រន្ទះបានបាញ់ចំអ្នកនេសាទម្នាក់ក្នុងខេត្តក្រចេះ បណ្តាលអោយស្លាប់ ពេលកំពុងជិះទូកបង់សំណាញ់នៅ ទន្លេមេគង្គ។ គ្រោះធម្មជាតិនេះ បានកើតឡើង កាលពីល្ងាចថ្ងៃទី២៣ ខែឧសភាឆ្នាំ២០២១ ខណៈមេឃកំពុង មានភ្លៀងនិងមានផ្គររន្ទះ ប៉ុន្តែបុរសអាយុ៣៥ឆ្នាំឈ្មោះ ទីវ ទៀង ត្រូវគេឃើញថាបានបន្តចេញនេសាទត្រី នៅកណ្តាលទន្លេមេគង្គ ទល់មុខនឹងវត្តសំបុក ក្នុងឃុំសំបុក ស្រុកចិត្របុរី។

ពលរដ្ឋនៅក្រៅប្រទេសបានបន្តចំអកចំពោះល្បិចកលទណ្ឌិតសមរង្ស៊ី ដែលប្រឹងប្រែងរកលុយដាក់ក្នុងហោប៉ៅ របស់ខ្លួនតាមអំពើបោកប្រាស់នៃកម្មវិធីដាក់លក់នាឡិកាដៃរបស់ខ្លួន។ ទណ្ឌិត សម រង្ស៊ី នៅជាមួយគ្នានេះ បានអួតអាងថាកម្មវិធីប្រមូលលុយ៥ដុល្លារម្នាក់តាមការលក់នាឡិកាដៃនោះ មានអ្នកជួយផ្តល់ប្រាក់បានចំនួនជាង៣ ម៉ឺននាក់ហើយ។ កម្មវិធីរៃអង្គាសលុយនេះ នឹងមានរយៈពេលវែងដល់ថ្ងៃទី៦ មិថុនា ឆ្នាំ២០២១ ទើបបានបញ្ចប់។

រដ្ឋមន្ត្រីការបរទេសកម្ពុជាលោក ប្រាក់ សុខុន គ្រោងនឹងចូលរួមកិច្ចប្រជុំពិសេសរដ្ឋមន្ត្រីការបរទេសអាស៊ាន-អាមេរិកនៅថ្ងៃស្អែក នេះតាមប្រព័ន្ធវីដេអូ Conference។

ធនាគារជាតិនៃកម្ពុជាបានដាក់ចេញនូវវិធានការអនុគ្រោះជាបន្តបន្ទាប់ ដើម្បីចូលរួមគាំទ្រគោលនយោបាយរាជរដ្ឋាភិបាលដោះស្រាយបញ្ហាប្រឈម និងសម្រាលបន្ទុកប្រជាពលរដ្ឋរងផលប៉ះពាល់ពីជំងឺកូវីដ១៩ ។

អង្គការសុខភាពពិភពលោក បានផ្ដល់ជំនួយសម្ភារៈដល់កម្ពុជា សម្រាប់ការងារគ្រប់គ្រងគ្រោះមហន្តរាយ។ ពិធីប្រគល់-ទទួលអំណោយរបស់អង្គការសុខភាពពិភពលោកជូនក្រសួងសុខាភិបាល បានធ្វើឡើងនៅព្រឹក ថ្ងៃទី២៤ឧសភាឆ្នាំ២០២១ នៅទីស្ដីការក្រសួងសុខាភិបាល ក្រោមវត្តមាន លោកសាស្រ្តាចារ្យ ម៉ម ប៊ុនហេង រដ្ឋមន្រ្តីក្រសួងសុខាភិបាល និងលោកស្រីវេជ្ជបណ្ឌិត លី អាយឡែន តំណាងអង្គការសុខភាពពិភពលោកប្រចាំ កម្ពុជា។

ប្រជាពលរដ្ឋដែលធ្លាប់ទៅកាត់សក់នៅហាង Taper ជិតទូរទស្សន៍អាស៊ីអាគ្នេយ៍ ត្រូវប្រញាប់ធ្វើចត្តាឡីស័ក និង តាមដានសុខភាព។ ហាង Taper Barbershop មានទីតាំងស្ថិតនៅផ្លូវលេខ ២០០២ សង្កាត់ទឹកថ្លា ខណ្ឌសែន សុខ រាជធានីភ្នំពេញ។

ប្រជាពលរដ្ឋ អាជីវករ កម្មករ កម្មការិនី ដែលធ្លាប់លក់ដូរ និងទិញឥវ៉ាន់ នៅផ្សារចំនួន២ក្នុងខេត្តស្វាយរៀង ត្រូវប្រញាប់ទៅធ្វើតេស្ដ និងធ្វើចត្តាឡីស័ក។ យោងតាមរដ្ឋបាលខេត្ត ថ្ងៃទី២៤ឧសភានេះ ផ្សារជីភូ នៃភូមិគោកល្វៀង, សង្កាត់ព្រៃអង្គុញ, ក្រុងបាវិត និងផ្សារថូម៉ាក នៃភូមិកំពោតជ្រូក សង្កាត់ព្រៃអង្គុញ ក្រុងបាវិត មានអ្នកវិជ្ជ មានកូវីដ១៩បានចេញចួលនៅទីនោះ។

ខេត្តស្វាយរៀង បានស្វែងរកមនុស្សពាក់ព័ន្ធជាមួយអ្នកបើករថយន្តឈ្នួលម្នាក់ពីភ្នំពេញ ស្វាយរៀង ក្រោយការរកឃើញអ្នកបើកតាក់ស៊ីនោះឆ្លងកូវីដ១៩។ យោងតាមរដ្ឋបាលខេត្ត អ្នកបើកបរឈ្មោះ ឯក ភក្ដី ដែលបានឆ្លង កូវីដ១៩ នោះ គឺជាអ្នកបើកបរតាក់ស៊ី ម៉ាកសាំយ៉ុង ពណ៌លឿង ស្លាកលេខ ស្វាយរៀង 2B-0159 ស្ថិត នៅភូមិ ជៀសឫស្សី, ឃុំកំពង់ចំឡង នៃស្រុកស្វាយជ្រំ។

ខេត្តបន្ទាយមានជ័យបានរកឃើញករណីវិជ្ជមានកូវីដ-១៩ចំនួន១១នាក់ ក្នុងរយៈពេល២៤ម៉ោងចុងក្រោយ។ យោងតាមរដ្ឋបាលខេត្ត ក្នុងចំណោមអ្នកកឆ្លងថ្មីទាំង១១នាក់នោះ មាន៥នាក់គឺជាពលករមកពីប្រទេសថៃ និង ៦នាក់ទៀតគឺជាករណីឆ្លងសហគមន៍នៅក្រុងប៉ោយប៉ែត និងស្រុកស្វាយចេក ។