ប្រជាពលរដ្ឋដែលបានទទួលការចាក់វ៉ាក់សាំងក្នុងរយៈពេល២៤ម៉ោងកន្លងមកនេះមានចំនួន៧ម៉ឺន៣ពាន់៥១៥ នាក់។

វ៉ាក់សាំងការពារជំងឺកូវីដ-១៩ ប្រភេទវ៉ាក់សាំងស៊ីណូវ៉ាក់ ចំនួន ៣លានដូសទៀត ដែលជាវ៉ាក់សាំងបញ្ជាទិញពី រដ្ឋាភិបាលចិននឹងដឹកមកដល់កម្ពុជានៅថ្ងៃអង្គារស្អែកនេះ។

រដ្ឋលេខាធិការក្រសួងសុខាភិបាលបានថ្លែងបង្ហាញក្តីព្រួយបារម្ភក្រោយពីការហក់ឡើងនូវចំនួនអ្នកឆ្លងជំងឺកូវីដ ១៩ឡើងវិញនាពេលនេះ។ តួលេខឆ្លងក្នុងប្រទេសកម្ពុជា បានហក់ឡើងខ្ពស់ក្នុងរយៈពេល៤ថ្ងៃជាប់គ្នាមកនេះ ដែលការឆ្លងជាង៣ពាន់ករណី រវាងពីថ្ងៃទី២៤កញ្ញាដល់២៧កញ្ញា ត្រូវគេឃើញថាដោយសារតែពិធីជួបជុំគ្នាក្នុង ការកាន់បិណ្ឌរយៈពេល២ថ្ងៃដំបូង ដោយបានឆ្លងខ្លាំងលើព្រះសង្ឃនិងពុទ្ធបរិស័ទតាមទីវត្តអារាម។

ការឆ្លងជំងឺកូវីដ១៩ក្នុងប្រទេសកម្ពុជាមានចំនួន៨៣៩ករណី ដែលស្ថិតនៅក្នុងខ្ទង់ជាង៨០០ករណីរយ:ពេល៤ ថ្ងៃជាប់ៗគ្នាមកនេះ។ ការឆ្លងជាង៨០០ករណីថ្ងៃនេះទៀត បាននាំឲ្យតួលេខឆ្លងក្នុងសហគមន៍ បានកើនឡើង លើស៩ម៉ឺនករណីហើយនៅពេលនេះ។

កម្ពុជាបានប្រកាសផ្ដល់វ៉ាក់សាំងស៊ីណូវ៉ាក់២០ម៉ឺនដូស ជួនដល់រដ្ឋាភិបាលឡាវដើម្បីការបង្កាការឆ្លងកូវីដ១៩។ ប្រធានគណៈកម្មការចំពោះកិច្ចចាក់វ៉ាក់សាំងកូវីដ១៩ ក្របខ័ណ្ឌទូទាំងប្រទេស លោកស្រី ឳ វណ្ណឌី​ន បានថ្លែង នៅថ្ងៃនេះថា វ៉ាក់សាំងទាំង២០ម៉ឺនដូសនោះ នឹងត្រូវផ្តល់ទៅប្រទេសឡាវវេលាថ្ងៃទី២៨កញ្ញាស្អែកនេះក្នុងពិធី

ប្រធានគណបក្សកាន់អំណាចនៃប្រទេសទាំង៣កម្ពុជា, វៀតណាមនិងឡាវ បានជួបគ្នានិងបានជួនដំណឹងទៅ វិញទៅមកអំពីសភាពការណ៍ក្នុងប្រទេសរៀងៗខ្លួនដើម្បីរក្សានូវគោលដៅសន្តិភាពនិងកិច្ចសហប្រតិបត្តិការ។ ជំនួបរវាងប្រធានគណបក្សប្រជាជនកម្ពុជាសម្តេចតេជោហ៊ុនសែន, អគ្គលេខាបក្សកុម្មុយនីស្តវៀតណាម លោក ង្វៀងភូជុង និងអគ្គលេខាបក្សប្រជាជនបដិវត្តន៍ឡាវ លោកថងលូន ស៊ីស៊ូលីត បានជួបគ្នាកាលពីថ្ងៃទី២៦កញ្ញា ឆ្នាំ២០២១នៅក្នុងរដ្ឋធានីហាណូយនៃប្រទេសវៀតណាម។

គម្រោងការពារទឹកជំនន់ក្នុងក្រុងភ្នំពេញជំហានទី៤ តម្លៃ៣៦លានដុល្លារ ត្រូវបានបញ្ចប់ការសាងសង់ រួចរាល់ ហើយ ។អង្គការ JICA របស់ជប៉ុនបានបញ្ជាក់ការបញ្ចប់ការសាងសង់ដោយជោគជ័យនេះ កាលពីថ្ងៃទី២៣ កញ្ញា។

សំណង់អគារកម្ពស់៦ជាន់នៃវិទ្យាស្ថានជាតិអប់រំថ្មី បានចាប់ផ្តើមដំណើរការសាងសង់ហើយ។ ពិធីក្រុងពាលី បញ្ចុះបឋមសិលា បានប្រព្រឹត្តទៅកាលពីថ្ងៃទី២៣កញ្ញា ស្ថិតក្នុងបរិវេណវិទ្យាស្ថានជាតិអប់រំក្នុងរាជធានីភ្នំពេញ ក្រោមអធិបតីភាពបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា។

ក្រសួងពាណិជ្ជកម្មបានថ្លែងថាការនាំចេញនូវទំនិញសំខាន់ៗរបស់កម្ពុជាក្នុងរយៈពេល៨ខែដើមឆ្នាំនេះ បាន ធ្លាក់ចុះជាង៥ភាគរយ បើប្រៀបធៀបនឹងរយៈពេលដូចគ្នាឆ្នាំ២០២០។

ក្មេងស្រីវ័យជំទង់ ២នាក់ បានបាត់បង់ជីវិតដោយសារលង់ទឹកពេលកំពុងជិះទូកដើម្បីដកព្រលិតក្នុងបឹងមួយ កន្លែងក្នុងស្រុកចិត្របុរីនៃខេត្តក្រចេះ ។ ហេតុការណ៍បានកើតឡើងនៅព្រឹកថ្ងៃទី២៤ កញ្ញានេះ ស្ថិតនៅបឹង ក្នុងភូមិ១០៥, ឃុំថ្មី ស្រុកចិត្របុរី ខេត្តក្រចេះ ។