សពទាហានមួកខៀវកម្ពុជាម្នាក់ ដែលស្លាប់ដោយសារកូវីដ១៩ នឹងទទួលបានមេដាយកិត្តិយសពីអង្គការសហប្រជាជាតិ។ សេចក្តីប្រកាសរបស់ អង្គកាសហប្រជាជាតិប្រចាំកម្ពុជា នៅថ្ងៃទី២៧ ខែឧសភាឆ្នាំ២០២១ មេដាយ »ដេក ហាម៉ាស ស្កុល» នឹងត្រូវប្រគល់ជូនវីរជនកងកម្លាំងរក្សាសន្តិភាពកម្ពុជា ដែលបានទទួលមរណភាព ក្នុង ពិធី រំលឹកវិញ្ញាណក្ខន្ធ ដែលធ្វើឡើងនៅឯទីស្នាក់ការ កណ្តាលរបស់អង្គការសហប្រជាជាតិ នៅទីក្រុងញូវយក។

ប្រទេសអាស៊ានទាំង១០ក្នុងរយៈពេល២៤ម៉ោងចុងក្រោយនេះ ការឆ្លងកូវីដ១៩ថ្មី មានចំនួនមានចំនួន ២ម៉ឺន ៧ពាន់៤៧៥ករណី និងការស្លាប់ថ្មីមានចំនួន៤៧៩នាក់។ កម្ពុជាក្នុងរយៈពេល២៤ម៉ោងចុងក្រោយនេះ មានការ ឆ្លងថ្មីសរុបចំនួន៥៩៩ករណី ក្នុងនោះ៥៧៤ករណីជាការដែលឆ្លងក្នុងសហគមន៍, និង២៥ករណីទៀតជាការនាំ ចូលពីក្រៅប្រទេស។

យុទ្ធនាការផ្ការីកចាក់វ៉ាក់សាំងទូទាំងប្រទេស បានចាក់លើមនុស្សចំនួន២លាន៤សែន១ម៉ឺន៨ពាន់២៨៥នាក់ ហើយដែលស្មើនឹងជាង២៤ភាគរយនៃចំនួនប្រជាជននៃគំរោងចាក់យ៉ាងហោច១០លាននាក់ដើម្បីរកភាពស៊ាំ នៅក្នុងប្រទេសកម្ពុជា។ សេចក្តីរាយការណ៍ពីក្រុមការការងារទទួលបន្ទុកការចាក់វ៉ាក់សាំង បានបញ្ជាក់ថា ក្នុង ចំណោមមនុស្សទាំងជាង២លាន៤សែននាក់នោះ អ្នកចាក់វ៉ាក់សាំងដូសទី២រួចរាល់មានចំនួន១លាន ៨សែន ១ពាន់៤៤៨នាក់។

ការឆ្លងចូលក្នុងសហគមន៍នៅថ្ងៃសុក្រនេះ បានថយចុះចំនួន៥៩ករណី បើប្រៀបធៀបកាលឆ្លងពីម្សិលមិញ។ កាលពីថ្ងៃព្រហស្បតិ៍ការឆ្លងចូលក្នុងសហគមន៍មាន៦៣៣ករណី, ចំណែកនៅថ្ងៃសុក្រនេះ ការឆ្លងចូលក្នុងសហគមន៍មាន៥៧៤ករណី។ គិតចាប់តាំងពីថ្ងៃច័ន្ទដើមសប្តាហ៍នេះមក ការឆ្លងចូលក្នុងសហគមន៍មានចំនួនសរុប ២ពាន់៩១៣ករណី ដែលនាំឲ្យចំនួនឆ្លងក្នុងព្រឹត្តិការណ៍សហគមន៍ ២០កុម្ភៈ បានកើនឡើងដល់២ម៉ឺន៧ពាន់ ៤៣៣ករណីហើយ។

សម្តេចតេជោ ហ៊ុន សែន គ្រោងនឹងអញ្ជើញចូលរួមកិច្ចប្រជុំកំពូលបរិស្ថានមួយនាសប្តាហ៍ក្រោយ ដែលនឹងរៀបចំឡើងដោយប្រធាធិបតីនៃប្រទេសកូរ៉េខាងត្បូង តាមប្រព័ន្ធវីដេអូ Conference ។ កិច្ចប្រជុំកំពូល សេអ៊ូល P4G ឆ្នាំ២០២១នៅថ្ងៃទី៣១ឧសភា នឹងប្រព្រឹត្តទៅក្រោមប្រធានបទ ”ការស្ដារបៃតងឡើងវិញប្រកបដោយបរិយាប័ន្ន ដើម្បីសម្រេចបាននូវ អព្យាក្រឹតភាពកាបោន”។ សម្ដេចតេជោហ៊ុន សែន គ្រោងនឹងថ្លែងសុន្ទរកថាលើប្រធានបទ “ការស្ដារបៃតងឡើងវិញប្រកបដោយបរិយាប័ន្នពីជំងឺកូវីដ-១៩”។

មនុស្ស២នាក់បានស្លាប់ និងរបួសក្នុងករណីគ្រោះថ្នាក់ផ្ទុះគ្រាប់មីនតោននៅខេត្តបាត់ដំបង។ សេចក្តីរាយការណ៍ បានបញ្ជាក់ថា ហេតុការណ៍នោះបានកើតឡើងនារសៀលថ្ងៃទី២៧ ខែឧសភា ឆ្នាំ២០២១នេះ នៅភូមិចំការចេក ឃុំស៊ុង ស្រុកសំឡូត ខេត្តបាត់ដំបង។ ហ្វេសប៊ុកផេករបស់អគ្គនាយកស៊ីម៉ាក់ លោកហេង រតនា បានអោយដឹងថា មានករណីគ្រោះថ្នាក់ផ្ទុះគ្រាប់មីនតោនសំណល់ពីសង្គ្រាមនោះ បានកើតឡើង ខណៈពេលដែលជនរងគ្រោះ កំពុងបើកបរគោយន្តធ្វើដំណើរ ដើម្បីទៅកាត់ស្មៅឱ្យចំណីគោ។

សមត្ថកិច្ច បានចាប់ឃាត់ខ្លួនមេខ្យល់៣នាក់ ដែលលួចនាំពលករឆ្លងដែនខុសច្បាប់ទៅប្រទេសថៃ។ សេចក្តី រាយការណ៍បានបញ្ជាក់អោយដឹងថា ការចាប់ឃាត់ខ្លួននោះគឺបានធ្វើឡើងកាលពីថ្ងៃទី២៦ ខែឧសភា ឆ្នាំ២០២១ នៅចំណុច ភូមិព្រៃគប់ សង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ។

សហព័ន្ធកីឡាបាញ់កាំភ្លើងកម្ពុជា បានសម្រេចជ្រើសរើសយកទីតាំងឧទ្យានជាតិរាម ក្នុងទឹកដីខេត្តព្រះសីហនុ ធ្វើជាកន្លែងសាងសង់ទីលានកីឡាបាញ់កាំភ្លើងស្តង់ដារអន្តរជាតិ សម្រាប់បម្រើដល់ការទទួលធ្វើម្ចាស់ផ្ទះ ការប្រកួត កីឡាស៊ីហ្គេមលើកទី៣២ ឆ្នាំ២០២៣។

ក្រុមជើងឯកនៃរដូវកាល២០២០ ប្រជែងបាន៣ពិន្ទុដំបូង នៅប្រកួតបង្គ្រប់សប្តាហ៍ទី៤ ជាមួយក្រុមបាតតារាង ម្ចាស់ផ្ទះ សូលទីឡូអង្គរ ដោយលទ្ធផល ៣ទល់០។ លទ្ធផលទទួលបានក្នុងក្របខ័ណ្ឌលីគកំពូលកម្ពុជានៃរដូវ កាល២០២១នេះ បានធ្វើកាលពីថ្ងៃពុធ ទី២៦ ខែឧសភា ឆ្នាំ២០២១។ ៣គ្រាប់ជ័យជម្នះរបស់ក្រុមភ្ញៀវ បឹងកេត ធ្វើសម្រេចដោយកីឡាករ ឱ ភារុណ នៅនាទីទី២, ក្រោយមកដោយកីឡាករ Rajkovic Marko នៅនាទីទី៧៧, ខណៈកីឡាករ សៀង ចន្ធា ធ្វើសម្រេចនៅនាទី៨៤។

ក្រុមហ៊ុន ជីប ម៉ុង បានឧបត្ថម្ភថវិកា១លានដុល្លារអាមេរិក ជូនកាកបាទក្រហមកម្ពុជា សម្រាប់ជួយសាងសង់ផ្ទះ ជូនអតីតយុទ្ធជនក្រីក្រ និងអតីតយុទ្ធជនមានពិការភាព នៅស្រុកភ្នំក្រវាញ ខេត្តពោធិ៍សាត់។ ការឧបត្ថម្ភនេះ ត្រូវ បានលើកឡើងក្នុងជំនួបមួយនៅថ្ងៃទី២៧ឧសភានេះ រវាងអគ្គលេខាធិការកាកបាទក្រហមកម្ពុជាលោកស្រី ពុំ ចន្ទីនី ជាមួយនឹងក ស្ថាបនិកក្រុមហ៊ុន ជីប ម៉ុង លោកស្រីអ្នកឧកញ៉ា ភាព ហៀក នៅទីស្នាក់ការកណ្តាលកាក បាទក្រហមកម្ពុជា។