រដ្ឋបាលរាជធានីភ្នំពេញនៅថ្ងៃទី១២ឧសភានេះ បានប្រកាសការរកឃើញអ្នកឆ្លងថ្មីចំនួន២៧៩នាក់ និងបានបង្ហាញអត្តសញ្ញាណអ្នកឆ្លងថ្មីទាំងនោះ។ បើប្រៀបធៀបករណីឆ្លងពីម្សិលមិញ ការឆ្លងក្នុងរយៈពេល២៤ម៉ោង ចុងក្រោយនេះក្នុងរាជធានីភ្នំពេញ បានកើនចំនួន ២៨ករណីឡើងវិញ គ្រាដែលការឆ្លងកាលពីម្សិលមិញ មានចំ នួនតែ ២៥១នាក់ នោះទេ។

រដ្ឋបាលរាជធានី បានរៀបចំសាឡើងវិញនូវតំបន់ក្រហម, តំបន់លឿងទុំ និងតំបន់លឿង ដើម្បីការបន្តអនុវត្ត វិធានការបិទខ្ទប់រយៈពេល១សប្តាហ៍ទៅមុខក្នុងតំបន់ដែលប្រឈមហានិភ័យខ្ពស់នៃការឆ្លងកូវីដ១៩។ សូមបញ្ជាក់ការអនុវត្តបិទខ្ទប់តាមតំបន់ប្រឈមហានិភ័យខ្ពស់ នឹងត្រូវផុតសុពលភាពចាប់ពីកណ្តាលអាធ្រាត្រ ឈានចូលថ្ងៃទី១៣ឧសភា ប៉ុន្តែដោយសារតែតំបន់មួយចំនួននៅតែបន្តប្រឈមហានិភ័យឆ្លងខ្ពស់ រដ្ឋបាលរាជធានី បានសម្រេចការរៀបចំបន្តបិទតាមតំបន់ខ្លះមួយចំនួនរយៈពេល៧ថ្ងៃថែមទៀត ដើម្បីការផ្តាច់ឫសគល់ការ ឆ្លងកូវីដ១៩។ តើការបិទខ្ទប់នោះ មាននៅទីណាខ្លះក្នុងការអនុវត្តវិធានការបិទខ្ទប់មួយសប្តាហ៍ទៅមុខទៀតនេះ ក្នុងរាជធានីភ្នំពេញនោះ?

មនុស្ស ០៤នាក់បានស្លាប់ និង១១នាក់រងរបួសធ្ងន់ស្រាល ក្នុងគ្រោះថ្នាក់ចរាចរណ៍ទូទាំងប្រទេសថ្ងៃទី ១១ ឧសភានេះ។ សេចក្តីរាយការណ៍ទិន្នន័យគ្រោះថ្នាក់ចរាចរណ៍ផ្លូវគោកទូទាំងប្រទេស បានបញ្ជាក់ថា គ្រោះថ្នាក់ ដែលបង្កឲ្យមានមនុស្សស្លាប់ និងរបួសសរុប១៥នាក់នៅថ្ងៃនេះ គឺកើតឡើងដោយសារហេតុការណ៍ប៉ះទង្គិច ចំនួន ៧លើក។

ខ្យល់កន្ត្រាក់ បានបំផ្លាញផ្ទះប្រជាពលរដ្ឋចំនួន ១៨ខ្នង នៅខេត្តបន្ទាយមានជ័យ។ ហេតុការណ៍គ្រោះធម្មជាតិ ខ្យល់កន្ត្រាក់នេះ បានកើតឡើងកាលពីវេលាម៉ោង៤ និង១០នាទីរសៀល នៅភូមិផាត់សណ្តោង និងភូមិចារថ្មី ឃុំគោកបល្ល័ង្គ ស្រុកមង្គលបូរី នៃខេត្តបន្ទាយមានជ័យ ។ មិនមានសេចក្តីរាយការណ៍ពីមនុស្សណាម្នាក់បានរង របួសនោះឡើយ។ ក្រសួងធនធានទឹកនិងឧតុនិយម បានដាស់តឿនប្រជាពលរដ្ឋទាំងអស់ត្រូវប្រុងប្រយ័ត្ន ចំពោះបាតុភូតផ្គររន្ទះ និងខ្យល់កន្រ្តាក់បន្តថែមទៀតក្នុងសប្តាហ៍នេះ។

ក្មេងប្រុស៣នាក់ ដែលចុះលេងទឹក បានលង់ស្លាប់នៅក្នុងហេតុការណ៍២កើតឡើងក្នុងខេត្តបាត់ដំបង។ សេចក្តីរាយការណ៍របស់អាជ្ញាធរថ្ងៃទី១០ឧសភា បានបញ្ជាក់ថាហេតុការណ៍លង់ទឹកករណីទីមួយ បានកើតឡើងនៅ ភូមិវត្តចាស់ ឃុំតាលាស់ ស្រុកមោងឫស្សីដោយមានក្មេងប្រុសអាយុ៥ឆ្នាំម្នាក់ឈ្មោះណាង រតនា បានស្លាប់ពេល ចុះលេងទឹកស្រះ។ ករណីលង់ទឹកទី២ កើតឡើងនៅភូមិអូរមុនី២ ឃុំអន្លង់វិល នៃស្រុកសង្កែ ដោយមាន ក្មេង ប្រុស២នាក់ ឈ្មោះ ឡាយ យ៉ុងបី អាយុ១៤ឆ្នាំ និងឈ្មោះ វុធ ណាវីន អាយុ ១១ឆ្នាំ បានលង់ទឹកស្លាប់ពេលចុះ លេងស្រះជំរៅប្រហែល៩ម៉ែត្រ។ ករណីមនុស្សលង់ទឹកស្លាប់ ត្រូវគេរាយការណ៍ថាបានកើតមានជារៀងរាល់ឆ្នាំ ដោយសារតែអំពើធ្វេសប្រហែស។

បុរសម្នាក់ ត្រូវបានរន្ទះបាញ់ស្លាប់ នៅក្នុងពេលស្ថិតក្នុង Kiosk ចាំដីឡូតិ៍មួយកន្លែងនៅក្នុងខេត្តកំពង់ស្ពឺ។ កម្ពុជា ដែលកំពុងឈានចូលក្នុងរដូវវស្សានាពេលនេះ មនុស្សមួយចំនួនត្រូវគេរាយការណ៍ជាបន្តបន្ទាប់ជុំវិញករណី ស្លាប់និងរបួសដោយសារតែរន្ទះបាញ់។

ភ្លៀងនឹងបន្តធ្លាក់ក្នុងកម្រិតពីមធ្យមទៅច្រើនផងដែរក្នុងមួយសប្តាហ៍ទៅមុខទៀតនេះក្នុងពេលដែលកម្ពុជា រងឥទ្ធិពលខ្យល់មូសុងនីរតី។ យោងតាមក្រសួងធនធានទឹកនិងឧតុនិយម រវាងពីថ្ងៃទី ១២ រហូតដល់ថ្ងៃទី១៨ ខែឧសភា ឥទ្ធិពលនោះ នឹងធ្វើឲ្យបណ្តាខេត្តនៅតំបន់វាលទំនាបកណ្ដាល, បណ្តាខេត្តភាគខាងត្បូង, បណ្ដា ខេត្តនៅភាគខាងកើតជាប់ប្រទេសវៀតណាម, បណ្តាខេត្តជាប់ជួរភ្នំដងរែក និងខ្ពង់រាបឦសាន នឹងអាចមាន ភ្លៀងបន្តធ្លាក់រាយប៉ាយនៅក្នុងកម្រិតពីមធ្យមទៅបង្គួរ, និងកន្លែងខ្លះអាចមានភ្លៀងធ្លាក់ក្នុងបរិមាណច្រើន ។ នៅតាមតំបន់មាត់សមុទ្រ នោះវិញ តំបន់ជាប់មាត់សមុទ្រនោះ នឹងអាចមានភ្លៀងធ្លាក់ពីមធ្យមទៅបង្គួរផងដែរ។ ការព្យាករណ៍សីតុណ្ហភាពកំដៅអតិបរមានក្នុងអម្លុងមួយសប្តាហ៍ទៅមុខទៀតនេះ​ នឹងមានរវាងពីរវាងពី៣១ ដល់ ៣៣និង៣៥អង្សាសេ។

ប្រជាពលរដ្ឋណាដែលធ្លាប់ទៅហាង The Pizza Company សាខា ស្ទឹងមានជ័យ ត្រូវប្រញាប់ធ្វើចត្តាឡីស័ក និង តាមដានសុខភាព។ ហាងThe Pizza Company សាខា ស្ទឹងមានជ័យ គឺជាហាងស្ថិតនៅលើផ្លូវ២១៧ សង្កាត់ ស្ទឹងមានជ័យ ខណ្ឌមានជ័យ។

ប្រជាពលរដ្ឋដែលកំពុងខ្វះខាត ចំនួន១ពាន់២៥០គ្រួសារ ក្នុងខណ្ឌចំនួន៥ នៅរាជធានីភ្នំពេញ បានទទួលអំណោយពីលោក ហ៊ុន ម៉ាណែត និងភរិយា។ អំណោយរបស់លោក ហ៊ុន ម៉ាណែត លោកស្រី ពេជ្រ ច័ន្ទមុនី ដោយមានការចូលរួមពីអង្គការសមាគមក្រៅរដ្ឋាភិបាលមួយចំនួន ត្រូវបានចែកជូនដល់ប្រជាពលរដ្ឋដែលកំពុង ខ្វះខាតចំនួន១ពាន់២៥០គ្រួសារ ក្នុងតំបន់បិទខ្ទប់ក្នុងរាជធានីភ្នំពេញ។

មេខ្យល់នាំមនុស្សឆ្លងដែនខុសច្បាប់ចំនួន៣នាក់ និងពលករចំនួន១៤នាក់ត្រូវសមត្ថកិច្ចបានឃាត់ខ្លួនក្នុងខេត្តបាត់ដំបង។ ប្រភពពីស្នងការដ្ឋាននគរបាលខេត្តបាត់ដំបងបានឲ្យដឹងថា ការឃាត់ខ្លួនបានធ្វើឡើង ក្នុងចំណុច ភូមិសាស្រ្តស្រុកកំរៀង ក្នុងពេលដែលមេខ្យល់ទាំង៣នាក់ បំរុងនាំពលករខ្មែរទាំងនោះចាកចេញឆ្លងដែនដោយខុសច្បាប់។ មេខ្យល់ទាំង៣នាក់នោះ ត្រូវបានបញ្ជួនដើម្បីការដាក់ទោសតាមច្បាប់,ចំណែកពលករទាំង១៤នាក់ ត្រូវបានបញ្ជូនទៅធ្វើចត្តាឡីស័ក។