យុទ្ធនាការសម្រុកចាក់វ៉ាក់សាំង បានកើនដល់៣០ភាគរយហើយនៃចំនួនចាក់១០លាននាក់ទូទាំងប្រទេស។ យោងតាមរបាយការណ៍របស់ក្រសួងសុខាភិបាល គិតត្រឹមថ្ងៃទី១៤មិថុនាឆ្នាំ២០២១ ការចាក់វ៉ាក់សាំងជូនប្រជា ពលរដ្ឋបានចំនួន៣លាន២៦៤នាក់ ក្នុងនោះអ្នកបានចាក់វ៉ាក់សាំងដូសទី២រួច មានចំនួន២លាន៥សែន៣ម៉ឺន ៧ពាន់២៧៤នាក់។

ខេត្តកណ្តាល បានបន្តជម្រុញយុទ្ធនាការចាក់វ៉ាក់សាំងបង្កាកូវីដ១៩ លើប្រជាពលរដ្ឋនៅទូទាំងខេត្ត ដែលគិត រហូតមកទល់នឹងពេលនេះ ចំនួនមនុស្សដែលបានទទួលការចាក់វ៉ាក់សាំងបានកើនដល់ជាង១៦ម៉ឺននាក់ហើយ។

គណបក្សប្រជាជនកម្ពុជានឹងត្រូវសម្រេចជ្រើសរើសបេក្ខជនមួយ ក្នុងចំណោមបេក្ខជន២រូប ដែលគណៈកម្មាធិការអចិន្រ្តៃយ៍រដ្ឋសភា បានអនុម័តជាបេក្ខជនឈរឈ្មោះប្រធានគណៈកម្មាធិការជាតិរៀបចំការបោះឆ្នោត។ គណបក្សប្រជាជនកម្ពុជា គឺជាគណបក្សធ្លាប់បានតែងតាំងលោក ស៊ិក ប៊ុនហុក កន្លងមក។

រដ្ឋមន្ត្រីការពារជាតិអាស៊ានទាំង១០ រវាងពីថ្ងៃទី១៥និង១៦មិថុនានេះ នឹងជាប់រវល់ជាបន្តបន្ទាប់ក្នុងកម្មវិធីប្រជុំ ថ្នាក់រដ្ឋមន្ត្រីការពារជាតិអាស៊ានលើកទី១៥, កិច្ចប្រជុំរដ្ឋមន្ត្រីការពារជាតិអាស៊ាន-បូក លើកទី ៨ និងកិច្ចប្រជុំ ក្រៅផ្លូវការរដ្ឋមន្ត្រីការពារជាតិអាស៊ាន-ចិន។

គ្រោះថ្នាក់ចរាចរណ៍នៅថ្ងៃទី១៤មិថុនាឆ្នាំ២០២១នេះ បានបណ្តាលអោយមានមនុស្សស្លាប់០៤នាក់ និងបានបង្កឲ្យមានអ្នករងរបួសធ្ងន់ និងស្រាល០៧នាក់ ។ សេចក្តីរាយការណ៍ទិន្នន័យគ្រោះថ្នាក់ចរាចរណ៍ផ្លូវគោកទូទាំង ប្រទេស បានបញ្ជាក់ថា គ្រោះថ្នាក់ដែលបង្កឲ្យមានមនុស្សស្លាប់ និងរបួសសរុប១១នាក់នៅថ្ងៃនេះ គឺកើតឡើង ដោយសារហេតុការណ៍ប៉ះទង្គិចចំនួន៨លើក។

ខេត្តកោះកុង បានផ្អាកការធ្វើចរាចរណ៍បណ្តោះអាសន្នសិនលើកំណាត់ផ្លូវជាតិលេខ៤៨ ក្នុងឃុំប៉ាក់ខ្លង ស្រុកមណ្ឌលសីមា ដោយសារទឹកអូរបានហូរច្រោះខាងក្រោមផ្លូវ។ មន្ទីរសាធារណការ និងដឹកជញ្ជូន ខេត្ត នៅថ្ងៃទី១៤មិថុនាឆ្នាំ២០២១ បានឲ្យដឹងថា កំណាត់ផ្លូវជាតិលេខ៤៨ ត្រង់គីឡូម៉ែត្រលេខ១៥៤ និង១៥៥ ស្ថិតនៅភូមិនាងកុក ឃុំប៉ាក់ខ្លង ក្នុងស្រុកមណ្ឌលសីមា មានជំនន់ទឹកភ្លៀងបានហូរច្រោះដាច់ផ្លូវ ដែលតម្រូវការ បិទការធ្វើចរាចរណ៍បណ្តោះអាសន្នសិននៅចំណុចនោះ។

ក្រុមជម្រើសជាតិប្រណាំងកង់កម្ពុជា បានធ្វើដំណើរទៅដល់ប្រទេសបារាំងហើយ ដើម្បីបន្តការហ្វឹកហាត់បង្កើន បច្ចេកទេសបន្ថែម។ ក្រុមជម្រើសជាតិកីឡាទោចក្រយានចំនួន៣នាក់គឺ កីឡាករ គឹម ចាន់ធូ, សាន ណាម៉ា ,កីឡាករសាន ណាម៉ាវ និងគ្រូបង្វឹកម្នាក់ គឺលោក ខ្លូត ករណី បានចាកចេញពីកម្ពុជាកាលពីល្ងាចថ្ងៃទី១២មិថុនា ឆ្នាំ២០២១ ដើម្បីការហ្វឹកហាត់បង្កើនគុណភាពបច្ចេកទេសនៅប្រទេសបារាំងរយៈពេល៣ខែ។ នេះជាឱកាសជា លើកដំបូង ដែលក្រុមជម្រើសជាតិកង់កម្ពុជាបានទៅហ្វឹកហាត់បង្កើនបច្ចេកទេសនៅតំបន់អឺរ៉ុប ដោយសារតែការ ជួយជ្រោមជ្រែង និងទទួលបានការឧបត្ថម្ភទាំងស្រុងពីប្រធានសមាគមកីឡាប្រណាំងកង់កម្ពុ ជា លោកស្រី ប៉ែន ស្រីមុំ ដែលមានទីស្នាក់ការនៅប្រទេសបារាំង។

បុរសម្នាក់ដែលសម្លាប់ភរិយាដោយការកាប់ដៃជើងច្រកក្នុងវ៉ាលីសនិងបានដឹកយកទៅបោះចោលក្នុងទន្លេមួយ កន្លែងក្នុងខេត្តត្បូងឃ្មុំ ត្រូវបានអាជ្ញាធរចាប់ខ្លួននិងបញ្ជួនទៅតុលាការនៅថ្ងៃនេះ។ សាកសព ស្ត្រីអាយុ៥៤ឆ្នាំ ឈ្មោះគង់ វុទ្ធី ដែលត្រូវគេកាប់ចិញ្ច្រាំជាកង់ៗដាក់ក្នុងវ៉ាលីស ត្រូវគេប្រទះឃើញបោះចោលនៅក្នុងទន្លេ ក្រោយ វិហារឥស្លាម ភូមិព្រែកតូច ឃុំជីរោទ៍ នៃស្រុកត្បូងឃ្មុំ កាលពីថ្ងៃទី១១មិថុនា។

មន្ត្រីក្រុមប្រឹក្សាឃុំព្រែកសាម៉ាន់ក្នុងស្រុកឆ្លូងខេត្តក្រចេះ បានរងការចោទពីពលរដ្ឋជាច្រើនក្នុងសហគមន៍ ពីបទរំលោភយកដីទីទួលកប់ខ្មោចរបស់អ្នកភូមិ ធ្វើជាកម្មសិទ្ធផ្ទាល់ខ្លួន។ ភាពវិវាទនេះ ត្រូវគេរាយការណ៍ថា បានកើតឡើងប្រមាណជិត២ឆ្នាំមកហើយ ប៉ុន្តែការដោះស្រាយរកយុត្តិធម៌ នៅមានភាពយឺតយ៉ាវ ដែលញ៉ាំង ឲ្យអ្នកស្រុកមានក្តីមន្ទិលសង្ស័យ។ សេចក្តីរាយការណ៍ដកស្រង់សម្តីប្រជាពលរដ្ឋក្នុងឃុំព្រៃសាម៉ាន់ សូមជួយ ជម្រុញការដោះស្រាយនោះ ដោយគតិយុត្តិ។

អតីតអ្នកតំណាងរាស្ត្រម្នាក់នៃគណបក្សប្រឆាំង ដែលធ្លាប់រត់ចោលស្រុកដោយសារសម្តីពាក់ព័ន្ធ បរិហាកេរ្តិ៍លើ សម្តេចតេជោហ៊ុនសែន ត្រូវបានព្រះរាជក្រឹត្យត្រាស់បង្គាប់ជារដ្ឋលេខាធិការក្រសួងទំនាក់ទំនងជាមួយរដ្ឋសភា, ព្រឹទ្ធសភានិងអធិការកិច្ច។