ប្រធានគណៈកម្មការចំពោះកិច្ចចាក់វ៉ាក់សាំងបង្កាជំងឺកូវីដ-១៩ ក្នុងក្របខណ្ឌទូទាំងប្រទេស លោកស្រីឳ វណ្ណ ឌីន បានបញ្ជាក់សាជាថ្មីនៃការមិនអស់ប្រាក់មួយរៀលឡើយជុំការចាក់វ៉ាក់សាំងបង្កាកូវីដ១៩ក្នុងប្រទេសកម្ពុជា នេះ។ សូមបញ្ជាក់ថាកន្លងមកនេះ ការបំពុលព័ត៌មានខ្លះតាមបណ្តាញសង្គម ត្រូវគេឃើញបាននិយាយអំពី ការ ចាក់វ៉ាក់សាំងបង្កាកូវីដ១៩ ដោយតម្រូវការចំណាយលុយ ដែលព័ត៌មាននោះកន្លងមកត្រូវគេរកឃើញថាមានប្រភពពីក្រុមធ្វើនយោបាយញុះញង់ចង់បង្កអស្ថិរភាពក្នុងប្រទេសកម្ពុជា។

ប្រទេសអាស៊ានទាំង១០ក្នុងរយៈពេល២៤ម៉ោងចុងក្រោយនេះ ការឆ្លងកូវីដ១៩ថ្មី មានចំនួន១ម៉ឺន៩ពាន់ ៦២៥ករណី និងការស្លាប់ថ្មីមានចំនួន៤០៦នាក់។ កម្ពុជាក្នុងរយៈពេល២៤ម៉ោងចុងក្រោយនេះ មានការឆ្លងថ្មី សរុបចំនួន៣៩៣ករណី ក្នុងនោះ៣៩២ករណីជាការដែលឆ្លងក្នុងសហគមន៍, និង១ករណីទៀតជាការនាំ ចូល ពីក្រៅប្រទេស។ ចំណែកការស្លាប់ថ្មីនៅក្នុងរយ:ពេល២៤ម៉ោងចុងក្រោយនេះមានចំនួន៣នាក់ដែលនាំឲ្យការ ស្លាប់សរុបមានចំនួន១៥៩នាក់។

ការឆ្លងចូលក្នុងសហគមន៍នៅថ្ងៃពុធនេះ បានកើនឡើងចំនួន៤៨ករណី បើប្រៀបធៀបនឹងការឆ្លងម្សិលមិញ។ កាលពីថ្ងៃអង្គារការឆ្លងចូលក្នុងសហគមន៍មាន៣៤៤ករណី, ចំណែកការឆ្លងនៅថ្ងៃពុធនេះ មាន៣៩២ករណី។

ប្រមុខរាជរដ្ឋាភិបាលកម្ពុជា បានថ្លែងអបអរសាទរប្រទេសចិនដែលទទួលបានជោគជ័យក្នុង បេសកកម្មអវកាស នៅភពព្រះអង្គារ៍។ គួរបញ្ជាក់ថាយានអវកាស ស៊ូរ៉ុង បានចុះចតដោយជោគជ័យលើភពព្រះអង្គារ៍កាលពីថ្ងៃសៅរ៍ ទី១៥ឧសភាដែលនាំឲ្យប្រទេសចិនគឺជាប្រទេសទី៣លើសកលលោកដែលអាចបញ្ជូនយានអវកាសធ្វើដំណើរចុះចតលើភពព្រះអង្គារ៍បានបន្ទាប់ពីសហរដ្ឋអាមេរិកនិងប្រទេសរុស្ស៊ី។

ខេត្តប៉ៃលិន បានរកឃើញអ្នកឆ្លងជំងឺកូវីដ១៩ថ្មី ចំនួន ៣នាក់ ក្នុងរយៈពេល២៤ម៉ោងចុងក្រោយនេះ។ យោងតាមរដ្ឋបាលខេត្ត អ្នកមានវិជ្ជមានជម្ងឺកូវីដ១៩ទាំង៣នាក់គឺស្រី្តម្នាក់អាយុ៦៤ឆ្នាំ មកពីខេត្តបន្ទាយមានជ័យ, និងពីរនាក់ទៀតជាប្តីប្រពន្ធអាយុ ៦២ឆ្នាំដូចគ្នា ដែលមកពីស្រុកសាមគ្គីមានជ័យនៃខេត្តកំពង់ឆ្នាំង។ របាយការណ៍បានបន្តថា អ្នកវិជ្ជមានជំងឺកូវីដ១៩ ទាំង៣នាក់នេះ មានជាប់ពាក់ព័ន្ធមនុស្សចំនួន ១១នាក់ថែមទៀត។

ខេត្តស្ទឹងត្រែងបានរកអ្នកឆ្លងកូវីដ១៩ម្នាក់ទៀត ដែលនាំឲ្យខេត្តនេះ មានមនុស្សឆ្លងក្នុងព្រឹត្តិការណ៍សហគមន៍ ២០កុម្ភៈបានកើនដល់៣នាក់ហើយ។ យោងតាមរដ្ឋបាលខេត្ត ថ្ងៃទី១៨ឧសភា អ្នកវិជ្ជមានកូវីដ-១៩ នោះគឺ ជាយុវជនម្នាក់អាយុ១៨ឆ្នាំឈ្មោះ ជាង ស៊ឺ ដែលបានធ្វើដំណើរពីខេត្តកណ្តាលមកកាន់ខេត្តស្ទឹងត្រែងកាលពីថ្ងៃទី ១៥ឧសភា។ យុវជនមានវិជ្ជមានកូវីដ១៩នោះ បានធ្វើដំណើរតាមរថយន្តដឹកបន្លែពីស្រុកកោះធំនៃខេត្តកណ្តាល មកកាន់ខេត្តស្ទឹងត្រែង។ បុរសនោះត្រូវគេរាយការណ៍ថាបានជាប់ពាក់ព័ន្ធនឹងក្រុមគ្រួសារចំនួន៥នាក់ដែលមាន វិជ្ជមានកូវីដ១៩ នៅភូមិព្រែកតារត្ន័ ឃុំពោធិ៍បាន ស្រុកកោះធំ នៃខេត្តកណ្ដាល។

ខេត្តតាកែវ បានរកឃើអ្នកឆ្លងកូវី-១៩ថ្មីចំនួន៤៨នាក់ថ្មីបន្ថែមទៀត ក្នុងរយៈពេល២៤ម៉ោងកន្លងមកនេះ។ យោងតាមរដ្ឋបាលខេត្ត អ្នកវិជ្ជមានកូវីដទាំង៤៨នាក់នោះ រួមមាន៤៥នាក់គឺជាកម្មករ និងកម្មការិនីនៃរោងចក្រ សាន់បូ ក្នុងស្រុកបាទី និង៣នាក់ទៀតគឺជាកសិករនិងកុមាររស់នៅស្រុកកោះអណ្តែត ខេត្តតាកែវ។

ខេត្តព្រៃវែង បានរកឃើញការឆ្លងកូវីដ១៩ថ្មីចំនួន៦នាក់នៅថ្ងៃនេះ។ យោងតាមរដ្ឋបាលខេត្តអ្នកមានវិជ្ជមាន កូវីដ-១៩ថ្មីទាំង៦នាក់ រួមមាន៣នាក់ជាម​នុស្សមកពីរាជធានីភ្នំពេញ, ម្នាក់មកពីខេត្តត្បូងឃ្មុំនិង២នាក់ទៀតជាពលរដ្ឋមកពីប្រទេសថៃ។

ខេត្តកំពង់ចាមបានរកឃើញអ្នកមានវិជ្ជមានកូវីដ-១៩ថ្មីចំនួន៥នាក់បន្ថែមទៀត ក្នុងរយៈ២៤ម៉ោងចុងក្រោយនេះ។ យោងតាមរដ្ឋបាលខេត្ត អ្នកមានវិជ្ជមានកូវីដ-១៩ថ្មីទាំង៥នាក់ គឺក្នុងរង្វង់ការធ្វើតេស្តលើមនុស្សសង្ស័យ ចំនួន ១៦៩នាក់។