រដ្ឋបាលខេត្តស្វាយរៀង បានថ្លែងនៅថ្ងៃនេះថា សកម្មភាពរត់ចេញរបស់កម្មករនៃរោងចក្រម្លើងទោចក្រយាន A and J Cambodia ដែលបណ្តាញសារព័ត៌មានបានផ្សាយពាសពេញប្រទេសនោះ គឺជាករណីមានមនុស្សបំផុសបំផុល។

បុរសម្នាក់ដែលរត់ចេញពីមណ្ឌលព្យាបាលជំងឺកូវីដ-១៩ មួយកន្លែងក្នុងរាជធានីភ្នំពេញ ត្រូវតុលាការ បានបញ្ជូនចូលពន្ធនាគារព្រៃសក្នុងការឃុំខ្លួនជាបណ្តោះអាសន្ន។ បញ្ជាការដ្ឋានកងរាជអាវុធហត្ថរាជធានីភ្នំពេញ បានបញ្ជាក់ថាបុរសដែលបានរត់ចេញពីកន្លែងព្យាបាលវិទ្យាល័យជាស៊ីមសាមគ្គីក្នុងខណ្ឌទួលគោកកាលពីថ្ងៃ ទី២២ឧសភានោះ ត្រូវបានតុលាការចេញដីកាឃុំខ្លួនបណ្តោះអាសន្នហើយ។ ការឃុំខ្លួន បានធ្វើកាលពីរសៀល ថ្ងៃទី២៦ឧសភា បន្ទាប់ពីបុរសរូបនោះ ត្រូវបានព្យាបាលជាសះស្បើយពីជំងឺកូវីដ-១៩រួចរាល់។

ខេត្តកោះកុងបានរកឃើញអ្នកមានវិជ្ជមានកូវីដ១៩ថ្មីចំនួន៤នាក់ ក្នុងរយៈពេល២៤ម៉ោងចុងក្រោយនេះ។ ការឆ្លងនៅថ្ងៃទី២៧នេះ ត្រូវគេឃើញថាមានតួលេខថយចុះ១១នាក់បើប្រៀបធៀបនឹងម្សិលមិញដែលមានការឆ្លង ច្រើនដល់១៥នាក់នោះ។

ខេត្តស្ទឹងត្រែង បានរកឃើញអ្នកវិជ្ជមានកូវីដ១៩ ថ្មីចំនួន ២នាក់ ថែមទៀត ក្នុងរយៈពេល ២៤ម៉ោង ចុងក្រោយនេះ ។ យោងតាមរដ្ឋបាលខេត្ត អ្នកឆ្លងថ្មីទាំង២នាក់នេះ គឺជាឳពុកនិងកូនស្រី រស់នៅក្នុងក្រុងស្ទឹងត្រែង។ រដ្ឋបាលខេត្តបានបញ្ជាក់ថាការរកឃើញការឆ្លងថ្មី២នាក់ចុងក្រោយនេះ បាននាំឲ្យខេត្តស្ទឹងត្រែងមានមនុស្សឆ្លង សរុបចំនួន៧នាក់ហើយ។

ខេត្តកំពតបានរកឃើញអ្នកវិជ្ជមានកូវីដ១៩ថ្មីចំនួន៧នាក់ ក្នុងរយៈពេល២៤ម៉ោងចុងក្រោយ។ យោងតាម រដ្ឋបាលខេត្ត អ្នកមានវិជ្ជមានថ្មីទាំង៧នាក់នោះ រួមមាននៅស្រុកអង្គរជ័យចំនួន៤នាក់ និងនៅស្រុកទឹកឈូចំនួន៣ នាក់។

ខេត្តកំពង់ឆ្នាំង បានរកឃើញអ្នកឆ្លងជម្ងឺកូវិដថ្មីចំនួន ១៩នាក់បន្ថែមទៀត ក្នុងរយៈពេល២៤ម៉ោងចុងក្រោយនេះ។ ការរកឃើញការឆ្លងថ្មីនៅថ្ងៃនេះ ត្រូវគេបញ្ជាក់ថាមានច្រើនជាងម្សិលមិញចំនួន៤នាក់។

ខេត្តត្បូងឃ្មុំបានរកឃើញអ្នកឆ្លងកូវីដ១៩ចំនួន៩នាក់ ក្នុងរយៈពេល២៤ម៉ោងចុងក្រោយ។ យោងតាមរដ្ឋបាល ខេត្ត ក្នុងចំណោមអ្នកវិជ្ជមានទាំង៩នាក់នោះ រួមមាន៨នាក់ឆ្លងនៅក្នុងស្រុកអូររាំងឪ និងម្នាក់ទៀតជាអ្នកដំណើរ មកពីខេត្តកំពង់ឆ្នាំង។ រដ្ឋបាលខេត្តបានបន្តថា ជាមួយនឹងការរកឃើញអ្នកវិជ្ជមានកូវីដ-១៩ទាំងនោះ គេក៏បាន រកឃើញអ្នកបានប៉ះពាល់ផ្ទាល់ទៅនឹងអ្នកជំងឺ ចំនួន៣៣នាក់ទៀតផងដែរ។

ខេត្តកំពង់ធំបានរកឃើញករណីវិជ្ជមានកូវីដ១៩ថ្មីចំនួន២២នាក់ ក្នុងរយៈពេល២៤ម៉ោងចុងក្រោយនេះផង ដែរ។ យោងតាមរដ្ឋបាលខេត្ត ក្នុងចំណោមអ្នកឆ្លងថ្មីទាំង២២នាក់នោះ មានកម្មកររោងចក្រចំនួន៥នាក់, ពលរដ្ឋ ១៦ នាក់ដែលប៉ះពាល់ជាមួយនឹងកម្មករ និងម្នាក់ទៀតជាអ្នកដំណើរមកពីរាជធានីភ្នំពេញ។ ក្នុងចំណោមអ្នកឆ្លង ទាំង២២នាក់នោះ រួមមានពលរដ្ឋនៅស្រុកតាំងគោកចំនួន២០នាក់, នៅស្រុកស្ទោងម្នាក់ និងនៅស្រុកប្រាសាទ សំបូរម្នាក់។

ខេត្តតាកែវបានរកឃើអ្នកឆ្លងកូវីដ១៩ថ្មីចំនួន១១នាក់ ដែលជាករណីកាន់តែធ្លាក់ចុះជាបន្តបន្ទាប់ក្នុងរយៈពេល ៣ថ្ងៃជាប់គ្នាមកនេះ។ កាលពីថ្ងៃទី២៥ឧសភា ខេត្តតាកែវបានរកឃើញអ្នកឆ្លងថ្មីច្រើនដល់៤៩នាក់, ចំណែកនៅ ថ្ងៃទី២៦ឧសភា បានរកឃើញចំនួន៣៧នាក់ និងនៅថ្ងៃនេះ ចំនួនអ្នកឆ្លងថ្មីបានធ្លាក់ចុះមកនៅត្រឹម១១នាក់។ គិតក្នុងរយៈពេល៣ថ្ងៃជាប់គ្នាមកនេះ ការឆ្លងកូវីដ១៩មានចំនួនសារុប៩៧នាក់។ យោងតាម រដ្ឋបាលខេត្ត អ្នកឆ្លងថ្មីទាំង១១នាក់នៅថ្ងៃនេះ រួមមានអ្នករស់នៅស្រុកព្រៃក្បាសម្នាក់, ស្រុកបាទីចំនួន៤នាក់, ស្រុកសំរោង ៤នាក់ និងក្រុងដូនកែវ២នាក់។

ការបាត់បង់អាយុជីវិតមនុស្សម្នាក់នៅក្នុងខេត្តបាត់ដំបងដោយសារកូវីដ១៩ បានជម្រុញឲ្យខេត្តពង្រឹកនូវ ការដាក់ចេញវិធានការបង្កាបន្ថែមទៀតដើម្បីការទប់ស្កាត់ការឆ្លងរាលដាលនៃជម្ងឺដ៏កាចសាហាវនេះ។ នៅក្នុងប្រទេសកម្ពុជាចំនួនមនុស្សស្លាប់ដោយសារកូវីដ១៩ បានកើនដល់១៩៤នាក់ហើយ។