ក្រុងតាខ្មៅនិងបណ្តាស្រុកនានាទូទាំងខេត្តកណ្តាលនឹងត្រូវចាប់ផ្តើមទទួលការចាក់វ៉ាក់សាំងបង្កាកូវីដ១៩ ហើយនៅទន្ទឹមនឹងការចាក់រួមគ្នាក្នុងខណ្ឌចំនួន៣ចុងក្រោយរបស់រាជធានីភ្នំពេញ។

ការឆ្លងចូលក្នុងសហគមន៍នៅថ្ងៃទី៩មិថុនានេះបានកើនឡើងចំនួន៤២ករណីបើប្រៀបធៀបនឹងម្សិលមិញ។ យោងតាមក្រសួងសុខាភិបាល ការឆ្លងចូលក្នុងសហគមន៍ថ្ងៃនេះមានចំនួន៦៧១ករណី, ចំណែកការឆ្លងចួល កាលពីថ្ងៃអង្គារ៍ម្សិលមិញ មានចំនួន៦២៩ករណី។ ចំនួនមនុស្សដែលបានឆ្លងក្នុងព្រឹត្តិការណ៍សហគមន៍ ២០កុម្ភៈ ក្នុងរយៈពេល១០៩ថ្ងៃមកនេះ បានកើនឡើងដល់៣ម៉ឺន៥ពាន់៣៨នាក់ហើយ។

សម្តេចពិជ័យសេនា ទៀ បាញ់ បានថ្លែងនៅថ្ងៃទី៩មិថុនា បញ្ជាក់ជុំវិញការរៀបចំដំណើរមួយទៅកាន់មូលដ្ឋាន សមុទ្ទរាមតាមសំណើរបស់ស្ថានទូតអាមេរិកក្រោយមានការចោទប្រកាន់និងការសង្ស័យដដែលៗជុំវិញការ ប្រើប្រាស់មូលដ្ឋានទ័ពជើងទឹករាមក្នុងទឹកដីកម្ពុជាជាមូលដ្ឋានយោធាកងទ័ពចិន។

តំណក់ប្រេងដំបូងរបស់កម្ពុជាត្រូវបានយកទៅរក្សាតំកល់ទុកនៅវិមានឈ្នះឈ្នះរួចហើយនៅព្រឹកថ្ងៃពុធនេះ។ ពិធីប្រគល់និងទទួលតំណក់ប្រេងដែលផ្ទុកក្នុងកែវ បានធ្វើឡើងនៅព្រឹកថ្ងៃទី ៩ ខែមិថុនា ឆ្នាំ២០២១នេះ ក្រោមអធិបតីភាពសម្តេចពិជ័យសេនា ទៀ បាញ់ ដែលជាប្រធានគណៈកម្មការសាងសង់វិមានឈ្នះឈ្នះនិងរដ្ឋមន្ត្រីក្រ សួងរ៉ែនិងឋាមពល លោកស៊ុយ សែម។

សម្តេចនាយករដ្ឋមន្ត្រី បានដាក់បញ្ជាឲ្យលុបចោលវិញការបោះឆ្នោតសាកល្បងជ្រើសរើសក្រុមប្រឹក្សាឃុំនិង សង្កាត់ដែលគ្រោងរៀបចំនៅថ្ងៃទី២០មិថុនាខាងមុខនេះ និងការលុបចោលការគ្រោងហ្វឹកហាត់ប្រមូលពលរដ្ឋ ដែលត្រៀមក្នុងវគ្គបណ្តុះបណ្តាលចាប់ផ្តើមពីថ្ងៃស្អែកនេះផងដែរ។ សម្តេចនាយករដ្ឋមន្ត្រី ហ៊ុន សែន ក្នុងសារសម្លេងមួយ នារសៀលថ្ងៃទី៩មិថុនា នេះ បានដាក់បញ្ជាការលុបចោលវិញនូវការបោះឆ្នោតសាកល្បងនេះ ដោយសារតែកម្ពុជាកំពុងតែប្រឈមនឹងជម្ងឺកូវីដ១៩ និងការបោះឆ្នោតសាកល្បងទាំងថ្ងៃទី២០មិថុនា និងការ ត្រៀមហ្វឹកហ្វឺនចាប់ពីថ្ងៃស្អែកនេះទៅ ក៏មិនត្រូវធ្វើផងដែរ។ សម្តេចនាយករដ្ឋមន្ត្រីបានថ្លែងថារាជរដ្ឋាភិបាលគោរពចំពោះឯករាជ្យភាពរបស់គណៈកម្មាធិការជាតិរៀបចំការ បោះឆ្នោតប៉ុន្តែគណៈកម្មាធិការជាតិរៀបចំការបោះឆ្នោតត្រូវតែយល់ជុំវិញកិច្ចការលំបាករបស់អង្គនីតិប្រតិបត្តិ និងអាជ្ញាធរគ្រប់លំដាប់ថ្នាក់ និងការលំបាករ​បស់ប្រជាពលរដ្ឋដែលកំពុងរងការវាយលុកពីសំណាក់ជម្ងឺរាតត្បាត កូវីដ១៩ចំពោះមុខនាពេលនេះផងដែរ។

តុលាការបានបដិសេធសំណើសុំនៅក្រៅឃុំរបស់លោករ៉ុងឈុន និងសម្រេចបន្តឃុំខ្លួនជាមួយការបញ្ជាក់ពី ចៅក្រមនៅថ្ងៃនេះថាតុលាការចាំបាច់នៅបន្តចំណាត់ការនីតិវិធីនេះ។ សវនាការស្នើសុំនៅក្រៅឃុំត្រូវបានបញ្ចប់ នៅម៉ោងប្រមាណ១១ព្រឹកថ្ងៃទី៨មិថុនានេះ ដោយចៅក្រមជំនុំជម្រះ លោក លិ សុខា បានប្រកាសម្រេចថា មិន អនុញ្ញាតឲ្យជនត្រូវចោទ រ៉ុង ឈុន បាននៅក្រៅឃុំនោះទេ។

អាជ្ញាធរក្នុងរាជធានីភ្នំពេញ បានចាប់ផ្តើមបញ្ជាការរុះរើសំណង់អនាធិបតេយ្យបណ្តែតលើទឹកក្នុងដងទន្លេជាបណ្តើរៗហើយទន្ទឹមនឹងឳសានវាទថ្ងៃទី១២មិថុនាកាន់តែកៀកជិតមកដល់នេះ។

សាលាដំបូងរាជធានីភ្នំពេញ បានលើកលែងការចោទប្រកាន់បណ្តឹងប្តឹងលើកញ្ញាមាន ពេជ្ររីតាហើយដែលជា ការបើកផ្លូវមួយវិញដើម្បីការតទល់រកយុត្តិធម៌ជាមួយនឹងឧកញាហេងសៀ។ កញ្ញាមាន ពេជ្ររីតា ដែលបានការពារខ្លួនទប់ទល់នឹងអំពើរំលោភបំពានលើរាងកាយប្រព្រឹត្តដោយលោកឧកញាហេងសៀ ក្នុងហេតុការណ៍មួយ លើរថយន្តចតស្ងៀមតាមផ្លូវថ្នល់ក្នុងរាជធានីកាលពីថ្ងៃទី៤ឧសភា ត្រូវបានឧកញារូបនោះ បានចោទនាង ពីបទ «លួច មានស្ថានភាពទម្ងន់ទោសដោយសារប្រព្រឹត្តអំពើហិង្សា»។ ក្នុងហេតុការណ៍ប៉ុនប៉ងបំពានលើរាងកាយក្នុងរថ យន្តនោះ កញ្ញាមាន ពេជ្ររិតា ធ្លាប់បានបញ្ជាក់ថានាងបានប្រើ កូនកាំបិតចុងស្រួចមួយដើម្បីការពារខ្លួន ប៉ុន្តែ ឧកញារូបនោះ បានប្តឹងចោទថានាងមានគម្រោងប្លន់ទៅវិញ។

ខេត្តព្រះសីហនុ មានការឆ្លងថ្មីថ្ងៃនេះចំនួន៧៩នាក់។ ការឆ្លងក្នុងរយៈពេល២៤ម៉ោងចុងក្រោយ មានតួលេខខ្ពស់ បើប្រៀបធៀបនឹងការឆ្លងម្សិលមិញ។ កាលពីថ្ងៃទី៧មិថុនា ខេត្តព្រះសីហនុមានការឆ្លងថ្មីចំនួន២៨នាក់ ដែល កើនលើសម្សិលមិញចំនួន៥១នាក់។

ខេត្តកោះកុងបានរកឃើញការឆ្លងថ្មីចំនួន៤នាក់នៅថ្ងៃនេះ ដែលកើនឡើងម្នាក់ប្រៀបធៀបនឹងម្សិលមិញ។ កាល ពីថ្ងៃទី៧មិថុនា ខេត្តកោះកុងបានរកឃើញអ្នកឆ្លងថ្មីចំនួន៣នាក់។ យោងតាមរដ្ឋបាលខេត្ត អ្នកថ្មីទាំង៤នាក់គឺ ជា ការឆ្លងចូលក្នុងសហគមន៍ក្នុងស្រុកស្រែអំបិល។ អ្នកឆ្លងទាំង៤នាក់នោះ គឺជាពលរដ្ឋដែលមានអាយុរវាងពី៣៥ ដល់៥៣ឆ្នាំ។