ព្រះវិហារ៖ មនុស្សប្រាំនាក់រងរបួសស្រាល ,ផ្ទះពីរខ្នងឆេះទាំងស្រុង និងបីខ្នងទៀតខូចខាត ៤០ភាគរយដោយសារអគ្គិភ័យបណ្តាលមកពីផ្ទុះធុងហ្គាសចាស់។ករណីនេះ បានកើតឡើងកាលពីរសៀលថ្ងៃទី១៨ ខែមេសា ឆ្នាំ២០២៤ នៅភូមិស្អាង ឃុំស្អាង ស្រុកជ័យសែន ខេត្តព្រះវិហារ ។ អធិការនគរបាលស្រុកជ័យសែនបានឳ្យដឹងថា ភ្លើងបានឆេះចេញពីផ្ទះឈ្មោះ រិន សំបូរ អាយុ៤០ឆ្នាំ ជាអ្នកលក់ និងដូរហ្គាស (ធុងហ្គាស) ដែលមានសភាពចាស់ មានច្រេះស្របពេល អាកាសធាតុក្តៅខ្លាំង ក៏ផ្ទុះធុងហ្គាសបង្កជាអណ្ដាតភ្លើងឡើង។ចំណែកពលរដ្ឋរបួសសើស្បែកចំនួនប្រាំនាក់ដោយការចូលរួមជួយពន្លត់។ ក្នុងហេតុការណ៍នេះសមត្ថកិច្ចនគរបាលស្រុកជ័យសែន និងកងកម្លាំងអធិការដ្ឋាន នគរបាលស្រុកឆែប បានជួយអន្តរាគមន៍ពន្លត់ទើបភ្លើងរលត់ទៅវិញនៅរសៀលថ្ងៃដដែលមិនបង្កគ្រោះថ្នាក់ធ្ងន់ធ្ងរ៕ដោយៈ សួន លីណា

ភ្នំពេញ៖ យោងតាមរបាយការណ៍ ពី នាយកដ្ឋាន នគរបាលចរាចរណ៍ និង សណ្តាប់ធ្នាប់សាធារណៈ ស្តីពី ការរឹតបន្ដឹងច្បាប់ចរាចរណ៍ផ្លូវគោក នៅថ្ងៃទី១៨ ខែមេសាធ្ឆ្នាំ២០២៤ បានឱ្យដឹងថាមានគោលដៅចំនួនសរុប៦គោលដៅ មានយានយន្តចូលគោលដៅចំនួន ១៨គ្រឿង រថយន្តធំ០គ្រឿង រថយន្តតូច ៥៥គ្រឿង ម៉ូតូ ៤០គ្រឿង ក្នុងនោះរកឃើញយានយន្តល្មើសសរុបចំនួន ៩៥គ្រឿងមានរថយន្តធំ ០គ្រឿង រថយន្តតូច ៥៥ គ្រឿង និងម៉ូតូចំនួន ៤០គ្រឿង ត្រូវបានផាកពិន័យតាមអនុក្រឹត្យលេខ ៣៩.អនក្រ.បក នៅទូទាំងប្រទេស ។ របាយការណ៍ដដែលបានវាយតម្លៃថា ការអនុវត្តតាមអនុក្រឹត្យថ្មី ក្នុងការ ផាកពិន័យ យានយន្តល្មើស បានដំណើរការទៅយ៉ាងល្អប្រសើរ ទទួល បានការគាំទ្រពិសេស អ្នកប្រើប្រាស់ផ្លូវទាំងអស់ បានចូលរួមគោរព ច្បាប់ចរាចរណ៍យ៉ាងល្អប្រសើរ ៕ ប្រភព ៖ នាយកដ្ឋាន នគរបាលចរាចរណ៍

ភ្នំពេញ៖ យោងតាមរបាយការណ៍ របស់អគ្គស្នងការដ្ឋាននគរបាលជាតិឲ្យដឹងថា នៅថ្ងៃទី១៨ ខែមេសា ឆ្នាំ២០២៤ មានករណីគ្រោះថ្នាក់ចរាចរណ៍ នៅទូទាំងប្រទេសកើតឡើងចំនួន ៥លើក បណ្តាលអោយមនុស្សស្លាប់ ០៥នាក់ និងរងរបួសធ្ងន់ស្រាលចំនួន ១៣នាក់។ របាយការណ៍ដដែលបញ្ជាក់ថា មូលហេតុដែលបង្កឱ្យគ្រោះថ្នាក់រួមមាន ៖ ល្មើសល្បឿន ០២លើក ស្លាប់ ០២នាក់ ធ្ងន់ ០០នាក់ ស្រាល ០០នាក់ មិនគោរពសិទិ្ឋ ០១លើក ស្លាប់ ០២នាក់ ធ្ងន់ ០០នាក់ ស្រាល ០០នាក់ និងប្រជែង ០២លើក ស្លាប់ ០១នាក់ ធ្ងន់ ០១នាក់ ស្រាល ១០នាក់ ៕ ប្រភព ៖ អគ្គស្នងការដ្ឋាននគរបាលជាតិ

ភ្នំពេញ៖ បួនថ្ងៃនៃពិធីបុណ្យចូលឆ្នាំខ្មែរ ពោលគឺពីថ្ងៃទី១៣ ដល់ថ្ងៃទី១៦ ខែមេសា​ ឆ្នាំ២០២៤ មានមនុស្ស ៣៩នាក់បានស្លាប់ក្នុងគ្រោះថ្នាក់ចរាចរណ៍ និងរបួសជិត១០០នាក់។ យោង​តាមទិន្នន័យរបស់នាយកដ្ឋាននគរបាល​ចរាចរណ៍ផ្លូវគោក និងសណ្តាប់ធ្នាប់សាធារណៈ នៃអគ្គស្នងការដ្ឋាននគរបាលជាតិ បានបង្ហាញថា ការបើកបរលើសល្បឿនកំណត់ និងការមិនគោរពសិទ្ធិនៅតែជាមូលហេតុចម្បងនៅពីក្រោយសោដនាដកម្មដ៏អាក្រក់នេះ។ របាយការណ៍​​នេះបានបង្ហាញថា ក្នុងចំណោមគ្រោះថ្នាក់ចរាចរណ៍​ទាំង៦០ករណីនោះ មានល្មើសល្បឿនចំនួន ២២ករណី, មិនគោរពសិទ្ធិចំនួន ២៥ករណី, មិន​ប្រកាន់ស្តាំ បួនករណី, ជែងបីករណី, បត់គ្រោះថ្នាក់មួយករណី, ស្រវឹងបួនករណី និង​កត្តាយានយន្តមួយករណី។ លោក គឹម បញ្ញា នាយកប្រចាំប្រទេស នៃអង្គការ​មូលនិធិបង្ការ​របួសអាស៊ី និយាយថា តួលេខនៃគ្រោះថ្នាក់ចរាចរណ៍អំឡុងពិធីបុណ្យចូលឆ្នាំនេះ គឺជា​តួលេខខ្ពស់។ លោក​កត់សម្គាល់ថា ចាប់តាំងពីដើមឆ្នាំ​២០២៤មក ឃើញថា ចំនួនគ្រោះថ្នាក់ចរាចរណ៍​នៅ​កម្ពុជាចាប់ផ្តើម​កើន បើធៀបនឹងឆ្នាំមុនៗ។ លោកថា ការអប់រំ និងក្រើនរំលឹកត្រូវតែធ្វើឱ្យបានជាប់ជាប្រចាំ។ ក្នុងរយៈពេលពេញមួយឆ្នាំ២០២៣ មានជនរងគ្រោះជាង ១៥០០នាក់បានស្លាប់នៅលើដងផ្លូវដោយគ្រោះថ្នាក់ចរាចរ។ ដើម្បីរឹតបណ្តឹងការអនុវត្តច្បាប់ និងទោសទណ្ឌ ក្រសួង​ម​ហាផ្ទៃ​កំពុងបង្កើត​ប្រព័ន្ឋ​ផ្ទុក​ទិន្នន័យបញ្ជីខ្មៅ ឬ Black List សម្រាប់កត់​ត្រាអ្នក​បើក​បរ​​ដែល​បង្ក​គ្រោះថ្នាក់ចរាចរណ៍​បណ្តាល​​ឲ្យ​មាន​អ្នក​រង​របួស​ឬ​ស្លាប់៕​ ដោយ៖ទួន សុផល

ភ្នំពេញ៖ កិច្ចខិតខំប្រឹងប្រែងក្នុងការប្រយុទ្ធប្រឆាំងអំពើហិង្សានៅក្នុងប្រទេសកម្ពុជាមានជាហូរហែ ប៉ុន្តែក្រសួងកិច្ចការនារីបានរាយការណ៍ថា បញ្ហាប្រឈមនៅតែគួរឱ្យព្រួយបារម្ភ។ ជាង ៣ ៦០០ ករណីហិង្សាត្រូវបានរកឃើញរវាងឆ្នាំ ២០១៩ ដល់ឆ្នាំ ២០២៣ ហើយជិតពាក់កណ្តាលគឺជាអំពើហិង្សាក្នុងគ្រួសារ ,៣៥ភាគរយទៀតជាករណីរំលោភសេពសន្ថវៈ និងមានតិចតួចជាករណីជួញដូរមនុស្ស។ ក្នុងចំណោមអំពើហិង្សាទាំងនេះ ស្ត្រីនៅតែជាជនរងគ្រោះ។ នេះបើយោងតាមរបាយការណ៍​​ក្នុង​ផែន​ការ​យុទ្ឋសាស្រ្ត​​នារីរតនៈទី៦របស់​ក្រសួង​កិច្ច​ការ​នារីដែលទើបចេញផ្សាយនាពេលថ្មីៗនេះ។ លោកជំទាវ គឹម ស៊ីផាត់ រដ្ឋលេខាធិការ​ប្រចាំការ​នៃ​ក្រសួង​កិច្ច​ការ​នារី ​​​បាន​ប្រាប់ទូរទស្សន៍​អប្សរាថា មានការលេចឡើងនូវរូបភាពថ្មីៗនៃអំពើហិង្សា និងការកេងប្រវញ្ចលើស្ត្រីនិងកុមារ។ លោកជំទាវថា ​បញ្ហានេះ​បាន​ដាក់​បន្ទុក​ផ្នែក​សេដ្ឋកិច្ច និង​សង្គម​ដល់​គ្រួសារ និងបាន​ជះឥទ្ធិពល​អវិជ្ជមាន​ទៅ​ដល់សីលធម៌​សង្គម តម្លៃស្រ្តី និង គ្រួសារខ្មែរ។ របាយការណ៍របស់ក្រសួងកិច្ចការនារីដដែលបង្ហាញផងដែរថា ស្ត្រីនិងក្មេងស្រីរងគ្រោះពីករណីហិង្សាចំនួន ៣​០៤៥ ករណីទទួលបានការគាំពារ និងសេវាផ្នែកច្បាប់។ ក្នុងយុទ្ធសាស្ត្រថ្មីសម្រាប់អនុវត្តពីឆ្នាំនេះដល់ឆ្នាំ ២០២៨ ក្រសួងកិច្ចការនារីរំពឹងថានឹងលើក​កម្ពស់​សមភាព​យេនឌ័រ និង​បង្កើន​ភាពអង់​អាច​ដល់ស្រ្តីនៅ​កម្ពុជា។ សេវាជួយសង្គ្រោះស្ត្រីក្នុងអំពើហិង្សា មានសេវាជួយសង្គ្រោះផ្ទាល់នៅហ្នឹងកន្លែង និង សេវា​ជំនួយ​តាម​តាមទូរស័ព្ទ (Help Line ) ផងដែរ ។ ប៉ុន្តែ លោកស្រី ស្ដើង ភារ៉ុង នាយិកាអង្គការបន្ទាយស្រី​មើល​ឃើញថា នៅមិនទាន់ឆ្លើយតបបានគ្រប់គ្រាន់។…

ភ្នំពេញ៖ បើទោះបីជាការព្យាបាលកាន់តែទំនើប ការដាក់ច្រវាក់នៅតែជាជម្រើសក្នុងចំណោមគ្រួសារដែលមានសមាជិកកើតជំងឺផ្លូវចិត្តធ្ងន់ធ្ងរ ឬជំងឺចិត្តវិកល។ គិតត្រឹមដើមខែមេសា ឆ្នាំ២០២៤ អង្គការចិត្តសង្គមអន្តរវប្បធម៌ ឬ TPO បានរកឃើញអ្នកជំងឺផ្លូវចិត្តជាង១៣០ នាក់ត្រូវបានក្រុមគ្រួសាររបស់ពួកគេចាក់ច្រវាក់ជាប់ជើង។ ក្នុងចំណោមអ្នកជំងឺទាំងនោះ មានបុរស ៨០ នាក់ និងស្ត្រី ៥៣ នាក់។ ជើងរបស់ពួកគេត្រូវចាក់ដោយច្រវាក់ដែកភ្ជាប់នឹងរបង ឬសសរផ្ទះដើម្បីបង្ខាំងមិនឱ្យទៅរំខានអ្នកស្រុក ជាពិសេសនៅពេលជំងឺវិកលរើឡើង។ លោក ស៊ាង លាប អ្នកផ្តល់ប្រឹក្សាផ្នែកផ្លូវចិត្ត និងអ្នកសម្របសម្រួលគម្រោងនៃអង្គការ TPO បានប្រាប់ទូរទស្សន៍អប្សរាថា ការដាក់ច្រវាក់ជាទារុណកម្មដែលធ្វើឲ្យអ្នកជំងឺផ្លូវចិត្តរងគ្រោះពីរត្រួត។  «ការចង់បង្ខាំងអ្នកជំងឺទុកចោលនេះ គឺទាមទារឱ្យមានការជួយ ដើម្បីធ្វើឱ្យគាត់ បានធូស្បើយ ហើយមានសេរីភាព ហើយចូលមករួមរស់មកជុំគ្រួសារ។ ប្រសិនជាមិនមានការជួយទេ ពួកគាត់ ត្រូវបានបង្ខំាំងរហូតទៅដល់ថ្ងៃស្លាប់»។ សម្រាប់ក្រុមគ្រួសារឬអាណាព្យាបាលរបស់អ្នកជំងឺផ្លូវចិត្តវិញ និយាយថា ទារុណកម្មនេះជាការបង្ខំចិត្តត្បិតគ្មានជម្រើស។ ស្ត្រីជាម្តាយវ័យ៧០ឆ្នាំ រស់នៅខេត្តព្រៃវែង បានចាក់ច្រាវាក់ជើងកូនប្រុសរបស់គាត់អស់ពេលជាង២០ឆ្នាំ។ ដោយសុំមិនបញ្ចេញឈ្មោះ លោកយាយលើកឡើងថា ប្រសិនបើលោកយាយមិនធ្វើបែបនេះទេ កូនប្រុសរបស់លោកយាយអាចដើររំខានគេ។ នៅបាត់ដំបងឯណោះវិញ អាណាព្យាបាលម្នាក់ ដាក់ច្រវាក់កូនស្រីដែលមានជំងឺផ្លូវចិត្ត១៩ឆ្នាំមកហើយ។ អ្នកស្រីថា ខ្លាចនាងលួចចេញក្រៅផ្ទះ និងរងការរំលោភបំពាន។ លើសពីការបាត់បង់សេរីភាព…