នៅក្នុងខេត្តស្វាយរៀងដដែល ការទើបរកឃើញអ្នកឆ្លងជាបឋមចំនួនជិត៦០នាក់ក្នុងរង្វង់កម្មករមួយពាន់នាក់នៃ ក្រុមហ៊ុនតម្លើងកង់ អេអន J. Cambodia ក្នុងតំបន់សេដ្ឋកិច្ចពិសេសតាយសេង ក្រុងបាវិត បាននាំឲ្យកម្មករទៅ យកសំណាកដទៃទៀត ភិតភ័យ នាំគ្នារត់ចេញពីកន្លែងទៅយកសំណាកនោះ។ សេចក្តីរាយការណ៍ពីខេត្តបាន ចាត់ទុកការនាំគ្នារត់ចេញនោះ គឺជាទង្វើមិនមានកិច្ចសហការជាមួយនឹងអាជ្ញាធរនិងមន្ត្រីសុខាភិបាល និងផ្ទុយ ពីច្បាប់ថែមទៀត។

ខេត្តស្វាយរៀងបានរកឃើញអ្នកមានវិជ្ជមានកូវីដ-១៩ថ្មីចំនួន៣៣នាក់ ក្នុងរយៈពេល២៤ម៉ោងចុងក្រោយ។ យោងតាម រដ្ឋបាលខេត្តអ្នកឆ្លងថ្មីទាំង៣៣នាក់នោះ រួមមាន២០នាក់នៅរោងចក្រយូលី ហ្គាមិន ក្នុងងតំបន់សេដ្ឋ កិច្ចពិសេសសានតុង, ២នាក់នៅក្រុងបាវិត, ៣នាក់នៅស្រុកស្វាយជ្រុំ, ២នាក់នៅក្នុងស្រុករំដួល, ៣នាក់នៅក្នុង ស្រុកកំពង់រោទិ៍ និងម្នាក់នៅស្រុករមាសហែក។

មន្ត្រីយោធាម្នាក់ដែលកំពុងយាមមណ្ឌលព្យាបាលកូវីដ១៩មួយកន្លែងនៅក្នុងខេត្តត្បូងឃ្មុំ ត្រូវបុរសមានវិជ្ជមាន កូវីដ១៩ម្នាក់បានវាយសម្លាប់ក្នុងពេលប៉ុនប៉ងចង់រត់គេចចេញពីមណ្ឌលព្យាបាលនោះ។ យោធិនអាយុ២៩ឆ្នាំ ឈ្មោះ មានវ៉ៃ នៃផ្នែកសឹករងស្រុកពញាក្រែក ត្រូវអង្គភាព បានបញ្ជូនទៅយាមការពារនៅមន្ទីរពេទ្យបង្អែក ស្រុកពញាក្រែក។ ហេតុការណ៍លួចវាយសម្លាប់នោះ បានកើតឡើងកាលពីល្ងាចថ្ងៃទី២៥ឧសភា ក្នុងពេលដែល បុរសឆ្លងកូវីដ១៩ឆ្មោះ មឿន ម៉ឺន អាយុ៣៨ឆ្នាំ បានប្រើដំបង និងចបកាប់វាយចំសៀតផ្កាយោធិនដែលកំពុង អង្គុយយាមតែម្នាក់ឯង។ ឃាតករសង្ស័យ ត្រូវសមត្ថកិច្ចចាប់ខ្លួនបានភ្លាមៗ។ ជនង្ស័យបានសារភាពថា មូលហេតុវាយសម្លាប់យោធិនកំពុងយាមនោះ គឺដើម្បីការប៉ុនប៉ងរត់គេចចេញពីកន្លែងព្យាបាលជំងឺកូវីដ-១៩។ អាជ្ញាធរបានថ្លែងថាឃាតករសង្ស័យនោះ ជាអតីតមនុស្សមានប្រវត្តិសេពថ្នាំញៀន។ នៅថ្ងៃទី២៦ឧសភានេះ អភិបាលខេត្តត្បូងឃ្មុំ និងមន្ត្រីនានា ត្រូវគេឃើញបានអញ្ជើញចូលរួមគោរពវិញ្ញាណក្ខន្ធសពយោធិនដែលរង នឹងការវាយប្រហារដោយអ្នកឆ្លងកូវីដ១៩នោះ។

យុទ្ធនាការផ្ការីកចាក់វ៉ាក់សាំង បានចំនួន២លាន៣សែន៦ពាន់៨២២នាក់ហើយដែលស្មើនឹងជាង២៣ភាគរយ នៃចំនួនប្រជាជនដែលគ្រោងនឹងចាក់ជាង១០លាននាក់នៅទូទាំងប្រទេស។ ក្នុងចំណោមមនុស្សទាំងជាង២ លាន៣សែននាក់នោះ អ្នកចាក់វ៉ាក់សាំងទី២ដូសរួចរាល់មានចំនួន១លាន៦សែន៨ម៉ឺន៨ពាន់៥៥១នាក់។

អំណោយជាឧបករណ៍ប្រយុទ្ធនឹងជំងឺកូវីដ១៩ ពីក្រុមហ៊ុនឯកជនបានផ្តល់ជួន ក្រសួងសុខាភិបាលកម្ពុជា ដើម្បីការចូលរួមទប់ស្តាត់ការឆ្លងដាលជំងឺកូវីដ១៩។ពិធីប្រគល់និងទទួលបានធ្វើឡើងនៅថ្ងៃទី២៦ឧសភាឆ្នាំ២០២១នេះនៅទីស្តីការក្រសួងសុខាភិបាល ក្រោមអធិបតីភាពរដ្ឋលេខាធិការក្រសួងសុខាភិបាល លោកស្រី យក់ សម្បត្ដិ និងតំណាងក្រុមហ៊ុន ដាំកូ ខេមបូឌា និងក្រុមហ៊ុន មើស្គ ខេមបូឌា។ ឧបករណ៍សម្រាប់ប្រយុទ្ធនឹងជំងឺ កូវីដ១៩នេះ រួមមានម៉ាសចំនួន២ម៉ឺន, អាកុលសម្លាប់មេរោគ ចំនួន១ពាន់៥០លីត្រ, និង អាវការពារកូវីដ១៩ ចំនួន ៣០០ឈុត។

រដ្ឋាភិបាលវៀតណាមបានប្រគល់ថវិកាចំនួន២០ម៉ឺនដុល្លារ និងសម្ភារៈបរិក្ខាពេទ្យជាច្រើនទៀត ដល់ក្រសួង សុខាភិបាល ដើម្បីការជួយទប់ស្កាត់កូវីដ១៩នៅកម្ពុជា។ ពិធីប្រគល់និងទទួល បានធ្វើឡើងនាព្រឹក ថ្ងៃទី២៦ ឧសភា ក្រោមវត្តមានរដ្ឋមន្ត្រីក្រសួងសុខាភិបាល លោកសាស្ត្រាចារ្យ ម៉ម ប៊ុនហេង និងឯកអគ្គរដ្ឋទូតវៀតណាម លោកវូ គ័ងមីង នៅទីស្តីការក្រសួងសុខាភិបាល។

ប្រទេសអាស៊ានទាំង១០ក្នុងរយៈពេល២៤ម៉ោងចុងក្រោយនេះ នាបការឆ្លងកូវីដ១៩ថ្មី ចំនួន១ម៉ឺន៧ពាន់ ២០០ករណី និងការស្លាប់ថ្មីមានចំនួន៤០៥នាក់។ កម្ពុជាក្នុងរយៈពេល២៤ម៉ោងចុងក្រោយនេះ មានការឆ្លងថ្មីសរុបចំនួន៦៦០ករណី ក្នុងនោះ៦២៦ករណីជាការដែលឆ្លងក្នុងសហគមន៍, និង៧ករណីទៀតជាការនាំចូលពីក្រៅ ប្រទេស។ ការស្លាប់ថ្មី នៅក្នុងរយៈពេល២៤ម៉ោងចុងក្រោយនេះ មានចំនួន៧នាក់ ដែលនាំឲ្យការស្លាប់សរុបក្នុង ប្រទេសកម្ពុជាបាន កើនដល់១៩០នាក់ហើយ។

ការឆ្លងចូលក្នុងសហគមន៍ក្នុងរយៈពេល២៤ម៉ោងចុងក្រោយនេះ មានការកើនឡើង៨៦ករណី បើប្រៀបធៀប កាលពីម្សិលមិញ។ ការឆ្លងកូវីដ១៩ថ្មីនៅថ្ងៃពុធនេះ មានចំនួន៦២៦ករណី បើប្រៀបធៀបនឹងការឆ្លងកាលពីថ្ងៃ អង្គារ៍នោះ មានចំនួន៥៤០ករណី។

ការផ្ទុះឆ្លងជម្ងឺកូវីដ១៩តាមរោងចក្រនិងសហគ្រាសនានា បានប្រញាប់ឲ្យអភិបាលរាជធានីបានស្នើដល់ក្រសួង ជាប់ពាក់ព័ន្ធនានាជួយសហការជាមួយនឹងរដ្ឋបាលក្រុង។ សេចក្តីរាយការណ៍បានឲ្យ ដឹងថា ការផ្ទុះឆ្លងរាលដាល នៅតាមរោងចក្រ, សហគ្រាសនានានៅក្នុងរាជធានីភ្នំពេញ មានការកើនឡើង និងការឆ្លងរាតត្បាតនេះមិនមាន លក្ខណៈធូរស្រាលឈប់ឈរសោះ។

ការឆ្លងក្នុងរាជធានីភ្នំពេញរយៈពេល២៤ម៉ោងចុងក្រោយនេះ មានតួលេខខ្ពស់ជាងពីម្សិលមិញចំនួន៥០ករណី។ កាលពីម្សិលមិញ ការឆ្លងកូវីដ១៩ក្នុងរាជធានីមានចំនួន២៦០ករណី ប៉ុន្តែតួលេខនៃការឆ្លងសម្រាប់ថ្ងៃទី២៦ឧសភានេះ មានចំនួន៣១០ករណី។