ខេត្តស្វាយរៀងរកឃើញអ្នកវិជ្ជមានកូវីដ-១៩ថ្មីចំនួន៤៣នាក់ ក្នុងរយៈពេល២៤ម៉ោងចុងក្រោយ។ យោងតាម រដ្ឋបាលខេត្ត អ្នកឆ្លងទាំង៤៣នោះ គឺជាកម្មករនិងកម្មការិនីនៃរោងចក្រ យូលី, ស្ថិតនៅក្រុងបាវិត ខេត្តស្វាយ រៀង។

ខេត្តកំពង់ចាម បានរកឃើញអ្នកមានវិជ្ជមានកូវីដ-១៩ថ្មីចំនួន៤២នាក់ ក្នុងរយៈពេល២៤ម៉ោងចុងក្រោយនេះ។ យោងតាមរដ្ឋបាលខេត្ត អ្នកឆ្លងថ្មីទាំង៤២នាក់នេះ គឺក្នុងរង្វង់មនុស្សធ្វើតេស្តសារុបចំនួន៤ពាន់១៥១នាក់។ ក្នុងចំណោមអ្នកឆ្លងទាំងនោះ រួមមាននៅស្រុកកងមាសម្នាក់, ស្រុកស្រីសន្ធរម្នាក់, ស្រុកបាធាយ២នាក់, ស្រុក កំពង់សៀម៤នាក់, ស្រុកព្រៃឈរ១០នាក់, ស្រុកជើងព្រៃ២១នាក់ និងអ្នកមកពីខេត្តកំពង់ធំចំនួន៣នាក់។

ខេត្តសៀមរាបមានអ្នកឆ្លងកូវី-១៩ ថ្មីតែម្នាក់ទេនៅថ្ងៃនេះ និងក៏មានអ្នកជាសះស្បើយ ចំនួន៥នាក់ផងដែរ ក្នុងរយៈពេល២៤ម៉ោងចុងក្រោយនេះ។ យោងតាមរដ្ឋបាលខេត្ត អ្នកវិជ្ជមាននោះ ជាស្ត្រីអាយុ២៦ឆ្នាំឈ្មោះ សន បញ្ញា ភេទស្រី រស់នៅភូមិខ្នារថ្មី, សង្កាត់ជ្រាវ ក្នុងក្រុងសៀមរាប ដែលបានធ្វើដំណើរមកពីរាជធានីភ្នំពេញ តាម រយៈរថយន្តឈ្នួល កាលពីថ្ងៃទី៣០ឧសភា ដោយមានអ្នករួមដំណើរជាមួយចំនួន៩នាក់។

ខេត្តព្រៃវែងមានអ្នកឆ្លងជំងឺកូវីដ-១៩ថ្មីចំនួន២៤នាក់ ក្នុងរយៈពេល២៤ម៉ោងចុងក្រោយ។ យោងតាមរដ្ឋបាល ខេត្ត ក្នុងចំណោមអ្នកឆ្លងថ្មីទាំង២៤នាក់នោះ រួមមាននៅក្នុងក្រុងព្រៃវែងចំនួន៦នាក់, ស្រុកព្រះស្ដេចចំនួន៣ នាក់, ស្រុកស្វាយអន្ទរចំនួន២នាក់,ស្រុកមេសាងម្នាក់, ស្រុកពាមជរ៣នាក់, ស្រុកបាភ្នំ៤នាក់, ស្រុកកញ្ច្រៀច ម្នាក់, ស្រុកកំពង់ត្របែក២នាក់, អ្នកមកពីខេត្តកំពង់ឆ្នាំងម្នាក់ និងមកពីខេត្តត្បូងឃ្មុំម្នាក់។

អ្នកសង្ស័យឆ្លងកូវីដ១៩ម្នាក់ទៀត កំពុងរត់គេចខ្លួនក្នុងពេលអាជ្ញាធរតម្រូវឲ្យទៅយកសំណាក នៅវិទ្យាល័យ បាក់ទូក។ បុរសឈ្មោះ យ៉ន យោគ ដែលបានរស់នៅក្នុងបន្ទប់ជាមួយនឹងអ្នក ឆ្លងកូវីដ១៩ ត្រូវបានគេតម្រូវឲ្យ ទៅយកសំណាកកាលពីថ្ងៃទី២៨ឧសភា។

ប្រធានគណៈកម្មការចំពោះកិច្ចចាក់វ៉ាក់សាំងកូវីដ១៩ក្នុងក្របខណ្ឌទូទាំងប្រទេសលោកស្រីឳវណ្ណឌីន បានថ្លែង អំពាវនាវពលរដ្ឋដែលឆ្លងកូវីដ១៩មិនត្រូវរត់គេចមិនព្រមទទួលយកការព្យាបាលនោះឡើយ។ ប្រសាសន៍លោក ស្រីឳវណ្ឌឌីន បានធ្វើឡើងនៅថ្ងៃទី៣១ឧសភានេះ បន្ទាប់ពីមានសេចក្តីរាយការណ៍ជាបន្តបន្ទាប់ករណីភិតភ័យ រត់គេចរបស់កម្មករក្នុងរោងចក្រខេត្តស្វាយរៀងកន្លងមកនេះ ដែលបណ្តាលឲ្យមានក្តីបារម្ភការមិនអាចគ្រប់គ្រង ការឆ្លងនៃជម្ងឺកូវីដ១៩ទាំងនោះបានឡើយ។

ទណ្ឌិតនិងមន្ត្រីក្នុងពន្ធនាគារខេត្តកណ្ដាល ឆ្លងកូវីដ១៩ កើនឡើង ៣៦៩នាក់ហើយ គិតត្រឹមថ្ងៃនេះ។ កាលពីថ្ងៃ ទី ២៥ឧសភា ការឆ្លងកូវីដ១៩ក្នុងបរិវេណពន្ធនាគារ មានចំនួន១០៦នាក់ក្នុងនោះរួមមានមន្ត្រីពន្ធនាគារ ចំនួន ៣នាក់ ។ សេចក្តីរាយការណ៍បង្ហាញចំនួនឆ្លងកើនដល់៣៦៩នាក់ថ្ងៃនេះ ត្រូវគេបញ្ជាក់ថា មានអ្នកឆ្លងកើន២៦៣ នាក់បន្ថែមទៀតក្នុងរយៈពេល៦ថ្ងៃកន្លងមកនេះ។ ពន្ធនាគារខេត្តកណ្តាលគឺជាពន្ធនាគារតែមួយគត់ដែលមាន សេចក្តីរាយការណ៍ជុំវិញការឆ្លងកូវីដ១៩រាលដាលលើអ្នកទោសក្នុងពន្ធនាគារ។

ប្រទេសអាស៊ានទាំង១០ក្នុងរយៈពេល៧២ម៉ោងចុងក្រោយនេះ មានការឆ្លងកូវីដ១៩ មានចំនួនជាង៨ម៉ឺនករណី និងការស្លាប់ថ្មីមានចំនួន១ពាន់២១៩នាក់។ កម្ពុជាក្នុងរយៈពេល៧២ម៉ោងចុងក្រោយនេះ មានការឆ្លងថ្មីសរុប ចំនួន១ពាន់៨៥៧ ករណីករណី ក្នុងនោះការឆ្លង១ពាន់៧៦១ករណី គឺជាការឆ្លងក្នុងសហគមន៍, និង៩៦ករណី ទៀតគឺជាការឆ្លងលើអ្នកដំណើរមកពីក្រៅប្រទេស។

ការឆ្លងកូវីដ១៩របស់កម្ពុជា បានកើនលើស៣ម៉ឺននាក់ហើយ ក្រោយរលកឆ្លងក្នុងព្រឹត្តិការណ៍សហគមន៍២០ កុម្ភៈបានឆ្លងរាលដាលខ្ពស់ពីមួយថ្ងៃទៅមួយថ្ងៃ។ ការឆ្លងរយៈពេល២៤ម៉ោងក្នុងព្រឹត្តិការណ៍សហគមន៍នៅថ្ងៃ ច័ន្ទនេះ មានចំនួន៦៩០ករណី ដែលនាំឲ្យចំនួនឆ្លងចូលក្នុងសហគមន៍សារុប២ម៉ឺន៩ពាន់១៩៤ករណីក្នុងរយៈ ពេល១០០ថ្ងៃគត់កន្លងមកនេះ។ បើប្រៀបធៀបការឆ្លងរវាងថ្ងៃអាទិត្យនិងថ្ងៃច័ន្ទនេះ ការឆ្លងរយៈពេល២៤ម៉ោង ចុងក្រោយមានកើនលើស៧៧ករណី។ ការឆ្លងនៅថ្ងៃអាទិត្យមានចំនួន៦៣៥ករណី, ចំណែកការឆ្លងនៅថ្ងៃច័ន្ទ នេះមានចំនួន៦៩០ករណី ដែលចំនួននៅតែខ្ពស់គួរឲ្យបារម្ភ។

រាជធានីភ្នំពេញគ្រោងនឹងបញ្ចប់ការចាក់វ៉ាក់សាំងទាំងស្រុងលើពលរដ្ឋរបស់ខ្លួនក្នុងខែមិថុនាខាងមុខនេះហើយ មុននឹងបន្តទៅកាន់តំបន់ក្រៅរាជធានីផ្សេងទៀតដែលជាតំបន់ប្រឈមហានិភ័យខ្ពស់។ ប្រធានគណៈកម្មការ ចំពោះកិច្ចចាក់វ៉ាក់សាំងកូវីដ១៩ក្នុងក្របខណ្ឌទូទាំងប្រទេសលោកស្រីឳវណ្ណឌីន បានប្រាប់ទូរទស្សន៍អប្សរា ថ្ងៃ ទី៣១ឧឧសភាថា នៅក្នុងរាជធានីភ្នំពេញនេះនៅសល់តែខណ្ឌចំនួន៣ទៀតតែប៉ុណ្ណោះ ដែលនឹងត្រូវគ្រោងចាក់​ រួចរាល់ក្នុងខែមិថុនាខាងមុខនេះ។