ក្រសួងធនធានទឹកនិងឧតុនិយម បានជូនដំណឹងប្រុងប្រយ័ត្នថា តំបន់មួយចំនួនអាចនឹងរងខ្យល់កន្ត្រាក់ ខ្លាំងចាប់ពីថ្ងៃ១៤ដល់១៦ឧសភា។ សេចក្ដីជូនដំណឹងថ្ងៃទី១៣ឧសភាឆ្នាំ២០២១ បានបញ្ជាក់ថា បណ្ដុំសម្ពាធ ទាបរួមជាមួយនឹងខ្យល់និរតីដែលបក់មកពីឈូងសមុទ្រថៃ នឹងមានឥទ្ធិពលខ្លាំងមកលើប្រទេសម្ពុជា។

ខេត្តបន្ទាយមានជ័យមានមនុស្សស្លាប់ដោយសារកូវីដ១៩ម្នាក់ ដែលនាំឲ្យការស្លាប់ដោយសារជម្ងឺរាតត្បាតនេះ បានកើនដល់៤នាក់ហើយ។ អ្នកស្លាប់ទី៤ក្នុងខេត្តបន្ទាយមានជ័យនេះ ជាស្ត្រីចំណាស់អាយុ៧០ឆ្នាំមានទីលំនៅ ភូមិគីឡូម៉ែត្រ៤ សង្កាត់ផ្សារកណ្តាល នៃក្រុងប៉ោយប៉ែត។ ស្ត្រីចំណាស់ឈ្មោះ យឹម យឿន បានបាត់បង់ជីវិត នៅថ្ងៃទី១៣ឧសភានេះក្នុងមន្ទីរពេទ្យបង្អែកប៉ោយប៉ែត។

ខេត្តបាត់ដំបងទើបនឹងមានអ្នកស្លាប់ដោយសារកូវីដ១៩ម្នាក់ជាលើកដំបូង។ យោងតាមរដ្ឋបាលខេត្ត បុរសជាតិ នេប៉ាល់ម្នាក់អាយុ៦៧ឆ្នាំស្នាក់នៅក្នុងខេត្តបាត់ដំបង ទើបបានស្លាប់វេលាព្រឹកថ្ងៃទី១៣ឧសភានេះនៅមន្ទីរពេទ្យ បង្អែកខេត្ត។

ខេត្តព្រៃវែង មានមនុស្សស្លាប់ម្នាក់ទៀតហើយដោយសារជម្ងឺកូវីដ១៩។ យោងតាមរដ្ឋបាលខេត្ត អ្នកដែលស្លាប់ នោះមានឈ្មោះ ស៊ីនួន សារ៉ាក់ ដែលជាប្រជាពលរដ្ឋរស់នៅភូមិព្រៃកំពែង ឃុំព្រៃកណ្ដៀង នៃស្រុកពាមរក៍។ បុរសឆ្លងកូវីដ១៩ រូបនោះ បានស្លាប់នៅថ្ងៃទី១២ ឧសភា ឆ្នាំ២០២១ និងទើបបានធ្វើដំណើរមកពីគីឡូម៉ែត្រ លេខ ៧, សង្កាត់ច្រាំងចម្រេះ ខណ្ឌឬស្សីកែវ រាជធានីភ្នំពេញ នាវេលាថ្មីៗនេះ។ ខេត្តព្រៃវែងមានមនុស្សស្លាប់ដោយ សារជម្ងឺកូវីដ១៩ចំនួនយ៉ាងហោចណាស់២នាក់ហើយ។

ខេត្តកំពង់ចាម បានរកឃើញអ្នកវិជ្ជមានកូវីដ១៩ថ្មីចំនួន១៣នាក់ និងព្យាបាលជាសះស្បើយម្នាក់ក្នុងរយៈពេល ២៤ម៉ោងចុងក្រោយនេះ។ យោងតាមសេចក្ដីជូនដំណឹងរបស់រដ្ឋបាលខេត្ត អ្នកមានវិជ្ជមានកូវីដថ្មីទាំង១៣នាក់ នោះ គឺរួមមាន៣នាក់នៅក្នុងស្រុកកងមាស, ៣នាក់នៅស្រុកស្រីសន្ធរ, ៣នាក់នៅស្រុកបាធាយ និង៤នាក់មក ពីខេត្តត្បូងឃ្មុំ។ អ្នកជំងឺទាំង១៣នាក់ ត្រូវបានបញ្ជូនទៅសម្រាកព្យាបាលនៅមន្ទីរពេទ្យមេគង្គកំពង់ចាម និង បន្តស្រាវជ្រាវរកអ្នកដែលប៉ះពាល់ដោយផ្ទាល់ និងប្រយោលបន្ថែមទៀត។

រដ្ឋបាលខេត្តព្រះសីហនុ បានប្រកាសរកឃើញអ្នកឆ្លងកូវីដថ្មីចំនួន៧០នាក់ និងបានបង្ហាញអត្តសញ្ញាញអ្នកឆ្លង ថ្មីថ្ងៃនេះ។ យោងតាមរដ្ឋបាលខេត្ត ថ្ងៃ១៣ឧសភានេះ ក្នុងចំណោមអ្នកឆ្លងថ្មីទាំង៧០នាក់ នោះ រួមមាន ២នាក់ ជាអ្នកស្រុកព្រៃនប់, ២២នាក់ជាកម្មកររោងចក្រញូវស្ដារនិងអ្នកផ្សេងទៀតជាប្រជាពលរដ្ឋ និងអាជីវករនៅក្នុង ក្រុងព្រះសីហនុ។

ខេត្តបាត់ដំបងបានរកឃើញករណីវិជ្ជមានកូវីដ-១៩ ចំនួន៤នាក់ ដែលជាពលករវិលត្រឡប់មកពីប្រទេសថៃ ក្នុងរយៈពេល២៤ម៉ោងចុងក្រោយនេះ។ យោងតាមរដ្ឋបាលខេត្ត មនុស្សចំនួន៤នាក់មកពីប្រទេសដែលមានវិជ្ជមានជំងឺកូវីដ-១៩នោះ ត្រូវបានបញ្ជូនទៅសម្រាកព្យាបាលនៅមន្ទីរពេទ្យបង្អែកស្រុកសំពៅលូន ខេត្តបាត់ដំបង។

ប្រជាពលរដ្ឋរស់នៅក្នុងតំបន់បិទខ្ទប់ចំនួន៥ពាន់គ្រួសារទៀត បានទទួលនូវស្បៀងអាហារ ដែលជាអំណោយ របស់រាជរដ្ឋាភិបាល។ យោងតាមរដ្ឋបាលរាជធានី អំណោយដែលបាន ដឹកនិងផ្តល់ជូនប្រជាពលរដ្ឋស្ថិតក្នុង តំបន់បិទខ្ទប់ចំនួន៥ពាន់គ្រួសាររយៈពេល២៤ម៉ោងចុងក្រោយនេះ បាននាំអោយចំនួន ប្រជាពលរដ្ឋសរុប ដែលទទួលបានអំណោយស្បៀងអាហាររបស់សម្តេចតេជោ បានកើនដល់៤០ម៉ឺនគ្រួសារហើយ។

ជម្ងឺកូវីដ១៩ បានឆ្លងចូលដល់មន្ត្រីជាន់ខ្ពស់ក្នុងទីស្តីការគណរដ្ឋមន្ត្រីហើយ។ សេចក្ដីប្រកាសព័ត៌មានរបស់ ទីស្តីការគណៈរដ្ឋមន្ត្រី ថ្ងៃទី១៣ឧសភានេះ បានបញ្ជាក់ថា លោកស្រីរដ្ឋលេខាធិការ មាស សាឯម ដានី ត្រូវ គេធ្វើតេស្តរកឃើញការឆ្លងកូវីដ-១៩។

រដ្ឋបាលរាជធានីភ្នំពេញ បានបង្ហាញអត្តសញ្ញាណអ្នកឆ្លងថ្មី ចំនួន១៥៤នាក់ ក្នុងរយៈពេល២៤ម៉ោងចុងក្រោយនេះ ដែលជាតួលេខស្រកចុះដល់ទៅ ១២៥នាក់ បើប្រៀបធៀបទៅនឹងករណីឆ្លងម្សិលមិញ។ កាលពីថ្ងៃទី១២ ឧសភា ការឆ្លងចូលក្នុងរាជធានីមានចំនួន២៧៩នាក់។