ក្រសួងធនធានទឹក បានដាស់តឿនប្រជាពលរដ្ឋប្រុងប្រយ័ត្នបាតុភូតThunderstorm ដែលរួមមានផ្គរ រន្ទះ និង ខ្យល់កន្ត្រាក់ក្នុងមួយសប្តាហ៍ទៅមុខទៀតនេះទន្ទឹមនឹងកម្ពុជាបន្តរងឥទ្ធិពលខ្យល់មូសុងនីរតីក្នុងកម្រិតពីមធ្យម ទៅបង្គួរ។

ខេត្តចំនួន៥នៅភាគនិរតីប្រទេស បានទទួលអំណោយជាថេបប្លេត និងបរិក្ខាពេទ្យពីសម្ដេចតេជោ ហ៊ុន សែន ដើម្បីត្រៀមចាក់វ៉ាក់សាំងនៅក្នុងខេត្ត។ គណៈកម្មការចំពោះកិច្ចចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេស នៅព្រឹកថ្ងៃទី១៥មិថុនា ឆ្នាំ២០២១ បានប្រគល់អំណោយ«ថេបប្លេត»របស់សម្តេចតេជោ ហ៊ុន សែន និង សំភារៈបរិក្ខាពេទ្យមួយចំនួនទៀត ជូនដល់ក្រុមគ្រូពេទ្យចាក់វ៉ាក់សាំងក្នុងខេត្ត ចំនួន៥ រួមមាន ខេត្តកែប កំពត, តាកែវ, ព្រះសីហនុ និងខេត្តកោះកុង។

ទួលបុរាណមួយកន្លែងក្នុងស្រុកអង្គរធំខេត្តសៀមរាប ត្រូវគេរាយការណ៍ជុំវិញការ រងការទន្រ្ទានដីដោយ ប្រជាពលរដ្ឋយកធ្វើជាកម្មសិទ្ធដំាដំឡូង។ អំពើទន្ទ្រានទួលបុរាណ ត្រូវគេចាត់ទុកជាអំពើខុសច្បាប់ដែលបំផ្លាញ សម្បត្តិវប្បធម៌ជាតិ។

សហព័ន្ធកីឡាការ៉ាតេកម្ពុជា គ្រោងរៀបចំការប្រកួតកីឡាការ៉ាតេជ្រើសរើសជើងឯកអាស៊ីអាគ្នេយ៍ ឆ្នាំ២០២២ ដើម្បីជាការវាស់ស្ទង់កម្រិតបច្ចេកទេសត្រៀមឆ្ពោះទទួលធ្វើម្ចាស់ផ្ទះ ស៊ីហ្គេម លើកទី៣២ ឆ្នាំ២០២៣។ ការប្រកួតកីឡាការ៉ាតេជ្រើសរើសជើងឯកអាស៊ីអាគ្នេយ៍ ឆ្នាំ២០២២ គឺជាសំណើរបស់ក្រសួងអប់រំ យុវជន និង កីឡា ដែលបានទទួលការយល់ព្រមពីប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន។

សមត្ថកិច្ចរាជធានី បានបង្ក្រាបទីតាំងខារ៉ាអូខេ២កន្លែងផ្សេងគ្នា កាលពីយប់ថ្ងៃទី១៤មិថុនាដែលជាការបំពាន លើវិធានការណ៍សុខាភិបាល។ ការបង្ក្រាបនេះ បានធ្វើក្នុងខណ្ឌពោធិ៍សែនជ័យ ដែលជាខណ្ឌមួយត្រូវគេជូន ដំណឹងការប្រុងប្រយ័ត្នបង្កាការឆ្លងក្នុងចំណោមបណ្តាខណ្ឌមួយចំនួនទៀតក្នុងរាជធានីភ្នំពេញ។

សាកលវិទ្យាល័យជាតិគ្រប់គ្រងរបស់កម្ពុជា បានជាប់ចំណាត់ថ្នាក់ក្នុងលំដាប់សកលវិទ្យាល័យឆ្នើមទាំង៥០ ក្នុងពិភពលោកប្រចាំឆ្នាំ២០២១។ ក្រសួងអប់រំ នៅថ្ងៃទី១៥មិថុនាឆ្នាំ២០២១ បានឲ្យដឹងថា គណៈកម្មការសម្ព័ន្ធ សកលវិទ្យាល័យពិភពលោកដែលជាអ្នករៀបចំការវាយតម្លៃប្រចាំឆ្នាំនៃចំណាត់ថ្នាក់សាកលវិទ្យាល័យកម្រិត ពិភពលោក The World’s Universities Ranking with Real Impact 2021 បានប្រកាសផ្តល់ចំណាត់ថា្នក់សាកល វិទ្យាល័យជាតិគ្រប់គ្រងរបស់ប្រទេសកម្ពុជាចូលក្នុងលំដាប់៥០ Top 50 University Ranking លើកម្មវិធីសិក្សា ៣ ប្រភេទដែលសម្រេចបាននូវនវានុវត្តឆ្នើម។

ខេត្តមណ្ឌលគិរីរកឃើញអ្នកឆ្លងជំងឺកូវីដ-១៩ថ្មីចំនួន១០នាក់ ក្នុងរយៈពេល២៤ម៉ោងចុងក្រោយដែលជាតួលេខ ថយចុះម្នាក់បើប្រៀបធៀបនឹងម្សិលមិញ។ យោងតាម រដ្ឋបាលខេត្ត អ្នកឆ្លងថ្មីទាំង១០នាក់នោះ គឺជាប្រជាពល រដ្ឋរស់នៅក្នុងក្រុងសែនមនោរម្យ។ ខេត្តមណ្ឌលគិរីមានអ្នកស្លាប់ដោយសារជំងឺកូវីដ-១៩ចំនួន២នាក់ហើយ។

ខេត្តកំពតក្នុងរយៈពេល ២៤ម៉ោងចុងក្រោយនេះ មានអ្នកឆ្លងកូវីដថ្មីចំនួន ២៩នាក់ ដែលជាតួលេខថយ ចុះ ៥២នាក់បើប្រៀបធៀបនឹងម្សិលម៉ិញ។ ខេត្តកំពតកាលពីម្សិលម៉ិញបានរកឃើញអ្នកឆ្លងកូវីដ១៩ចំនួន ៨១នាក់ ។

ខេត្តកោះកុង បានរកឃើញអ្នកឆ្លងកូវីដថ្មីចំនួន១៦១នាក់ ក្នុងរយៈពេល២៤ម៉ោងចុងក្រោយ ដែលជាតួលេខឆ្លងខ្ពស់ និងច្រើនជាងពីម្សិលមិញដល់១៤៩នាក់។ កាលពីថ្ងៃទី១៤មិថុនាម្សិលមិញ ខេត្តកោះកុងមានការឆ្លងថ្មីតែ ចំនួន១២នាក់នោះទេ។

ខេត្តព្រះវិហារបានរកឃើញអ្នកឆ្លងជម្ងឺកូវីដថ្មីចំនួន៥នាក់ ក្នុងរយៈពេល២៤ម៉ោងចុងក្រោយនេះ។ យោងតាម រដ្ឋបាលខេត្ត អ្នកឆ្លងថ្មីទំាង៥ គឺជាមនុស្សរស់នៅភូមិស្រអែមខាងជើង, ឃុំស្រអែម នៃស្រុកជាំក្សាន្ត។ ខេត្តព្រះវិហារ គិតត្រឹមថ្ងៃទី១៥មិថុនា មានអ្នកវិជ្ជមានកូវិដ១៩ សរុបចំនួន ៣៣នាក់ និងមានអ្នកជាសះស្បើយ ចំនួន៨នាក់។