ប្រទេសអាស៊ានទាំង១០ក្នុងរយៈពេល២៤ម៉ោងចុងក្រោយនេះ ការឆ្លងកូវីដ១៩ថ្មី មានចំនួន២ម៉ឺន៣ពាន់ ៦៥៨ករណី និងការស្លាប់ថ្មីមានចំនួន៤៧៦នាក់។ កម្ពុជាក្នុងរយៈពេល២៤ម៉ោងចុងក្រោយនេះ មានការឆ្លងថ្មី សរុបចំនួន៦៩៣ករណី ក្នុងនោះ៦៦០ករណីជាការឆ្លងក្នុងសហគមន៍, និង៣៣ករណីទៀតជាការនាំចូលពីក្រៅ ប្រទេស។

ការឆ្លងចូលក្នុងសហគមន៍នៅថ្ងៃទី១៦មិថុនានេះបានកើនឡើងចំនួន២០៩ករណីបើប្រៀបធៀបនឹងម្សិលមិញ។ ការឆ្លងចូលក្នុងសហគមន៍កាលពីថ្ងៃអង្គារមានចំនួន៤៥១ករណី ចំណែកការឆ្លងក្នុងសហគមន៍នៅថ្ងៃពុធនេះ មានចំនួន៦៦០ករណី។ ចំនួនមនុស្សដែលបានឆ្លងក្នុងព្រឹត្តិការណ៍សហគមន៍២០កុម្ភៈ បានកើនឡើងដល់ ៣ម៉ឺន៨ពាន់៦៧១នាក់ហើយ។

កិច្ចប្រជុំរដ្ឋមន្ដ្រីការពារជាតិអាស៊ាន-បូក លើកទី៨ បានប្រព្រឹត្តទៅនៅថ្ងៃនេះដោយមានការចូលរួមថ្លែងអន្តរាគមន៍ពីសម្តេចពិជ័យសេនា ទៀ បាញ់ ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិកម្ពុជាផងដែរ។ កិច្ចប្រជុំ រដ្ឋមន្ត្រីការពារជាតិអាស៊ាន-បូក គឺជាវេទិការបស់អាស៊ានជាមួយនឹងប្រទេសដៃគូសន្ទនា៨ប្រទេសរួមមាន អូស្ត្រា លី, ចិន, ឥណ្ឌា, ជប៉ុន, នូវ៉ែលហ្សេឡង់, កូរេខាងត្បូង, រុស្ស៊ីនិងសហរដ្ឋអាមេរិក។

រដ្ឋមន្ត្រីក្រសួងការពារជាតិកម្ពុជាសម្តេចពិជ័យសេនា ទៀ បាញ់ បានថ្លែងចូលរួមអបអរសាទរជាមួយនឹងរដ្ឋមន្ត្រី ការពារជាតិអាស៊ានទាំង១០ប្រទេស ក្នុងកិច្ចប្រជុំក្រៅផ្លូវការរដ្ឋមន្ត្រីការពារជាតិអាស៊ាន-ចិន ដែលបានរៀបចំធ្វើ តាមប្រព័ន្ធវីដេអូ Conference នៅថ្ងៃទី១៥មិថុនា។

បេក្ខជនដែលត្រូវជ្រើសរើសជាប្រធានគណៈកម្មាធិការជាតិរៀបចំការបោះឆ្នោត ត្រូវបានកំណត់ហើយគឺលោក ប្រាជ្ញច័ន្ទ។ លោកប្រាជ្ញច័ន្ទដែលជាអតីតអភិបាលខេត្តបាត់ដំបងនិងជាសមាជិករដ្ឋសភានិងជាប្រធានគណៈកម្មការទី១ បានដាក់ពាក្យលាលែងពីតំណែងជាប្រធានគណៈកម្មការទី១ និងពីសមាជិករដ្ឋសភានៅថ្ងៃទី១៦មិថុនា នេះ។

+មាតិកាព័ត៌មានសំខាន់ៗសម្រាប់ថ្ងៃនេះរួមមាន៖ ១. រដ្ឋមន្ត្រីក្រសួងការពារជាតិកម្ពុជាចូលរួមអបអរសាទរខួបលើកទី៣០នៃទំនាក់ទំនងសន្ទនាអាស៊ាន-ចិន ២. លោកប្រាជ្ញច័ន្ទត្រូវបានជ្រើសរើសជាបេក្ខជនប្រធានគជប

គ្រោះថ្នាក់ចរាចរណ៍ទូទាំងប្រទេសនៅថ្ងៃទី១៥មិថុនានេះ មានមនុស្សម្នាក់ស្លាប់និង២នាក់រងរបួស។ សេចក្តីរាយការណ៍ទិន្នន័យគ្រោះថ្នាក់ចរាចរណ៍ផ្លូវគោកទូទាំងប្រទេស បានបញ្ជាក់ថា គ្រោះថ្នាក់ដែលបង្កឲ្យមាន មនុស្សស្លាប់ និងរបួសសរុប០៣នាក់នៅថ្ងៃនេះ គឺកើតឡើងដោយសារហេតុការណ៍ប៉ះទង្គិច ចំនួន ០២លើក។

អ្នកដែលដែលធ្លាប់បានទៅហាងកាហ្វេស៊ីក្លូ ទួលទំពូង ត្រូវប្រញាប់ធ្វើចត្តាឡីស័ក និងតាមដានសុខភាព។ ហាងកាហ្វេស៊ីក្លូ សាខាទួលទំពូង មានទីតាំងស្ថិតនៅផ្លូវលេខ១៥៥កែង២៣៦ ក្នុងសង្កាត់ទួលទំពូង នៃខណ្ឌ បឹងកេងកង។

អ្នកដែលដែលធ្លាប់បានទៅធនាគារ Shinhan Bank ត្រូវប្រញាប់ធ្វើចត្តាឡីស័ក និងតាមដានសុខភាព។ ធនាគារ Shinhan Bank មានទីតាំងស្ថិតនៅផ្លូវ២១៧, សង្កាត់ស្ទឹងមានជ័យ១ ក្នុងខណ្ឌមានជ័យ។

ត្រីផ្សោតមួយក្បាលទម្ងន់ជិត២០០គីឡូក្រាម ត្រូវគេឃើញស្លាប់អណ្តែតទឹក នៅកណ្តាលដងទន្លេមេគង្គ សង្ស័យមានការប្រើឧបករណ៍នេសាទល្មើសច្បាប់ដែលធ្វើឲ្យត្រីពូជកំរនោះ បានស្លាប់។ សពត្រីផ្សោតនេះ ត្រូវគេប្រទះ ឃើញវេលាទាបភ្លឺ ថ្ងៃទី១៤មិថុនា នៅក្នុងភូមិសាស្ត្រភូមិអន្លង់ស្វាយ ឃុំព្រះរំកិល ក្នុងស្រុកបុរីអូរស្វាយសែនជ័យ ខេត្តស្ទឹងត្រែង។