ខេត្តពោធិ៍សាត់ បានទទួលឧបករណ៍តេស្តរហ័សស្វែងរកមេរោគកូវីដ១៩ ចំនួន១ពាន់គ្រឿង ដែលជាអំណោយ របស់រដ្ឋមន្ត្រីក្រសួងរ៉ែ និងថាមពលដើម្បីប្រើប្រាស់ក្នុងការប្រយុទ្ធប្រឆាំងនឹងជំងឺកូវីដ-១៩។ ឧបករណ៍តេស្ត រហ័សនោះ ត្រូវបានផ្តល់ដល់រដ្ឋបាលខេត្តក្នុងពិធីមួយដែលចូលរួមដោយអភិបាលខេត្តពោធិ៍សាត់ លោកម៉ៅ ធនិន នៅថ្ងៃទី១២ឧសភានេះ។

ខេត្តពោធិ៍សាត់ បានរកឃើញអ្នកវិជ្ជមានកូវីដ-១៩ថ្មីចំនួន៧នាក់បន្ថែមទៀតក្នុងរយៈពេល២៤ម៉ោងចុងក្រោយនេះ។ យោងតាមរដ្ឋបាលខេត្តពោធិ៍សាត់ថ្ងៃ១២ឧសភានេះ ក្នុងចំណោមអ្នកឆ្លងថ្មីទាំង៧នាក់នោះ មានអ្នកមកពី រាជធានីភ្នំពេញចំនួន៦នាក់ និងមកពីប្រទេសថៃម្នាក់។

រដ្ឋបាលខេត្តព្រះសីហនុ បានប្រកាសការរកឃើញអ្នកឆ្លងកូវីដថ្មីចំនួន២៨នាក់ និងបានបង្ហាញអត្តសញ្ញាណ អ្នកឆ្លងថ្មីទាំងនោះ។ រដ្ឋបាលខេត្តបានបញ្ជាក់នៅថ្ងៃទី១២ឧសភានេះថា ក្នុងចំណោមអ្នកឆ្លងថ្មី២៨នាក់ នោះ រួមមានប២៥នាក់ជាអ្នករស់នៅក្រុងព្រះសីហនុ និង៣ទៀតជាអ្នករស់នៅឃុំស្រុកព្រៃនប់។

ខេត្តតាកែវ បានប្រកាសរកឃើញអ្នកឆ្លងកូវីដថ្មីចំនួន៥នាក់បន្ថែមទៀត។ សេចក្ដីជូនដំណឹងរបស់រដ្ឋបាលខេត្ត ថ្ងៃទី១២ឧសភានេះបានបញ្ជាក់ថាក្នុងចំណោមអ្នកឆ្លងថ្មីទាំង៥ រួមមាន៣នាក់រស់នៅស្រុកព្រៃកប្បាស និង២ នាក់នៅស្រុកអង្គរបុរី។

ខេត្តកំពង់ចាម បានរកឃើញអ្នកវិជ្ជមានកូវីដថ្មីចំនួន៥នាក់ និងបានព្យាបាលជាសះស្បើយម្នាក់រយៈពេល២៤ ម៉ោងចុងក្រោយនេះ។ សេចក្ដីជូនដំណឹងរបស់រដ្ឋបាលខេត្តថ្ងៃទី១២ឧសភានេះ បញ្ជាក់ថាក្នុងចំណោមអ្នកឆ្លងថ្មី ទាំង៥នាក់ គឺរួមមាន៤នាក់ជាពលរដ្ឋក្នុងស្រុកកងមាសនិងម្នាក់នៅក្នុងក្រុងកំពង់ចាម។ អ្នកជំងឺទាំង៥នាក់ ត្រូវ បានបញ្ជូនទៅសម្រាកព្យាបាលនៅមន្ទីរពេទ្យមេគង្គកំពង់ចាម និងបន្តស្រាវជ្រាវរកអ្នកដែលប៉ះពាល់ដោយផ្ទាល់ និងប្រយោលបន្ថែមទៀត។

ខេត្តកំពង់ឆ្នាំង បានរកឃើញអ្នកវិជ្ជមានកូវីដថ្មីចំនួន៥នាក់បន្ថែមទៀត ក្នុងនោះរួមមានអ្នកយកព័ត៌មានអប្សរាណិតម្នាក់ផងដែរ ប្រចាំខេត្តកំពង់ឆ្នាំងគឺលោកយឹម សុខារិន្ទ។ ភរិយានិងកូនប្រុស២នាក់របស់ភ្នាក់ងារព័ត៌មាន អប្សរាណិតប្រចាំខេត្តកំពង់ឆ្នាំង និងម្នាក់ទៀតជាមន្ត្រីនគរបាលចរាចរណ៍ ក៏ត្រូវគេរកឃើញមានវិជ្ជមានកូវីដ១៩ ផងដែរ។ អ្នកពាក់ព័ន្ធជាច្រើននាក់ទៀត ត្រូវគេឃើញបានបន្តទៅយកសំណាកនៅក្នុងមន្ទីរពេទ្យបង្អែកខេត្ត កំពង់ឆ្នាំង។

ក្រុមមេធាវីរបស់សម្តេចតេជោហ៊ុនសែន ត្រូវគេរាយការណ៍ថាបាននិងកំពុងធ្វើការស៊ើបអង្កេតលើករណីបណ្តឹង មួយដែលមានការចោទប្រកាន់ជុំវិញអំពើចោទប្រកាន់ប៉ុនប៉ងរំលោភលើស្ត្រីជាពិធីការីនីម្នាក់នៃប៉ុស្តិ៍ MyTV ដោយបុរសជាឧកញាម្នាក់ឈ្មោះ ហេង សៀ។ បណ្តឹងរបស់ស្ត្រីជាពិធីការីនីឈ្មោះ មានពេជ្រ រីតា អាយុ២០ឆ្នាំ ដែលចោទឧកញាហេងសៀ ប៉ុនប៉ងរំលោភរួបនាងក្នុងរថយន្តនោះ បានធ្វើឲ្យរំជើបរំជួលដល់អ្នកលេងបណ្តាញ សង្គម ជាពិសេសការចង់ដឹងថាហេតុអ្វីបានជាពិធីការីនីឈ្មោះ មានពេជ្រ រីតា ដែលគេប៉ុនប៉ងចាប់រំលោភនោះ បែរជាត្រូវគេចាប់ខ្លួននោះទៅវិញ?

ក្រុមការងារចាក់វ៉ាក់សាំងរបស់ក្រសួងការពារជាតិ បានថ្លែងថារយៈពេល១១ថ្ងៃ ការចាក់វ៉ាក់សាំងដល់ប្រជាពលរដ្ឋក្នុងតំបន់ប្រឈមហានិភ័យ មានចំនួនជិត៥០ម៉ឺននាក់ហើយក្រោយការចាក់លើពលរដ្ឋចំនួន៤ម៉ឺន ៧ពាន់៩៥នាក់ នៅថ្ងៃទី១១ឧសភា។

ប្រទេសអាស៊ានទាំង១០ក្នុងរយៈពេល២៤ម៉ោងចុងក្រោយនេះ ការឆ្លងកូវីដ១៩ថ្មី មានចំនួន១ម៉ឺន៦ពាន់៧៥៣ ករណី និងការស្លាប់ថ្មីមានចំនួន៣២៤នាក់។ កម្ពុជាក្នុងរយៈពេល២៤ម៉ោងចុងក្រោយនេះ មានការឆ្លងថ្មីសរុប ចំនួន៤៧២ករណី ក្នុងនោះ៤៦៩ករណីជាការដែលឆ្លងក្នុងសហគមន៍, និង៣ករណីទៀតជាការនាំចូលពី ក្រៅ ប្រទេស។ ចំណែក ការស្លាប់ថ្មីនៅក្នុងរយ:ពេល២៤ម៉ោងចុងក្រោយនេះមានចំនួន៥នាក់ដែលនាំឲ្យការស្លាប់ សរុបមានចំនួន១៣៦នាក់នោះហើយ។

ការឆ្លងចូលក្នុងសហគមន៍នៅថ្ងៃពុធនេះបានបន្តថយចុះបន្តិចថែមទៀតបើប្រៀបធៀបកាលពីម្សិលមិញករណី។ កាលពីថ្ងៃអង្គារិ៍ការឆ្លងចូលក្នុងសហគមន៍មាន៤៧០ករណី, ចំណែកការឆ្លងនៅថ្ងៃពុធនេះ ការឆ្លងចូលក្នុងសហ គមន៍មាន៤៦៩ករណី។ ទោះជាយ៉ាងណាក៏ដោយ តួលេខការឆ្លងចូលក្នុងរាជធានី ត្រូវគេកត់សម្គាល់មានចំនួន ខ្ពស់ជាងពីម្សិលមិញចំនួន២៨ករណី។