ការចាក់វ៉ាក់សាំងក្នុងអតីតតំបន់ក្រហមក្នុងរាជធានីបានបន្តធ្វើថែមទៀតដោយមានពលរដ្ឋចំនួនជាង៧៦ម៉ឺន នាក់ហើយបានទទួលវ៉ាក់សាំងកូវីដ-១៩ ក្នុងរយៈពេល២៣ថ្ងៃ។ យោងតាមផែនការ ការចាក់វ៉ាក់សាំងលើអតីត តំបន់ក្រហម នឹងគ្រោងធ្វើលើពលរដ្ឋសារុបជាង៨០ម៉ឺននាក់។

រាជធានីភ្នំពេញកាន់តែពង្រីកតំបន់ចាក់វ៉ាក់បន្ថែមទៀតទន្ទឹមនឹងការមកដល់វ៉ាក់សាំងបង្កាកូវីដ១៩ជាបន្តបន្ទាប់។ កម្ពុជាកាលពីថ្ងៃទី២៣ឧសភាបានទទួលវ៉ាក់សាំងស៊ីណូវ៉ាក់ចំនួនមួយលានដូសថែមថែមទៀត​ ដែលជាវ់ាក់សាំង បញ្ជាទិញពីប្រទេសចិន។ ជាមួយនឹងការមកដល់វ៉ាក់សាំងចិនជាបន្តបន្ទាប់នេះ ខណ្ឌចំនួន៣ទៀតក្នុងរាជធានី គឺខណ្ឌចំការមន, ខណ្ឌ៧មករា និងខណ្ឌច្បារអំពៅ នឹងក្លាយជាគោលដៅចាក់វ៉ាក់សាំងចាប់ពីថ្ងៃទី២៥ឧសភា ស្អែកនេះទៅ។

ប្រមុខរាជរដ្ឋាភិបាលកម្ពុជាបានសម្តែងក្តីសោកស្តាយជុំវិញការមិនអាចរៀបចំពិធីជួបជុំនៃទិវាកុមារអន្តរជាតិ ១ មិថុនា និងទិវាពិភពលោកប្រឆាំងពលកម្មកុមារ១២មិថុនា ខាងមុខនេះ ដោយសារតែវិបត្តិគម្រាមនៃជម្ងឺកូវីដ១៩។ សម្តេចអគ្គមហាសេនាបតីតេជោ ហ៊ុន សែន ក្នុងនាមជាប្រធានកិត្តិយសក្រុមប្រឹក្សាជាតិកម្ពុជាដើម្បីកុមារ ក្នុងសារលិខិតមួយដែលបណ្តាញសារព័ត៌មានទើប ទទួលបាននៅថ្ងៃនេះ បានបញ្ជាក់ថាសម្តេចតែងនឹងរលឹកនិង ព្រួយបារម្ភពីសុខទុក្ខរប​ស់ពលរដ្ឋជាពិសេសកុមារ ទាំងអស់នៅទូទាំងប្រទេស។​ សម្តេចនាយករដ្ឋមន្ត្រី បានថ្លែង បន្តថាទោះបីឆ្នាំ២០២១នេះ «រាជរដ្ឋាភិបាលអាក់ ខាន មិនបានរៀបចំប្រារព្ធទិវាកុមារអន្តរជាតិឲ្យបានអធិកអធម យ៉ាងណាក្តីក៏កន្លងមក សម្តេចបានអនុវត្តនូវការងារ យុទ្ធសាស្ត្រមួយចំនួនក្នុងការលើកកម្ពស់និងជម្រុញការ អនុវត្តសិទ្ធិកុមារអនុលោមតាមអនុសញ្ញាស្តីពីសិទ្ធិកុមារ ដែលកម្ពុជាបានផ្តល់សច្ចាប័ននិងចែងក្នុងរដ្ឋធម្ម នុញ្ញ ជាធរមាន»។ សារលិខិត៤ទំព័ររបស់សម្តេចនាយករដ្ឋមន្ត្រី បានរៀបរាប់ជុំវិញការយកចិត្តទុកដាក់របស់រាជរដ្ឋាភិបាលចំពោះកុមារ, ការរៀបចំកម្មវិធីគោលនយោបាយជាតិដើម្បីកុមាររួមមានទាំងផែនការសកម្មភាព ជាច្រើន ដើម្បីជួយទប់ស្កាត់កុមារប្រឆាំងការកេងប្រវ័ញ្ចផ្លូវភេទតាមប្រព័ន្ធអនឡាញផងដែរ។ សារលិខិតរបស់សម្តេច បានធ្វើការអំ ពាវនាវ៩ចំណុចដល់គ្រប់ស្ថាប័ននិងក្រសួងក្រោមបង្គាប់ ត្រូវយកចិត្តទុកដាក់ដល់កុមារ, បង្កើន សិទ្ធិអំណាច ដល់កុមារជាពិសេសកុមារីនិងសហគមន៍ដើម្បីធ្វើឲ្យមានការផ្លាស់ប្តូរសំខាន់ដែលអាចដោះ ស្រាយ ឫសគល់នៃ ការរើងអើង, ការផាត់ចេញពីសង្គមនិងភាពរងគ្រោះនិងងាយរងគ្រោះរបស់កុមារ ជាពិសេសកុមារី, កុមារជន ជាតិដើមភាគតិចនិងកុមារមានពិការភាពជាដើម។

ក្រុមកីឡាករកីឡាការិនីអត្តពលកម្មសរុបចំនួន២៧នាក់កំពុងដំណើរការហ្វឹកហាត់បង្កើនគុណភាពបច្ចេកទេស ដើម្បីត្រៀមចូលរួមប្រកួតប្រជែងព្រឹត្តិការណ៍កីឡាស៊ីហ្គេមនៅប្រទេសវៀតណាមក្នុងរយៈពេលប្រមាណជាង៦ ខែទៅមុខទៀតនេះ។ កីឡាស៊ីហ្គេម លើកទី៣១ ក្នុងប្រទេសវៀតណាម គ្រោងនឹងដំណើរការពីថ្ងៃទី២២ខែវិច្ឆិកា ដល់ថ្ងៃទី២ ខែធ្នូ ឆ្នាំ២០២១។

ការនាំចេញកង់របស់កម្ពុជាក្នុងរយៈពេល៤ខែដើមឆ្នាំនេះ បានទទួលចំណូលជិត២០០លានដុល្លារអាមេរិក។ យោងតាមរបាយការណ៍របស់ក្រសួងពាណិជ្ជកម្ម ចំណូលជិត២០០លានដុល្លារពីការនាំចេញកង់ទៅក្រៅប្រទេសនេះ បានកើនឡើងជាង ៣២% បើប្រៀបធៀបនឹងរយៈពេលដូចគ្នានៅឆ្នាំ២០២០ ដែលពេលនោះ កម្ពុជា ទទួលបានប្រាក់ចំណូលតែជាង១៥០លានដុល្លារនោះទេ។

ជម្ងឺបង្កវិនាសកម្មដល់សត្វគោក្របី បានរាលដាលចូលមកដល់ប្រទេសក្នុងអាស៊ានហើយ។ ជម្ងឺ Lumpy Skin Disease ដែលគេស្គាល់ថាជំងឺដុំពកស្បែកគោក្របី និងធ្លាប់តែកើតឡើងក្នុងទ្វ្រីបអាហ្វ្រិកនិងមជ្ឈិមបូព៌ានិងនៅ អឺរ៉ុបប៉ែកអាគ្នេយ៍នោះ បាននិងកំពុងរាលដាលចូលមកក្នុងតំបន់អាស៊ីកណ្តាល, អាស៊ីខាងត្បូង, ប្រទេសចិន និងបានឈានចូលមកដល់ប្រទេសថៃ និងវៀតណាមហើយ។

ចំនួនមនុស្សស្លាប់ដោយសារការពុលស្រាសនៅក្នុងខេត្តកណ្តាល បានកើនឡើងចំនួន១២នាក់។ សមត្ថកិច្ចបាន បញ្ជួនអ្នកផលិតស្រាចំនួន១៣នាក់ដែលពាក់ព័ន្ធ ទៅតុលាការនៅថ្ងៃទី២១ឧសភានេះ។

ពលករខ្មែរចំនួន១២នាក់ដែលឆ្លងដែនខុសច្បាប់ ត្រូវបានទាហានថៃបញ្ជូនមកកម្ពុជាវិញតាមច្រកខេត្តបន្ទាយមានជ័យ។ ពលករខ្មែរចំនួន១២នាក់រួមមានប្រុស៥នាក់, ស្រី៥នាក់និងក្មេងតូចៗចំនួន២នាក់ ត្រូវបានគេយកទៅ ធ្វើចត្តាឡីស័ក រយៈពេល១៤ថ្ងៃ នៅមណ្ឌលចត្តា ឡីស័ក នៅស្រុកថ្មពួក នារសៀលថ្ងៃទី២០ ខែឧសភា ឆ្នាំ ២០២១។ ពលករខ្មែរទាំង១២នាក់នោះ ត្រូវបានអាជ្ញា ធរថៃស្ទាក់ចាប់ខ្លួននៅចំណុចព្រំដែនស្រុកតាព្រះយ៉ា ខេត្ត ស្រះកែវ ក្នុងពេលពួកគេកំពុងលួចឆ្លងដែន ទៅធ្វើការ នៅក្នុងខេត្តនគររាជសីមា។

ប្រជាពលរដ្ឋដែលបានទៅចាក់វ៉ាក់សាំងនៅសាលាបឋមសិក្សាឬស្សីកែវនាព្រឹកថ្ងៃទី១៦ឧសភា ត្រូវប្រញាប់ ធ្វើចត្តាឡីស័ក និងតាមដានសុខភាព។ អនុគណៈកម្មការស្រាវជ្រាវជំងឺកូវីដ-១៩ នៅថ្ងៃទី២១ឧសភាឆ្នាំ២០២១ បានជូនដំណឹងថា មានអ្នកជំងឺកូវីដ-១៩ ដែលបានទៅចាក់វ៉ាក់សាំងដូសទី១ នៅសាលាបឋមសិក្សាឫស្សីកែវ ស្ថិតនៅទីតាំងស្ថិតនៅសង្កាត់ឫស្សីកែវ ខណ្ឌឫស្សីកែវរាជធានីភ្នំពេញ កាលពីព្រឹកថ្ងៃទី១៦ឧសភាឆ្នាំ២០២១ ។