណ៍ច្បាប់ សមាមាត្រ និងភាពចាំបាច់ ព្រមទាំងរួមចំណែកដល់ការសម្រេចបាននូវឌីជីថលូបនីកម្មដ៏រស់រវើករបស់កម្ពុជា ដែលជាកម្លាំងចលករជំរុញកំណើន និងការអភិវឌ្ឍ។

ឯកឧត្តម ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងទ័ពជើងគោក បានណែនាំឱ្យបណ្តាស្ថាប័ន កងឯកភាពចំណុះកងទ័ពជើងគោកទាំងអស់ បន្តយកចិត្តទុកដាក់ និងត្រៀមលក្ខណៈអនុវត្តគ្រប់ភារកិច្ច ទាំងកិច្ចការងារស្នូល និងភារកិច្ចនានាតាមបទបញ្ជារបស់រាជរដ្ឋាភិបាល ក្រសួងការពារជាតិ និងអគ្គបញ្ជាការដ្ឋាន គឺការចូលរួមសហការការពារសន្តិសុខ សណ្តាប់ធ្នាប់សាធារណៈ ជាមួយគ្រប់ស្ថាប័ន អង្គភាព និងអាជ្ញាធរពាក់ព័ន្ធ ជាពិសេសការការពារសន្តិសុខ សុវត្ថិភាព ជូនថ្នាក់ដឹកនាំជាតិ អន្តរជាតិ ក្នុងដំណើរការនៃកិច្ចប្រជុំនានា ដែលកម្ពុជាធ្វើជាម្ចាស់ផ្ទះក្នុងនាមជាប្រធានអាស៊ាន ឆ្នាំ២០២២ ក៏ដូចជាដំណើរការឃោសនា និងការប្រព្រឹត្តទៅនៃការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥ នាពេលខាងមុខ។

នាយឧត្តមសេនីយ៍ នាង ផាត រដ្ឋលេខាធិការប្រចាំការក្រសួងការពារជាតិ បានមានប្រសាសន៍បញ្ជាក់ថា ក្នុងអំឡុងពេលដែលប្រទេសជាតិកំពុងប្រយុទ្ធប្រឆាំងយ៉ាងខ្លាំងក្លាជាមួយជំងឺកូវីដ-១៩ កងយោធពលខេមរភូមិន្ទនៅតែមានភារកិច្ចសំខាន់ក្នុងការពង្រឹងកិច្ចការពារជាតិតាមព្រំដែន បង្រ្កាបបទល្មើស និងបង្កើនកិច្ចសហប្រតិបត្តិការជាមួយប្រទេសជិតខាង។ ជាពិសេសទៀត កងយោធពលខេមរភូមិន្ទ បានចូលរួមយ៉ាងសកម្មជាមួយយុទ្ធនាការចាក់វ៉ាក់សាំងជូនប្រជាពលរដ្ឋ ព្រះសង្ឃ កម្មករ នៅទូទាំងប្រទេសបានយ៉ាងល្អប្រសើរ ក្នុងទប់ស្កាត់ការរីករាលដាលកូវីដ-១៩ផងដែរ។

ឯកឧត្តម សន្តិបណ្ឌិត ម៉ៅ ចន្ទតារា រដ្ឋលេខាធិការក្រសួងមហាផ្ទៃ បានដាក់ចេញនូវផែនការចាំបាច់មួយ និងបែងចែកភារកិច្ចដល់សមាជិកដែលមានភារកិច្ចសម្រាប់កិច្ចប្រជុំអាស៊ានណាប៉ូលលើកទី៤០។ ឯកឧត្តម បានជំរុញនិងលើកទឹកចិត្តឱ្យក្រុមការងារលេខាធិការដ្ឋានចំណុះអនុគណៈកម្មការខ្លឹមសារ ដើម្បីជាជំនួយក្នុងការរៀបចំសន្និសីទអាស៊ានណាប៉ូលលើកទី៤០នេះ សហការជាមួយគ្រប់ស្ថានប័ន ធ្វើយ៉ាងណាឱ្យដំណើរកិច្ចប្រជុំទទួលបានលទ្ធផលល្អជាទីគាប់ចិត្ត។ ឯកឧត្តម សន្តិបណ្ឌិត ក៏បានថ្លែងអំណរគុណដល់ថ្នាក់ដឹកនាំកិច្ចដែលបានចូលរួមប្រជុំ និងយកចិត្តទុកដាក់ត្រៀមធ្វើការកិច្ចការងារតាមភារកិច្ចដែលថ្នាក់ដឹកនាំបានបែងចែកជូនសម្រាប់កិច្ចប្រជុំអាស៊ានណាប៉ូលលើកទី៤០ ដែលប្រទេសកម្ពុជាធ្វើជាម្ចាស់ផ្ទះ។