ខេត្តតាកែវ បានរកឃើញករណីវិជ្ជមានកូវីដ១៩ថ្មីចំនួន៣៩នាក់ទៀត ក្នុងរយៈពេល២៤ម៉ោងចុងក្រោយនេះ។ សេចក្ដីជូនដំណឹងរបស់រដ្ឋបាលខេត្ត បានឲ្យដឹងថាអ្នកឆ្លងថ្មីទាំង៣៩នាក់នោះ គឺរួមមាន១១នាក់នៅក្នុងស្រុក សំរោង, ១៧នាក់នៅស្រុកព្រៃកប្បាស, ៥នាក់ នៅស្រុកបាទី, ២នាក់នៅក្នុងស្រុកទ្រាំង, ២នាក់ទៀតនៅស្រុក គិរីវង់ និង២នាក់ទៀតស្ថិតនៅក្នុងស្រុកត្រាំកក់។

ខេត្តសៀមរាប បានរកឃើញអ្នកវិជ្ជមានជំងឺកូវីដ-១៩ ថ្មីចំនួន២នាក់ថែមទៀតក្នុងរយៈពេល២៤ម៉ោងចុងក្រោយនេះ ។ សេចក្ដីជូនដំណឹងរបស់រដ្ឋបាលខេត្ត បានឲ្យដឹងថាអ្នកឆ្លងថ្មីទាំងចំនួន២នាក់នោះ គឺរួមមានពល រដ្ឋម្នាក់រស់ នៅក្នុងស្រុកពួកដែលធ្លាប់ប៉ះពាល់ជាមួយអ្នកស្លាប់ដោយសារកូវីដ១៩ម្នាក់កាលពីថ្ងៃទី៣ឧសភា, ចំណែកអ្នក ឆ្លងម្នាក់ទៀត គឺស្ថិតនៅក្នុងក្រុងសៀមរាបដែលបានធ្វើដំណើរមកពីខេត្តព្រះសីហនុ កាលពីថ្ងៃទី៩ ឧសភា។

ខេត្តកំពង់ចាម បានរកឃើញអ្នកឆ្លងកូវីដ១៩ថ្មីចំនួន២១នាក់បន្ថែមទៀត ក្នុងរយៈពេល២៤ម៉ោងចុងក្រោយ និងបានបង្ហាញអត្តសញ្ញាណអ្នកឆ្លងថ្មីទាំងនោះ ដើម្បីស្វែងរកមុខសញ្ញាដែលជាប់ពាក់ព័ន្ធ។ សេចក្តីប្រកាសព័ត៌មានរបស់រដ្ឋបាលខេត្តនៅថ្ងៃអង្គារ៍នេះ បានបញ្ជាក់ថាអ្នកមានវិជ្ជមានជំងឺកូវីដ១៩ថ្មីទាំងនោះ គឺជាកម្មករក្នុង រោងចក្រ។

ខេត្តបាត់ដំបង បានប្រកាសរកឃើញអ្នកវិជ្ជមានកូវីដ-១៩ ចំនួន៩នាក់បន្ថែមទៀតដែលក្នុងនោះ៨នាក់គឺជា ពលករមកពីប្រទេសថៃ។ រដ្ឋបាលខេត្តដំបងនៅថ្ងៃនេះ បានបញ្ចេញអត្តសញ្ញាណអ្នកឆ្លងថ្មីទាំង៩នាក់នោះ ដើម្បីស្វែងរកមុខសញ្ញាដែលជាប់ពាក់ព័ន្ធ។ យោងតាមរដ្ឋបាលខេត្ត ក្រៅពីមនុស្ស៨នាក់ដែលបានឆ្លងមកពី ប្រទេសថៃ មនុស្សម្នាក់ទៀតដែលជាប់ពាក់ព័ន្ធនឹងការឆ្លងក្នុងព្រឹត្តិការណ៍សហគមន៍ គឺពលរដ្ឋធ្វើដំណើរមកពី រាជធានីភ្នំពេញ។

រដ្ឋបាលខេត្តព្រះសីហនុ បានប្រកាសការរកឃើញការឆ្លងថ្មីកូវីដ១៩ ចំនួន២៧នាក់ និងបានបង្ហាញអត្តសញ្ញាណ អ្នកឆ្លងថ្មីដើម្បីស្វែងរកមុខសញ្ញាសង្ស័យជាប់ពាក់ព័ន្ធ។ យោងតាមរដ្ឋបាលខេត្ត ក្នុងចំណោមអ្នកឆ្លងថ្មីទាំងនោះ គឺរួមមាន២៦នាក់ជាអ្នករស់នៅសង្កាត់លេខ១, លេខ២, លេខ៣ និងលេខ៤ ក្នុងក្រុងព្រះសីហនុ និងម្នាក់ទៀតជា អ្នករស់នៅឃុំបិតត្រាំង នៃស្រុកព្រៃនប់។

កិច្ចសម្ភាសន៍ឆ្លើយឆ្លងរ​បស់វិទ្យុអាស៊ីសេរីជាមួយនឹងមេខ្លោងឧទ្ទាមទណ្ឌិតសមរង្ស៊ី ដែលញុះញង់ពលរដ្ឋខ្មែរ ងើបប្រឆាំងនឹងប្រមុខដឹកនាំរាជរដ្ឋាភិបាលបច្ចុប្បន្ន បានធ្វើឲ្យពលរដ្ឋខ្មែរជាច្រើនទាំងក្នុងនិងក្រៅស្រុក បញ្ចេញ ប្រតិកម្មប្រឆាំង។ កាលពីថ្ងៃ១០ឧសភា ក្នុងកិច្ចសម្ភាសន៍មួយរវាងវិទ្យុអាស៊ីសេរី តាមប្រព័ន្ធ Online, ទណ្ឌិត សមរង្ស៊ីដែលមិនបានជួយអ្វីសោះដល់ពលរដ្ឋក្នុងប្រទេសដែលកំពុងរងគម្រាមនឹងជម្ងឺកូវីដ១៩ បានប្រើភាសា ញុះញង់ដល់ពលរដ្ឋខ្មែរ ត្រូវងើបបះបោរប្រឆាំងនឹងរាជរដ្ឋាភិបាល។

សប្បុរសជនជាថ្នាក់ឧកញ៉ា ចំនួន១២៦នាក់ បានរួមគ្នាឧបត្ថម្ភជាថវិកាជាង១លានដុល្លារអាមេរិក និងជំនួយជា សម្ភារៈមួយចំនួនដល់កងទ័ពជើងគោក និងសមាគមគ្រូពេទ្យស្ម័គ្រចិត្តយុវជនសម្តេចតេជោ TYDA។ កម្លាំងកងទ័ពជើងគោកក្នុងពេលប្រយុទ្ធប្រឆាំងនឹងជម្ងឺកូវីដ១៩ ត្រូវគេឃើញបានពង្រាយកម្លាំងពេទ្យទាហាននិងកម្លាំង ជួយដឹកជញ្ជូនដើម្បីការចែកចាយស្បៀងដល់ប្រជាពលរដ្ឋក្នុងតំបន់ក្រហម, ចំណែកសមាគមក្រុមគ្រូពេទ្យយុវ ជនស្ម័គ្រចិត្តសម្តេចតេជោ TYDA គឺជាក្រុមយុទ្ធជនអាវស ដែលប្រឡូកដោយផ្ទាល់ក្នុងសមរភូមិនៃសត្រូវឥត ស្រមោលកូវីដ១៩។

ប្រជាពលរដ្ឋស្ថិតក្នុងតំបន់បិទខ្ទប់ជាង១ម៉ឺន៥ពាន់គ្រួសារទៀត បានទទួលស្បៀងអាហារ ដែលជាអំណោយ របស់សម្តេចតេជោនាយករដ្ឋមន្ត្រី នៅថ្ងៃទី១១ឧសភានេះ ដែលនាំអោយការដឹកជញ្ជូននិងចែកស្បៀងដល់ ប្រជាពលរដ្ឋស្ថិតក្នុងតំបន់បិទខ្ទប់នៃខណ្ឌទំាង១៤ទូទំាងរាជធានី បានចំនួនសរុបជាង៣៧ម៉ឺនគ្រួសារហើយ។

ភូមិចំនួនយ៉ាងហោច១៦នៅថ្ងៃនេះ ត្រូវបានគេរកឃើញមានការឆ្លងកូវីដ១៩ ក្នុងសហគមន៍រាជធានីរយៈពេល២៤ ម៉ោងចុងក្រោយនេះ។ យោងតាមក្រសួងសុខាភិបាល ក្នុងរាជធានីការឆ្លងមានចំនួន២៥១ករណី។

សម្តេចពិជ័យសេនាទៀបាញ់ បានព្រមានដាក់ទោសចំពោះបុគ្គលណាដែលកើតជម្ងឺកូវីដ១៩ហើយ មិនព្រមឲ្យពេទ្យព្យាបាលប៉ុន្តែបែរជាបន្លំទៅចាក់វ៉ាក់សាំងបង្កាកូវីដ១៩។ យោងតាមប្រសាសន៍សម្តេចពិជ័យសេនាទៀ បាញ់នៅថ្ងៃទី១១ឧសភានេះ ករណីនេះ បានកើតមានក្នុងរាជធានីភ្នំពេញ។