មនុស្សម្នាក់ដែលបានរត់ចេញពីតំបន់ក្រហមក្នុងរាជធានីភ្នំពេញ ត្រូវគេរកឃើញមានវិជ្ជមានកូវីដ-១៩នៅក្នុង ខេត្តសៀមរាប។ សេចក្ដីជូនដំណឹងរបស់រដ្ឋបាលខេត្តបានឲ្យដឹងថា ស្ត្រីដែលរត់ចេញពីតំបន់ក្រហមក្នុងរាជធានី ភ្នំពេញនោះ ឈ្មោះឆុង សូលីដា អាយុ៣៥ឆ្នាំ ដែលមានទីលំនៅក្នុងភូមិគោកដឺ, ឃុំកៀនសង្កែ នៃស្រុកសូទ្រ និគម។ ស្ត្រីរូបនោះ បានរត់ចេញពីតំបន់ក្រហមនៅរាជធានីកាលពីថ្ងៃទី៧ឧសភាធ្វើដំណើរមកកាន់ខេត្តសៀម រាប និងត្រូវបានគេរកឃើញមានវិជ្ជមានកូវីដ១៩កាលពីថ្ងៃទី១៣ឧសភា។

ប្រទេសអាស៊ានទាំង១០ក្នុងរយៈពេល២៤ម៉ោងចុងក្រោយនេះ ការឆ្លងកូវីដ១៩ថ្មី មានចំនួន១ម៉ឺន ៦ពាន់២៦៥ ករណី និងការ ស្លាប់ថ្មីមានចំនួន៣១៤នាក់។ កម្ពុជាក្នុងរយៈពេល២៤ម៉ោងចុងក្រោយនេះ មានការឆ្លងថ្មីសរុបចំនួន៣៥៨ករណី ក្នុងនោះ៣៥០ករណីជាការដែលឆ្លងក្នុងសហគមន៍, និង៨ករណីទៀតជាការនាំចូលពីក្រៅប្រទេស។

ការឆ្លងចូលក្នុងសហគមន៍ក្នុងរាជធានីភ្នំពេញរយៈពេល២៤ម៉ោងនេះ មានចំនួន១៧៥នាក់។ រដ្ឋបាលរាជធានី បានបង្ហាញនូវអត្តសញ្ញាណអ្នកឆ្លងថ្មីទាំងនោះ ជាមួយនឹងការកត់សម្គាល់ថាជាចំនួនបានកើនឡើងវិញបន្តិច ក្នុងរាជធានី បើទោះបីជាមានសញ្ញាឆ្លងធ្លាក់ចុះនៅទូទាំងប្រទេសក៏ដោយ។ កាលពីម្សិលមិញ ការឆ្លងក្នុងរាជ ធានី មានតែ១៥៤ករណីនោះទេ។

ការឆ្លងចូលក្នុងសហគមន៍នៅថ្ងៃសុក្រនេះបានបន្តថយចុះបន្តិចថែមទៀតចំនួន៨១ករណីបើប្រៀបធៀបកាល ពីម្សិលមិញករណី។ កាលពីថ្ងៃព្រហស្បតិ៍ ការឆ្លងចូលក្នុងសហគមន៍មាន៤៣១ករណី, ចំណែកនៅថ្ងៃសុក្រនេះ ការឆ្លងចូលក្នុងសហគមន៍មាន៣៥០ករណី។ ការថយចុះនេះ គឺមានរយៈពេល១០ថ្ងៃជាបន្តបន្ទាប់មកហើយ ក្រោយករណីឆ្លងខ្ពស់បំផុតមិនធ្លាប់មានកាលពីថ្ងៃទី៤ឧសភាដែលពេលនោះ ការឆ្លងខ្ពស់បំផុតក្នុងសហគមន៍ មានចំនួន៩៣៨ករណី។

ក្រសួងសុខាភិបាលបានស្នើឲ្យអភិបាលរាជធានី ខេត្តទាំងអស់ ត្រូវពង្រឹងបន្ថែមនូវវិធានការទប់ស្កាត់ការឆ្លង រាតត្បាតជំងឺកូវីដ-១៩នៅតាមមូលដ្ឋាន។ សេចក្តីស្នើនេះ បានទន្ទឹមនឹងការរកឃើញថា នៅតំបន់លឿង ដែលគេចាត់ទុកថាជាតំបន់មានការប្រឈមហានិភ័យតិចក្នុងការឆ្លង បែរជារកឃើញការឆ្លងកូវីដ១៩ច្រើនជាងគេវិញ ដោយការសង្ស័យខ្វះភាពប្រុងប្រយ័ត្នក្នុងការបង្កាអនាម័យប្រុងប្រយ័ត្ន។

តំបន់លឿងដែលគេចាត់ទុកថាជាតំបន់មានការប្រឈមហានិភ័យតិចជាងគេ ត្រូវគេរកឃើញថាបែរជាមានការ ឆ្លងកូវីដ១៩ច្រើនជាងគេវិញក្នុងរយៈពេល៧ថ្ងៃចុងក្រោយនេះ។ យោងតាមអនុគណៈកម្មការស្រាវជ្រាវជំងឺកូវីដ-១៩ ការធ្វើតេស្តរកឃើញ រវាងពីថ្ងៃទី៦ ដល់ថ្ងៃទី១២ ខែឧសភា ឆ្នាំ២០២១ អ្នកឆ្លងមេរោគកូវីដ-១៩ថ្មីច្រើនជាង គេ គឺជាប្រជាពលរដ្ឋដែលរស់នៅក្នុងតំបន់លឿងដែលមាន៥០.០៧%, តំបន់ក្រហមមាន៣២.១៩%, តំបន់លឿង ទុំមាន១៤.៣៤% និងតំបន់ផ្សេងទៀត៣.៤%។

រាជរដ្ឋាភិបាលកម្ពុជាបានលើកទឹកចិត្តមនុស្សដែលទទួលវ៉ាក់សាំងបង្កាកូវីដ១៩ណាដែលស្ថិតចំលេខទី១លាន, ទី២លាន និងរំពឹងដល់លេខទី៣លាននិងទី៤លានជាបន្តបន្ទាប់ថែមទៀត។ កម្ពុជាមានគំរោងចាក់លើពលរដ្ឋចំនួនយ៉ាងហោច១០លាននាក់ ដែលរំពឹងប្រើប្រាស់វ៉ាក់សាំងច្រើនជាង២០លានដូស។

ព្រះមហាក្សត្រខ្មែរជាទីគោរពសក្ការៈ មានព្រះជន្មគំរប់៦៨ព្រះវស្សា និងយាងចូល៦៩ព្រះវស្សានៅថ្ងៃទី១៤ឧសភានេះហើយ ជាមួយនឹងការថ្វាយពរពីគ្រប់ទីកន្លែងទូទាំងប្រទេសអបអរសាទរព្រះរាជពិធីចំរើនព្រះជន្មរបស់ព្រះអង្គ។

រដ្ឋបាលរាជធានីបានទទួលនូវអំនោយជាស្បៀងអាហារពីក្រុមហ៊ុនឯកជន ចំនួន២នៅថ្ងៃនេះ ដែលជាការរួមចំណែកចែកចាយស្បៀងដល់ពលរដ្ឋក្នុងតំបន់បិទខ្ទប់។ អំណោយរបស់ក្រុមហ៊ុនឯកជន សុវណ្ណាភូមិ Life Insurance PLC បាន ឧបត្ថម្ភ មី ចំនួន៥០០កេស តូច, ចំណែកក្រុមហ៊ុន HUAVEI TECHNOLOGIES (CAMBODIA) Co.,LTD បានឧបត្ថម្ភ អង្ករ ៥ពាន់គីឡូក្រាម, ត្រីខចំនួន៥០០យួរ, មីចំនួន៥០០កេសតូច និងពងទាចំនួន ៥ពាន់គ្រាប់។

គ្រោះធម្មជាតិខ្យល់កន្តាក់និងរន្ទះបាញ់បានបណ្តាលឲ្យកុមារី២នាក់បានស្លាប់និងរបួស, ខូចខាតផ្ទះពលរដ្ឋ១ ខ្នង ក្នុងហេតុការណ៍ដែលបានកើតឡើងនៅខេត្តបាត់ដំបង។ គ្រោះធម្មជាតិនោះ បានកើតឡើងកាលពីវេ លា ម៉ោង ២និង៤០នាទីថ្ងៃទី១២ ខែឧសភា ឆ្នាំ២០២១ ស្ថិតក្នុងភូមិស្វាយកង់ ឃុំអន្លង់វិល នៃស្រុកសង្កែ។