ចំនួនមនុស្សដែលបានចាក់វ៉ាក់សាំងក្នុងប្រទេសកម្ពុជាបានប្រមាណជាង២៧ភាគរយហើយនៅទូទាំងប្រទេស ខណៈបណ្តាប្រទេសមួយចំនួនលើសកលលោក ខ្លះនៅមិនទាន់បាន៥ភាគរយនៃចំនួនប្រជាពលរដ្ឋដែលត្រូវ ចាក់នៅឡើយនោះទេ។

អភិបាលគ្រប់គ្រងខណ្ឌពោធិ៍សែនជ័យដែលជាខណ្ឌឆ្លងកូវីដ១៩ច្រើនជាងគេក្នុងរាជធានី ត្រូវគេរាយការណ៍ ថាបានឆ្លងនឹងជម្ងឺកូវីដ១៩ហើយ។ ខណ្ឌពោធិ៍សែនជ័យ គឺជាខណ្ឌមួយក្នុងចំណោមខណ្ឌទាំង៦ដែលមានតំបន់ ក្រហមដែលជាតំបន់ប្រឈមហានិភ័យខ្ពស់បំផុត។

ឯកអគ្គរដ្ឋទូតសហរដ្ឋអាមេរិកប្រចាំកម្ពុជា បានសន្យាការពង្រឹងនិងការប្តេជ្ញាធ្វើកិច្ចការជាមួយភាគីពាក់ព័ន្ធ កម្ពុជាដើម្បីប្រយុទ្ធប្រឆាំងនឹងអំពើជួញដូរមនុស្ស និងវិស័យមួយចំនួនទៀត។ ការសន្យារបស់ឯកអគ្គរដ្ឋទូតសហរដ្ឋអាមេរិកលោក Patrick Murphy បានធ្វើឡើងក្នុងឳកាសដែលលោកជួបពិភាក្សាការងារជាមួយសម្ដេចក្រឡា ហោម ស ខេង ឧបនាយករដ្ឋមន្ដ្រី និងជារដ្ឋមន្ដ្រីក្រសួងមហាផ្ទៃកាលពីរសៀលថ្ងៃទី៧មិថុនា នៅទីស្ដីការក្រសួង មហាផ្ទៃ។ ក្នុងជំនួបនោះសម្ដេចក្រឡាហោមស ខេង និងឯកអគ្គរដ្ឋទូតអាមេរិក បានធ្វើការកត់សម្គាល់និងវាយ តម្លៃខ្ពស់ចំពោះដំណើរទស្សនកិច្ចរបស់លោកស្រីWendy Sherman អនុរដ្ឋមន្ត្រីក្រសួងការបរទេសអាមេរិក មក កាន់កម្ពុជា កាលពេលថ្មីៗនេះ។ សម្ដេចក្រឡាហោម បានចាត់ទុកដំណើរទស្សនកិច្ចនោះមានសារៈសំខាន់ ដែលនឹងបន្ដពង្រឹង, ពង្រីកកិច្ចសហប្រតិបត្តិការ និងមិត្តភាពរវាងប្រទេសទាំងពីរកាន់តែខ្លាំងក្លាបន្ថែមទៀត។ សម្ដេចក្រឡាហោម បានថ្លែងអំណរគុណ ដល់រដ្ឋាភិបាលសហរដ្ឋអាមេរិក ដែលបាន និងកំពុងបន្ដផ្ដល់ជំនួយ គាំទ្រដល់ការងារប្រយុទ្ធប្រឆាំងជំងឺកូវីដ-១៩។

ប្រទេសអាស៊ានទាំង១០ក្នុងរយៈពេល២៤ម៉ោងចុងក្រោយនេះ ការឆ្លងកូវីដ១៩ថ្មី មានចំនួន២ម៉ឺន២៥០ករណី និងការស្លាប់ថ្មីមានចំនួន៤០៣នាក់។ កម្ពុជាក្នុងរយៈពេល២៤ម៉ោងចុងក្រោយនេះ មានការឆ្លងថ្មីសរុបចំនួន ៦៧៨ករណី ក្នុងនោះ៦២៩ករណីជាការឆ្លងក្នុងសហគមន៍, និង៤៩ករណីទៀតជាការនាំចូលពីក្រៅប្រទេស។

ការឆ្លងចូលក្នុងសហគមន៍ក្នុងរយៈពេល២៤ម៉ោងចុងក្រោយនេះ មានការកើនឡើង៦៧ករណីបើប្រៀបធៀប នឹងម្សិលមិញ។ យោងតាមក្រសួងសុខាភិបាល ការឆ្លងចូលក្នុងសហគមន៍ថ្ងៃនេះ មានចំនួន៦២៩ករណី បើ ប្រៀបធៀបនឹងការឆ្លងកាលពីម្សិលមិញថ្ងៃទី៧មិថុនា មានចំនួនតែ៥៦២ករណីនោះទេ។ ចំនួនមនុស្សដែលបានឆ្លងក្នុងព្រឹត្តិការណ៍សហគមន៍ ២០កុម្ភៈ ក្នុងរយៈពេលជាង១០០ថ្ងៃកន្លងមកនេះ បានកើនឡើងដល់៣ម៉ឺន៤ពាន់៣៦៧នាក់ហើយ។

រដ្ឋាភិបាលចិន បានបញ្ជាក់ការតាំងចិត្តជួយកម្ពុជាក្នុងការបណ្តេញឲ្យអស់នូវវីរុសកូវីដ១៩ ទន្ទឹមនឹងការដឹកជញ្ជូន វ៉ាក់សាំងជំនួយនិងវ៉ាក់សាំងបញ្ជាទិញជាបន្តបន្ទាប់ដើម្បីជួយរាជរដ្ឋាភិបាលកម្ពុជា។ កម្ពុជានិងចិន គឹជាប្រទេស នៃមិត្តភាពដែកថែប។ ស្ថានទូតចិនបានសរសេរនៅថ្ងៃនេះថា «ភាគីចិន តែងយកចិត្ត ទុកដាក់ចំពោះចំណង មិត្ត ភាពដូចបងប្អូន រវាងចិននិងកម្ពុជា» ។

វ៉ាក់សាំងចិនស៊ីណូវ៉ាក់និងស៊ីណូហ្វាម ចំនួនមួយលានដូស បានដឹកមកដល់កម្ពុជានៅថ្ងៃទី៨មិថុនានេះ ដើម្បី បន្តការជម្រុញចាក់លើពលរដ្ឋ តាមគម្រោងយុទ្ធសាស្ត្រផ្ការីកដាក់ចេញដោយប្រមុខរាជរដ្ឋាភិបាល។

ប្រធានព្រឹទ្ធសភាសម្ដេចវិបុលសេនាភក្ដី សាយ ឈុំ បានស្នើឲ្យទូតប្រទេសឆែក ជួយជំរុញការផ្លាស់ប្តូរពាណិជ្ជកម្ម និងការវិនិយោគបន្ថែមមកកាន់ប្រទេសកម្ពុជា។ ប្រសាសន៍ស្នើនិងជម្រុញដើម្បីរកការបង្កើនទំហំពាណិជ្ជ កម្មរវាងប្រទេសកម្ពុជានឹងឆែក បានធ្វើឡើង ក្នុងឳកាសសម្តេចប្រធានព្រឹទ្ធសភា អនុញ្ញាតឯកអគ្គរដ្ឋទូតថ្មីនៃសា ធារណរដ្ឋឆែកប្រចាំកម្ពុជា លោក Martin Vávra បានចូលជួបសម្ដែងការគួរសម និងពិភាក្សាការងារនៅព្រឹកថ្ងៃ ទី៨មិថុនា នៅវិមានព្រឹទ្ធសភា។ លោក Martin Vávra បានវាយតម្លៃខ្ពស់ចំពោះទំនាក់ទំនង និងកិច្ចសហប្រតិបត្តិ ការដ៏ល្អរវាងប្រទេសទាំងពីរ កម្ពុជា និងសាធារណរដ្ឋឆែក ដែលមានតាំងពីយូរលង់ណាស់មកហើយ។

ប្រទេសអាស៊ានទាំង១០ក្នុងរយៈពេល៧២ម៉ោងចុងក្រោយនេះ ការឆ្លងកូវីដ១៩ មានចំនួន៧ម៉ឺន៨ពាន់៧៥៥ ករណី និងការស្លាប់ថ្មីមានចំនួន១ពាន់៣៤០នាក់។ កម្ពុជាក្នុងរយៈពេល៧២ម៉ោងចុងក្រោយនេះ មានការឆ្លង ថ្មីសរុបចំនួន១ពាន់៧៥៨ ករណីក្នុងនោះការឆ្លង១ពាន់៦៨៧ករណីជាការឆ្លងក្នុងសហគមន៍, និង៧១ករណី ទៀតជាការឆ្លងលើអ្នកដំណើរ មកពីក្រៅប្រទេស។

កម្ពុជាក្នុងរយៈពេល៧២ម៉ោងកន្លងមកនេះ ការឆ្លងចូលក្នុងសហគមន៍មានចំនួន១ពាន់៦៨៧ករណី ក្នុងនោះ រួមមានការឆ្លងនៅថ្ងៃច័ន្ទនេះចំនួន៥៦២ករណី។ ចំនួនមនុស្សដែលបានឆ្លងក្នុងព្រឹត្តិការណ៍សហគមន៍ ២០កុម្ភៈ រយៈពេល១០៧ថ្ងៃមកនេះ បានកើនឡើងដល់៣ម៉ឺន៣ពាន់៧៣៨នាក់ហើយ។