ពលរដ្ឋនៅក្រៅតំបន់ក្រហម នឹងទទួលបានការចាក់វ៉ាក់សាំងបង្កាកូវីដ១៩ចាប់ពីថ្ងៃស្អែកទី១៨ឧសភានេះហើយ ដែលនឹងចាប់ផ្តើមធ្វើក្នុងខណ្ឌបឹងកេងកង និងខណ្ឌសែនសុខ ដែលជាតំបន់លឿង។ ការចាក់វ៉ាក់សាំងក្នុងខណ្ឌ នៃតំបន់លឿងទាំង២នេះ បានធ្វើឡើងទន្ទឹមនឹងការចាក់វ៉ាក់សាំងដូសលើកទី២ដល់ពលរដ្ឋក្នុងតំបន់ក្រហម ជាបន្តទៀតដោយឥតឈប់ឈរ។

សេចក្តីសម្រេចមួយចុះហត្ថលេខាដោយសម្តេចនាយករដ្ឋមន្ត្រី ក្នុងការចាត់តាំងរៀបចំក្រុមមន្ត្រីដើម្បីពិនិត្យ កិច្ចការនិងសីលធម៌របស់ក្រុមឧកញ៉ា ត្រូវបានបញ្ចេញតាមបណ្តាញសង្គមថ្ងៃនេះ ក្នុងរង្វង់ដែលកំពុងមានហេតុការណ៍នៃជម្លោះមួយទាក់ទងនឹងសីលធម៌មិនល្អរបស់ឧកញ៉ា។

តំបន់ក្រហមក្នុងរាជធានីភ្នំពេញ នឹងគ្រោងបង្រួមកាន់តែតូចជាងមុនក្រោយចំនួនតួលេខឆ្លងកាន់តែធ្លាក់ចុះគួរ ឲ្យកត់សម្គាល់។ រាជធានីភ្នំពេញរយៈពេល២៤ម៉ោងចុងក្រោយនេះ ការឆ្លងចូលក្នុងសហគមន៍មានចំនួន១៣០ ករណី ដែលជាការថយចុះគួរឲ្យកត់សម្គាល់។ យោងតាមរដ្ឋបាលរាជធានីភ្នំពេញ ការបង្រួមតំបន់ក្រហម និងការ បិទខ្ទប់ នឹងគ្រោងឲ្យមាន ត្រឹមតែការបិទតាមខ្នងផ្ទះ, តាមអគារ ឬនៅតាមខុនដូរ ដែលមានការឆ្លងនិងប្រឈម ហានិភ័យខ្ពស់តែប៉ុណ្ណោះ នៅថ្ងៃទី១៩ឧសភាខាងមុខនេះ។

រាជធានីភ្នំពេញ បានរកឃើញករណីឆ្លងថ្មីចំនួន១៣០នាក់ រយៈពេល២៤ម៉ោងចុងក្រោយនេះ ដែលថយចុះ១៤ ករណីបើប្រៀបធៀបនឹងម្សិលមិញ។ យោងតាមសេចក្ដីជូនដំណឹងរបស់រដ្ឋបាលរាជធានីភ្នំពេញ អ្នកឆ្លងជំងឺកូវីដ-១៩ថ្មីចំនួន១៣០នាក់ គឺជាចំនួនឆ្លងថយចុះខ្លាំងជាងគេបំផុត បើធៀបទៅនឹងរយៈពេល៧ថ្ងៃចុងក្រោយនេះ។

យុទ្ធនាការចាក់វ៉ាក់សាំងក្នុងតំបន់ក្រហមរយៈពេល១៦ថ្ងៃកន្លងមកនេះ បានផ្តល់លើពលរដ្ឋចំនួនជិត៧០ម៉ឺន នាក់ហើយ។ ការបន្តចាក់ក្នុងថ្ងៃទី១៧ឧសភានេះ បានសម្រុកធ្វើបន្ថែមទៀតក្នុងយុទ្ធសាស្ត្រ «ផ្ការីក» ដើម្បីបង្កើត ភាពស៊ាំក្នុងប្រទេសកម្ពុជា។

ប្រទេសអាស៊ានទាំង១០ក្នុងរយៈពេល៧២ម៉ោងចុងក្រោយនេះ ការឆ្លងកូវីដ១៩ មានចំនួន៥ម៉ឺន៣ពាន់៣១ ករណីនិងការស្លាប់ថ្មីមានចំនួន៩៤២នាក់។ កម្ពុជាក្នុងរយៈពេល៧២ម៉ោងចុងក្រោយនេះ មានការឆ្លងថ្មីសរុប ចំនួន១ពាន់៤៥ករណីករណីក្នុងនោះ១ពាន់២៥ករណីជាការឆ្លងក្នុងសហគមន៍, និង២០ករណីទៀតជាការឆ្លងលើ អ្នកដំណើរមកពីក្រៅប្រទេស។

ការឆ្លងកូវីដ១៩ចូលក្នុងសហគមន៍រយៈពេល២៤ម៉ោងចុងក្រោយនេះ មានចំនួន៣៥៦ករណី ដែលកើនឡើង ១៥ករណី បើប្រៀបធៀបនឹងម្សិលមិញ។ សូមបញ្ជាក់ថាកាលពីថ្ងៃអាទិត្យ ការឆ្លងចូលក្នុងសហគមន៍មាន ៣៤១ ករណី។ ចំនួនមនុស្សដែលបានឆ្លងក្នុងព្រឹត្តិការណ៍សហគមន៍ ២០កុម្ភៈ បានកើនឡើងដល់២ម៉ឺន១ពាន់៩១០ នាក់ហើយ។

ក្រុមប្រតិបត្តិបោសសំអាតគ្រាប់មិនទាន់ផ្ទុះនៅក្នុងទឹកទន្លេ បានត្រៀមអនុវត្តការបោសសំអាតក្នុងការដ្ឋានទី២ របស់ខ្លួនដែលគ្រោងនឹងប្រព្រឹត្តទៅក្នុងខេត្តកណ្តាល។ នាវាចម្បាំងមួយគ្រឿងរបស់អតីតកងទាហានលន់នល់ ក្នុងទសវត្ស១៩៧០ ត្រូវកងទ័ពរំដោះបាញ់លិច នៅក្នុងឃុំបឹងគ្រំ នៃស្រុកល្វាឯម ដែលគិតមកទល់នឹងពេលនេះ មានរយៈជិត៥០ឆ្នាំហើយ។

អតីតមន្ត្រីជាន់ខ្ពស់ នៃអតីតបក្សឆាំងម្នាក់ វិលត្រលប់មកដល់កម្ពុជាវិញ ក្រោយមានការលើកលែងទោសពី ប្រមុខរាជរដ្ឋាភិបាល។ លោកស្រី ថាក់ ឡានី ដែលនិរទេសខ្លួនទៅក្រៅប្រទេស តាមពួកក្រុមឧទ្ទាមក្រៅច្បាប់ ដឹកនាំដោយបុគ្គល សម រង្ស៊ី បានវិលត្រឡប់មកវិញនៅថ្ងៃទី១៤ឧសភានេះវិញហើយ តាមច្រកទ្វារអន្តរជាតិ ប៉ោយប៉ែត នៃខេត្តបន្ទាយមានជ័យ។

ប្រជាពលរដ្ឋណាដែលធ្លាប់ធ្លាប់មានទំនាក់ទំនងជាមួយជនជាតិចិនស្នាក់នៅសណ្ឋាគារឡាវ៉ាន់យ៉ា ប៊ូទីក ត្រូវ ប្រញាប់ធ្វើចត្តាឡីស័ក និងតាមដានសុខភាព។ សណ្ឋាគារឡាវ៉ាន់យ៉ា ប៊ូទីក មានទីតាំងស្ថិតនៅផ្ទះលេខ ១៦ ផ្លូវលេខ ២២៨ កែង ផ្លូវលេខ ៥៥ សង្កាត់ផ្សារថ្មី៣ ខណ្ឌដូនពេញ។