ស្នងការដ្ឋាននគរបាលរាជធានី បានបើកកិច្ចប្រជុំរបស់ខ្លួននៅថ្ងៃនេះ ដោយពិនិត្យមើលភាពចន្លោះប្រហោង នានាក្នុងការអនុវត្តច្បាប់រយៈពេលពេញមួយខែឧសភាកន្លងមក ជាមួយនឹងការដាស់តឿននិងព្រមានផងដែរ ចំពោះមន្ត្រីក្រោមបង្គាប់ណាដែលអសកម្មឫពាក់ព័ន្ធនឹងអំពើល្មើសច្បាប់។ កិច្ចប្រជុំប្រចាំខែតាមរយៈប្រព័ន្ធ អនឡាញនេះ បានធ្វើឡើងក្រោមវត្តមានអគ្គស្នងការរងនគរបាលជាតិលោកឧត្តមសេនីយ៍ឯកសថេត ដែលជា ស្នងការនគរបាលជាតិ។

រដ្ឋបាលរាជធានី បានកំណត់ពេលមួយសប្តាហ៍ដើម្បីឲ្យមានការរុះរើឬយកចេញជាបន្ទាន់នូវសំណង់អនាធិបតេយ្យមួយចំនួននៅលើផ្ទៃទន្លេក្នុងរាជធានីភ្នំពេញ។ សេចក្តីរាយការណ៍បានបង្ហាញថា សំណង់អនាធិបតេយ្យ មួយចំនួនដូចជា បែរចិញ្ចឹមត្រីចល័ត, ផ្ទះបណ្តែតទឹក, ផ្ទះទូកតូចៗ និងសំណង់បណ្តែតទឹកមួយចំនួនទៀតនៅ លើទន្លេបានបង្កអោយបាត់បង់សណ្តាប់ធ្នាប់, ប៉ះពាល់ដល់ផ្លូវនាវាចរ និងបំពុលបរិស្ថានធ្ងន់ធ្ងរ។

ខេត្តរតនគិរីបានរកឃើញអ្នកឆ្លងកូវិដថ្មីម្នាក់ ក្នុងរយៈពេល២៤ម៉ោងចុងក្រោយនេះ។ យោងតាមរដ្ឋបាលខេត្ត អ្នកជម្ងឺគឺជាបុរសចំណាស់វ័យ៧៩ឆ្នាំ ដែលបានធ្វើដំណើរពីរាជធានីភ្នំពេញមកកាន់ខេត្តរតនគិរី តាមរថយន្ត ឈ្នួលមួយនៅថ្ងៃទី២មិថុនានេះ។ ករណីរកឃើញវិជ្ជមានកូវិដ១៩នៅថ្ងៃទី២មិថុនានេះ គឺជាអ្នកជម្ងឺទី១៦ហើយ សម្រាប់ខេត្ត រតនគិរី៕

ខេត្តសៀមរាបបានបន្តរកឃើញអ្នកវិជ្ជមានជំងឺកូវី១៩ ថ្មី ចំនួន២នាក់ក្នុងរយៈពេល២៤ម៉ោងចុងក្រោយនេះ។ យោងតាមរដ្ឋបាលខេត្ត ក្នុងចំណោមអ្នកឆ្លងថ្មីទាំង២នាក់នោះ មានម្នាក់បានធ្វើដំណើរមកពីក្រុងប៉ោយប៉ែត ខេត្តបន្ទាយមានជ័យ កាលពីថ្ងៃទី១៦ ខែឧសភា ឆ្នាំ២០២១ និងម្នាក់ទៀត បានធ្វើដំណើរមកពីខេត្តសមុទ្រ ប្រាកាន ប្រទេសថៃ កាលពីថ្ងៃទី២០ឧសភា ឆ្នាំ២០២១។

ខេត្តក្រចេះ បានរកឃើញអ្នកឆ្លងកូវីដ១៩ថ្មី ចំនួន ៥នាក់ ក្នុងរយៈពេល២៤ម៉ោងចុងក្រោយនេះ ដែលជាការ ឆ្លងនៅក្នុងសហគមន៍ ។ យោងតាមរដ្ឋបាលខេត្ត អ្នកឆ្លងថ្មីទាំង ៥នាក់ នោះ រួមមានបុរស២នាក់ និងស្រ្តី ៣នាក់ ដែលមានអាយុចន្លោះពី១៧ឆ្នាំ ដល់៣៣ឆ្នាំ និងជាពលរដ្ឋរស់នៅក្នុងស្រុកសំបូរ ប៉ុន្តែទើបបានវិលត្រឡប់មកពី ខេត្តកំពង់ធំ។ ខេត្តក្រចេះ គិតត្រឹមថ្ងៃទី២មិថុនានេះ មានករណីឆ្លងសារុប៨នាក់ហើយ។

ខេត្តកំពង់ចាមរកឃើញអ្នកវិជ្ជមានកូវីដ-១៩ចំនួន៣៣នាក់បន្ថែមទៀតដែលជាតួលេខកើនឡើងជាងម្សិល មិញចំនួន២នាក់។ កាលពីថ្ងៃទី១មិថុនា ខេត្តកំពង់ចាមបានរកឃើញអ្នកឆ្លងថ្មី៣១នាក់។

ខេត្តកំពង់ឆ្នាំងបានរកឃើញអ្នកវិជ្ជមានកូវិដ១៩ចំនួន២នាក់ នៅថ្ងៃទី២មិថុនានេះ។ អ្នកជម្ងឺកូវីដទំាង២ គឺជាម្តាយនិងកូន ដែលជាម្ចាស់ហាងសំអាងការមួយកន្លែងនៅភូមិស្រែព្រីង សង្កាត់កំពង់ឆ្នាំង ក្រុងកំពង់ឆ្នាំង។

ខេត្តបាត់ដំបង បានរកឃើញអ្នកវិជ្ជមានកូវីដ-១៩ចំនួន១២នាក់បន្ថែមទៀតក្នុងរយៈពេល២៤ម៉ោងចុងក្រោយ នេះ។ យោងតាមរដ្ឋបាលខេត្ត ក្នុងចំណោមអ្នកឆ្លងថ្មីនោះ មាន៥នាក់ជាអ្នកដំណើរមកពីប្រទេសថៃ និង៧នាក់ ជាករណីឆ្លងក្នុងសហគមន៍។