គ្រោះធម្មជាតិខ្យល់កន្ត្រាក់កាលពីយប់ថ្ងៃពុធ បានបង្កការខូចខាតផ្ទះប្រជាពលរដ្ឋចំនួន១៤ខ្នង នៅក្នុងខេត្តត្បូងឃ្មុំ។ យោងតាមក្រសួងធនធានទឹកនិងឧតុនិយម ខ្យល់កន្ត្រាក់បោកបក់ខ្លាំងវេលាយប់ថ្ងៃទី៥ឧសភាឆ្នាំ២០២១នោះ បានធ្វើឲ្យរំលំរោងអាជីវកម្មឡឥដ្ឋមួយខ្នងនៅស្រុកអូររាំងឪ, ខូចខាតផ្ទះ៨ខ្នងនៅក្នុងស្រុកតំបែរ, ប៉ះពាល់ របើកដំបូងផ្ទះមួយខ្នងក្នុងស្រុកពញាក្រែក, ខូចខាតទាំងស្រុងផ្ទះមួយខ្នងនៅក្នុងស្រុកពញាក្រែក, និងខូចខាត ផ្ទះចំនួន៤ខ្នងទៀតក្នុងស្រុកមេមត់់។ សេចក្តីរាយការណ៍បង្ហាញថាមិនមានករណីគ្រោះថ្នាក់ដល់អាយុជីវិតទេ។

តូបលក់ចំនួន៥០តូប ក្នុងផ្សារត្រាំកក់ខេត្តតាកែវ បានរងនឹងការឆេះក្នុងគ្រោះអគ្គិភ័យមួយវេលាល្ងាចថ្ងៃ ពុធ ម្សិលមិញ។ ហេតុការណ៍ឆេះតូបក្នុងផ្សារត្រាំកក់ខេត្តតាកែវ បានកើតឡើងក្នុងវេលាម៉ោងប្រមាណ​៦និង ២០ នាទី។ រថយន្តពន្លត់អគ្គិភ័យចំនួន១៤គ្រឿង ដែលប្រមូលពីបណ្តាស្រុកនិងពីស្នងការដ្ឋាននគរបាលខេត្ត បាន ជួយធ្វើអន្តរាគមន៍ពន្លត់ ក្រោមការដឹកនាំបញ្ជាផ្ទាល់ដោយស្នងការនគរបាលខេត្តលោកឧត្តមសេនីយ៍ទោ សុខ សំណាង។

រដ្ឋបាលខេត្តកំពង់ស្ពឺ បានសម្រេចផ្អាកបណ្ដោះអាសន្នទីតាំងអាជីវកម្មចំនួន ៣កន្លែង ចំនួន១៤ថ្ងៃ បន្ទាប់ពីមាន អ្នកវិជ្ជមានកូវីដ១៩ ធ្លាប់ចូលប្រើប្រាស់សេវាកម្មនៅទីតាំងទាំង៣ នោះ ។ ការសម្រេចផ្អាកអាជីវកម្មនោះ បាន ធ្វើឡើងនៅក្នុងសេចក្តីប្រកាសមួយរបស់រដ្ឋបាលខេត្តកំពង់ស្ពឺ នៅថ្ងៃ០៦ ឧសភា ២០២១ នេះ ។

រដ្ឋបាលខេត្តបាត់ដំបង បានសម្រេចបិទជាបណ្តោះអាសន្ន នូវទីតាំងឱសថស្ថាន មួយកន្លែង ក្នុងមូលដ្ឋានស្រុក ភ្នំព្រឹក ក្រោយអ្នកមានប្រវត្តិចូលទីតាំងនោះរកឃើញឆ្លងជំងឺកូវីដ១៩ ។ យោងតាមរដ្ឋបាលខេត្ត ទីតាំងឱសថ ស្ថាន ដែលសម្រេចបិទជាបណ្តោះអាសន្ននោះ មានយីហោឈ្មោះ ពេជ្រចិន្តា ស្ថិតនៅភូមិភ្នំតូច ឃុំពេជ្រចិន្តា ស្រុកភ្នំព្រឹក ខេត្តបាត់ដំបង ។

ប្រជាពលរដ្ឋក្មេងចាស់ ចំនួន ៣៥នាក់ ដែលត្រូវបាននាំយកមកធ្វើចត្តាឡីស័ក នៅសាលាគំរូក្រុងកំពង់ឆ្នាំង ត្រូវ បានអាជ្ញាធរខេត្ត និងក្រុមគ្រូពេទ្យ បានអនុញ្ញាតឲ្យពួកគាត់ត្រឡប់ទៅផ្ទះវិញហើយ នៅព្រឹកថ្ងៃទី៦ ខែឧសភានេះ បន្ទាប់ពីពួកគាត់បានស្នាក់នៅធ្វើចត្តាឡីស័ក អស់រយៈពេលជាងកន្លះខែកន្លងមកនេះ និងត្រូវគ្រូពេទ្យធ្វើ តេស្តលើកទី២ មិនឃើញមានមេរោគកូវីដ-១៩ទេ។

រដ្ឋបាលខេត្តកំពង់ឆ្នាំង បានបញ្ជាក់ការសម្រេចយកទីតាំងព្រៃរបស់សហគមន៍មួយកន្លែង ដែលស្ថិតនៅឆ្ងាយ ពីភូមិឋានរបស់ប្រជាពលរដ្ឋ ដើម្បីសាងសង់ជាឈាបនដ្ឌាន សម្រាប់ទុកបូជាសពអ្នកស្លាប់ដោយសារជំងឺកូវីដ-១៩។ ការជូនដំណឹងបញ្ជាក់របស់រដ្ឋបាលខេត្តនៅថ្ងៃទី៦ឧសភានេះ គឺនៅបន្ទាប់ពីករណីស្ត្រីម្នាក់ដែលបានស្លាប់ ដោយសារជម្ងឺកូវីដ១៩ នៅក្នុងស្រុករលាប្អៀ កន្លងមកនេះ មិនត្រូវបានប្រជាពលរដ្ឋ អនុញ្ញាតអោយធ្វើការបូជា សពនៅក្នុងវត្តនោះឡើយ។

មន្ដ្រីនគរបាលម្នាក់ក្នុងក្រុងដូនកែវខេត្តតាកែវ បានឆ្លងជំងឺកូវីដ១៩។ យោងតាមរដ្ឋបាលក្រុងដូនកែវ មន្ដ្រីនគរបាលឆ្លងកូវីដ១៩នោះ ឈ្មោះ យិន សេរី រស់នៅភូមិតាំង, សង្កាត់រកាក្រៅ នៃក្រុងដូនកែវ។

ប្រជាពលរដ្ឋដែលធ្លាប់ទៅមន្ទីរសំរាកព្យាបាល ពិន ចំប៉ា ក្នុងខណ្ឌសែនសុខ ត្រូវប្រញាប់ធ្វើចត្តាឡីស័ក និង តាមដានសុខភាព។ មន្ទីរសំរាកព្យាបាល ពិន ចំប៉ា មានទីតាំងស្ថិតនៅផ្ទះលេខ ២៧២ ក្នុងសង្កាត់ទឹកថ្លា នៃ ខណ្ឌសែនសុខ។

អំណោយជាគ្រឿងឧបភោគបរិភោគ និងថវិការបស់ក្រុមការងាររៀបចំអង្គការចាត់តាំងយុវជនគណបក្សប្រជាជនកម្ពុជាប្រចាំប្រទេសអូស្ត្រាលី និងនូវ៉ែលហ្សេឡង់ និងក្រុមការងារផ្នែកក្រៅប្រទេស នៃយុវជនគណបក្សប្រជាជនកម្ពុជាថ្នាក់កណ្តាល បានប្រគល់ជូនអភិបាលរាជធានីភ្នំពេញ សម្រាប់ចែកជូន ប្រជាពលរដ្ឋដែលបន្ត ស្ថិត ក្នុងតំបន់បិទខ្ទប់។

អភិបាលខេត្តកណ្ដាល បានបញ្ជាឲ្យបន្តបិទខ្ទប់តំបន់អគារវប្បធម៌រយ:ពេល ៧ថ្ងៃទៀត ក្រោយមានអ្នកឆ្លងកូវីដ ជាបន្តបន្ទាប់។ តំបន់វប្បធម៌គឺជាតំបន់មួយដែលស្ថិតនាកណ្តាលក្រុងតាខ្មៅនៃខេត្តកណ្តាល។ មន្ត្រីសុខាភិបាលខេត្តកណ្ដាល កាលពីម្សិលមិញ បានប្រើម៉ាស៊ីន Rapid Test យកសំណាកពលរដ្ឋរស់នៅ នៅតំបន់អគារវប្បធម៌ កាលពីម្សិលមិញ និងជាលទ្ធផល បានរកឃើញពលរដ្ឋជាបន្តបន្ទាប់ដែលមានវិជ្ជមានកូវីដ១៩ ។